मत्ती 7
7
सूजो मीने दोष अन्लैदीलाची
लूका ६:३७-३८,४१-४२
1“सूजो मीने दोष अन्लैदीलाची, मेस्ये नमयूनेये दोष लैदीस्ये त्वो। 2#मर्कूस 4:24चेनेयलो नमयूदे सूजो मीयूने केर्बे दोष लैदीय होर्बेने नमयूनेये दोष लैदीय। कम्ब नापदे नमयूदे नापदीय, होरप्रने नमयूजे लागिये नापदीय।
3“नैजे रङ्से म्याने ख्यब मूढ ब था अम्प्रे तर चेने न रङ्से च्योन्जे म्याने ख्यब चीदत्या पूइब तङ? 4या नैजे रङ्से म्याने मूढ ख्यङ् यलो ‘नैजे म्याजे पूइ चीद ङैने योन्से पीन्’ यदेबे नैजे च्योन्ने केर्बे य खूइय। 5या कप्टी मी, खूम् रङ्से म्याजे मूढ योन्, होर्दे नैजे च्योन्जे म्याने ख्यब पूइ योन्ब नदे चेलाबे तङ खूइय।
6“कम्ब से पवित्र ख्यङ् हम्ब क्योयूने अम्पीन्लाची। रङ्सेजे लू-कूम पर्देब हीर-मोतीयू पाजे खूम्ने अन्छालाची, नत्र, हम्बयूे रङ्से तोप्दे हम्ब छ्येकने मेस्ये ल्वारदेबे नने च्याकने।
प्रार्थनाजे लागि बोङ् चेब
लूका ११:९-१३
7“स्यलो नमयूने पीन्क्य, मेल्लो नमयूदे प्रेक्क्य, ढ्याक्-ढ्याक् चील्लो नमयूजे लागि ख्यो पूक्मीय। 8चेनेयलो सूदे स्येय, ङूदे प्रेक्क्य, सूदे मेल्क्य, ङूदे प्रेक्क्य, सूदे ढ्याक्-ढ्याक् चीक्क्य, ङूजे लागि ख्यो पूक्मीय।
9“नमयू नङ्ने सू मी ख्यङ्, कादेये रङ्से चदे क्यङ् स्यब ङूने लूङ् पीन्क्या? 10या ङ स्यब ङूने र्वे पीन्क्या? 11येरेक्यूत्देबे नमयू दुष्ट क्यूल्लीने रङ्से च-चीमीयूने सोरो ज्य से पीनब स्येदेयलो, स्वर्गने टूङब नमयूजे पदे ङूने स्यब मीयूने कोलाथेप् चीत्देबे सोरो ज्य सेयू पीन्क्य। 12#लूका 6:31नमयूने मीयूदे कर व्यवहार चीस्स्य मन, होरप्रने व्यवहार नमयूदेये हम्बयूने ची, चेनेयलो अम्बने मोशाजे नियम मेस्ये अगमवक्ताजे मूल शिक्षा ख्यङ्।
साँघुरो मेस्ये फराकिलो ख्यो
लूका १३:२४
13“साँघुरो ख्यो क्यूत्देबे नङ्ने क्योब, चेनेयलो फराकिलो ख्यो मेस्ये सूस्योलो लम्दे नरकने सबीय। अम्ब फराकिलो ख्यो नङ्दे क्योबब मीयू कूम क्यूक्क्य। 14चेनेयलो जीया प्रेनेने सबब ख्यो साँघुरो ख्यङ् मेस्ये लम् सोरो मूस्यूल् ख्यङ्, अम्बदे जीया प्रेब नेने सबीय। अम्ब लम् पत्तप्रेब मी छीत्यात्या क्यूक्क्य।
तङ्बो मेस्ये हम्बजे सी
लूका ६:४३-४४; १३:२५-२७
15“लूच्च अगमवक्तायूप्रे होस्स्यार क्यूर्, हम्ब नमयू ट्याने स्वान्प्र क्यूत्देबे रीय, तर नङ्ब च्यूङ्कूप्र फत्या क्यूक्क्य। 16थमयूजे काम लेत्देबे हम्बयूने नमयूदे चीन्तीय। चो पोङ्दे अङ्गुर या सिउँडीजे पोङ्दे अञ्जीर थ्व प्रेक्क्या स्व? 17होरप्रने सोरो ज्य तङ्बोने सोरो ज्य सी लोसे पीन्क्य। तर खराब तङ्बोदे खराब सी लोसे पीन्क्य। 18सोरो ज्य तङ्बोदे अन्ज्य सी पीन अङ्खू, अन्ज्य तङ्बोदे सोरो ज्य सी पीन अङ्खू। 19#मत्ती 3:10; लूका 3:9सी सोरो ज्य अन्ल्वब तङ्बोयू टक्कने टील्देबे मी भोप्प्रोने छाबीय। 20#मत्ती 12:33येरप्रने हम्ब लूच्च अगमवक्तायू ख्यङ् यदेबे थमयूदे चेब कामदेने था प्रेक्क्य।
21“ङैने ‘प्रभु, प्रभु’ यब मीयू क्वाने स्वर्गजे राज्यने प्र प्रेस्स्ये त्वो। स्वर्गने ख्यब ङैजे पजे आज्ञा मन्देब मीदे त्या परमेश्वरजे राज्यने प्र प्रेक्क्य। 22हम्ब दिनने ङैने कूम मीयूदे यीय, ‘प्रभु, प्रभु, ङीदे नैजे मीन्ने अगमवाणी क्यम तेया?, नैजे मीन्ने छेत्यू ताल्बे तेया। मेस्ये नैजे मीन्ने शाक्तिशाली कामयू चेतेया?’ 23#भजनसंग्रह 6:8होर्दे नमयूने ङ चेलाबे यीय, ‘नमयूने ङैदे कलङ्बे अन्स्ये। धर्म प्वेब काम फर मीयू, ङैजे खूम्दे थेचेकी।
थर् ङ्हीजे जा
लूका ६:४७-४९
24“येरेक्यूत्देबे ङैजे अम्ब वचन सूदे ङ्यीन्देबे मन्दीय, ङ हम्बने बुद्धि ख्यब मी त्याप्रे कर्क्य, ङूदे पोलोम्फ्याने रङ्से कीम् बन्दीदे। 25होर्दे च्वो रदे मेस्ये भल् ग्येरदे, होर्देङ्येदे हून्ड केन् रदे मेस्ये हम्बदे कीम्ने टेरलीने हम्ब कीम् अङ्हूली चेनेयलो कीम्जे जा पोलोम्फ्याने पूते ख्य। 26सूमीदे ङैजे अम्ब- वचन ङ्यीन्देबेये अम्मन्दी, हम्बब पीस फ्याने रङ्से कीम् बन्देब मूर्ख मीत्याप्रे कर्क्य।
27होर्दे च्वो रदे मेस्ये भल् ग्येरदे, होर्देङ्येदे हून्ड केन् रदे मेस्ये हम्बदे कीम्ने टेरब हम्ब कीम् हूलीदेबे कूम नाश चीक्कदे। 28#मर्कूस 1:22; लूका 4:32येशूदे अम्ब पो स्योक्क चेनमेस्ये ङूजे शिक्षा ङ्यीन्देबे मीहुल हार्मन्दीकदे। 29चेनेयलो ङूदे थमयूजे पन्डेयूदेप्र दी, तर हक प्रेब मीदेप्र चीत्देबे लोम्मे ख्य।
Markert nå:
मत्ती 7: सर् कबुल
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ghale New Testament © Nepal Bible Society, 2011.