Mateus 7
7
Ca tomi' em' xijexi'
Lucas 6.37-42
1Ta tomi' em' xujuhu' pain ca pan teretem wa me ta ac tococwa na. Ma' ta om tomi' em' cuhu' pain ca pan teretem wa Iri' Jam ta. 2Mo ta tomi' em' xujuhu' pain ca pan teretem wa ma', ac i ma' tara ca tomi' em' xim cuhu' pain ca pan teretem wa Iri' Jam quem. Ca tomi' em' tamana nuhu' ma', win hwe ma' ac cuhu' tara, tomi' em' ac i ma' ac cuhu' tara pain ca pan teretem wa quem.
3Tomi' inem pain ca tomi' em' mon win ma' ma pain wijimain ca caracat nucun ma' ac tococwa na. Tomi' em' iri mon ne, an xiho' ac mon na wari' co noro e' nain wijimain tohoromi pana ca pe nain tocon win ma' ca ma'. Xi querec pin' pan cain cote ne pana ca pe nain tocon ta! 4Hot pin tain wijimain tohoromi pana ca pe nain tucum ma' xa' mon win ma' ma ra? Je i ma' ne ma ra? Cain' cain' xima quem? Ma' na ca tomi' ac i ma' ac ma ra? Pe ara xi' nain tucum cote ne pana ta. 5Ac ca iri'o' ta' ca' tara me ma ra? Hot pin cain' rain cote ne pana ca pe nain tucum ma'. Querec toha ac ma tara, ha' pin ac quem tara pain ca hot pin main wijimain tohoromi pana ca pe nain tocon win ma' ma ma'. Ac i ma' na ca tomi' tococwa ma'.
6Ta pijim' mi' huhun pain capijacon Iri' Jam oro wari' co tomi' napat nanain pain ca om howa nucucun me ta ac tococwa na. Noro jein carawa ca awi ca an terem' mi' tocwa oromijac ma'. Mo ta an terem' mi' hun pain, xin in taqui' hwet ac cuhu' tara oromijac. Noro jein wijimain pacun ca awi tamana ma', pérola ma'. Mo ta wixicao' mi' xine pain caji mijac ma', xom tapiripit pin ac nein tara quem. Ac i ma' na ca tomi' tococwa ma'.
Ca mi' ne tocwa pain carawa Iri' Jam
Lucas 11.9-13
7Tama' mi' ne jun pain oro ca param nuhu' Iri' Jam ta ac tococwa na. Mi' ac cuhu' pain tara. Tama' pirao' jein carawa ca param hwe con. Mam' ac hwein con tara. Tama' tomi' jun pain ca quep xiho' xut ta hun ma' quem. Ac ca tataca hwein tara pana ca mam' tao' pa' nein manain xiricon ma', ac ca pa xat mi' cuhu' pain tara quem. Quep xiho' ac cuhu' tara quem. 8Xi taraju wet ara tococwa oro wari' co mi' ne nonon pain carawa ta. Oro co tama' mi' ne nonon pain carawa ma', mi' mi' xam' ac tococwa pain tara. Oro co tama' pirao' nanain carawa ca param caca con, mam' ac cacain con tara. Oro co tama' tomi' nonon pain ca quep xiho' xut me cocon ma', co ac ca tama' tataca tataca cacain na manain xiricon ma', ac ca pa xat mi' tococwa pain tara man quem, quep xiho' ac tococwa tara quem.
9Am ma' ca win ma' nuhu' co wanxi' ma'. Cain' cain' ta' ca pain ca mi' ne pain capam' pan con panxica ma'? Mi' xiron pain pacun ra? Om na. 10Cain' cain' ta' ca pain ca mi' ne con hwam con quem? Mi' xiron con em' ra? Om na quem. 11Je ca tomi' xuhu' ca' ac tococwa na. Wahu' pain ca wari' hwe ma', caracat paxi' hwe, ane ma' ne xumuhu' ne. Xiram pa' taxi' huhun mana panxihwe pain ca mi' e' huhun pain carawa ca awi. Cain' cain' ca Cotere' co pe pawin cain quem? Om ta xiram pa' tamana pan ca quem? Om ta mi' cocon pain carawa ca awi oro wari' co mi' ne nonon pain ra? Mi' pan totoron pain ta.
12Je ca tomi' xuhu' ca': Oro ca ara mi' ma' tatarapari' ne huhun oro wari' ma', je i ma' tara ca ara mi' huhun quem. Wari' co ara ac i ma' ma', ac ca tomi' ha' pi' pin cain na oro ca xirao' nucun Moisés cocon oro profeta cara pane. Ac i ma' na ca tomi' tococwa ma'.
Wijimain wana
13-14Ma' 2 na wana ta ac tococwa na. Wanaji cote ne xe ma', hwara' na quimain. Xut hohot na. Mija nana wari' co xuruxut nanain quem. Wana ca mao nain ca e' cara to wa ma' iri na ne, om ca hwara' ne quimain. Om paxi' na ca xut ac xine. Ma' paric ca' e' nana co mam' nanain quem. Je ca tomi' xuhu' ca': Xuruxut mama' jein wijimain wana ca mao nain ca e' cara to wa ta. Ac i ma' na ca tomi' tococwa ma'.
Oro wari' co pijim' mixein taxipa' nana
Lucas 6.43-45
15Ma' tara xumuhu' me, ta taraju wet huhun oro wari' co profeta urut ta ximama' nunuhu' pain ca pijim' mixein nucucun ma' me ta ac tococwa na. An xiho' paxi' nanain ovelha ca awi pain ca om mana' nein ma', ac ca awi caca e' na pain curucucun. Ane om awi pan ne ximicocon ne. An xiho' e' nonon copacao' co om awi pain ca mana' nucun. 16Querec pin' iri jein ca pan teretem nucucun ne, taxi' ac huhun tara pain ca mixein nucucun. Noro jein caji pi ma'. Wina tara caji pi ra, mi tarain uva ra? Om na. Caji nahwarac ca to' taratan wari' ma' quem, wina tara ra, mi tarain figo ra? Om na quem. 17Oro panaji memem ma' quem, awi iri na panaji ne, wina awi ac ne na. Pan tem iri na panaji ne, wina pan tem ac ne na quem. 18Panaji memem ca awi ma', om ca wina pan tem ac ne. Panaji memem ca pan tem ma', om ca wina awi ac ne quem. 19Oro panaji memem ca om wina awi ma', ta' caracat pi' pin ac xine na, wixicao' mi' ac xine na pain xe quem. 20Je ca tomi' xuhu' ca': Querec pin' iri jein ca pan teretem nucucun oro wari' co profeta urut ta ximama' nana pain ca pijim' mixein cucuhu' ma' ne, taxi' ac huhun tara pain ca mixein nucucun ta.
21Oro wari' co Taramaxicon ne nanapa' ma', Taramaxicon ne Taramaxicon ne paxi' nanapa', ane om taramaxicon pe ho' taramaxicon pe ho' xam' cocon Te Iri' Jam co pe pawin ne. Taramaxicon pe ho' e' tata co ara nanain ca param nucun Te. 22Maqui' iri tara xec nein ca tomi' xo' toton ta' oro wari' pain oro carawa ca ara caca pain ca e' e' wet nucucun ca' ne, mija ac caca tara co tomi' mixein ca' nanapa': Taramaxicon nuxut, Taramaxicon nuxut, om ca querec pin' maparut ra? Om ca tomi' hwet taxipa' urut pain wuxum pain ca pijim' urut pain capijam pane ra? Om ca tomi' hwet taxipa' urut pain wuxum pain ca tomi' jein pin urut cocon oro caxicon jam pane ra, je pain ca an hwet urut pain ca hwara' opa nem pain ca ara urut pain carawa ca om ara taxi' ne ca wari' wa pane quem? Tomi' mixein ac i ma' tatarapa'. 23Tomi' ac toton tara: Om ca querec pin' camain' xuhu' pane ta. In ca' xine ta oro caracat co pan teretem nana, ac i ma' tara ca tomi' toton ta na ca tomi' tococwa ma'.
Wari' co quep pe nain xirim pain pacun, xucun wari' co quep pe nain xirim pain namaji quem
Lucas 6.46-49
24Je ca tomi' xuhu' ca' ac tococwa na. Wari' co taraju wet nain ca tomi' ne ca', co tomi' ha' napa' ma' quem, ma' na ximicon. An xiho' non wari' co coromicat xo' ma', co quep pe nain xiricon pain pacun. Quep pin iri nain xiricon ne, 25aram aram pan' ac ne na xowi'. Pan' tamana pan' tamana, we' pin ac ne na com. Nuru mip ac ne na hotowa pain xiricon. Nuru mip nuru mip paxi' na hotowa pain xiricon ma', ane om pa cat mao ne ne. Xi om ne ca pe ho' ara nein pacun ta.
26Wari' co taraju paxi' nain ca tomi' ne ma' iri na ne, taraju paxi' napa', ane om tomi' ha' capa' ne. An xiho' non wari' co om coromicat xo' ma', co quep pe nain xiricon pain namaji. Quep pin iri nain xiricon ne, 27aram aram pan' ac ne na xowi'. Pan' tamana pan' tamana, we' pin ac ne na com. Nuru mip iri nain xiricon hotowa ne, pa cat mao ac ne na. Pa caracat pi' pin na. Ac i ma' na wari' co tomi' ha' nain ca tomi' ne ca', ac i ma' na wari' co om tomi' ha' nain quem. Ac i ma' na ca pijim' ca Jeju pane.
28Maho' iri nain ca pijim' wa ne, wa wa ac caca na oro wari' co taraju nanain ca pijim' nucun. 29Xi an hwet pan ara cain ca hwara' opa nucun pain ca ca' na cain capijacon Iri' Jam ta. Om ca an xiho' tococwa oro co tomi' capijacocon e' nana pain ca ca' na taxipa' nanain ca xirao' nucun Moisés ma'.
Markert nå:
Mateus 7: TBPN
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright 2023 Missão Novos Tribos do Brasil