Mwanduso 6
6
Wihi wa Munhu
1Wanhu viwanduse kongezeka muna iisi yose, na wana wa chike welekigwa kumwawo, 2wasenga wa Mulungu#6:2 Kwa Chiebulaniya cholongwa, “Wana wa Mulungu,” lusita mwingi ina fambulo da viumbe wa chimuhe siyo wanhu. wawawona wandele wa wanhu kuwa lumondo, na wawasola kuwa wake zawo fana viwalondile. 3Maabaho Mndewa Mulungu kalonga, “Muhe wangu hawizakala kwa wanhu siku zose, kwaviya wawo ni lukuli. Kwandusila sambi na kugendelela, hawezakala miyaka kufosa miyaka gana na malongo maidi.” 4Lusita ulo na kugendelela, kukala na Wanefili #6:4 “Wanefili” fambulo jake “mizinhu mitali inenehe.” mwiisi, wawo wakala welesi wa wana wa Mulungu na wandele wa wanhu. Wawo niiyo wanhu wakalile magalu, wamanyike ng'hani baho umwaka. 5Mndewa Mulungu kawona wihi mkulu wa wanhu muna iisi na magesa yawo yehile chila siku, 6Ivo Mndewa Mulungu kengilwa usungu ng'hani kwa kumulumba munhu na kumwika muna iisi, na kawona usungu ng'hani muna umoyo wake. 7Mndewa Mulungu kalonga, “Nizamsegeza munhu yonimulumbile muna isi, na iviya nizawasegeza wang'onyo, waja wotambala na ndege wa kuulanga. Nojuta kwaviya niwalumba.” 8Mbali Mndewa Mulungu kanogelwa na Nuhu.
Nuhu
9Zino ni mbuli za ugima wa Nuhu yoyakalile yotenda yanogile haulongozi wa Mulungu, mkamilifu muna uwelesi wake. Nuhu kakala kwa kumnogeza Mulungu. 10Nuhu kaweleka wana watatu wa chilume, wowatangigwe Shemu na Hamu na Yafesi. 11Chila munhu kakala mwihi haulongozi wa Mulungu, na tibwilitibwili jenela chila hanhu. 12Mulungu kawona isi yose imema wihi, kwaviya wanhu watenda ihe.
13Mulungu kamulongela Nuhu, “Nilamula kuwadanganiza wanhu wose kwaviya waimemeza iisi tibwilitibwili. Kweli nizawadanganiza ng'hani hamwe na isi. 14Zenga safina kwa mabanzi ya mibiki midala. Gola viheleto na uhake tulasi kunze na mgati. 15Vino niivo vondauizenge, utali wake iwe makono magana matatu na ugalamu wake makono malongo matano na chimo chake makono malongo matatu. 16Utende chisuwili na chiwe mkono umwe hagati wa digulu maabaho ika lwivi ubanzi umwe, safina iwe na golofa nhatu. 17Na niye nizagala gombo muna iisi muladi kudanganiza chila chiumbe chili na ugima. Chila chinhu muna iisi chizadanganika. 18Mbali nizatenda lagano na weye. Kwizakwingila muna isafina na muke wako, wanago na wake zawo. 19Wagale mwiisafina chila modeli ya viumbe vili na ugima vidi, va chilume na va chike, na uvilolese vikale. 20Wingize chila ndege wa kuulanga, chila wang'onyo wotambala na chila wanyama, waidi waidi muladi wawe wagima. 21Usole chila modeli ya ndiya wiike goya kwa ichimu chenu na kwa ichimu chawo.” 22Nuhu kasang'hana chila chinhu fana viyalagilizigwe na Mulungu.
Obecnie wybrane:
Mwanduso 6: Ching'hwele
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
NT © 2014 Pioneer Bible Translators and The Word for the World
OT © 2019 Pioneer Bible Translators