Texte de la Bible: Kera © Alliance Biblique du Tchad, 2004 Enregistrement du Nouveau Testament Kera ℗ 2013 Hosanna

Kera - 2004 TCH (NT) Drama

 Texte de la Bible: Kera © Alliance Biblique du Tchad, 2004.

Də ko kəman hõy məna, dər *hi bə faake kə Pepeŋa, Yeesu hadlaŋ giidə aka də kaasawa. Tay əsəŋ bə ɗeme *kaa gə guuduŋa, kəya yə əsəŋ bə hiti kaasawa faɗi, daana bə hirɗiya. Bə minti kaanə *Farisiyeŋ əsnəy bə ji bədoona kəyaŋ, yə əsəŋ bə wəətu minti: «Golə la kəm! Kaa gə guudum bə ji karman bə minti *ku gili náŋ a waataŋ cuuru minti wə a ji dər hi bə faake kə Pepeŋa baŋ.» Wə hərnəy kel minti: «Aŋ aŋkaŋ kel gə minti *Davidi jiiniy hõy də kaa gə guuduŋ bə minti tay bə ɗəməyaŋ bə mo? Wə kəlaŋ giidə *muryuki kə Pepeŋa, wə hamaŋ mappa də minti yə a vaana a Pepeŋ adaŋ. Anaaŋa kəkəy a paapa ciiri kir minti yə hamə la ba, gud maa mo ku gili náŋ bə waatə-waate minti həmu la ha'aŋ *kaa kə keere Pepeŋ təwa'i. Aŋ aŋkaŋ kel gə minti gə jeerə-jeere giidə ku gili kə *Moyisiŋa minti dər hi bə faake kə Pepeŋa, kaa kə keereŋ ji joŋre giidə *Kuli kə Pepeŋaŋ bə mo? Yə paapa bə ɗe gud ku gili bə cəərə hi bə faakeŋa ba, də teŋ keɗe kəətiŋ doy cəərə kel teŋa ba. Katən ha'aŋ, ten waataŋ haa minti hulum kəman yaŋ kəna, wə dəŋaŋ Kuli kə Pepeŋ ɗaw. Kefter kə Pepeŋ waataŋ minti: ‹Ten golde katən haa minti tam jəə giidim pəsaŋ la sar kaŋa dəŋaŋ ji bə keere də bege bə kəmpuruŋ.› Aŋ a əskə gud kel teŋ laŋ, aŋ sə a de kaa té gə minti jəŋ baymele baŋ də kəəti ba. Gud maa mo, ten *Kormə Hulúm ten haa bərdə hi bə faakeŋ.»


Kəya Yeesu yaakaŋ ko toŋ, wə kooroŋ a kele giidə *kuli bə toose kə kaanə Ziwifiŋa. Hulum kəman ada, kəəsu wəra gə mee-me. Kaanə *Farisiyeŋ a gə balə-bele minti té ge Yeesu də kel səm moŋ, yə əsəŋ bə law ku minti: «Ana ha'aŋ, ku gili náŋ yaŋ nuutu bə ayə-aye kəkəy a áŋ bə seere hulum dər *hi bə faake kə Pepeŋa mo?» Yeesu minti: «Jəəne minti hulum guudəŋa, taaməka də minti a kəəsu mənaŋ awaŋ ne giidə tələŋkə dər hi bə faake kə Pepeŋaŋ, wə haara wəra bə mo? Hulum kisirkiŋ dəŋaŋ taaməkaŋ kampa ablaw bə mo? Bədoona ana ta, kəkəy wəra bə ayə-aye minti tam jəə hulum la pisi dər hi bə faakeŋa.» Kəya wə waataŋ hulum minti: «Ɗekrə kaasam la warna.» Wə ɗeŋ a ɗekre kəəsu warna anəkay, yə haraŋ wəra dədərgə faɗi damdi kaaya teŋ ana. Kəya kaanə *Farisiyeŋ vaŋ warda giidə kuli bə tooseŋ da, yə raawaŋ bə tepe kuya cəərə hel də minti té awə Yeesu la wəra dəərəŋ.

Bə minti Yeesu əskəŋ kel gə minti kaŋ bə wəətiya cuuru kəyaŋ, wə yaakaŋ ko toŋ wəra faɗi, wə kooroŋ. Kaa kə ablaw kooroŋ guudu faɗi gəm, wə seerteŋ kaa kə ɗemeŋ wəra keɗe'i. Səma, Yeesu ləytənəy minti yə a ge gud tó wəra ba kir minti kel gə minti Ezay, *hulum bə jogte ku mini kə Pepeŋ, a wəətənəy doo kuy la wəra. Pepeŋ a waataŋ minti:
«Haa kəya hulum bə joŋre nin bə minti ten ŋəmnuŋ.
Wə haa hulum bə minti giidən bəlu ablaw,
kusrən wəra də waale guudu anə fənay-fənay.
Ten əyu Tiirən yaŋ minti a əsə la cuuru, wə waate kel yaŋ wəra a gidiirə kaŋ keɗe'i də hel də minti yə kole wəra ɗeker dərəna.
Wə bə caate awəy də kaa ba, wə naakte ku bə gəm.
Wə bə sewlete wəra a kəkəya bə gəm.
Hulum bə minti wəra bə gayə-geye damdi derga də goɓə-goɓe anaŋ, wə ɓəlku wəra ba.
Hulum bə minti səɓaki paapa giidu pəda damdi lampa də minti do'e də keseŋ anaŋ,
wə ɓəlku səɓaki nuutu wesekaŋ wəra ba.
Wə bə ji pisiŋa bədoona hãã bə minti wə kolə kel ɗekeriŋ bə pi buluma cəərə baymeleŋa.
Kəya gidiirə kaŋ keɗe kole yaŋ bə mele ɗiki di wəra cuuru.»


Kəya yə bəŋ sar Yeesu də hulum kəman bə bəwə-bəwi daana bə minti ku wəra ba'-ba'i kas kəwal gə minti cuuruŋ. Kəya Yeesu siirunu wəra, wə əsəŋ bə waate kela daana wəra bə ase faɗi gəm. Kaŋ ŋələŋ ablaw, yə əsəŋ bə waate minti: «Ana haa *Kormə Davidi mo, naanaanə mo?»
Bə minti kaanə *Farisiyeŋ əskəŋ kel teŋ, yə əsəŋ bə waate minti: «Hulum toŋ sarme kəwal wəra, haa say də abay də minti *Belzebul, kumna kə kəwal, əynu duŋ.»
Yeesu əsnəy ɗiki di tə bə moŋ, wə wəətənəy minti: «Kaa gə minti giidə seŋka kə kumna bə məna, jəəne minti yə duuri aduubə də kumsi té tokiŋ, kumna toŋ ji ba. Vil kəman mo, kaa gə minti ger kusri akera mo, haraŋ ne bə duuri də kumsi tokiŋ, yə ji ada laki pəda gəm. Jəəne minti Sataŋ bə sarme kəwal gə minti naataŋaŋ, a bə duuri də kusrə tá toki, kumna naataŋ bə ɗe ajewa haa naanaanə pə mo? A jəə la minti ten sarme kəwal wəra haa də səɓaki kə Belzebul, kaa gə minti bə hate guudəŋaŋ sərməy wəra haa də səɓaki kə mindi gəm tə mo? Yə kole yaŋ dəmaŋ də kusri kaa kə jəmaŋ kəəti dəŋ. Səma, jəəne minti ten sarme kəwal wəra haa də Tiirə Pepeŋ, ten gaŋ dərəŋ haa minti Pepeŋ wəra bə hame kumna nuutuŋa cəərəŋa ɗaw.
Hulum neke bə kele ger hulum bə səɓakiŋ na bə ɗe a humti kar nuutuŋ warda bay bəŋu wəraŋ naanaanə mo? Wə bəŋnu ne wəra taŋ, wə neke bə humi kar nuutuŋ kəm bədoona.
Hulum bə minti jəəne paapa dəərən baŋ, wə acukur dəərən. Hulum bə minti kaynan bə tepe kaŋa baŋ, wə miiriy wəra haa meere ɗaw. Gud teŋa ta ten waataŋ: baymele bə minti kaŋ juunu daana kel gə minti yə wəətənəy bə sarte sam Pepeŋ keɗeŋ, vəəgə bə giidu yaŋ cəərə kel teŋa. Səma sarte bə sam Tiiru Cetcetaŋ, vəəgə bə giidu paapa cəərə toŋa ba. Hulum bə minti waate kel kə bayməlaŋ cəərə ten *Kormə Hulúmaŋ, vəəgə bə giidu yaŋ cəərə kel teŋa. Səma hulum bə minti waate kel kə bayməlaŋ cəərə Tiiru Cetcetaŋaŋ, vəəgə bə giidu paapa cəərə kel teŋa ba, koo dər ko bə hebkənaŋa, koo dər ko bə adoroŋ na keɗe.»


«Kəbaŋ jəəne pəsaŋ, we diŋ ji haa pəsaŋ gəm. Kəbaŋ jəəne bayməlaŋ, we diŋ ji haa bayməlaŋ gəm. Aŋ ase kəbaŋ haa gud we diŋa. Karmə akay! Aŋ neke bə waate kel pəsaŋ haa naanaanə mo bə minti aŋ də kusrəŋ, aŋ wəra kaa kə bayməlaŋ? Gud maa mo ku hulum waate ha'aŋ kel gə minti ɗusnu ku tərmuyu wəraŋ. Hulum pisiŋ, pisiŋ kele warda haa gal giidu pəsaŋ da gəm. Hulum bə baymeleŋ, baymeleŋ kele warda haa gal giidu gə bayməlaŋ da gəm. Ten waataŋ, dər hi bə kəətiŋa ha'aŋ, kaŋ ɗe a tope bəlam də kel kə bay guudi gə minti yə a wəətətənəy yaŋ wəra tiinə Pepeŋa té də kusri. Gud maa mo yə jəmam kəəti dəm haa də kel gə minti a kaltaŋ wəra kumaŋ. Kel nəmtiŋ jəəne ɗeker, kəətiŋ dom ba. Yə jəəne paapa ɗeker baŋ, kəətiŋ dom faɗi.»


Kəya sərdə *kaa kə hate ku gili kə Pepeŋ daana kaanə *Farisiyeŋ əsəŋ bə waate Yeesu minti: «Hulum bə hateŋ, are bele minti tam jəə karman bə ge dər la a are.» Wə hərnəy kel minti: «Kaa kə dogoynaŋ, yə wəra bayməlaŋ, yə paapa bə isi gud Pepeŋa ɗeketi bə gəm. Yə bele minti ten jəə karman bə ge dər la a té. Səma koo karman bə ge dər anə məna ten jəy diy ba. Yə ase tó bə minti jəŋ sar Zonasi, *hulum bə jogte ku mini kə Pepeŋ təwa, ten jəy baalaŋ bə deŋe toŋ ba. Damdi Zonasi hətəŋ giidə aska mootoŋa soope ana, bədoona gəm *Kormə Hulúm bə hiti yaŋ soope giidə teɗkera, wə bə hare yaŋ wəra dədərgə gəm. Dər hi bə kəətiŋa, kaanə Niniveŋ piti yaŋ apəya bə de kaa kə dogoynaŋa də kəəti. Gud maa mo kaanə Ninive koloŋ kirki a baymele neeteŋ a ko bə minti Zonasi wəətənəy kel ha'aŋ. Səma kel gə daŋə-deŋe kə Zonasi yaŋ kəna. Dər hi bə kəətiŋa ha'aŋ, kumna həlgə agal kə tamkaŋ daŋ, də minti a bəŋ ger *Salomoŋ bə bi a iski kel nuutuŋ, fe yaŋ apəy da bə de kaa kə dogoynaŋa də kəəti. Gud maa mo a bəŋ warda tooto agev də seŋkaŋ da. Səma kel gə daŋə-deŋe kə Salomoŋ yaŋ kəna.»


«Bə minti kəwal pəŋ ne wəra cəərə hulumaŋ, yə koore a ko keeŋeŋ na a golde ko bə minti té əsə la ada bə faakeŋ. Səma yə fele ko bə isi ba. Kəya yə minti: ‹Ten hare giidə kuli nin bə minti ten a təəkunu wardaŋ.› Yə hare kəyaŋ, yə ɗe a fele kuliŋ giidu wəra boobo, wəra bə harwə-harwe anə ke'-ke'i, daana bə ɗampə-ɗampe wəra pisi a kuɗuŋa. Kəya yə koore a humi kəwal gaalaŋ gə dəŋəy bayməlaŋ guudi da seeɗa. Yə hare da də kumsi keɗe, bə bi a isi giidə huluma. A ko toŋa kəyaŋ, hulum toŋ kole wəra baymele dəŋaŋ bə minti wə a jəŋ ajew. Kaa gə bayməlaŋ gə dogoynaŋ, yə bə ji yaŋ siri haa bədoona ana gəm.»


Bə minti Yeesu kəm bə waate kela gil a kaa kə ablaw, anə nuru də kəsəənuŋ tuluŋ ada, yə əsəŋ warda anə laki tiilim da bə waate minti té də caadə wəətu kel. [Kəya hulum kəman wəətunu minti: «Ba'i kəm baŋ, anə nərəm yaŋ kəna laki tiilima də kəsaanam, yə də caadə waatam kel.»] Wə hərnu kel minti: «Nərən haa mindi mo? Kəsaanan haa anə mindi mo?» Kəya wə haŋ kəəsu apəya, wə ɗikniy cəərə *kaa gə guuduŋ na. Wə waataŋ minti: «Laki kənaŋ haa anə nərən də kəsaanan faɗi. Gud maa mo, mindi mindi mo bə minti ji karman bə minti giidə Barən Pep bə minti apəy daŋ bəluŋ, hulum toŋ haa seenən, nawrən, nərən faɗi gəm.»

Hør på MATIYE 12