Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

नीकुदेमुस नओएं यक यहूदी नेता थिआ। से फरीसी नओएं यक धार्मिक दले मेह्‍णु थिआ। तेन ब्यादि टेम यीशु केईं एई कइ तस जे बोलु, “ए गुरु! जे जे चमत्कारे कम तुस कते, तसे बेलि असी पता लगो असा कि परमेश्वरे शक्ति तुसी जुए असी त सच्चे परमेश्वर तुस हें गुरु बणाई कइ लंघो असे।” यीशु तस जे बोलु, “अउं तोउ जे बोता कि जपल तकर तु दुबारी ना जमता, तपल तकर तु परमेश्वरे राज्ये कदी हेस्सेदार ना बणता।” नीकुदेमुसे बोलु, “मेह्‍णु स्याणा भोई कइ दुबारा कीं जमते? से कि दुबारी अपु ईये पेट अन्तर घेई सकता ना?” त यीशु जवाब दिता, “अउं तोउ जे बोता कि पोणि त शुची आत्माई जुए जमणे बगैर कोई परमेश्वरे राज्ये हेस्सेदार ना बण बटता। किस कि जपल अस जमते, अस अपु ईया बोउए गभुर भुन्ते। पर अगर अस शुची आत्माई बेलि दुबारी जमते, त अस परमेश्वरे गभुर बणते। त, तु हैरान ना भुओ कि मेईं तोउ जे बोलु ‘दुबारी जमुण जरूरी असा।’ ब्यार जीं चहन्ती, तीं चलती। तु तसे अवाज शुण सकता, पर तोउ पता ना लगता कि ए कोठिआ अओ असी त कोठि जे घेण लगो असी। तीं ‘शुची आत्माई बेलि दुबारी जमुणे’ बारे बि तु पता ना लाई सकता।” नीकुदेमुसे पुछु “ई कीं भोई सकतु”? त यीशु बोलु, “तु इस्राएले मेह्‍णु के गुरु भोई कइ बि ई बोक ना समझता ना? जेस सच्चाई असी पता असा, तस अस बोते, त जे जे असी काओ असु, तसे बारे उगाह देन्ते, पर तुस सम्हाई हें उगाह ना मानते। जपल मेईं इस धरती पुठ भुणे बाड़ी बोके की, त तुस तस ना मानते। त अगर अउं स्वर्ग पुठ भुणे बाड़ी बोके करुण त कीं कइ तुस तस मानते? अउं मनखे कुआ छड़ दी कइ होर कोई बि स्वर्ग जे गोओरा नेईं, किस कि अउं स्वर्ग केआं अओ असा। पर ई भुन्तु कि जीं मूसे अरुणि धार अन्तर पित्तले बड़ो कीड़ा ढना, तीं मोउं मनखे कुआ बि यक रोज ढनाई छते। ताकि जे बि मोउं पुठ विश्वास कराल, से हमेशा परमेश्वर जुए बिश्ता।”
“परमेश्वर सम्हाई जुए ती परेम कता। तोउं त तेन अपु इकलौता कुआ इस धरती पुठ लंघा। त जे बि तस पुठ विश्वास कराल, हमेशा परमेश्वर जुए बिशाल। पर जे बि परमेश्वरे कुआ पुठ विश्वास न कराल से परमेश्वर केआं हमेशा लिए दूर भोई घियाल त खतम भोई घियाल। परमेश्वरे अपु कुआ इस धरती पुठ तोउं लंघा, ताकि तसे बेलि मेह्‍णु अपु पापे सज्जा केआं बच सकियेल। से मेह्‍णु सज्जा शुणाण जे ना थिआ अओ। पर सज्जा तेन्हि पुठ असी, जे परमेश्वरे इकलौता कुआ पुठ विश्वास ना कते। पर तेन्हि पुठ सज्जा नेईं जेन्हि तस पुठ विश्वास किओ असा। सज्जा शुणाणे बझह ई बि असी कि परमेश्वरे कुआ टगड़ियारी ईं इस धरती पुठ आ, ताकि मेह्‍णु सच्चाई पता चले। पर मेह्‍णु टगड़ियार केआं ज्यादा अन्हारु ट्यारु लगु, किस कि तेन्के कम खराब थिए। किस कि जे बि पापे कम कते, से टगड़ियार पसंद ना कते, त तसे भेएड़ बि ना एन्ते। ना त तेन्के पापे कम सम्हाई के नजर एई घेन्ते। पर जे परमेश्वरे वचने सच्चाई मान कइ जीन्ते, से टगड़ियार जे एन्ते, ताकि सोबी जेईं केईयेल कि तेन्हि अपु कम परमेश्वरे वचन मान कइ किओ असे।”

पता यीशु त तसे चेले यरुशलेम शेहर केआं नश कइ यहूदिया राज्ये औत-कोती ग्रां जे घेई गे त तठि बिशे। तेस इलाके जेन्हि जेन्हि मेह्‍णु पाप केआं अपु मन बदलो थिए, से तेन्हि मेह्‍णु पाणि अन्तर चुसुण लगा। त शालीम ग्रां भेएड़ ऐनोन नओएं जगाई पुठ सुआ पुओणि भुणे बझई जुए यूहन्ना बि मेह्‍णु चुसताथ। त मेह्‍णु एई कइ तठि तसे बेलि चुसीन्तेथ। (किस कि अभेईं तकर यूहन्ना जेहेल अन्तर नेओथ छोओ।)
तठि यूहन्ने चेले केसे यहूदी जुए तेन्के रिवाजे मुताविक शुचा भुण जे धूणे बारे झगड़ा भुण लगा। त तेन्हि यूहन्ना केईं एई कइ तस जे बोलु, “गुरुजी, यरदन दरेउ पार यक जेईं मेह्‍णु चुसुण लगो असा त सुआ जेईं तस केईं घेण लगो असे। ए सेईंए भो जे पेहले तुसी जुए मिओ थिआ, त तसे बारे तुस लगो थिए ‘ए मसीह भो’” त यूहन्ने बोलु, “अगर परमेश्वर केसे कमियाब ना बणाल त कोई जेईं बि एतु कमियाब ना भोई सकता। तुस अपफ में उगाही असे कि मेईं बोलो थिउ कि अउं मसीह ना भो, पर तस केईआं अगर लंघो असा। इए शुणे! जे कुआ दुल्हन जुए ब्याह कता, से दुल्हा भो। त जीं दुल्हे मितर दुल्हे जुए खड़ भोई कइ दुल्हे अवाज शुणणे बेलि खुशी मेती, ती खुशी जुए में छाड़ि भीं लगण लगोरी नेईं। त ई जरूरी असु कि यीशु शान बधो लौती त में घट भो लौती।”
तोउं यूहन्ने बोलु, “जे स्वर्ग केआं अओ असा, से होरी सोबी केआं बोडा असा। मेह्‍णु इस मतोके भिन्थ त से मतोके बोके कते। पर से परमेश्वर केआं अओ असा त से होरी सोबी केआं बोडा असा। तेन जे बि स्वर्ग अन्तर काउ त परमेश्वर केआं शुणु तसे उगाह देन्ता। पर कोई बि तसे बोक ना मानते। तोउं बि जेन केनि तसे बोके मनी से सोबी के अगर उगाह देन्ता कि परमेश्वरे वचन सच्चा असा। यीशु परमेश्वरे लंघो असा, त से परमेश्वरे बोक कता, किस कि परमेश्वर खुल कइ अपु आत्मा तसे धे देन्ता। परमपिता परमेश्वर अपु कुआ यीशु ट्यारा असा त तेन सोबी चीज पुठ तसे धे हक दुतो असा। त जे परमेश्वरे कुआ पुठ विश्वास कता, तस परमेश्वर जुओई अमर जीवन मेता। पर जे बि तस पुठ विश्वास ना कता, तस जीवन ना मेता। पर तस जे परमेश्वरे भयंकर कोप असा।”

Hør på यूहन्ना 3