Matie 3
3
1Hɩ vra lɔ Zhan Batisì srɔ ɛnnùwì Zhüde kpɔsɔ wú kɩ bukru kɛ dɔ́ Ɔwɔ ankà. 2Nɛ dɔ̀ le: “Nyɛ́n crɔn ny'eci-hán-ci, ɔmuhi Anhobɩ́-Nɛ̀ncüì-dúyri dú ɛtɛ̀sɛ̀n nɔn!” 3Zhan dú ɔwrɔn léyi Ɔwɔ-mùanwú-ankà-dɔ́-wrɔn Ezàhi dɔ́ n'ankà, ɛnvra léyi nɛ́n dɔ̀ le:
“Ɔwrɔnẅì tɔ̀n sùva de dú ɛnnùwì ke di nkù kɛ dɔ̀ le:
Nyɛ́n mrɛ́n Ɛẅɛnwrɔn levri,
nyɛ́n hán n'ɛnlevri lɔ kɛ̀ nyrɔn anvrɛnvrɛn!”
4Zhan ceci lɔ dú ɔnɔ̀n-tù ceci kɩ nɛ̀n nyɔn ɔnɔ̀n-wrú pɛtɛ̀n ɛẅìe; n'ɛci-zî dú cɛncecreva mán anjɔ. 5Zherüzalɛmɛ̀n anmàn-bɔ̀, Zhüde kpɔsɔ wú bɔ̀ lɔ fɛn mán ɔkpɔsɔ léyi dú Zhurdɛn shi lɔ tɛ̀sɛ̀n nɔn kɛ vá cɔ́ Zhan. 6Yɔ krɛ́ y'ɛgbàn anwrɔn lɔ fɛn zìwú kɩ Zhan kɛ wá yɔ ɛnshi ɛnkru Zhurdɛn shi lɔ mɛ̀n.
7Ɛnvra léyi Zhan kán ɔmu le Ɔwɔ-nyànmàn-sùva-wá-bɔ̀ mán anwrɔn léyi ke sɩ́ bú owúemɛ̀n-dù-frɔ́ ankà kɛ tán ankàẅì, yɔ, anwrɔn bobrebe ndɔ hɔ̀n lɔ, yɔ vá cɔ́ nɛ̀n ô nɛ̀n wá yɔ ɛnshi ɛnkru, kɩ nɛ dɔ́ yɔ le: “Ɛnlɛbrì mɛ̀n mɛ̀n-bɔ̀! Antɔn de dɔ́ nyɛ̀n le, Ɔwɔ mrɛ̀ncì léyi kɛ́n eburi nɔn kɛ lɛ vɔ́n nyɛ̀n ɛwú nɛ́n? 8Nyɛ́n hán eci ke yé le nyɛ́n crɔn ɛnkruɛ, 9kɩ nyɛ́n bɩ́ tro le: ‘Abrahamɛ̀n dú nyɛ́n nancüì.’ Ɔmuhi mɛ dɔ́ nyɛ̀n le, Ɔwɔ kɛ cüɛ̀n hô, ne le bɩ́ ɛbù ẅì ndɔ hɔ̀n lɔ, nɛ̀n srɔ Abrahamɛ̀n nɛ́n nan-ẅì hɔ̀n! 10Otù krɔn kpehɛ́n, ô kɛ̀ voyan antɛ̀ annyràn mɛ̀n hàn hɛ́n: ɛtɛ̀ totɔtɔ̀n léyi ke sɩ́ shi ɛẅì ankrànkràn nɔn, yɛ lɛ voyan nɛ̀n ku ɛnhyà. 11Mɛ tɛn, ɛnshi de me bɩ mɛ wá nyɛ̀n ɛnkru ô ke yé le nyɛ́n crɔn ɛnkruɛ; tɛ́n ɔwrɔn léyi dú mɛ̀n ɛmɛẅi kɛ và nɔn, kɛ lɛ wá nyɛ̀n ɛnshi ɛnkru Ɛnhɛ́n Prɔnprɔn mɛ̀n mán ɛnhyà mɛ̀n. Ɛkɔrɛ̀ srɔ́n nɛ̀n vrán mɛ̀n: mɛ̀n sɩ̀ zeze mɛ̀n zrɔa hɩ m'á sɩ́ m'edomɛ̀n ɛnhi ô mɛ̀n gbrɔ n'annanwrú hɛ́ lɔ nɔn. 12Eci-kua-ci dú nɛ̀n antamɛ̀n kɩ nɛ lɛ kua ɛci ankrànkràn mán ɛci gbàngbàn. Ɛci ankrànkràn hɔ̀n lɔ nɛ lɛ sɩ́ yɔ ɛbemɛ̀n, tɛ́n ne le ku ɛci gbàngbàn hɔ̀n lɔ ɛnhyà léyi ke sɩ́ zɛ́n mrìmrì nɔn mɛ̀n.”
Zhezü ɛnshi-kru-wá
(Nyɛ́n nyan Markɛ̀n 1:9-11; mán Lükɛ̀n 3:21-22 wrú lɔ mɛ̀n)
13Zɛtɛn Zhezü dú Galile kpɔsɔ wú vá Zhurdɛn shi mùan; nɛ vá Zhan ɛtɛ̀sɛ̀n ô kɛ̀ wá nɛ̀n ɛnshi ɛnkru. 14Zhan kɔrɔ kɩ kɛ dɔ́ nɛ̀n le: “Mɛ̀n de ke ji le ɛ̀ wá mɛ̀n ɛnshi ɛnkru nɔn, kɩ vɛ tɛn, ɛ vá cɔ́ mɛ̀n ô mɛ̀n wá mɛ́n ɛnshi ɛnkru!” 15Tɛ́n Zhezü mrɛ́n nɛ̀n ɔmùan le: “È shrì kè dú ɔmu lɔ ɛnvra ndɔ lɔ mɛ̀n. Ɔmuhi, ɔmu lɔ de ke ji le bɔ̀ hán eci léyi Ɔwɔ ke ji nɔn.” Zɛtɛn Zhan shrì kɩ wá nɛ̀n ɛnshi ɛnkru. 16Ɛnvra léyi yɛ wá Zhezü ɛnshi ɛnkru trɔ nɔn, nɛ̀n dú ɛnshiemɛ̀n nɛ̀n srɔ ɛntrɛ. Ɛnvra zri lɔ anhobɩ́ gbɛ́ ɔmùan: nɛ̀n kán Ɔwɔ Hɛ́n kakɛ hán brɛndre hɔ́ kɩ hɔ́ncɔ́ nɛ̀n. 17Kɩ esùva tɔ̀n dú anhobɩ́ kɛ dɔ̀ le: “Ɔwrɔn ndɔ lɔ dú m'ɛcüɛn Ẅì; mɛ́n pɔ̀püɛ̀ lɔ fɛn dú nɛ̀n ɛmɛ̀n.”
Obecnie wybrane:
Matie 3: ƐAA03
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.