Lukë 23
23
'Ü faa' Jesu Pilatëa ‑nyɛɛ
Matiö 27.1-2,11-14; Marëkë 15.1-5; Jaan 18.35-38
1Nyüüa 'fɩɔ nya sɔsɔwʋ, 'ünya fa 'ɔɔn Pilatëa ‑nyɛɛ. 2'Ü 'tɔa' nɩ, ‑gbagblɛ 'ü ‑tʋ 'ɔɔn ‑gälɩ, 'ü ‑nëma: «Nyɔɔlɔ kʋa' ‑pɩ nɩ, ana 'brea nyüü 'ɔ 'tuto, 'üa 'wli 'lɩ 'ɔ 'paa cacɩwii 'ümä ‑yrɛ be, anya 'kplara 'ɔɔn ‑gälɩ. 'Ɔ ‑gbala 'üün 'ünyɩ 'pɛɛ Sesaa dapoo, ‑bɛ 'ɔ ‑gbala 'üün ‑maa 'ɔɔ bä 'kɩɩlɔ 'ü 'daraa' 'Kriisë.» 3Pilatë nya 'bete 'ɔɔn: «Juifëa 'kɩɩ bä?» Jesu ‑nëma: «‑Na mlɩ 'i ja.» 4'Ia ‑gʋ Pilatë nya ‑gbala ‑gbɔsapɛrɩnyüü kpakü nyra ‑jria ‑maa: «'Nyɩ 'jä wiili kä ‑gʋ 'mäa' nyɔɔlɔ kʋa' ‑pɩ 'bla ‑a.» 5‑Maa 'ü blara, 'ü ‑nëma: «'Bala Galilee, ‑a ‑srörö Judeea ‑tʋtʋa 'fɩɔ ‑gälɩ, ‑a ji ‑tɛ, 'ɔa 'kpɩkpɩakʋ 'jrara nyüüa polu.»
Erɔɔdëa ‑nyɛɛ
6Pilatë 'nröröa' 'üa mlɩ Galilee 'wli nɩ, 'ɔnya 'bete nyɔɔlɔ ɔma bä Galileenyɔɔ. 7'Ɔ 'nua' ‑maa Erɔɔdëa ‑tʋtʋ ‑gälɩa nyɔɔ 'ɔ bä nɩ, 'ɔnya fa 'ɔmɩ 'ɔɔn ‑tɛ 'lɩ Erɔɔdë bäa', 'be 'ia 'taɩn 'lɩ 'ɔa 'mʋgbɛ bä Jerusalɛɛmë. 8Dɔrʋ 'bla Erɔɔdë 'ɔ 'jäa' Jesu; ‑mää ‑mlatɩkä 'ɔnyɩ 'ɔɔn 'bata 'ɔmä 'ɔɔn 'jä, 'be 'ɔ 'nöö 'ɔa 'nyrɩ 'wli ‑gböösa. 'Ɔ 'bata 'ɔmä ‑saragbi nʋ 'ɔmä 'ɔɔn 'jä. 9'Ɔ 'betre 'ɔɔn wii 'kɔkɔmlɛ 'lɩ, ‑maa 'ɔnyɩ 'ɔɔn mɛ dɛrɩ ‑a cɛrɛ. 10‑Bɛ ‑gbɔsapɛrɩnyüü kpakü nyra ‑dɔkpɩanyüü 'nyüglö, ‑bɛ 'ü ‑tʋʋä 'ɔɔn ‑gbagblɛ ‑gälɩ ‑gböösa. 11Erɔɔdë, nyra 'ɔa 'sʋgɩa, 'böö 'ɔɔn 'klɩ ‑bɛ 'ü srörö 'ɔɔn. 'Ünya 'pa 'ɔɔn 'kotulu plöa' ‑gälɩ, 'ünya 'blöö 'ɔɔn Pilatëa ‑nyɛɛ dɛrɩ. 12'Ia ‑srɩlɩa 'mlɩ nɩ, Pilatë nyra Erɔɔdë nʋ ‑gbötüdɛɛ, 'be 'ü ma 'nyɩ 'jäjrä 'nyüa 'mlɩ ‑a.
‑Gäa 'böbökʋ
Matiö 27.15-31; Marëkë 15.6-20; Jaan 18.39-40; 19.1-16
13Pilatë nya we ‑gbɔsapɛrɩnyüü kpakü, nyüüa 'wliklɩa nyüü nyra nyüüa 'fɩɔ, 14'ɔnya ‑gbala 'üün: «'A ja 'mɩ nyɔɔlɔ kʋa' ‑pɩ, ɔ 'a 'daaa' ‑maa nyüü 'ɔ 'tuto, 'ana 'klʋɩ 'nyaa 'bete 'ɔɔn. Wiili 'a 'daa ‑maa 'kpɔɔ 'ɔ nʋa' 'nyɩ 'jä 'ia dɩjɔ 'doo 'wʋ ‑a; 15Erɔɔdëa 'mʋgbɛ 'nyɩ 'jä 'ia dɩjɔ 'doo 'wʋ ‑a. 'Be 'ia ‑gʋ 'ɔ 'blöö amɩ 'ɔɔn bei 'wʋ dɛrɩ#23.15 'ɔ 'blöö amɩ 'ɔɔn bei 'wʋ dɛrɩ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'nyaa blɔ 'amɩ 'ɔa ‑nyɛɛ., wiili 'ɔ nʋa' i kä ‑gʋ 'ɔmäa' jä 'inyɩ 'lɩ ‑a bä. 16'Ia ‑gʋ 'sɛpɛ 'nëmä 'ɔɔn 'sɛpɛ, ‑bɛ 'mä 'ɔɔn ‑wälɩ 'cɛrɛ.» 17‑Bɛ ‑glɩsɩglɩsɩ 'mäa' 'lɩjrä nɩ, 'ɔ kä 'ɔmä ‑jienyɔɔ 'doo ‑wälɩ 'cɛrɛ#23.17 ‑Taa 'pɛlɛ (17) 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. 18‑Maa 'üa 'fɩɔ ‑gölöa' 'ü nɩnɩa: «'Bla nyɔɔlɔ kʋa' ‑pɩ! ‑Cɛɛrɛ Barabasë ‑wälɩ!» 19Barabasëlɔ nɩ, ɔ bä kä toubenyüüa ‑tɔrʋpɩɔ, 'ɔnya 'blara bätäläa 'mlɩ nyɔɔ 'doo. 'Ia ‑gʋ 'ü 'pa kä 'ɔɔn ‑jie 'lɩ. 20Pilatë nya ‑gbala 'üün 'sɔɔwʋ, 'be 'ɔ 'bata Jesua ‑wälɩcɛrɛkʋ, 21‑maa 'ünya 'kpöö: «Kolo 'ɔɔn krʋa ‑gälɩ! Kolo 'ɔɔn krʋa ‑gälɩ!» 22'Ɔnya 'bete 'üün tääfawʋ: «Bʋbɔgbi 'plɛɛ 'ɔ nʋ le? 'Nyɩ 'jä dɛɛlɛ 'ɔ nʋa' i kä ‑gʋ 'ɔmäa' 'blara 'wʋ ‑a. 'Ii känyrɩ nɩ, 'sɛpɛ 'mä 'ɔɔn 'sɛpɛ ‑bɛ 'mä 'ɔɔn ‑wälɩ 'cɛrɛ.» 23‑Maa 'ü blara, 'ü nɩnɩa 'kpɔɔ ɔ kolo krʋa ‑gälɩ. 'Üa mlɩa wii nyra ‑gbɔsapɛrɩnyüüa mlɩa wii#23.23 nyra ‑gbɔsapɛrɩnyüüa mlɩa wii: ‑Taa ‑waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä. ‑sööö 'wʋ. 24Pilatë nya 'nyie 'ɔmä wiili 'ü 'daaa' nʋ. 25Nyɔɔlɔ bea' tou, ɔ 'blaa' nyɔɔ ‑bɛ 'ü 'paa ‑jie 'lɩ nɩ, ɔ 'ü 'daaa' ɔ 'cɛrɛa' ‑wälɩ nɩ, 'ɔnya 'balɩ 'ɔɔn; 'ɔnya 'sara 'üün Jesu kälɩ, 'ü nʋ wiili 'ü 'bataa'.
Gɔlëgotaa 'nyʋfɔ mlɩ
Matiö 27.31-32; Marëkë 15.20-21; Jaan 19.17
26'A mö 'ü mö ɩ, 'ü nyra Sirɛɛnëbätäa nyɔɔ 'doo 'ü 'dara Simɔɔ nya traraklɩ, 'ɔ sɔ ɩ 'klʋɛɛ. 'Ünya 'kpla 'ɔɔn, 'ünya tro 'ɔɔn krʋa 'wli 'kä 'ɔ ‑mɛɛɛ Jesu ‑gälɩ. 27Nyüü 'kɔkɔmlɛ prɛ 'ɔɔn dɛrɩ. 'Ŋlëgë 'kɔkɔmlɛ bɔtɔ 'üa ‑tɔklʋ#23.27 'A 'üa 'sa. 'Sɩrɩ ama 'wua ‑bɛ a ‑tʋʋäa' plɛklɩ 'dari, 'aiɛ a troa' 'dari 'wli. ‑bɛ 'ü 'wuö. 28Jesu nya ‑sie 'üa 'pɛlɩ kälɩ, 'ɔ ‑nëma: «Jerusalɛɛmëa 'ŋlëkayörü 'amɩ, 'anyɩ 'wu 'na ‑gʋ. ‑Maa, 'ba 'wu 'ana në ‑gʋ nyra 'ana 'jüa ‑gʋ! 29'Be 'ia 'taɩn nya jia, ‑plɩɩ nyüü 'mäa' 'daa: ‹Dɔrʋ 'blaa 'amɩ, 'amɔ ‑gbɔa' nyra ‑mülü ‑kaapɩɔ 'jʋ ‑gu, nyra ü ‑kaaa' ‑pɩɔ 'jʋ 'nyaa.› 30'A ‑plɩɩ nyüü 'mä 'dʋgbë kpakü ‑gbala: ‹'Ba blö amɩ ‑gälɩ›, 'kä 'ünya 'dʋgbëjie ‑gbala: ‹'Ba ‑sisie amɩ#23.30 Osee 10.8.!› 31Nyüü ma nʋ 'saa tuu 'jɩjarɛ nɩ, ‑asɩ mamatuua ni nya bä le?»
Jesua krʋa ‑gälɩa kolokʋ
Matiö 27.33-37; Marëkë 15.22-26; Jaan 19.17-27
32'Ü fa bɩa ‑srɩ 'dooläa 'mlɩ 'jejienyüü 'sɔɔ 'ümä 'üün 'bla 'üü ‑bɛ Jesu. 33'Ü 'tɔa' ‑plɩɩlɩ 'ü 'daraa' Gɔlëgotaa#23.33 Gɔlëgotaa: 'Ia ‑gbaa bä: «'wukapɛa ‑gba». nɩ, 'a ‑plɩɩ 'lɩ 'ü kolo 'ɔɔn, 'ɔɔ ‑bɛ 'jejienyüülü krʋë ‑gälɩ, 'doo bä 'dupa 'lɩ, 'doo nya bä 'ɔa kʋmla 'lɩ. 34Jesu ‑nëma: «'Na tʋ, cere 'ümɩ 'iin; wiili 'ü nöa', 'ünyɩ 'iin jre ‑a jre.» 'Ünya 'pa ‑tɔɔo 'ümä 'ɔa 'koti ‑pä. 35‑Bɛ nyüü 'nyüglö 'ü tɛ tɛ 'üün 'klɩ. 'Kamanyüü nyra nyüü ‑mölöö srörö 'ɔɔn ‑bɛ 'ü nö: «'Ɔ 'pʋɔ nyüü ‑mölöö; ɔma bä 'Kriisëlɔ Nyɔsʋa 'baa' 'lɩ nɩ, 'kä 'ɔ 'baalɩ 'ɔa nyufa mlɩ 'la!» 36'Sʋgɩanyüüa 'mʋgbɛ srörö 'ɔɔn; 'ünya jijrö 'ɔɔn ‑gba 'ünya ‑nyɩ 'ɔɔn viinɛgrë, 37‑bɛ 'ü nö: «‑Ama bä juifënyüüa 'kɩɩ, 'balɩ ‑na nyufa mlɩ!» 38'Ɔa 'wlili nɩ, 'ü ‑jɩjra tuu 'pɛ ‑gälɩ ‑maa: «Nyɔɔlɔ kʋa' ‑pɩ bä juifënyüüa 'Kɩɩ.» 'Ü ‑jɩjra 'iin grɛɛkëwii 'lɩ, latɩɩnwii 'lɩ nyra ebrööwii#23.38 'Ü ‑jɩjra 'iin grɛɛkëwii 'lɩ, latɩɩnwii 'lɩ nyra ebrööwii: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. 39'Jejienyüülüa ‑tɔrʋpɩɔa 'doo ‑jejre ‑bɛ 'ɔ nö: «‑Nyɩ 'daa ‑mɔ bä 'Kriisë, 'balɩ ‑na nyufa mlɩ, 'kä ‑baalɩ amɩ mlɩ 'la!» 40‑Maa 'sɔɔa nʋlɔ nya ‑gbala 'ɔa ‑mɔlɔ: «‑Nyɩ 'nɩmɩ Nyɔsʋaa ŋalɛ ‑a kä, ‑mɔ nyra 'ɔmɩ kɔsɔ 'ü ‑tʋa' ‑sʋɛ 'dee 'lɩ? 41Ana nɩlɩ nɩ, 'ü kä ‑gä 'ümä amɩ 'pɔnɩ, 'be wiili a nʋa' 'ia 'pɛɛ bäsaa. ‑Maa ‑taa nyɔɔlɔ nɩ, 'ɔnyɩ ‑balʋ ‑a nʋ.» 42'Ɔnya ‑gbala Jesu: «'Pläkänyɔɔ#23.42 'Pläkänyɔɔ: ‑Taa ‑waklöölä 'nyɩ grɛɛkë kätɩpɔɔkɩ ‑mɩdooa 'mlɩ ‑a bä., 'taɩn 'lɩ ‑mäa' ‑na 'kamapläa 'mlɩ pa nɩ, 'pa 'na ‑gä plɛ.» 43Jesu nya ‑gbala 'ɔɔn: «'Cɩcasa 'n ‑gbala ‑mɩ, 'nyraa ‑mɔ nya Paradii#23.43 Paradii: ‑Plɩɩ nyüü Nyɔsʋa 'baa' 'lɩmlɩ kʋäa' ‑bɛ 'ü ‑glaaa' ‑gäa 'taɩn. mia 'saarɩ.»
Jesua jäjäkʋ
Matiö 27.45-54; Marëkë 15.33-39; Jaan 19.28-30
44'Jrʋ 'a ‑sopuplö. 'Jöjrüükpü nya pala 'ia 'blɩlɩa 'fɩɔ ‑gälɩ palapalaa ‑gbiajrʋa ‑gliiibei tää#23.44 ‑gbiajrʋa ‑gliiibei tää: Grɛɛkëwii nö: «'Jöjrüükpü nya pa ‑tʋtʋa 'fɩɔ ‑gälɩ, ‑sɔ ‑gliiibei ‑uundoo 'lɩ ‑a mi ‑a ‑tɔɔ ‑gliiibei ‑uunmlɔɔ 'lɩ.» Juifëa ‑nyɛɛ nɩ, 'taɩn 'lɩ 'jrʋ 'tɔɔa', 'a ‑plɩɩ 'ü 'bala 'taɩn a ‑täsäkʋ. 'Jrʋlʋ ma 'mɩmrɛlɩ nɩ, 'i bä ‑gliiibei ‑uundoo 'üa ‑nyɛɛ. ‑Gbiajrʋa ‑gliiibei tää 'lɩ, 'a ‑plɩɩ 'ü 'blaa 'Paakëa ‑bablëë.. 45'Jöjrüükpü nya 'prɛrɛ 'jrʋa 'klʋɩ, dɔʋlʋ bäa' Nyɔsʋaanyuku kpakua ‑wälɩa ‑tɔrʋpɩɔ nya ‑gaala 'lɩ#23.45 Dɔʋlʋ kä 'kpökpü ‑gböösa. Dɔʋlʋ kä 'kpökpü ‑gböösa. 'U kʋ Nyɔsʋaa Papapɩɔa palafa 'wʋ. Nyɔsʋa 'ɔɔ 'ŋlara 'uun. 'Ii ‑gbala amɩ 'sɩrɩ Jesua jäjäkʋ 'saa 'ɔa ‑glügbö 'nyʋfɔ 'ümä Nyɔsʋaa 'klʋɩ 'nyüglö ‑mlatɩ.. 46Jesu nya 'kpö ‑gböösa 'ɔ ‑nëma: «'Na tʋ, 'n ‑nyɩ ‑mɩ 'na ‑susu kälɩ#23.46 'Lɩbrɛrɛpɔɔkʋ 31.6..»
'Ɔ bɩaa' 'saa wiipapakʋ 'ɔnya jä. 47'Sʋgɩakamanyɔɔ 'jäa' wiili nröröa' nɩ, Nyɔsʋa 'ɔ 'bʋala; 'ɔ ‑nëma: «'Cɩcasa, nyɔɔlɔ kʋa' ‑pɩ 'ɔ ‑gä ɩ 'klɩ.»
48Nyüülü ji ɩa' ‑taalä 'jäkalɩ nɩ, 'ü jäa' wiili nröröa' nɩ, 'ü bɔtɔ 'üa ‑tɔklʋ#23.48 Tɛ wiili ‑jɩjraa' waklüü 27 ‑wälɩ. ‑bɛ 'ü 'blöödɛrɩ nyatɛsa. 49'Ɔa jejrenyüüa 'fɩɔ nyra 'ŋlëgëlü jaraa' 'üün sɔrɔ Galilee. 'Ü tʋŋlɔlɩdɛrɩ ‑bɛ 'ü ‑pʋpɔ wiili nröröa'.
Jesua ‑tʋtʋkʋ
Matiö 27.57-61; Marëkë 15.42-47; Jaan 19.38-42
50Juifëa tropina 'lɩa nyɔɔ 'doo bälɩ, 'ɔɔ 'ü 'daraa' Josɛɛfë. 'Ɔ bä kä 'mʋfanyɔɔ 'ɔnya ‑gäklɩ. 51'Ɔɔlɔ nɩ, 'ɔnyɩ kä 'üün ‑a 'nyiere. Juifëa bätä 'dööa 'mlɩ 'ɔ sɔ, 'ää 'ü 'daraa' Arimatë. 'Ɔa 'mʋgbɛlɔ#23.51 'Ɔa 'mʋgbɛlɔ: ‑Taa waklöölä 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä., Nyɔsʋaa 'kamaplä 'ɔ ‑glaaa. 52Nyɔɔlɔ nya mi Pilatë 'klɩ 'nyüglö, 'ɔmä 'ɔɔn Jesua jäjäa nɔ ‑nyɩ. 53'Ɔ 'ciea' 'ɔɔn krʋa ‑gälɩ, 'ɔnya ‑fifra 'ɔɔn 'cɩcrɛɛ, 'ɔnya fa 'ɔɔn 'täkä kpakölä 'ü 'kɔtɔa' 'lɩ, 'äa 'mlɩ 'piekalɩ. 'Ü ‑kaapɩɔ 'äa 'mlɩ nyɔɔ ‑träärä. 54'I bä kä ‑Ëleresrɩ 'fɩɔwʋ ‑bɛ ‑fʋflʋpasrɩ 'mä 'lɩjrä. 55'Ŋlëgë 'nyɛrɛa' Jesu ‑gba 'bala Galileebätä nɩ, 'ü ‑mɛ Josɛɛfë ‑gälɩ. 'Ü 'jä 'kuyulu, 'ünya 'jä 'sɩrɩ 'ü ‑tʋa' 'ɔɔn. 56'Ünya 'blöödɛrɩ, 'ünya pi 'nɔnʋpakpɩ nyra ‑daŋlʋɩnɩ#23.56 'nɔnʋpakpɩ nyra ‑daŋlʋɩnɩ: Juifëa ‑nyɛɛ nyɔɔ ma jä 'ü 'paa 'ɔɔn 'nɔnʋpakpɩ nyra ‑daŋlʋɩnɩ.. 'Ünya 'pa ‑fʋflʋ ‑fʋflʋpasrɩ 'lɩ, 'be 'asɩ 'üa ‑dɔ ‑gba#23.56 Ɛgësɔɔdë 20.10; Deteronɔɔmë 5.14..
Markert nå:
Lukë 23: Bakwé
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Wycliffe Bible Translators, Inc.