Basketo - 2014 BSE (NT) Drama

Basketo - 2014 BSE (NT) Non Drama

“ቴ ዪንታ̇ክ ኪን ጋ̈ሬ፤ ዶራንኮ ሞ̈ ጋርታ̇ ካሪን ኣሻ̇ሪ ሜላ ጎይባራ ባ̇ር ጌሊዛ̈ዲ ሶ̈ላኬ ቡሪዝ ኣሴ። ካሪንባር ጌሊዛ̈ዲ ዶራን ዬጚዝ ና̈ሳ̈̈ዳ። ካሪን ና̈ጊዛ̈ዲ ኢ̈ቦ ካሪን ፊርቂ̇̈ሬ፤ ዶራንሬ ኢ ቆ̈ን ሲስኪ̇̈ሬ፤ ኢያር ፌ ዶራን ኢንታ̇ ሱምምባር ጼይጊ̈ሬ ማ ቲ̈ናሪ ኢንታ̇ ዛ̈ና ኤ̈ጚ̈ሬ። ፌ ዶራን ኬሲ̇ኖፖ̇ ዓኒ ኢንታ̇ ቲ̈ኒን ቲ̈ኒን ኣ̈̇ር ዬ̈ሬ፤ ዶራንሬ ኢ ቆ̈ን ኤራዚንኮታ̇ቦ ኢ ዎሂን ዬ̈ሬ። ና̈ሳ ሜላኮ ቆ̈ን ኤሪባ̈ሶኮታ̇ቦ ኢ ጋልዳፖ̇ ዎጺርዶኬ፤ ኢ ዎሂን ዬባሴ” ጌይዴ።
ኢ ዪኖ̇ ሚሳ̈ሊን ኢንታብ ሶ̈ሊዴ፤ ዎቲናካሬ ኢ ሶ̈ሊኖን ኢንታ̇ብ ጌላካ̇ዬ።
ዪ̈ኮታ̇ቦ ኢ ማሃር ኢንታኮ “ቴ ዪንታ̇ክ ኪን ጋ̈ሬ፥ ዶራንቦ ካራ ታ̈ና። ታ̈ፖ̇ ቲ̈ን ዬይኖን ዎይ ሶላኬ ቡሪዝ ኣሴ፤ ዎቲናካሬ ዶራን ኢንቲ̇ ጋ̈ዚን ሲስካካዬ። ጌሊዝ ካራ ታ̈ና፤ ቴ ጎይባራ ጌሊዛ̈ዲ ፋጺ̈ሬ፤ ጌሊ̈ሬ፤ ኬሲ̈ኪሬ፤ ኮሽ ማ̈ታ ዎ ቤሳ̇ር ዲጚ̈ሬ። ሶላ̈ዲ ዉቃ̇ንዳ̇ቦ ሹካ̇ንዳብኬ ይሳ̇ንዳብ ሙታ̇ ዬዪሬ፥ ቴ ዬይኖንዳ ቴ ዶራን ሜናብ ሼምፓባር ዶኢ ዲጛምፔ̈ንኬ ፔቲ̇ ባዝ ኣባክ ኢንታ̇ብ ዪኖ ባዝ ባዪዶ̈ር ዶኣምፔ̈ኔ።
“ኮሽ ዬ̈ን ና̈ሳ ታ̈ና፤ ኮሽ ዬ̈ን ና̈ሳ̈ዲ ፌ ዶራን ጊሽ ፌ ሼምፒ̇ን ዓይቃብ ኣ̈ ኢሚ̇̈ሬ። ሚ̈ሺ̇ ጪጊ̇ን ዬጚዝ ኣሲ፥ ዶራን ኢያይ ጊዳካዮኮታ̇ብኬ ኢያር ኪን ዬን ኣስ ማ̈ቃካ̇ዮኮታ̇ቦ፥ ዬ̈ያ ዬዬ̈ጌይንዶ ዶራን ኣሻ̇ሪ ፌ ቆሚ̇ን ዎጺ̇̈ሬ፥ ዬ̈ያ̈ዳር ዶራን ላ̈ሊ̇̈ሬ ማ ዶካ̇ን ኤ̈̇̈ሬ። ዪ ዬ̈ጚዝ ናሳ̈ዲ ፌ ቆሚ̇ን ዎጻ̇ዚንዳ̇፥ ኢ ሚ̈ሻ̇ብ ኦ̈ዝ ኣስ ማ̈ቂ̇ኖኮታ̇ብኬ ዶራንቦ ቆፒ̇ባሶኮታ̇ቦ።
ኮሽ ዬ̈ን ና̈ሳ ታ̈ና፤ ታ ባ̈ባ ታ̈ና ኤራዚንዲፌ̈ንኬ ታ̈ናር ታ ባ̈ባ̈ ኤራዚንዲፌ̈ኒ፥ ታ̈ኒ ቴ ዶራን ኤራሬ፤ ኢንታ̇ር ታ̈ና ኤሪ̈ሬ። ታ̈ኒ ቴ ዶራን ጊሺ̇ምቦ̇ ቴ ሼምፒ̇ን ዓይቃብ ኣ̈ ኢማ̇̈ሬ። ቴ ሞ̈ ዓ̈ ጋርታ ባዮ̇ ሜላ ዎይሊን ዶሪ ታ̈ብ ዎ፤ ቴ ኢንታ̇ ኤሄ̈ንዳ̇ብ ኮሻ̈ሬ፥ ኢንታር ቴ ቆ̈ን ሲስኪሬ፤ ዬ̈ሪ ፔቲ̇ ዉዳ ማ̈ቂ̇̈ሬ፥ ማ ኢንታ̇ ዬ̈ጚዝ ናሳ̈ዳሬ ፔታ̇ን ማ̈ቂ̈ሬ።
“ታ̈ኒ ማ̈ቃር̇ ሼምፓባር ዶኣንዳ̇ቦ ዶሳራ ዓይቃብ ቴ ታ̈ና ኣ̈ ኢማ̇ዚንኮታ̇ቦ ታ ባ̈ባ̈ ታ̈ና ካ̈ሬ። ታ̈ኒ ቴ ሼምፒን ዶሳራ ዓይቃብ ኣ̈ ኢማ̇̈ርዶኬ ኦ̈ናካር ፌ ዎልቃባር ታ̈ና ዎንዳ̇ብ ዳንዳኢዝ ኣሲ ባዬ̇። ታ̈ኒ ቴ ሼምፒ̇ን ዓይቃብ ኣ̈ ኢማ̇ንዳባሬ ማ ዓይቃ ጋርታ̇ፖ̇ ማ̈ቃ̇ ዲንዳንዳቦ ሲልጣ̈ና ቴዬ̇። ዓና̇ ኪ̈ቲ̇ን ታ̈ኒ ኤኪ̇ኖንዳ̇ ቴ ባ̈ባ̈ ጋልዳፖ̇” ጌይዴ።
ዪና̇ ኢ ሶ̈ሊኖ ሶ̈ሊንኮታ̇ቦ ኣይሁዳን ዱማ ዱማ ቆፊ ኢንታ̇ ጊዳ̇ ኬስኪ̇ን ዎል ዎል ፋጊንቲ̇ዴ። ኢንታ̇ ጋርታ̇ፓ̇ሬ ዎይሊንን “ኢ̈ታ ኣያ̇ና ኢያ ኤ̈̇ን ኢ ዣ̈ሽቲ̇ኔ፥ ዪንቲ̇ ኢ̈ኮን ኣባብ ሲስኪ̈ራ?” ጌይዴ።
ሜላን “ዪ̈ዲፌ̈ኖ ሶ̈ላ̈ዲ ኢ̈ታ ኣያ̇ና ኤ̈̇ኖ ኣሲ ሶ̈ሊዝ ሶ̈ላ ጊዳካ̇ዬ፤ ኢ̈ታ ኣያ̇ኖ ዎቢ̇ኖ ኣ̈ፍ ፋንዳብ ዳንዳኢ̈ራ?” ጌይዴ።

ዬሩሳ̈ላም ካታሚን ጋርታ̇ ጾ̈ሳ̇̇ ኬ̈ ኦራዝ ባ̈ል ቦንቻ̇ንዳብ ኬ̈ሊ̇ ዬሊ̇ዴ። ዪና̇ ኢዝባራ ኬሊ̇ንዳ̇ ባርጊ ኣጋኔ። ዬሱ̈ሲ ጾ̈ሳ̇̇ ኬ̈ ጋርታ̇ ሶሎሞ̈ን ባራንዳ̇ ጋ̈ዝ ጎይንባራ ጌዳክ ዓኒክ ቢርንቲ̇̈ርዶን፥ ዪና̇ ኢዝባራ ኣይሁዳን ኢ ቡጊዲምባ̇ር ሺ̈ቃር ኢ̈ኮ “ኑ̈ኒ ኣ̈ንታ̇ ዬሊ̇ዝ ዲራ̈ስ ኢ ኦ̈ናዶ̈ኔ ጌዪ ሙታ̇ ዶኣኔ? ኔ̈ኒ ክርስቶ̈ሳኮ ኪንን ኑ̈ብ ሶ̈ላቤ” ጌይዴ።
ዬሱ̈ሳር ኢንታ̇ኮ “ቴ ዪንታ̇ብ ሶ̈ሊንዶ̈ን፥ ዪንቲ̇ ታ̈ና ኣማ̇ናብዳ ጌይዴ። ታ̈ኒ ቴ ባ̈ባ̈ ሱም̈ንባራ ኦዝ ታ̈ሚ̇ራ̈ታን ታ ባዝ ማርኪቲ̈ሬ። ዪንቲ̇ ቴ ዶሪ ጊዳካ̇ዮኮታ̇ቦ ታ̈ና ኣማ̇ኒባ̈ሴ። ቴ ዶራን ቴ ቆ̈ን ሲስኪ̈ሬ፤ ታ̈ናር ኢንታ̇ ኤራ̈ሬ፤ ኢንታ̇ር ቴ ዎሂን ዬ̈ሬ። ቴ ኢንታ̇ብ ሜናብ ሼምፓባር ዶኢ ኢማ̇̈ሬ፥ ዪ̈ኮታ̇ቦ ኢንቲ̇ ዉርሲ ዪባ̈ሴ ቴ ኩሺን ጋርታ̇ፖ̇ ኦ̈ናካር ቡራር ኢንታ̇ ኤኪ̇ባ̈ሴ። ኢንታ̇ ታ̈ብ ኢሚ̇ኖ ቴ ባ̈ባ̈ዲ ዎይፖ̇ ሺ̈ሬ። ቴ ባ̈ባ̈ ኩሺን ጋርታፓ̇ር ኦ̈ናካር ኢንታ̇ ቡሪ ኤካ̇ንዳብ ዳንዳኢዛ ባዬ̇። ታ̈ናኬ ቴ ባ̈ባ̈ዲኬ ዎልኣ ፔታ̇ኔ” ጌይዴ። ዪና̇ ኢዝባራ ኣይሁዳን ዬሱ̈ሳ ቆጻ̇ንዳብ ዓታ̇ር ማ̈ቃር ሹች ዲን ኤኪ̇ዴ። ዬሱ̈ሳር ኢንታ̇ኮ “ታ̈ኒ ቴ ባ̈ባ̈ ኦ̈ ጌዪ ታ̈ብ ኢሚ̇ኖ ኦ̈ሳን ጋርታ̇ፖ̇ ዎይሊን ኮሽ ኦስ ኦ̈ር ቴ ዪንታ̇ ቤይሳዴ፤ ዓት ኦ̈ሳን ዪን ጋርታ̇ፖ̇ ዎኒ̇ቢያ ዪንቲ ታና ሹችባር ቆ̈ጻ̇ንዳብ ኮያዚንዳ̇” ጌይዴ።
ኢንታ̇ር ኢ̈ኮ “ኑ ኔ̈ና ሹችባር ቆጻ̇ዚንዳ ኔ̈ኒ ኮሽ ኦ̈ሳ ኦ̈ኖምቦ̇ ጊዳካ̇ይዶ̈ን ኔ̈ኒ ጾ̈ሳ̇̇ ቆ̈ኖምቦ̇፤ ዪና̇ሬ ኔ̈ኒ ኣስዶ̈ራ ኔ ኔ̈ና ጾ̈ሴ̇ ጌይኖንኮታ̇ቦ” ጋ̈ር ማሂዴ።
ኢያር ኢንታ̇ኮ “ዪንታ̇ ሂጊ̇ን ጋልዳ̇፥ ጾ̈ሳ̇̇̈ዲ ‘ቴ ዪንቲ̇ ጾ̈ሳ̇̇ን ጋ̈ዴ’ ጋ̈ሪ ሶ̈ሊኖን ጻ̈ፊንታ̇ካ̇? ጾ̈ሳ̇̇ ቃ̈ላ̈ዲ ላ̈ሚንቲባ̈ሶን ኑ ኤሪ̈ሬ። ዪዚ ዪን ጾ̈ሳ̇̇ ፌ ቃ̈ሊን ኢንታ̇ብ ኢሚ̇ኖ ኣሳን ኢ ኢንታ̇ ‘ጾ̈ሴ̇’ ጌዪ ጼይጌጌይን፥ ታ̈ና ቴ ባ̈ባ̈ዲ ፌዬ̇ ጋ̈ር ሳ̈ዝ ጋልዳ ኪ̈ቲ ሚሺን ቴ ታ̈ና ‘ጾ̈ሳ̇̇ ናኤ’ ጌይኖንኮታ̇ቦ ዪንቲ̇ ታ̈ና ኣባቦ ‘ኢ ጾ̈ሳ̇̇ ቆ̈ኔ’ ጌዪ ሶ̈ሊ̈ራ? ታ̈ኒ ቴ ባ̈ባ̈ ኦ̈ሲን ኦባስኮ ታ̈ና ኣማ̇ናፒ̇ቴ። ታ̈ኒ ታ ባ̈ባ̈ ኦ̈ሲን ኦ̈ርኮ ዪንቲ̇ ታ̈ና ኣማ̇ናካይ ኣቴጌይናሬ ቴ ኦ̈ሲምባር ኣማ̇ኒብቴ፥ ዪኒ̇ባራ ታ ባ̈ባ̈ ታባር ዎንዲኬ ታ̈ናር ቴ ባ̈ባ̈ባር ዎን ዪንቲ̇ ኮሺንቺ̇ ኤሪ̈ሬ” ጌይዴ።
ኢንታ̇ር ዓታ̇ር ማ̈ቃ̇ር ኢያ ኤ̈̇ንዳብ ኮዪን ኢ ኢንታ ኩሽታፖ̇ ቡ̈ታ̇ር ሉኪ̇ዴ።
ዬሱ̈ሲ ማ̈ቃ̇ር ዮ̈ርዳኖ̈ስ ዋ̈ን ፊ̈ን ፊ̈ጛር ዋ̈ኒ̇ሲ ሚን ጻማ̇ቃዝ ቤሲ̇ን ዬ̈ሪ ኢና ጋምኢዴ። ዎይሊን ኣሳን ኢ̈ክ ዬ̈ሪ “ዋ̈ኒ̇ሲ ኣባካር ታሚ̇ራ̈ታ ኦካዬ፤ ዎቲናካሬ ኢ ና̈ሳ ዪ̈ኮን ሶ̈ሊኖ ባዛን ዎይ ኪን” ጌይዴ። ቤስ̇ ኢና ዎይሊን ኣሲ ዬሱ̈ሳ ኣማ̇ኒዴ።

Słuchaj ዋ̈ኒ̇ሳ 10