1 Musa 11
11
Palas i Babel
1I mulana, karina bangsa i suberri tanoh èn pellin sada ngo kessa katana. 2Tapi tikan laus kalak i mi Babilonia, imo kan kebincaren, ndèas ngo suak i, gabè merian i sidi mo kalak i. 3Nai mengerana mo kalak i samahsa, “Aci sibahan mo batu bata, janah situtung mo i asa gabè mpihir.” Bagi mo carana asa merbatu bata kalak i, mahan batu bages janah tèr mo ibaing mahan pèjerna. 4Nina kalak i nola mo, “Aci mo si pajek sada kuta dekket sada palas pucukna soh mi langit, asa termurmur kita janah asa ulang nè mersèrak kita mi suberri tanoh èn.”
5Nai susur mo Jahowa lako menengen kuta dekket palas sinipajek jelma i. 6Nai nina mo, “Sada bangsa janah sada kata ngo kalak èn, pellin permulaenna dèng ngo sura-sura kalak èn. Oda ndekkah nè, ndorok nola mo ia mahan bakunè sambing dok atèna. 7Selloh mo susur kita lako menursari kata kalak i, asa ulang mersiantusen nè kalak i.” 8Nai gabè mersèrak mo kalak i ibaing Jahowa mi suberri tanoh èn. Gabè ipetadi kalak i mo majek kuta i. 9Ingo memaingken asa ibaing gerar kuta i Babel, kerna i sidi mo isursari Jahowa kata karina bangsa, janah i sidi nai mo isèrak Jahowa kalak i mi suberri tanoh èn.
Pemparen si Sem
(1 Kron. 1:24-27)
10En mo pemparen si Sem. Dua tahun enggo kessa laè mengeraja i tikan merumur 100 tahun si Sem, lot mo anakna mergerar si Arpakhsad. 11Kessa i nggelluh dèng ngo ia lima ratus tahun nai, janah lot dèng ngo dukakna sidèban.
12Tikan merumur 35 tahun si Arpakhsad, lot mo anakna gerarna si Selah. 13Kessa i nggelluh dèng ngo si Arpakhsad 403 tahun nai, janah lot dèng dukakna sidèbankenna i.
14Tikan merumur si Selah 30 tahun, lot mo anakna mergerar si Eber. 15Kessa i nggelluh dèng ngo si Selah 403 tahun nai, janah lot dèng dukakna sidèban.
16Tikan merumur 34 tahun si Eber, lot mo anakna mergerar si Peleg. 17Kessa i nggelluh dèng ngo si Eber 430 tahun nai, janah lot dèng ngo dukak-dukakna sidèban.
18Tikan merumur 30 tahun si Peleg, lot mo anakna mergerar si Rehu. 19Kessa i nggelluh dèng ngo si Peleg 209 tahun nai, janah lot dèng ngo dukakna sidèban.
20Tikan merumur 32 tahun si Rehu, lot mo anakna mergerar si Serug. 21Kessa i nggelluh dèng ngo si Rehu 207 tahun nai janah lot dèng ngo dukak-dukakna sidèban.
22Tikan merumur 30 tahun si Serug, lot mo anakna mergerar si Nahor. 23Kessa i nggelluh dèng ngo si Serug 200 tahun nai, janah lot dèng ngo dukak-dukakna sidèban.
24Tikan merumur 29 tahun si Nahor, lot mo anakna mergerar si Terah. 25Kessa i nggelluh dèng ngo si Nahor 119 tahun nai, janah lot dèng ngo dukak-dukakna sidèban.
26Enggo kessa merumur pitupuluh tahun si Terah, lot mo anakna imo si Abram, si Nahor dekket si Haran.
Pemparen si Terah
27En mo pemparen si Terah: Anakna si Abram, si Nahor dekket si Haran. Anak si Haran imo si Lot. 28Matè ngo si Haran i kutana imo i Ur nagerri Babilonia, tikan nggelluh dèng bapana. 29Ikabini si Abram mo si Sara, janah si Nahor kabin dekket si Milka berru si Haran. Lot dèng ngo anak si Haran mergerar si Jiska. 30Ukum si Sara nggempus ngo.
31Itadingken si Terah ngo kuta Ur ni Babilonia rebbak dekket si Abram anakna i, bak si Lot kempuna i, dekket si Sara purmaènna imo sinibages si Abram. Sura-surana naing mbungkas mi tanoh Kanaan. Tapi soh kessa kalak i mi Haran, gabè merian i sidi mo kalak i. 32Janah i sidi mo matè si Terah tikan merumur 205 tahun.
Markert nå:
1 Musa 11: LAIBTD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)