Luk 7
7
Yecu atɔ Lïm de Bɛ̈ny de Alathkëër Kabɔt Dem
(Math 8:5-13)
1Na wën, aacï wëlkï thok ë luɛl ë kɔc yïth kedhie, ke jɔ lɔ Kapernaum. 2Ku lïm tök de bɛ̈ny de nɔm alathkëër kabɔt ade guöp juäi, akɔɔr thuɔɔu, ku ye lïm nhiɛɛr bɛ̈nyde. 3Na wën, acï këde Yecu piŋ, ke toc röördït ke Judai, lek lɔ̈ŋ an, bï bɛ̈n bï lïmde bɛ̈n tɔ dem. 4Gokï bɛ̈n tɔ nu Yecu, bïk ku läŋkï arëët, luelkï an, “Raanë ee raan piɛth raan duɛ̈ɛ̈rë kony në luɔɔiyë. 5Anhiaar jurda, ku acï wo yiëk ɣön ë Nhialic yen guöp.”
6Go Yecu lɔ ke keek. Na wën, aacï guɔ thiɔ̈k ke ɣöt, ke bɛ̈ny de nɔm alathkëër kabɔt ke jɔ määthke tuöc en, ku lueel an, “Bɛ̈nydït, du yïguöp dak: yɛn cïï piɛth luɔi bï yïn bɛ̈n ɣöndï, 7yen aa kɛ̈n ɛn rɔt tɔ piɛth aya luɔi bän lɔ tëde yïn: jɔ jam lueel tei, ke lïmdï bï dem. 8Ku yɛn aya yɛn ee raan cï tääu ë bäny cök, ku nu alathkëër ë yacök, na yɔ̈ɔ̈k tök an, ‘Lɔ!’ Ka lɔ, ku na yɔ̈ɔ̈k däŋ an, ‘Bä!’ Ka bɔ̈, ku na yɔ̈ɔ̈k lïmdï an, ‘Loi kënë,’ ka looi.”
9Na wën, të cï Yecu kakë piŋ, ke jɔ gäi ë yen, go rɔt puk, ku yöök kut ë kɔc kuany ecök an, “Wek yɔ̈ɔ̈k an, gäm dïït cït ee kënë akɛ̈n kɔn yök, acakaa Yithriɛlic!”
10Na wën, të cï tuuc kenïïm dhuöny ɣöt, ke ke jɔ lïm wën tök yök ke cï guöp pial.
Yecu atɔ Wën ë Tiiŋ Abaar tɔ Pïïr
11Na ɣɔn amiäk, ke jɔ lɔ pänydït cɔl Nain: ku cath kɔc juëc në yen, kɔckɛn ë piööcë, ku kut dït ë kɔc. 12Na wën, aacï ɣet ë kalthok ë pänydït dï, ke jɔ rɔ̈m ke raan cï thou aket ë kɔc, leerë roor, ku ye mɛnh tök në man nɔm, ku man acïn nɔm moc: ku cath kut ë kɔc ke pänydït në yen. 13Të cï Bɛ̈nydït e tïŋ, ke jɔ piɔ̈u kok ke yen, ku yöök an, “Du dhiau.” 14Go bɛ̈n ku jiɛk kët: go kɔc ket raan gokï kɔ̈ɔ̈c. Go lueel an, “Dhuŋë! Yïn yɔ̈ɔ̈k an, Jɔt rɔt!” 15Go raan wën cï thou ago yethar ɣäny piny, ku gɔl jam. Go bɛ yiɛ̈n man.
16Go kɔc dɔm ë riɔ̈ɔ̈c kedhie: ku jɔkï Nhialic leec, luekï an, “Tiët dït acï tuöl ë woyiic! Nhialic acï kɔcke bɛ̈n neem!”
17Go jam de luɔi cï looiyë ɣet piny de Juda ëbɛ̈n, ku bɛ̈i nu ë yekëc.
Kɔc cï Tooc ë Jɔn Baptith
(Math 11:2-19)
18Go kɔcpiööcë Jɔn gokï Jɔn lɛ̈k kakë kedhie. 19Na wën, ke Jɔn jɔ kɔckɛn ë piööcë cɔɔl kaarou, ku jɔ ke tuöc Bɛ̈nydït, lek thiëëc an, “Ye raan wään an, bï bɛ̈n? Ku de raan däŋ buk tiit?”
20Na wën, aacï kɔc ɣet të nu yen, ke jɔkï lueel an, “Wok cïï Jɔn Baptith tuöc yïn, buk yïn bɛ̈n thiëëc, na ye raan wään an, bïï bɛ̈n? Ku de raan däŋ buk tit?”
21Ku ëkööl manë guöp ke jɔ kɔc juëc tɔ dem në tɔ̈ɔ̈kden ku në kë ye ke cuil gup ku në jɔɔk rac cï ke dɔm, ku tɔ cöör juëc yiɛ̈n. 22#Yith 35:5,6; Yith 61:1. Go Yecu bɛ̈ɛ̈r, yöök keek an, “Lakï, lɛ̈kkï Jɔn ka cäk tïŋ ku ka cäk piŋ, cöör acï ke tɔ yiɛ̈n ŋöl aciɛthkï, kɔc cïï wɛth dɔm acï ke tɔ waar,#7:22: acï ke tɔ waar: Tïŋ 5:12. mïŋ apïŋkï, kɔc cï thou acï ke tɔ ɣɔ̈ɔ̈r, kɔc kuanynyïïn aye ke guiëër wëlpiɛth. 23Ku na de raan cïï piɔ̈u bï ŋït në këdï, ka bï thieei!”
24Na wën, aa cï kɔc tuucë Jɔn jäl, ke gɔl jam kekë kut ë kɔc në këde Jɔn, an, “Ë we lɔ jɔ̈ɔ̈ric lak ŋö tïŋ? Ee aruöör niŋë yom, yen ë lak tïŋ? 25Ku ë we lɔ biic lak ŋö tïŋ? Ee raan ceŋ lupɔ lɔ nip? Tiëŋkï, kɔc ceŋ lupɔ cï läkëläk, ku yek kak ë mitëmit cam, kek aye tɔ̈u ë ɣööt ke meliik yiic! 26Ku ë we lɔ biic lak ŋö tïŋ? Ee tiët? Yeka, wek yɔ̈ɔ̈k an, ee raan wär tiët ë kajuëc aya. 27#Mal 3:1. Yen raan cïï jam gɔ̈ɔ̈r në këde kï an,
‘Tïŋ, yɛn tooc tunydï ë yïnɔm tueŋ,
Raan bï kueerdu looi yic apiɛth ë yïnɔm tueŋ.’
28Wek yɔ̈ɔ̈k an, “Në kɔc yiic kɔc cï dhiëëth ë diäär, acïn tiët nu tiët dïït wär Jɔn Baptith, ku raan koor cïn naamde raan nu ë ciɛɛŋ de Nhialic yic yen adït awär en.”
29 #
Math 21:32; Luk 3:12. Go kɔc cï wëlkë piŋ kedhie, ayï kɔc ë athölbö tɔ kut, agokï piath ë Nhialic piɔ̈u leec, wën cï ke baptith ë baptinh ë Jɔn. 30Ku Parithai kekë bäny ee kɔc wɛ̈ɛ̈t ë löŋ, ke ke jɔ jam nu ë Nhialic piɔ̈u në këden rɛɛc, wën kënë ke baptith ë baptinh ë Jɔn.
31Go Bɛ̈nydït lueel an, “Bä rem ë ëköölë jɔ thɔ̈ɔ̈ŋ ŋö? Ku cïtkï ŋö? 32Acïtkï mïththii rɛ̈ɛ̈r ë thuukic, ke ke ye röt cɔɔl an, ‘Wo cï kaaŋ kuöth week, ku wek kën cöŋ, wo cï dhuöör ë wenïïm, ku wek kën dhiau!’ 33Jɔn Baptith acï bɛ̈n ke cie cam ë kuïn ku cie dek ë mɔ̈u, aguɔkï lueel an, ‘Ciɛth ke jɔŋ rac!’ 34Wën ë Raan acï bɛ̈n ke ye cam ku ye dek, aguɔkï lueel an, “Tïŋ raanë, ee mamïïth ku ye raan ë dek ë mɔ̈u arëët, ku ye mɛ̈thë ë kɔc ë athölbö tɔ kut kekë kɔc ë kërac looi!’ 35Ku pɛlënɔm de Nhialic aye tɔ ye yic në mïthke kedhie.”
Yecu acï lɔ Ɣön ë Raan Parithai cɔl Thimon
36Na wën, ke cɔɔl raan töŋ de Parithai an, bï cam ke ye, ku jɔ lɔ ɣön ë Parithai, le ku nyuc tën ee kɔc cam. 37#Math 26:7; Mak 14:3; Jɔn 12:3. Ku ade tiiŋ nu pänydït, tiiŋ rac, na wën, acï piŋ nɔn rëërë Yecu tën ee kɔc cam ɣön ë Parithai, ke bïï gun ë alabatha de yic miök cï tumëtum, 38bï ku kɛ̈ɛ̈c ë yecök ciëën ke dhiau, ku gɔl ë wɛ̈k ëcök ë pïïu ke nyin, ku jɔ ke weec ë nhïm ke yenɔm, ku ciim cök, ku tɔc keek ë miök cï tumëtum. 39Na wën, ke Parithai wën cï Yecu cɔɔl, të cï en e tïŋ, ke jɔ lueel ë yepiɔ̈u an, “Raanë tëë ye tiët, adï cï tiiŋë ŋic, tiiŋ ë jak en, ku adï cï täude ŋic, ee tiiŋ ee kërac looi!”
40Go Yecu bɛ̈ɛ̈r, yöök an, “Thimon, yɛn de kë lɛ̈k yïn.”
Go lueel an, “Bɛ̈ny ee wëët, luel këdu.”
41Go lueel an ade raan nu raan cï kɔc dhɛ̈ɛ̈n kaarou: ŋɛk acï dhɛ̈n wëu cït jinii kathiëër, ku ŋɛk ke cït jinii tök tei. 42Na wën, të cïn kek wëu bïk bɛ cuöl en, ke ke jɔ pɔ̈l kaarou në dhuëëŋ. Jɔ lɛ̈k ɛn an, “Në keek kaarou, eeŋa bï ye nhiaar arëët?”
43Go Thimon bɛ̈ɛ̈r an, “Aya lueel an, ee raan cï päl kajuëc, en abï ye nhiaar arëët.”
Go yɔ̈ɔ̈k an, “Yïn ë löŋ tiiŋ nɔm.” 44Go yenɔm wɛ̈l tik, ku yöök Thimon an, “Cï tiiŋë tïŋ? Yɛn ë bɛ̈n ɣöndu, ku yïn kën a gäm pïïu waak ɛn ke yacök: ku tiiŋë acï a waak cök ë pïïu ke nyin, ku weec keek ë nhïm ke yenɔm. 45Yïn kën a ciim, ku tiiŋë, gɔl të wën bä yɛn ɣöt, aɣet cï ënɔɔnë akën a pɔ̈l cök ë ciëm. 46Yïn kën a tɔc nɔm ë miök: ku tiiŋë acï a tɔc cök ë miök cï tumëtum. 47Yen a lɛ̈k ɛn ë yïn an, “Karɛcke, aciɛk an, juëckï, acï ke päl en, nɔn cï en a nhiaar arëët: ku raan cï päl këthiinakäŋ, nhiëërde abï kuur tei.”
48Ku jɔ tik yɔ̈ɔ̈k an, “Karɛcku acï ke pɔ̈l.”
49Go kɔc rɛ̈ɛ̈r ë yen ëtök tën ee kɔc cam, agokï jam gɔl ë kepiɔ̈ɔ̈th an, “Eeŋa ëraanë raan ë karɛc pɔ̈l aya?”
50Go tik yɔ̈ɔ̈k an, “Gämdu acï yï kony, lɔ tei, acïn kërac.”
Markert nå:
Luk 7: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.