Ҳастӣ 3
3
Инсуни гуноҳ
1Мор чи ҳама саҳроти ҳайвунтик, Худованд Худой ҳаст акун, айёртар хой. Ке мор заифайса аво: "Оё Худо баростӣ аво, ки чи ягун боғи дарахтти мевай нахорт?"
2Заифа мориса аво: "На! Мох чи боғи мевоти дарахтти хварак тунимишт, 3лекин Худо аво, ки чи дарахти меваик, боғи бидуни хаст, нахорт, ке ави даст нарасунт, мабодо мирт".
4Мор заифайса аво: "На! Шумох намиртишт. 5Балки Худо ғиривчӣ, метик, чи ави хортишт, ғурдотшинт пета вичию шумох Худой мета витишту неку бад ғирифтишт".
6Заифа авенк, ах дарахт хараки бахша хубу ғурдай хушру яхшчӣ, ке дониши туфарак тунчӣ. Пас чи ави мевай ачину ахвар, ке виришк, авипи хой, атуфар, ке ах тим ахвар. 7Ниҳит вахти дутити ғурдотиш пета авоору ахтит ағириворк, лучор. Ке анҷири баргт ягдигарипи ашию хапти бахшашинт лунгит соз акунор.
8Баъд вахтик, ахтит Худованд Худой овозк, салқини мети боғи алаксишт, адуғушор, чи Худованд Худой боғи дарахти бидун баҷо авоор. 9Аммо Худованд Худо Одами фарёд акуну аво: "Куишт?"
10Аво: "Овозт боғи адуғушиму ачукайрим, чобахшак лучим, ке баҷо авим".
11Худо аво: "Ках тавса аво лучишт? Оё чи ав дарахтик, тавса нахвар вотам ой, ахварӣ?"
12Одам аво: "Ит заифаик, ман атуфарӣ, чи ав мевай ман атуфар, ке ман ахарим".
13Ав вахт Худованд Худо заифайса аво: "Иш чо арк хойк, акунӣ?" Заифа аво: "Мор ман фиреб акун, ке ман ахварим".
14Пас Худованд Худо мориса аво: "Ит арки бахшат ту бисёртар чи ҳама чорпою саҳроти ҳайвунт, лаънатӣ вӣ. Дарайпит рот шавишту тамуми умрит ғирек хваришт.
15Туву заифай бидуни, ке тав наслу заифай насли бидуни душманӣ видумишт. Ах тав сар човчӣ, ту ави пашна деҳишт".
16Баъд заифайса аво: "Ҳомилай вахтит ранҷу азобт ғули кунумишт, пуллотит дардипи заништ. Вирисат майл куништ, аммо ах тав сардорӣ кунчӣ".
17Ке Одамиса аво: "Азбаски инчи гапт ғуш адорию чи ав дарахти мевай ахарик, Ман "чи ави нахорт", вотам ой, замин лаънат вичӣ, ке тамуми умрит чи замин азобипи нун хваришт.
18Замин тав бахша хору хас жуворчӣ, ке ту саҳрой вайшт хваришт.
19Чи ғирек соз витаишт, ке то ғирекиса гардаки метисат, пешунӣ арақипит нун хваришт. Зеро ту ғирекишту ғирекиса гардишт".
20Одам инчиш Ҳавво нум амун, чобахшак ах ҳама зиндоти оча авӣ. 21Ке Худованд Худо чи пуст либос акуну Одаму инчиш ануғунтун.
22Баъд Худованд Худо аво: "Инак, одам Мох мета витаху неку бад ғиривчӣ. Акнун мабодо даст ван куноту чи ҳаёти дарахти мевай тим носот харот, ке то абад зинда пирахсот". 23Пас Худованд Худо ави чи боғ нуки акун, то заминик, чи ави ҳаст авӣ, арк кунот. 24Баъди Одами нуки карак, Худованд Адани боғи шарқи немай каррубитию чархдеҳна уловӣ шамшерти амун, то ҳаёт дарахти рот посбунӣ кунонт.
Markert nå:
Ҳастӣ 3: yai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2022, Wycliffe Bible Translators, Inc. All rights reserved. Text used by permission.