Matiyu 8
8
Isaye kam barasua isangaduwu
(Mar 1.40-45; Luk 5.12-16)
1Isa kǝla kaudǝyen jǝpkenniya, am kada kadami tia geya. 2Kam barasua laa ise fuwunjun tungurumje tiro: «Kǝma, raammaa, rangǝme wua isangasǝgǝme tayirro wallǝkki,» yeno. 3Isa mukko sajiye kamdǝa leje: «Raakkǝna, tayirro walle!» yeno. Sadǝman barasudǝ tia kolje tayirro walyeno. 4Daji Isaye tiro: «Bare wundumaro adǝa wulgǝmmi, amma lene ɍimandǝro fǝledǝgǝne, koro sadaa Nawi Musa wuljǝnadǝa de, jamaro shedaro waljo!»
Isaye soji kura Rombeye kaɍea isangaduwu
(Luk 7.1-10; Yah 4.43-54)
5Isa bǝrni Kafarnaambero kǝrgaanniya, soji kura Rombe laa nanjuro ise tia lowoje: 6«Kǝma, kaɍeani dondi fadon bowada, tiyinju nuna jauro basardi,» yeno. 7Isaye tiro: «Lekke tia isangagǝkki,» yeno. 8Amma soji kuradǝye tiro: «Kǝma, nia fannin sawo tikkǝni. Biya wada ye, kaɍeani ngaji. 9Wudǝ cidiya kǝnduwo amben kǝrgakko, fǝrduni yen sojiya takkǝna. Falnjaro: “Lene!” nǝkkiya, leji. Fal laaro: “Are!” nǝkkiya, isi. Koro kaɍeaniro: “Adǝa de!” nǝkkiya, cǝdi.» 10Isa adǝa fangenniya, ajapce jama tia jagaidǝro: «Jiremaro nayiro wulnjagakki, curo jama Israyilawuyen kambǝrse kura adǝ gai fandǝkkǝni! 11Nayiro wulnjagakki, am kada adinnam-a fǝde-alan#8.11 am adinnam-a fǝde-alan - Kǝrdiya. isane Nawi Ibrahim-a Nawi Isaku-a Nawi Yakuba-a rokko nodo bargaa Mai Samemayen masǝna dioro napcai. 12Amma tadawa nodo bargaayedǝa#8.12 tadawa nodo bargaayedǝ - Israyilawu. deyan curo duwu cǝlǝm pǝttero gǝpcagai, nadǝn so ye tǝdi, sheɍi ye naldi,» yeno. 13Daji Isaye soji kuradǝro: «Lene, kambǝrsenǝm nangaro awo suworǝmmadǝ wakkajo!» yeno. Kaɍeanjudǝ sa adǝman ngayeno.
Isaye am ngǝwua isangaduwu
(Mar 1.29-39; Luk 4.38-44)
14Isa fado Biturussero kadinniya, ya kǝsai Biturusse kangea bowada kiro. 15Isa mukkonju leyenniya, kangedǝ tia kolje, ti ye cije Isaa sosadu badiyeno.
16Yim adǝa kǝngal kikkurunniya, bǝrniwudǝ karuwamaso kada na Isayero kewudo. Mananjulaman sedannadǝa duyeno, koro am dondi sammaa isangayeyeno. 17Adǝgaima awo Kǝmande kuren ci Nawi Ishayayen wuljǝnadǝ wakkayeno. Tiye: «Kǝndondinde kǝlanjuro ngoje kasuwanden isangaseyera,»#Ish 53.4 cǝnna.
Isaa ga kǝske gǝni
(Luk 9.57-62)
18Yim laa Isa jama kada tia dirijane kǝljanadǝa kirunniya, fuwurawanjuro wada bǝrǝmdǝa faldaye kaino. 19Daji malǝm Attauraye laa nanjuro ise tiro: «Sayinna, ndara lenǝmi yaye nia njǝgakki,» yeno. 20Isaye tiro: «Kǝluwuso bǝlaanjaa, ngudoso sameye ye fannjaa, amma Tada Kambedǝ#8.20 Tada Kambedǝ - Isa kǝla Tada Kambedǝyen manajiya, kǝlanjuman manaji. nanju tustuyema bawo,» yeno. 21Koro fuwuranju laa ye tiro: «Kǝma, amarsǝgǝne lekke bawania sittǝrakkiya duwon,» yeno. 22Amma Isaye tiro: «Wua sǝgai, kolle am sanuna amanja sanunadǝa sittǝraja!» yeno.
Kǝnduwo Isaye kǝla karuwa-a cambaldu ingiye-ayen
(Mar 4.35-41; Luk 8.22-25)
23Isa curo maarayero kǝrgaanniya, fuwurawanju ye tia jaane kasargawo. 24Sadǝman karuwa dunoa cije ingi bǝrǝmbe cambalje, har ingi maaradǝro fiduwu badiyeno. Sadǝn Isa kǝnǝm cǝdi. 25Fuwurawanjudǝ isane tia kǝnǝmnin kesangǝranniya, tiro: «Kǝma, andia samoye, nuiye!» yera. 26Isaye tayiro: «Awiro yaayew, nayi kambǝrse ganaadǝ?» yeno. Daji cije karuwadǝ-a bǝrǝmdǝ-aro kikkadǝnniya, dajane dunia gǝmbo walyeno. 27Fuwurawanjudǝ ajapcane: «A! Kam jiɍi fi attǝ? Karuwa-a bǝrǝm-ama mananju jagai!» yera.
Kǝnduwo Isaye kǝla sedannayen
(Mar 5.1-20; Luk 8.26-39)
28Isa bǝrǝmdǝa falje koje cidi Gadarawuyero kadinniya, karuwama yindi kaurilalan caluwe tia kapkeyera. Tayidǝ jauro jau, har wunduma rakce jawaldǝyen kojiwawo. 29Daji yiljane: «Awi lambonǝm andiro, Tada Alaye? Sanju cǝdǝnnin andiro ajawu gǝnaduwuro wa kadim?» yera. 30Kuruwunjan alade kada newo cadi ye mbeji. 31Daji sedannadǝ Isaa lowojane: «Dusamia, aladeyadǝro dusagane curonjaro ngayiyo!» yera. 32Isaye tayiro: «To, lenowo!» yenniya, sedannadǝ caluwe curo aladeyadǝyero kasargawo. Daji aladeyadǝ samma ngǝrǝmjane kaulan jǝpcane bǝrǝmdǝro fidagane ingiye ngoje kasuno. 33Sǝniya aladeyayedǝ cagase bǝlaro lejane awo kǝla karuwamaso aniyen wakkajǝnadǝa ambo wulyeyera. 34Daji am bǝlaye samma ye Isaa kaptuwuro caluwe kerunniya, cidinja koljoro tia lowoyera.
Markert nå:
Matiyu 8: kby
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), SIM International