ɛMacu 6
6
ɛYɛso gha Kɛ Mɛmɛ nɛ ɛli ne yaa Phyik Nitaasek
1“Wu aa mɔn ɛn ɛtomɛ ɛyɛnɛng nga, sɔng ne ɛ mɔn ɛn te ninyi na yaang nibhɛ ton nyini wo nang. Wu ɛ kɛ mɔn ɛn ɛlɛ wo, sɔng ɛ sɛ ne sɛ ɛn ɛkɔn ɛlɔ ɛkyɛɛ mon na ne ɛ so dak ne irywa wo nang.
2“iPhɛ ɛlɛy, wu aa nang ɛtaasek ka ɛkɔn na, sɔng ne ɛ tɔɔrek kpas tɛ niluk ka nɛ nibhɛ tɔɔsel ndɔ ne idee ne itsɔɔy de ne nkpiinɛ da nang. Nibhɛ mɔn ɛlɛ wo te ninyi na ji ton nibhɛ. Nzi ne tɔng nyini itin nɛ, nibhɛ kɛ ku say ilong nibhɛ de. 3Wu aa nang ɛtaasek ka ɛkɔn na, sɔng ne ɛ sim ɛn ɛnyi seng ɛkɔn na ne ɛɛ mɔn ɛn no nang, 4te ìnang mo da ne so gying. ɛKyɛɛ mo gha ne ɛ wɛɛ ɛkɔn na ne ɛ mɔn gying ngo yaa ne nang nyini ilong mon de.
ɛYɛso gha kɛ Mɛmɛ nɛ ɛLi ne yaa Bol ne ɛTaanggbey
(ɛLuk 11.2-4)
5“Wu ˆaa ne bol ɛn ne ɛTaanggbey ya, sɔng ne ˆɛ roo ɛn tɛ niluk ka nang, daa ɛli nɛ nibhɛ kyinasek tsik ndɔ ne idee ne itsɔɔy gbik nɛ nilamas ne nkpiinɛ nibhɛ roro tɛ ninyi ji yaang nibhɛ. Nzi tɔng nyini itin nɛ nibhɛ kɛ ku say ilong nibhɛ. 6Wu aa ne bol ɛn ne ɛTaanggbey ya, cwi ɛbhɛ lel ɛn ndɔ ne iduk mo te ɛ cwaal ɛn ɛlɔ yɛ, ɛ ji roo ne ɛKyɛɛ mo gha ne ɛ so gying ngo, ɛKyɛɛ mo gha ne ɛ wɛɛ ɛkɔn na ne ɛ mɔn gying ngo yaa ne mɔn nɛ iyɛnɛng. 7Yaa sɛ ɛ so ɛn bol ɛn ne ɛTaanggbey ya, sɔng ne ɛ rɛrɛ ɛn buburu wo tɛ ninyi na nɛ nibhɛ doo ɛTaanggbey yegha nang, nibhɛ wɛɛ te ivol igbom nibhɛ da ifɛ aa te i phok nibhɛ. 8Sɔng ɛ te ɛn tɛ nibhɛ wo nang, daa ɛli ne ɛKyɛɛ mon na ku yɛɛ ɛkɔn na ne ɛ sim ɛn ɛ tɔ tang phom ɛn ɛbhɛ.
9“Yaa sɛ aa bol ɛn ne ɛTaanggbey ya,
te ne ɛ yɔng ɛn,
‘ɛTaa mos daa ne irywa,
te nang irywɛɛk mo wo
ne ndiinday,
10Te igbɔm mo da yɛɛs
ndɔ ɛzay ya,
te ne mɔn ɛkɔn na ne ɛ sim
ndɔ ɛzay ya ɛli ne
ma mɔn daa ne irywa wo.
11Nang njwii ɛkɔn ne re izenge
ne ɛhaa ne re cɛcɛɛy.
12Hana njwii ne ɛfɔt mos so,
ɛli ne njwi kɛ ma hana
ninaa nɛ nibhɛ kɛ mɔn njwi
ɛfɔt to nɛ wo.
13Sɔng ɛ sim njwii ho
ne itɛrɛk ga nang,
yang kyɛngɛse njwii
ndɔ ne ntsɛntsɛng
igywebhe ɛShɛtan de.’
14“Wu ɛ kɛ hana ɛn ninyi nɛ nibhɛ kɛ mɔn nyini ɛfɔt to, ɛKyɛɛ mon ɛdaa ne irywa gha yaa ne ma hana nyini nɛ. 15Wu ɛ kɛ ne shɛɛ tang hana ɛn ninyi na ne ɛfɔt nibhɛ wo, sɔng ɛKyɛɛ mon na yaa ne ma hana nyini nɛ nang.
ɛYɛso gha kɛ Mɛmɛ nɛ ɛli ne yaa Kuma
16“Wu aa ne kuma ɛn no, sɔng ne ɛ bees ɛn ɛyisɛ mon na ɛli nɛ niluk ka i mɔn no nang, daa ɛli nɛ nibhɛ bees ɛyisɛ nibhɛ gha tɛ ninyi ji seng wu nibhɛ kuma. Nzi tɔng nyini itin nɛ nibhɛ kɛ ne ku say ilong nibhɛ. 17Wu aa ne kuma ɛn no, ne ɛ kus ɛn ɛyisɛ mon ɛ sop ɛn itso mon, 18ɛli ne hame ninyi na yaa seng wu ɛ kuma ɛn, te ɛKyɛɛ mon na ne ɛ so gying ngo ɛbhɛ seng zɔng; ɛlɛy ɛKyɛɛ mon na ne ɛ wɛɛ nikɔn na ne i mɔn gying ngo, yaa ne nang nyini ilong mon de.
iBol ne Tumɛ iRyat ɛDaa ne irywa
(ɛLuk 12.33-34)
19“Sɔng ɛ tumɛ ɛn iryat de ɛzay yeghaa wo ne nzuu de yaa re wo ihywɛ ta phulɛm mo, ninaa ɛyi ta bala ɛlɔ yɛ nibhɛ yibhɛ wo nang. 20Yang tumɛ ɛn iryat mon de dak ne irywa, ɛnggyɛ wo sɔng nzuu yaa re nang, sɔng ihywɛ yaa ne phulɛm nang, sɔng ninaa ɛyi yaa ne ta bala ɛlɔ yɛ, nibhɛ yibhɛ nang. 21Ɛlɔ gha ne iryat mo de sonɛ, ɛlɔ yɛ ne irway mo da yaa ne ma sonɛ.
iWɛwɛy ne iBek
(ɛLuk 11.34-36)
22“iRwisɛ da ifɛ ifɛ so ɛpitila ne ibek ko, wu irwisɛ mo da ne so yɛnɛng ibek mo de ya ne so hyɔrɔ wɛwɛy. 23Wu irwisɛ mo da ne so kpɛɛ ibek mo de yaaso hyɔrɔ ne igbyik. iPhɛ ɛlɛy, wu iwɛwɛy ndɔ mo de kɛ ne kyii hyereey iphɛ teye igbyik, ne ɛ so ndɔ gbyik ka gbyighilik!
ɛTaanggbey nɛ Nikɔn ɛZay
(ɛLuk 16.13)
24“Sɔng ɛnyi gha yaa yɛɛ ne boos nikyɛɛ ne ijwee na ifaa nang, aa sim ɛdaan ne ɛ ji mbaray ɛdɛng; aa roos ɛdaan nɛ ɛ ji bɛɛs ɛdɛng. Sɔng aa ne yɛɛ ne i roos ɛTaanggbey yegha ɛ kyii ta i sim ijam be nang.
Sɔng Ɛ Sap ɛn Nang
(ɛLuk 12.22-31)
25“iPhɛ ɛlɛy nzi ne bok nyini, sɔng ˆɛ sap ɛn ibol ɛkɔn de ne ˆaa re ɛn, ˆɛ sɔ ɛn nang. Sɔng ne ˆɛ tas ibol ne itsura de ne aa yɛk ɛn nyini nɛ ne ibek nang. Nzi shɛɛ bo iken de phyin ire de? Nzi ne ta bo ibek ge ne ma ta phyin itsura da nang? 26Wɛɛ ɛn ninon ɛdaa ne irywa na, sɔng nibhɛ hap nang, sɔng nibhɛ ne pha nang, sɔng nibhɛ ne bok ɛgban nang, gbik ne iphɛ ɛlɛy ɛKyɛɛ ɛdaa ne irywa mon ɛbhɛ ne re nɛ nibhɛ. Ne ɛ shɛɛ tang phyin ɛn ninon naa? 27Ɛya phɛ yɛ ndɔ mon no ne ɛ Sɛɛ sap po ɛ phyii hante ne ɛwa ɛdaan ndɔ nituk ɛbhɛ naa?#6.27 hante ne ɛwa ɛdaan ndɔ nituk ɛbhɛ naa: ɛByin ne iWee da kɛ haa ɛbɛ wo ɛlɛ, “Hante ne ndaalang ɛbhɛ.”
28“Ɛya ɛkɔn ɛbhɛ kɛ ne te nyini ɛ sap ɛn ibol ne itsura daa? Wɛɛ ɛn nggbay ne ivee ɛhay da ɛli ne ifɛ hɔnɔs so, sɔng ifɛ mɔn ɛtomɛ nang, sɔng ifɛ ne ryɔng ne itsura ne ifɛ nang. 29Gbik ne iphɛ ɛlɛy, sɔng ɛgɔm ɛSɔlɔmɔn na, ne ihywee ne iryat ɛbhɛ de ne ɛ kaa bok ko kaa ne yɛk ghe ne ɛdɛ ɛtura ɛyɛnɛng ngo ne ɛbhɛ so te nggbay yɛdaa nggyɛ wo nang. 30Wu ɛTaanggbey ya ɛbhɛ ɛ yaak nggbay ɛhay da ne itsura da, ne iphɛ sonɛ izenge i cwiil ne ihwɛlɛ wo i wɔɔ wo, aa ne shɛɛ tang nang nyini itsura da ne ifɛ phyin ɛlɛ woo? Nyinɛn no ne ìnang ne itin mon de kɛ taasek ko. 31iPhɛ ɛlɛy, sɔng ne ɛ tɔɔ sap ɛn ibol ɛkɔn de ne aa re ɛn ɛ ta sɔ ɛn no nang. Sɔng ne ɛ ta sap ɛn ibol ne ɛtura de ne aa yɛk ɛn nɛ wo nang. 32Nikɔn nɛnaa wo nɛ ninyi na nɛ nibhɛ doo ɛTaanggbey yegha tɔk. ɛKyɛɛ mon ɛdaa ne irywa gha i yɛɛ ɛli ne ɛ sim ɛn nibhɛ. 33Yang tsa ɛ tɔk ɛn igbɔm ɛTaanggbey da ne ihywel icik ga ne ɛTaanggbey ya sim mo, yaa ne hanas nyini nɛ nikɔn nɛnaa wo gbik. 34iPhɛ ɛlɛy, sɔng ne sap ɛn ibol ne ihwɛlɛ de nang, tek ɛn te ihwɛlɛ wo sap ito ne ifɛ. Te nggbang ne icwas ne izenge da hɔn nyini nɛ ɛlɛy.
Markert nå:
ɛMacu 6: etxNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project