Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወሀሎ አሐዱ ብእሲ ዘይደዊ ዘስሙ አልዓዛር በቢታንያ ዘሀገረ ማርያ ወማርታ እኅታ። ወማርያሰ ይእቲ እንተ ቀብዐቶ ለእግዚእነ ዕፍረተ ወመዝመዘት እገሪሁ በሥዕርታ ወእኁሃ ላቲ አልዓዛር ይደዊ። ወለአካ አኃቲሁ ኀበ እግዚእ ኢየሱስ እንዘ ይብላ እግዚእነአ ናሁ ዘታፈቅር ይደዊ። ወሰሚዖ እግዚእ ኢየሱስ ይቤ ዝንቱ ደዌ ኢኮነ ለሞት አላ በእንተ ስብሐተ እግዚአብሔር ወከመ ይሰባሕ ወልደ እግዚአብሔር በእንቲኣሁ። ወያፈቅሮሙ እግዚእ ኢየሱስ ለማርታ ወለማርያ እኅታ ወለአልዓዛር። ወሶበ ሰምዐ ከመ ይደዊ ነበረ ኀበ ሀለወ ብሔር ሰኑየ መዋዕለ። ወእምዝ ይቤሎሙ ለአርዳኢሁ ንሑር ብሔረ ይሁዳ ካዕበ። ወይቤልዎ አርዳኢሁ ረቢ አኮኑ ይእዜ የኀሥሡ አይሁድ ይውግሩከ ወካዕበ ተሐውርኑ ህየ። ወአውሥአ እግዚእ ኢየሱስ ወይቤሎሙ አኮኑ ዐሠርቱ ወክልኤቱ ሰዓቱ ለዕለት ብእሲ ዘየሐውር መዓልተ ኢይትዐቀፍ እስመ ይሬኢ ብርሃኖ ለዝንቱ ዓለም። ወዘሰ የሐውር ሌሊተ ይትዐቀፍ እስመ አልቦ ውስቴቱ ብርሃን ዘይሬኢ። ወዘንተ ነገረ ይቤሎሙ ለአርዳኢሁ ወእምዝ ይቤሎሙ አልዓዛር ዐርክነ ኖመ ወባሕቱ አሐውር አንቅሆ። ወይቤልዎ አርዳኢሁ እግዚኦ እመሰ ኖመ ይነቅህ ወይጥዒ። ወእግዚእ ኢየሱስ ይቤ በእንተ ንዋመ ሞቱ ወሎሙሰ መሰሎሙ በእንተ ንዋመ ድቃስ ዘይቤሎሙ። ወእምዝ ይቤሎሙ እግዚእ ኢየሱስ ገሃደ አልዓዛር ሞተ። ወአንሰ እትፌሣሕ በእንቲኣክሙ እስመ ኢሀሎኩ ህየ ከመ ትእመኑ ወባሕቱ ንሑር ኀቤሁ። ወይቤሎሙ ቶማስ ዘይብልዎ ዲዲሞስ ለቢጹ አርዳእ ንሑርኬ ንሕነኒ ከመ ንሙት ምስሌሁ። ወሖረ እግዚእ ኢየሱስ ቢታንያ ወበጺሖ ህየ ረከቦ በዘወድአ ረቡዐ መዋዕለ እምዘተቀበረ። ወቢታንያሰ ቅርብት ይእቲ ለኢየሩሳሌም መጠነ ዐሠርቱ ወኀምስቱ ምዕራፍ። ወብዙኃን እምነ አይሁድ እለ ሖሩ ኀበ ማርያ ወማርታ ከመ ያላቅስዎን በእንተ እኁሆን። ወሶበ ሰምዐት ማርታ ከመ መጽአ እግዚእ ኢየሱስ ወፅአት ወተቀበለቶ ወማርያሰ ነበረት ቤተ። ወትቤሎ ማርታ ለእግዚእ ኢየሱስ እግዚእየ ሶበሰ ሀሎከ ዝየ እምኢሞተ እኁየ። ወይእዜኒ አአምር ከመ ዘሰአልኮ ለእግዚአብሔር ይሁበከ እግዚአብሔር። ወይቤላ እግዚእ ኢየሱስ እኁኪሰ ይትነሣእ። ወትቤሎ ማርታ አአምር ከመ ይትነሣእ አመ ትንሣኤ ምዉታን በደኃሪት ዕለት። ወይቤላ እግዚእ ኢየሱስ አነ ውእቱ ትንሣኤ ወሕይወት ዘየአምን ብየ እመኒ ሞተ የሐዩ። ወኵሉ ዘሕያው ወየአምን ብየ ኢይመውት ለዓለም ተአምኒኑ ዘንተ። ወትቤሎ እወ እግዚኦ አንሰ አአምን ከመ አንተ ውእቱ ክርስቶስ ወልደ እግዚአብሔር ዘመጽአ ውስተ ዓለም። ወዘንተ ብሂላ ሖረት ወጸውዐታ ለማርያ እኅታ ጽሚተ ወትቤላ ናሁ መጽአ ሊቅነ ወይጼውዐኪ። ወሶበ ሰምዐት ማርያ ተንሥአት ፍጡነ ወሖረት ኀቤሁ። ወዓዲሁ ኢቦአ እግዚእ ኢየሱስ ውስተ ሀገር አላ ሀሎ ውስተ ብሔር ኀበ ተቀበለቶ ማርታ። ወሶበ ርእይዋ ለማርያ አይሁድ እለ ሀለዉ ምስሌሃ ውስተ ቤት ወእለ ያላቅስዋ ከመ ተንሥአት ፍጡነ ወወፅአት ተለውዋ ወመሰሎሙ ዘተሐውር ኀበ መቃብሩ ትብክዮ በህየ። ወሶበ በጽሐት ማርያ ኀበ እግዚእ ኢየሱስ ርእየቶ ወሰገደት ሎቱ ታሕተ እገሪሁ ወትቤሎ እግዚእየ ሶበሰ ሀሎከ ዝየ እምኢሞተ እኁየ። ወሶበ ርእያ እግዚእ ኢየሱስ እንዘ ትበኪ ወአይሁድኒ እለ መጽኡ ምስሌሃ ከመ ይበክዩ ገዐረ በመንፈሱ ወሆከ ርእሶ። ወይቤ አይቴ ቀበርክምዎ ወይቤልዎ እግዚኦ ነዓ ትርአይ። ወአንብዐ ካዕበ እግዚእ ኢየሱስ። ወይቤሉ አይሁድ ርእዩ መጠነ ያፈቅሮ። ወቦ እምውስቴቶሙ እለ ይቤሉ እምኢክህለኑ ዝንቱ ዘከሠተ አዕይንቲሁ ለዘዕዉሩ ተወልደ ከመ ይግበር በዘኢይመውት ዝንቱኒ። ወካዕበ ተከዘ በልቡ እግዚእ ኢየሱስ ወሖረ ኀበ መቃብሩ እንዘ ያነብዕ ወበኣት ውእቱ ወክዱን እብን ዐቢይ ዲቤሁ። ወይቤሎሙ እግዚእ ኢየሱስ አእትትዋ ለእብን ወትቤሎ ማርታ እኅቱ ለዘሞተ እግዚእየ ወድአ ጼአ እስመ ረቡዐ ኮነ ዮም እምዘተቀብረ። ወይቤላ እግዚእ ኢየሱስ ኢይቤለኪኑ ከመ እመ ተአመንኪ ትሬእዪ ስብሐተ እግዚአብሔር ወአእተትዋ ለይእቲ እብን። ወአንሥአ አዕይንቲሁ እግዚእ ኢየሱስ ላዕለ ወይቤ አአኵተከ አባ እስመ ሰማዕከኒ። ወአንሰ አአምር ከመ ዘልፈ ትሰምዐኒ ወባሕቱ በእንተ እለ ይቀውሙ ሰብእ እብል ዘንተ ከመ ይእመኑ ከመ አንተ ፈነውከኒ። ወዘንተ ብሂሎ ከልሐ በዐቢይ ቃል ወይቤ አልዓዛር አልዓዛር ነዓ ፃእ አፍኣ። ወወፅአ ውእቱ ምዉት እንዘ ግኑዝ ወእሱር እደዊሁ ወእገሪሁ ወገጹኒ ጥብሉል በሰበን ወይቤሎሙ እግዚእ ኢየሱስ ፍትሕዎኬ እንከሰ ወኅድግዎ ይሑር። ወብዙኃን እምአይሁድ እለ መጽኡ ኀበ ማርያ ወማርታ ርእዮሙ ዘገብረ እግዚእ ኢየሱስ አምኑ ቦቱ። ወቦ እምውስቴቶሙ እለ ሖሩ ኀበ ፈሪሳውያን ወአስተዋደይዎ ወነገርዎሙ ኵሎ ዘገብረ እግዚእ ኢየሱስ።

ወአስተጋብእዎሙ ሊቃነ ካህናት ወፈሪሳውያን ለሕዝብ ወይቤልዎሙ ምንተ ንሬሲ ናሁ ዝንቱ ብእሲ ብዙኀ ተኣምረ ይገብር። ወእመኒ ኀደግናሁ ከመዝ ኵሉ የአምን ቦቱ ወይመጽኡ ሰብአ ሮሜ ወይነሥኡነ ብሔረነ ወሕዝበነኒ። ወይቤሎሙ አሐዱ እምኔሆሙ ዘስሙ ቀያፋ ሊቀ ካህናት ዘእብሬቱ ይእቲ ዓመት አንትሙሰ ኢተአምሩ ወኢምንተኒ ወኢሂ ትመክሩ። ይኄይሰነ አሐደ ብእሴ ንቅትል ወይሙት ህየንተ ሕዝብ እምይትኀጐል ኵሉ ሕዝብ። ወዘንተሰ አኮ እምልቡ ዘይቤ አላ እስመ ሊቀ ካህናት ውእቱ ወእብሬቱ ይእቲ ዓመት ተነበየ ዘንተ እስመ ሀለዎ ለእግዚእ ኢየሱስ ይሙት በእንተ ኵሉ ሕዝብ። ወአኮ በእንተ ሕዝብ ባሕቲቶሙ አላ ከመ ያስተጋብኦሙ ለውሉደ እግዚአብሔር እለ ተዘርዉ አሐተኔ። ወእምይእቲ ዕለት ተማከሩ ሊቃነ ካህናት ከመ ይቅትልዎ።

ወኢያንሶሰወ እንከ እግዚእ ኢየሱስ ገሃደ ማእከለ አይሁድ አላ ሖረ ኀበ ሀገር እንተ ትሰመይ ሀገረ ኤፍሬም ዘቅርብት ለበድው ወነበረ ህየ ምስለ አርዳኢሁ። ወቀርበ በዓለ ፋሲካሆሙ ለአይሁድ ወዐርጉ ብዙኃን ለኢየሩሳሌም እምበሓውርት እምቅድመ በዓለ ፋሲካ ያንጽሑ ርእሶሙ። ወአኀዙ አይሁድ ይኅሥሥዎ ለእግዚእ ኢየሱስ ወይቤሉ በበይናቲሆሙ እንዘ ይቀውሙ ውስተ ቤተ መቅደስ ምንተ ትብሉ ናሁ ኢመጽአ ለበዓል። ወአዘዙ ሊቃነ ካህናት ወፈሪሳውያን እምከመቦ ዘአእመረ ኀበ ሀሎ ይቅጽብዎሙ ከመ የአኀዝዎ።

Słuchaj ወንጌል ዘዮሐንስ 11