Mateus 28
28
Ca e' mami' ca Jeju
Marcos 16.1-8; Lucas 24.1-12; João 20.1-9
1Pi' pin iri na sábado ne, xec pa' ac cacam na pain domingo. Iri' xo' xec pin iri na pain domingo ne, maji querec xin manain pacun ca an corom pe pe xine curucun Jeju ta ac cama na Maria Madalena cam xequem Maria ma', mama' ac cacama na.
2Ane ane cocoroc mip ac ne na macan', xi quiji' qui' ara cain pawin jam co taramaja mi' non Iri' Jam ta. Xut hwet ac cain na manain pacun, joc panajao' pin ac cain na pacun ca tao' pa' nain manain ma', xao pe ac cain na pacun ma' quem. 3Ac ca coc wein ca comerem na ca joc xec ca jam co taramaja mi' non Iri' Jam ma'. Towo' tamana na womicon quem. 4Jin' tamana ac caca na oro soldado co querec wet nanain manain pacun ma'. Cocoroc tamana nana pain ca jin' nucucun. Camara' mama' ac cacain na macan'. Ac ca cono' pin caca na quem.
5Tomi' ac cacam na oro narima' jam co taramaja mi' non Iri' Jam ma': Ta jin' mahu' me ta. Taxi' inuhu' pain ca pirao' hun Jeju co tatatain mi' wa pain pana pane. 6Om pin nain i ca'. E' mami' na ta. Win ne ca wara tomi' pe cain pane. Harahap je, noro jein ca terem' pe ca ira. 7Mama' harahap je ta ac cacam na. Tomi' jujun co taxipa' ca ma', e' mami' na ta jujun. Tomi' ca' jujun quem: Wara mao nain Galileia cain. Mama' je quem, je i cain tara ca querec pe hun ta jujun. Ta ji'am pin hwein ca tomi' xuhu' ca' me nanam.
8Hwerehwet ca' hap ac cacamain na manain pacun ma'. Jin' paxi' nana, ane tomi' querec te tamana cacama ne. Maji jein hwet xuxun co taxipa' ca cwain. Tomi' hwet xuxun pain ca ara ne con Jeju ta nana.
9Ane ane win quima ho' ac cacam na Jeju pain wana. Ma' i ma' pahu' quem ac cacam na.
Xuruxut hwet ac cocon na, pe torotop mi' ac cocon na, pe horoman tapan' ac cacamain na caximacon. Tomi' querec te tamana nonon pain ca in ac cocon ma'.
10Ta jin' hwe me ta ac cacam na. Mo tomi' jujun xere cwain. Mama' jein Galileia cain jujun. Je i cain tara ca querec pe mahu' ta nuhu' ca' jujun ta na ca tomi' cacam ma'.
Ca tomi' mixein nucucun oro soldado
11Jein jein wet iri nanain wana oro narima' ma' ne, in mama' ac cacain na cidade win ma' caca oro soldado co querec wet nanain manain pacun ira. Mo hwet nonon oro taramaxicon nucucun oro sacerdote ma', tomi' hwet tomi' hwet pi' pin nonon pain carawa ca ara ca ara pe ne pain manain pacun ma'.
12Tomi' cut in xuxun oro win taramaxicon iri' pain ca judeu iri' ca' nana, cut in ac xucucun na, tomi' xo' ac xucucun na. Cut mi' moin' ac tococwa na pain dinheiro oro soldado ma'. 13Tomi' ac tococwa na: Tomi' ca' jujun oro wari' me: Pi'am iri urut ne, maqui' towa ac caca na co taxipa' ca ma'. An mao ac cacain na curucun, ac i ma' tara ca tomi' huhun oro wari' ta tata. 14Mo ta taxi' cuhu' taramaxicon ma', tomi' xo' ac xut con tara, om ca em' caca ta xut con pahu', tomi' tomi' na pin ac xut con tara. Om ac ne tara ca quep xirac cuhu' ma', ac i ma' na ca tomi' tococwa oro soldado ma'.
15Ma ac caca na, cut mama' ac cacain na dinheiro. Tomi' ha' ac tococwa na oro taramaxicon nucucun oro sacerdote ma', tomi' mixein tomi' mixein ac tococwa na oro wari' ma'. Wiricoco co taxipa' ca co an mao nanain curucun ta nana pain ca tomi' mixein nucucun. An xin tiquin' ac cacain na oro win judeu urut co taraju nonon ma' quem. An xin tiquin' an xin tiquin' wet nanain ca tomi' mixein nucucun pain xocori ca' quem.
Ca hwet pa' caparut Jeju pain ca taxipa' urut con ca'
Marcos 16.14-18; Lucas 24.36-49; João 20.19-23; Atos 1.6-8
16Maji pain Galileia ta ac urut na pain ca taxipa' urut con Jeju ca', mama' ac urut na. Ma' 11 pin e' urut pain ca taxipa' urut con ca'. Hwet ac urut pain na pacun ca wara tomi' xo' caparut Jeju pane. 17Querec iri urut con ne, pe torotop mi' ac urut con na pain ca in ac urut con. Pe torotop mi' paxi' urut con, ane ma' caca win ma' nuxut co hehe nana ne. Wirico tara ron nana pain ca hehe nucucun.
18Xut hwet ac caparut na, tomi' ac caparut na: Mi' napa' pain ca taramaxicon wa Te Iri' Jam. Taramaxicon pe pi' pin rain pawin je macan' ta napa'. 19Je ca tomi' xuhu' ca': Hwet hwet xam' jujun oro wari' pain oro xijein macan'. Pijim' hwet jujun pain capija, ma' ta taxipa' cacapa'. Ja' jujun pain com quem. Ja' iri jujun ne, an hwet ac hwein tara wixicon Te, je pain wuxu pain ca Panxita' capa' ca', je pain wixinain Tamataracon quem. 20Ca' na jujun pain oro capija ca tomi' xuhu' pane quem, ma' ta tomi' ha' tomi' ha' xam' cacain ta. Mam' pe wet jein i ca' quem: Pe ho' cara xuhu'. Pi' pin pa' ma' tarapa' macan' ca' pahu', om ta an to camain' xuhu'. Ac i ma' na ca tomi' caparut pain ca taxipa' urut con ca'.
Je i ma'.
Markert nå:
Mateus 28: TBPN
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright 2023 Missão Novos Tribos do Brasil
Mateus 28
28
Ca e' mami' ca Jeju
Marcos 16.1-8; Lucas 24.1-12; João 20.1-9
1Pi' pin iri na sábado ne, xec pa' ac cacam na pain domingo. Iri' xo' xec pin iri na pain domingo ne, maji querec xin manain pacun ca an corom pe pe xine curucun Jeju ta ac cama na Maria Madalena cam xequem Maria ma', mama' ac cacama na.
2Ane ane cocoroc mip ac ne na macan', xi quiji' qui' ara cain pawin jam co taramaja mi' non Iri' Jam ta. Xut hwet ac cain na manain pacun, joc panajao' pin ac cain na pacun ca tao' pa' nain manain ma', xao pe ac cain na pacun ma' quem. 3Ac ca coc wein ca comerem na ca joc xec ca jam co taramaja mi' non Iri' Jam ma'. Towo' tamana na womicon quem. 4Jin' tamana ac caca na oro soldado co querec wet nanain manain pacun ma'. Cocoroc tamana nana pain ca jin' nucucun. Camara' mama' ac cacain na macan'. Ac ca cono' pin caca na quem.
5Tomi' ac cacam na oro narima' jam co taramaja mi' non Iri' Jam ma': Ta jin' mahu' me ta. Taxi' inuhu' pain ca pirao' hun Jeju co tatatain mi' wa pain pana pane. 6Om pin nain i ca'. E' mami' na ta. Win ne ca wara tomi' pe cain pane. Harahap je, noro jein ca terem' pe ca ira. 7Mama' harahap je ta ac cacam na. Tomi' jujun co taxipa' ca ma', e' mami' na ta jujun. Tomi' ca' jujun quem: Wara mao nain Galileia cain. Mama' je quem, je i cain tara ca querec pe hun ta jujun. Ta ji'am pin hwein ca tomi' xuhu' ca' me nanam.
8Hwerehwet ca' hap ac cacamain na manain pacun ma'. Jin' paxi' nana, ane tomi' querec te tamana cacama ne. Maji jein hwet xuxun co taxipa' ca cwain. Tomi' hwet xuxun pain ca ara ne con Jeju ta nana.
9Ane ane win quima ho' ac cacam na Jeju pain wana. Ma' i ma' pahu' quem ac cacam na.
Xuruxut hwet ac cocon na, pe torotop mi' ac cocon na, pe horoman tapan' ac cacamain na caximacon. Tomi' querec te tamana nonon pain ca in ac cocon ma'.
10Ta jin' hwe me ta ac cacam na. Mo tomi' jujun xere cwain. Mama' jein Galileia cain jujun. Je i cain tara ca querec pe mahu' ta nuhu' ca' jujun ta na ca tomi' cacam ma'.
Ca tomi' mixein nucucun oro soldado
11Jein jein wet iri nanain wana oro narima' ma' ne, in mama' ac cacain na cidade win ma' caca oro soldado co querec wet nanain manain pacun ira. Mo hwet nonon oro taramaxicon nucucun oro sacerdote ma', tomi' hwet tomi' hwet pi' pin nonon pain carawa ca ara ca ara pe ne pain manain pacun ma'.
12Tomi' cut in xuxun oro win taramaxicon iri' pain ca judeu iri' ca' nana, cut in ac xucucun na, tomi' xo' ac xucucun na. Cut mi' moin' ac tococwa na pain dinheiro oro soldado ma'. 13Tomi' ac tococwa na: Tomi' ca' jujun oro wari' me: Pi'am iri urut ne, maqui' towa ac caca na co taxipa' ca ma'. An mao ac cacain na curucun, ac i ma' tara ca tomi' huhun oro wari' ta tata. 14Mo ta taxi' cuhu' taramaxicon ma', tomi' xo' ac xut con tara, om ca em' caca ta xut con pahu', tomi' tomi' na pin ac xut con tara. Om ac ne tara ca quep xirac cuhu' ma', ac i ma' na ca tomi' tococwa oro soldado ma'.
15Ma ac caca na, cut mama' ac cacain na dinheiro. Tomi' ha' ac tococwa na oro taramaxicon nucucun oro sacerdote ma', tomi' mixein tomi' mixein ac tococwa na oro wari' ma'. Wiricoco co taxipa' ca co an mao nanain curucun ta nana pain ca tomi' mixein nucucun. An xin tiquin' ac cacain na oro win judeu urut co taraju nonon ma' quem. An xin tiquin' an xin tiquin' wet nanain ca tomi' mixein nucucun pain xocori ca' quem.
Ca hwet pa' caparut Jeju pain ca taxipa' urut con ca'
Marcos 16.14-18; Lucas 24.36-49; João 20.19-23; Atos 1.6-8
16Maji pain Galileia ta ac urut na pain ca taxipa' urut con Jeju ca', mama' ac urut na. Ma' 11 pin e' urut pain ca taxipa' urut con ca'. Hwet ac urut pain na pacun ca wara tomi' xo' caparut Jeju pane. 17Querec iri urut con ne, pe torotop mi' ac urut con na pain ca in ac urut con. Pe torotop mi' paxi' urut con, ane ma' caca win ma' nuxut co hehe nana ne. Wirico tara ron nana pain ca hehe nucucun.
18Xut hwet ac caparut na, tomi' ac caparut na: Mi' napa' pain ca taramaxicon wa Te Iri' Jam. Taramaxicon pe pi' pin rain pawin je macan' ta napa'. 19Je ca tomi' xuhu' ca': Hwet hwet xam' jujun oro wari' pain oro xijein macan'. Pijim' hwet jujun pain capija, ma' ta taxipa' cacapa'. Ja' jujun pain com quem. Ja' iri jujun ne, an hwet ac hwein tara wixicon Te, je pain wuxu pain ca Panxita' capa' ca', je pain wixinain Tamataracon quem. 20Ca' na jujun pain oro capija ca tomi' xuhu' pane quem, ma' ta tomi' ha' tomi' ha' xam' cacain ta. Mam' pe wet jein i ca' quem: Pe ho' cara xuhu'. Pi' pin pa' ma' tarapa' macan' ca' pahu', om ta an to camain' xuhu'. Ac i ma' na ca tomi' caparut pain ca taxipa' urut con ca'.
Je i ma'.
Markert nå:
:
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright 2023 Missão Novos Tribos do Brasil