Mak 3
3
Raan de Ciin cï Riɔu
(Math 12:9-14; Luk 6:6-11)
1Na wën, aacï bɛ lɔ ɣön ë Nhialic, ku ade raan ëtɛ̈ɛ̈n raan cï ciin tök riɔu. 2Agokï woi guöp, nɔn bï en e tɔ dem ëkööl ë Thabath, ke bïk lɔ gaany. 3Go lɛ̈k raan cï ciin riɔu an, “Jɔt rɔt, kääcë cil.” 4Go keek thiëëc an, “Ee kënou cï päl kɔc ë kööl ë Thabath, ee luɔi de këpiɛth, ku ye luɔi de kërac? Ee kunydewëi, ku ye näŋ de kɔc?”
Gokï lɔ diu. 5Na wën, aacï keek lieec ke cï ŋeeny, ë piɔ̈u diu në riɛl ril kek piɔ̈ɔ̈th, ke jɔ raan yɔ̈ɔ̈k an, “Riny yïciin.” Go riny: go ciin bɛ piath cït man ë ciin däŋ. 6Go Parithai lɔ biic, lek kethook mat në kɔc ke Ɣerod ëtök, në näŋ bï kek Yecu nɔ̈k.
Kut dïït nu në Wɛ̈ɛ̈r Yɔu
7Go Yecu rɔt riic ëtɛ̈ɛ̈n kekë kɔckɛn ë piööcë le ë Baar ë Galili yɔu: ku kuany cök ë kut dïït ë kɔc bɔ̈ Galili: ku bɔ̈ kut dïït ë kɔc ë Juda, 8ku në Jeruthalem, ku në Yidumia, ku në Jordan nɔm lɔŋtui, ku në piny thiääk ke Tayer ku Thidon, abïkï tëde yen, luɔi cï kek kadït cï looi piŋ. 9#Mak 4:1; Luk 5:1-3. Go lɛ̈k kɔckɛn ë piööcë an, bï abël thiinë ye tiit, në baŋ de kut ë kɔc, ke ke cï ye bï nyiɛɛc: 10luɔi cï en kɔc juëc tɔ dem, arëk acïk röt cuöt të nu yen, bïk bɛ̈n jak guöp, kek kɔc de gup jɔɔk kedhie. 11Ku jɔɔk rac col, të de en të cï kek e tïŋ, ke ke cuɛt röt piny ë yenɔm, ku cötkï an, “Yïn ee Wën ë Nhialic!”
12Go ke cök ë lom en kethook, ke cïkï bï tɔ ŋic.
Yecu Akuany Tuuc Kathiëër ku Rou
(Math 10:1-4; Luk 6:12-16)
13Na wën, ke lɔ ë kuurdït nɔm, le ku cɔɔl kɔc nu ë yepiɔ̈u: gokï lɔ tëde yen. 14Go thiëër ku rou lɔc, kɔc bï ya tɔ̈u në yen, ku bï keek aa tooc bïk wël aa lɔ guiir, 15ku bïk aa cath në riɛl bï kek juäi tɔ waar, ku bïk jɔɔk rac aa cieec:
16Ku jɔ Thimon cäk bɛɛŋ an, (Petero), 17ku Jakop wën ë Dhebedayo, ku Jɔn mänhë ë Jakop, go keek cäk bɛɛŋ, an, (Bowanek, yen aye “Wɛ̈ɛ̈t ke määrëdeŋ”), 18ku Andereya, ku Pilip, ku Bartholomayo, ku Mathayo, ku Thoma, ku Jakop wën ë Alapayo, ku Thadayo, ku Thimon raan ë Kanaan, 19ku Judath Yithkariɔt, raan bï e nyiɛɛn aya.
Yecu ku Beeldhebub
(Math 12:22-32; Luk 11:14-23; 12:10)
20Na wën, ke kut ë kɔc be guëër, arëk acïn të man duëërë kɔc cam ë kuïn. 21Na wën, aacï määthke ye piŋ, ke ke lɔ biic lek dɔm: ayek lueel an, “Jiɛɛm wei!”
22 #
Math 9:34; 10:25. Ku acïï kɔc ë löŋ gɔ̈ɔ̈r e lueel, kɔc bɔ̈ ë Jeruthalem an, “Ade guöp Beeldhebub! Ku an ee jɔɔk rac cieec në riɛl ë bɛ̈nydïït ë jɔɔk rac.”
23Go keek cɔɔl të nu yen, ku yöök keek ë kääŋ an, “Catan duëër Catan cieec adï? 24Ku na cï ciɛɛŋ e yic tek në ater, yen ee ciɛɛŋë acïï duëër kɔ̈ɔ̈c. 25Ayï dhiën, të tek en eyic ater, ka cïï duëër kɔ̈ɔ̈c en ee dhiënë. 26Ku Catan aya, të jɔt en rɔt ku ciëk rɔt ater, ago eyic tek, ka cïï duëër kɔ̈ɔ̈c, thök bï en thök aduëër thiɔ̈k.
27“Acïn raan duëër lɔ ɣön ë raan ril, ku yiɛk wëuke, të ŋoot en ke kën raan ril kɔn duut, na cï en kɔn duut, ke jɔ ɣönde yak.
28Wek yɔ̈ɔ̈k ëyic an, “Karɛc cïk wööc abï ke päl mïth ke kɔc, ayï lɛ̈t ëbɛ̈n lɛ̈t bïk kek Nhialic aa lat, abï ke päl keek kedhie: 29#Luk 12:10. ku raan bï Wëidït ɣer aa lat acïï bï pɔ̈l ëtaitai, kërɛɛc dït anu ë yeyeth aɣët wadäŋ thɛɛr: 30luɔi cï kek e lueel an, “Ade guöp jɔŋ rac.”
Mïthëkɔcken ku Man Yecu
(Math 12:46-50; Luk 8:19-21)
31Na wën, ke mïthëkɔcken ë ke bɔ̈ në man, bïk ku kɛ̈ɛ̈ckï biic, agokï tuöc raan, le ye cɔɔl. 32Ku rɛ̈ɛ̈r kut dïït ë kɔc ë yelɔ̈ɔ̈m, agokï lɛ̈k en an, “Tïŋ, moor ku mïthëkɔckun ka, biic, akɔɔrkï yïn.”
33Go bɛ̈ɛ̈r an, “Eeŋa ee maar? Ku ee yïŋa ee mïthëkɔckuɔ?” 34Go kɔc rɛ̈ɛ̈r ë yelɔ̈ɔ̈m lieec, ku lueel an, “Maar, kï, ku mïthëkɔckuɔ kï! 35Raan ëbɛ̈n raan bï këde Nhialic piɔ̈u aa looi, raanë yen aye Mɛnhkäi, ku ye nyankäi, ku ye maar.”
Markert nå:
Mak 3: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.