Mak 5
5
Yecu Atɔ Raan de Guöp Jɔŋrac Waar
(Math 8:28-34; Luk 8:26-28)
1Agokï ɣet ë Baar ë Galili lɔŋtui, piny de kɔc ke Gadaren. 2Na wën, aacï bɛ̈n bei ë abëlic, ke räm ënɔnthiinë ke raan de guöp jɔŋ rac raan bɔ̈ bei ë rɛ̈ŋ yiic, 3raan ee rëër të nu rɛ̈ŋ: ku acïn raan duëër e mac, acakaa yen ë mac ë kuat: 4aaye cool ë rekë ye në joth ku kuɛɛt, go kuɛɛt aa tuɛ̈ɛ̈ny ku dhuuŋ joth, ku acïn raan cath ke riɛl bï en e tɔ loi nɔm. 5Ku ë aköölnyïïn kedhie, wakɔ̈u ku aköl, ee tɔ̈u ë kuurdït kɔ̈ɔ̈th ku të nu rɛ̈ŋ, ke ye cööt, ku ye rɔt ŋuɛ̈ɛ̈t ë kɔi.
6Na wën, ke tïŋ Yecu tëmec, go bɛ̈n ke riŋ, bïï ku lɛm, 7ku cööt ë röl dït an, “Eeŋödï wo yïn? Yecu, yïn Wën ë Nhialic dït arëët! Yïn yɔ̈ɔ̈k në rin ke Nhialic, an, Du ya lui këtuc!” 8(Aa lueel ee kënë në biäk cï Yecu ye yɔ̈ɔ̈k an, “Bä bei e raan guöp, yïn jɔŋ rac.”)
9Go thiëëc an, “Cɔl yï ŋa?”
Go bɛ̈ɛ̈r an, “Yɛn cɔl ‘Remdït’ luɔi juëc wok!” 10Go lɔ̈ŋ arëët an, acïï ke bï ciɛɛc biic ë pinyë.
11Ku ade luny dïït ë kudhuur ë kuurdït thar ëtɛ̈ɛ̈n, ke ke nyuäth. 12Go jɔɔk rac ëbɛ̈n gokï lɔ̈ŋ, an, “Tɔ wo lɔ të nu kudhuur buk lɔ ë kegup.” 13Go ke päl lɔ. Na wën, ke jɔɔk rac ë ke bɔ̈ bei ë raan guöp, lek ë kudhuur gup: go luny ëbɛ̈n lɔ guluŋ piny wïïr, cït aguum kaarou: agokï mou wïïr.
14Go kɔc wën ë kudhuur nyuääth gokï kat, lek lueel pänydït ayï baai. Gokï jɔ lɔ biic lek kë cï looi tïŋ, nɔn e yen ŋö. 15Gokï bɛ̈n të nu Yecu, ku tïŋkï raan wën de guöp jɔɔk, ke rɛ̈ɛ̈r, ku ceŋ lupɔ, ke cï nɔm piath, yen raan wën cath ke rem dïït ë jɔɔk rac, gokï riɔ̈ɔ̈c. 16Na wën, ke kɔc wën cï e tïŋ, ke ke guïïrkï luɔi wën cï luöi raan wën de guöp jɔɔk, ku guïïrkï në këde kudhuur aya.
17Gokï jɔ lɔŋ, an, bï jäl pinyden.
18Na wën, ale ë abëlic, ke raan wën de guöp jɔɔk rac ke lɛ̈ŋ, an, bï tɔ̈u ke yen ëtök.
19Go cuö gam, ku yöök an, “Lɔ paandu tëde kɔckun, ku lɛ̈kë keek kadït cïï Bɛ̈nydït luöi yïn, ku kok cï en piɔ̈u kok ke yïn.
20Go jäl, ku jɔ kɔc guiëër ë Dekapoli luɔi dïït cïï Yecu luöi yen, go kɔc gäi kedhie.
21Na wën, acï Yecu wɛ̈ɛ̈r bɛ teem ë abël, ku cï ɣet lɔɔk, ke kut dïït ë kɔc guëër të nu yen, ku anu ë wɛ̈ɛ̈r yɔu. 22Na wën, ke bɛ̈ny tök bɔ̈ bɛ̈ny töŋ de luaŋ de Nhialic, cɔl Jairo, na wën, aacï e tïŋ, ke cuɛt rɔt piny ë yecök, 23go lɔ̈ŋ arëët an, “Nyandiën thiinë acï tiaam akɔɔr thuɔɔu, yïn läŋ, an, bä, thanyë yïcin ë yeguöp, ke bï guöp waar, ago pïïr.
24Go lɔ kekë yen, ku kuany cök ë kut dïït ë kɔc, gokï giŋ.
25Na wën, ke tiiŋ tök bɔ̈, tiiŋ de tëdɛn ee cool ë wat ë riɛm ë run kathiëër ku rou, 26ku acï kajuëc guum kak ë looi akïm juëc, go wëuke thöl kedhie, ku acïn të ŋuän cï yök, arëk abï lɔ ke dït en tëtök. 27Na wën, acï këde Yecu piŋ, ke bɔ̈ ë kut ë kɔciic ë yekɔ̈u ciëën, bï ku jiɛk lupɔde. 28Aye lueel, an, “Na cakaa yɛn ë jak lupɔɔke tei, ke yɛn bï guöp pial.”
29Go awaŋdɛn ë bï riɛm bei thïn go lɔ ŋëu ënɔnthiinë, go yök ë yeguöp nɔn cï yen dem ë jɔŋde. 30Na wën, ke dap ŋic en Yecu nɔn cï riɛl bɛ̈n bei ë yeguöp, go rɔt puk ë kut ë kɔciic, ku thiëëc an, “Eeŋa ë jak lupɔɔkï?”
31Go kɔckɛn ë piööcë gokï thiëëc, an, “Kɛ̈në kut ë kɔc tïŋ acï yïn giŋ, ku bä jɔ thiëëc, an, eeŋa ë jak ɛn?” 32Go kɔc caath nyïïn, ke bï raan tïŋ raan ë loi kënë. 33Go tiiŋë bɛ̈n, ke riɔ̈c ku lɛthë, aŋic kë cï luöi yen, bï ku cuɛt rɔt piny ë yenɔm, jɔ guiëër yith ëbɛ̈n. 34Go yɔ̈ɔ̈k, an, “Nyanë, gämdu acï yï tɔ waar, lɔ tei ë ciën këdäŋ, yïn bï guöp pial ë jɔŋdu.
35Të ŋoot en ke jam, ke kɔc ë ke bɔ̈ ɣön ë bɛ̈ny de luaŋ de Nhialic, kɔc bï e bɛ̈n lueel, an, “Nyandu ë thou: eeŋö ŋoot yïn ke yï jut Bɛ̈ny ë wëët?”
36Na wën, acï Yecu jam piŋ, jam wën cï lueel, ke dap bɛ̈ny de luaŋ de Nhialic yɔ̈ɔ̈k, an, “Du riɔ̈c, gam tei.” 37Ku acïn raan cï pɔ̈l a kuany e cök, ee Petero etök, ku Jakop, ku Jɔn mänhë ë Jakop. 38Gokï bɛ̈n ɣön ë bɛ̈ny ë luaŋ de Nhialic, go kɔc tïŋ acïk nuɔɔn, adhiaukï ku kïïukï. 39Na wën, acï lɔ ë kalic, ke yöök keek, an, “Eeŋö cä wek nuɔɔn wäkya, ke we dhiau? Meth akën thou, anin tei.”
40Gokï dɔl guöp. Na wën ke ke tɔ lɔ biic kedhie, ku jɔ lɔ kekë wun meth ku man ku kɔc wën cath në yen, lek ɣöt të nu meth thïn. 41Go meth dɔm cin, ku yöök an, “Talitha kumi.” Të pukë yen ë thoŋda, alueel an, “Yïn nyanthiinë, jɔt rɔt.”
42Go duet rɔt jɔt ënɔnthiinë, ku ciɛth: runke athiëërkï ku rou. Gokï gäi ë gäi dït. 43Go ke cök ë lom en kethook, ke cïï bï dɛ raan bï kënë ŋic: ku lueel an, “Miackï ë këcam.”
Markert nå:
Mak 5: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.