Ge’ez - 2021 - BSE (NT) Non Drama

Ge’ez - 2021 - BSE (NT) Drama

መጽሐፈ ልደቱ ለእግዚእነ ኢየሱስ ክርስቶስ ወልደ ዳዊት ወልደ አብርሃም። አብርሃም ወለዶ ለይስሐቅ ወይስሐቅኒ ወለዶ ለያዕቆብ ወያዕቆብኒ ወለደ ይሁዳሃ ወአኀዊሁ። ወይሁዳኒ ወለደ ፋሬስሃ ወዛራሃ እምትእማር ወፋሬስኒ ወለደ ኤስሮምሃ ወኤስሮምኒ ወለደ አራምሃ። ወአራምኒ ወለደ አሚናዳብሃ ወአሚናዳብኒ ወለደ ነአሶንሃ ወነአሶንኒ ወለደ ሰልሞንሃ። ወሰልሞንኒ ወለደ ቡኤዝሃ እምራኬብ ወቡኤዝኒ ወለደ ኢዮቤድሃ እምነ ሩት ወኢዮቤድኒ ወለደ እሴይሃ። ወእሴይኒ ወለደ ዳዊትሃ ንጉሠ ወዳዊትኒ ንጉሥ ወለደ ሰሎሞንሃ እምነ ብእሲተ ኦርዮ። ወሰሎሞንኒ ወለደ ሮብዓምሃ ወሮብዓምኒ ወለደ አብያሃ ወአብያኒ ወለደ አሳፍሃ። ወአሳፍኒ ወለደ ኢዮሳፍጥሃ ወኢዮሳፍጥኒ ወለደ ኢዮራምሃ ወኢዮራምኒ ወለደ ዖዝያንሃ ዘተሰምየ አዛርያስ። ወዖዝያንኒ ወለደ ኢዮአታምሃ ወኢዮአታምኒ ወለደ አካዝሃ ወአካዝኒ ወለደ ሕዝቅያስሃ። ወሕዝቅያስኒ ወለደ ምናሴሃ ወምናሴኒ ወለደ አሞጽሃ ወአሞጽኒ ወለደ ኢዮስያስሃ። ወኢዮስያስኒ ወለደ ኢኮንያንሃ ወአኀዊሁ አመ ፍልሰተ ባቢሎን። ወእምድኅረ ፍልሰተ ባቢሎን ኢኮንያንኒ ወለደ ሰላትያልሃ ወሰላትያልኒ ወለደ ዘሩባቤልሃ። ወዘሩባቤልኒ ወለደ አብዩድሃ ወአብዩድኒ ወለደ ኤልያቄምሃ ወኤልያቄምኒ ወለደ አዛርሃ። ወአዛርኒ ወለደ ሳዶቅሃ ወሳዶቅኒ ወለደ አኪምሃ ወአኪምኒ ወለደ ኤልዩድሃ። ወኤልዩድኒ ወለደ አልዓዛርሃ ወአልዓዛርኒ ወለደ ማትያንሃ ወማትያንኒ ወለደ ያዕቆብሃ። ወያዕቆብኒ ወለደ ዮሴፍሃ ፈኃሪሃ ለማርያም ዘእምኔሃ ተወልደ እግዚእ ኢየሱስ ዘተሰምየ ክርስቶስ። ወኵሎንኬ እንከ ትውልድ እምአብርሃም እስከ ዳዊት ትውልድ ዐሠርቱ ወአርባዕቱ። ወእምዳዊት እስከ ፍልሰተ ባቢሎን ትውልድ ዐሠርቱ ወአርባዕቱ ወእምፍልሰተ ባቢሎን እስከ ክርስቶስ ትውልድ ዐሠርቱ ወአርባዕቱ ወኵሎንኬ ትውልድ እምአብርሃም እስከ ክርስቶስ ትውልድ አርብዓ ወክልኤቱ።

ወለእግዚእነ ኢየሱስ ክርስቶስ ከመዝ ውእቱ ልደቱ ወሶበ ተፍኅረት እሙ ማርያም ለዮሴፍ ዘእንበለ ይትቃረቡ ተረክበት ፅንስተ እመንፈስ ቅዱስ። ወዮሴፍሰ ፈኃሪሃ እስመ ጻድቅ ውእቱ ኢፈቀደ ይክሥታ አላ መከረ ጽሚተ ይኅድጋ። ወእንዘ ዘንተ ይኄሊ ናሁ አስተርአዮ መልአከ እግዚአብሔር በሕልም እንዘ ይብል ኦ ዮሴፍ ወልደ ዳዊት ኢትፍራህ ነሢኦታ ለማርያም ፍኅርትከ እስመ ዘይትወለድ እምኔሃ እመንፈስ ቅዱስ ውእቱ። ወትወልድ ወልደ ወትሰምዮ ስሞ ኢየሱስሃ እስመ ውእቱ ያድኅኖሙ ለሕዝቡ እምኀጢአቶሙ። ወዝ ኵሉ ዘኮነ ከመ ይትፈጸም ዘተብህለ እምኀበ እግዚአብሔር በነቢይ እንዘ ይብል። «ናሁ ድንግል ትፀንስ፤ ወትወልድ ወልደ ወይሰመይ ስሙ አማኑኤል » ዘበትርጓሜሁ እግዚአብሔር ምስሌነ። ወተንሢኦ ዮሴፍ እምንዋሙ ገብረ በከመ አዘዞ መልአከ እግዚአብሔር ወነሥኣ ለማርያም ፍኅርቱ። ወኢያእመራ እስከ አመ ወለደት ወልደ ዘበኵራ ወጸውዑ ስሞ ኢየሱስሃ።

Słuchaj ወንጌል ዘማቴዎስ 1