JOHANA 4

Isua leh Samari Hmeichhia

1Farisai-ten Johana aiin Isuan zirtîr tam zâwk a siam a, a baptis tih an hria tih Isuan a hriat chuan, #Jn. 3:22. 2Isua tak chuan a baptis lo va, a zirtîrten an baptis zâwk a ni. 3Judai ram a chhuahsan a, Galili ramah a kîr leh ta a. 4Samari ram a kal tlang a ngai a.

5Samari rama khaw pakhat, Sukar an tih chu a va thleng a, chu chu Jakoban a fapa Josefa ram a pêk kianga awm a ni.#Gen. 33:19; Jos. 24:32. 6Jakoba tuichhunchhuah pawh chutah chuan a awm a. Isua chu a kal hah êm avângin tuichhunchhuah sîrah chuan a ṭhu chawt a. Chhûn lai tak a ni.

7Samari hmeichhia tui chawi tûrin a lo kal a. Isua chuan, “In tûr mi pe rawh,” a lo ti a. 8A zirtîrte chu ei tûr leiin khuaah an kal tawh a ni. 9Hmeichhia chuan, “Nang Juda mi i ni a, kei Samari hmeichhia ka ni a, engtiziaa in tûr mi dîl nge maw i nih le?” a ti a (Juda-te leh Samari miten eng mah an inhman ṭâwm ngai lo va).#4:9 Mss ṭhenkhatah kual khung chhûnga mi hi a chuang ve lo, ‘an inkâwm nêl ngai lo,’ tih theih a ni bawk. #Ezra 4:1-5; Neh. 4:1,2.

10Isuan a chhâng a, “Pathian thilpêk leh i hnêna, ‘In tûr mi pe rawh,’ titu hi hria ni la chuan, a hnênah i dîl zâwk ang a, ani chuan tui nung#4:10 ‘tui luang’ tihna a ni bawk. a pe tûr che a ni,” a ti a. #Jn. 7:37; Thup. 21:6; 2:17. 11Hmeichhia chuan, “Ka pu, khai chhuahna tûr eng mah i nei si lo va, tuichhunchhuah a thûk vei nên, khawi ata nge tui nung chu i neih? 12Kan pu Jakoba aiin i ropui zâwk em ni? Ani chuan he tuichhunchhuah hi min pe a, amah leh a fate leh a ran rualte pawhin heta mi hi an in ṭhîn,” a ti a. 13Isuan, “Tu pawh he tui in apiang an tuihâl leh ang; 14tu pawh an hnêna ka pêk tûr tui in erawh chu an tuihâl leh tawh lo vang. An hnêna ka pêk tûr chu, an kawchhûngah tuihnaah a lo chang ang a, chatuan thlengin a kang lo vang,” a ti a. #Jn. 6:35; 7:38.

15Hmeichhia chuan, “Ka pu, chu tui chu mi pe rawh, ka tuihâl tawh loh nân leh hêng thleng thlenga tui chawi tûra ka lo kal tawh loh nân,” a ti a. 16Isuan, “I pasal va ko la, hetah lo kîr leh ang che,” a ti a. 17Hmeichhia chuan, “Pasal ka nei hlei nêm,” a ti a. Isuan, “ ‘Pasal ka nei hlei nêm,’ i tih hi i ti dik e; 18Pasal panga i nei tawh a, tûna i neih lai hi i pasal a ni lo rêng a ni. I sawi chu a dik e,” a ti a. #2 Lal. 17:24; Hos. 2:7. 19Hmeichhia chuan, “Ka pu, zâwlnei i ni tih ka hre ta. 20Min thlahtute chuan he tlângah hian Pathian chibai an bûk ṭhîn a, nangni erawh chuan, ‘Miten Jerusalem-ah ngei Pathian chibai an bûk tûr a ni,’ in ti a,” a ti a. #Deut. 11:29; Jos. 8:35.

21Isuan, “Hmeichhia, ka thu awih rawh, he tlângah kher lo pawh, Jerusalem-ah kher lo pawh Pa chibai in bûk hun a thleng dâwn.#Mal. 1:11. 22Nangnin in hriat loh chibai in bûk ṭhîn, keinin kan hriat chu chibai kan bûk ṭhîn; chhandamna chu Juda-te hnên ata lo chhuak a ni si a.#2 Lal. 17:29-41; Isa. 2:3; Rom. 9:4. 23Nimahsela, a hun a thleng dâwn, tûnah pawh a thleng tawh mêk, Pathian chibai bûktu tak takten thlarau leh thutakin Pa chibai an bûk tawh ang. Chutiang mi chu Pain amah chibai bûk tûrin a zawng a ni. 24Pathian chu thlarau a ni a, amah chibai bûktuten thlarau leh thutakin chibai an bûk tûr a ni,” a ti a.#Fil. 3:3. 25Hmeichhia chuan, “Mesia, Krista an tih chu, a lo kal dâwn tih ka hria. A lo kal hun chuan engkim min la hrilh ang,” a ti a. 26Isuan a chhâng a, “Kei, a betu che hi amah chu ka ni,” a ti a.

27Chumi lai chuan zirtîrte chu an lo thleng tawh a, hmeichhia a bia an rawn hmuh chuan mak an ti hle a. Nimahsela, tu mahin, “Eng nge i duh?” emaw, “Engah nge hmeichhia i biak?” emaw an ti lo. 28Hmeichhia chuan a tuibêl a kalsan a, khuaah a kîr a, khuaa mite hnênah chuan, 29“Mi pakhat, ka thiltih apiang mi hrilh thei vektu a awm a, lo kal ula, va en teh u, Krista a ni thei âwm emaw,” a ti a. #Mt. 12:23; Jn. 7:26. 30Tichuan, khua ata chu an chhuak a, Isua hnênah an kal ta a. 31Chumi hlân chuan zirtîrte chuan, “Zirtîrtu, ei rawh,” tiin an ngên a. 32Ani lah chuan, “In hriat loh chaw ei tûr ka nei e,” a ti mai si a. #Mt. 4:4. 33Zirtîrte chuan, “Tuten emaw chaw an rawn pe em ni chu le?” tiin an inzâwt ta hlawm a.

34Isuan an hnênah, “Mi tîrtu duhzâwng tih leh a hna thawh zawh chu ka chaw a ni. 35‘Thla li-ah buh seng a hun ang,’ in ti ṭhîn a ni lâwm ni? Dâk chhuak ula, lote en vêl rawh u, buhte chu seng mai theihin a êng tawh tih ka hrilh che u hi. 36Buh sengtu chuan hlawh a hmu nghâl tawh a, chatuan nun atân a seng khâwm mêk a ni, a phuntu leh a sengtu chu an hlim dun theih nân. #Mt. 9:37; Lk. 10:2. 37‘Mi pakhatin a tuh a, mi dangin a seng a,’ tih thu hi a dik a ni. #Job. 31:8; Mik. 6:15; Mt. 13:57; Mk. 6:4; Lk. 4:24. 38In thawhrim rah ni lo seng tûrin ka tirh che u hi, mi dangin an thawk a, an thawhrim rah in seng a ni,” a ti a.

39Hmeichhiain, “Ka thiltih apiang mi hrilh thei vek,” a tih avâng khân chumi khuaa Samari mi tam takin Isua an ring ta a. 40Samari mite Isua hnên an lo thlen chuan an hnênah châm tûrin an ngên a, chu khuaah chuan ni hnih a châm ta a. 41A thu an hriat chuan mi dang tam tak pawhin an ring ta a. 42Tin, hmeichhe hnênah chuan, “Tûnah zawng i thu sawi avânga ring kan ni ta lo, keimahni ngeiin a thu sawi kan hria a, he mi hi khawvêl chhandamtu a ni ngei tih kan hre ta,” an ti a.

Isuan milian fapa a tidam

(Mt. 8:5-13; Mk. 7:1-10)

43Ni hnih hnu chuan chuta ṭangin Galili ramah a kal ta a. 44Amah Isua ngeiin, “Zâwlnei chu ama ram lamah chawimawiin a awm lo,” a lo ti tawh si a. 45Galili ram a va thlen erawh chuan, Galili mite chuan an lo lâwm hle a; Jerusalem-a Kalhlên Kût chhimin an han kal a, kût laia a thiltih engkim an han hmuh avângin. #Jn. 2:23.

46Isua chuan Galili rama Kana, tui uaina a chantîrna khua kha a va thleng leh a. Kapernaum-ah sawrkâr milian tak pakhat fapa damlo a awm a.#Jn. 2:1-11. #Mt. 8:5-10; Lk. 7:2-10. 47Chu mi chuan Isua, Judai ram aṭangin Galili ramah a lo kal tih a hriatin a hnênah a han kal a, a fapa thi lek lek tidam tûrin Kapernaum-a chhukah a sâwm a. 48Isuan a hnênah, “Chhinchhiahna leh thil mak tih in hmuh loh chuan in ring tawp lo vang,” a ti a. 49Chu mi chuan, “Ka pu, ka fapa chu a thih hmain lo kal hrâm rawh,” a ti a. 50Isuan, “Kal mai rawh; i fapa chu a dam ta,” a ti a. Ani chuan Isua thu sawi chu a ring a, a kal ta a. 51A zu haw chu kawngah a chhiahhlawhten an lo hmuak a, “I fapa chu a dam ta e,” an lo ti a. 52A fapa lo dam leh ṭan hun chu a zâwt hlawm a. Anni chuan, “Nimin chhûn dâr khatah khân a khawsikin a thlah ta a ni,” an ti a. 53Naupang pa chuan chumi lai tak chu Isuan, “I fapa chu a dam ta,” a hnêna a tih hun kha a ni tih a hre ta a. Tichuan, an chhûngin an ring ta a. 54Chu chu Isua Judai ram aṭanga Galili rama a kal hnua chhinchhiahna thil mak a tih vawi hnihna a ni.

Markert nå:

JOHANA 4: MIZCLBSI

Marker

Del

Kopier