創世記 3
3
人違背命令
1蛇係主上帝所創造个動物當中最搞怪个。蛇對該女人講：「上帝敢有影講過你等一定做毋得食園中所有樹頂个果子？」
2該女人應講：「園中樹頂个果子𠊎等全部做得食； 3只有園中央該頭樹頂个果子，上帝識講：『你等做毋得食，也毋好摸，若毋聽從，你等就會死。』」
4蛇對女人講：「你等無一定會死， 5因為上帝知你等拿來食，目珠就會變金，你等會像上帝恁樣曉得分別善惡。」
6該女人看到該頭樹仔个果子好食、好看、又會給人得到智慧，姖就將果子摘下來食，也拿給厥老公，厥老公也食。 7佢兩儕个目珠就金起來，正知自家係赤身露體，就編無花果樹个葉仔來遮身體。
8該日臨暗仔，該人㧯厥𡜵娘聽到主上帝在園肚行个聲音，就囥在園肚个樹林中，毋敢見主上帝个面。 9主上帝喊該人，對佢講：「你在㖠？」
10佢講：「𠊎在園中聽到你个聲，因為𠊎赤身露體，驚到囥起來。」
11主上帝講：「麼人㧯你講你赤身露體呢？你敢有食𠊎吩咐你做毋得食該頭樹頂个果子？」
12該人講：「你賜給𠊎做伴个女人，姖將該樹頂个果子給𠊎，𠊎就食。」
13主上帝問該女人講：「你到底做麼介事呢？」女人講：「蛇引誘𠊎，𠊎就食。」
主上帝判佢等
14主上帝對蛇講：
「你既然做這事，就一定受責罰，
會比一切牲畜㧯野獸較衰過。
你愛用肚笥趖，
終身食泥。
15𠊎愛使你㧯女人結冤仇；
你个後代㧯女人个後代彼此怨恨。
佢愛打你个頭；
你愛咬佢个腳㬹。」
16主上帝又對該女人講：
「𠊎愛大大增加你懷孕个痛苦；
你愛在痛苦中𫱔子女。
你會愛慕若老公；
若老公會管你。」
17主上帝又對亞當講：
「你既然聽若𡜵娘个話，
食𠊎吩咐你做毋得食該頭樹頂个果子，
土地愛因為你來受咒詛；
你愛一生人勞碌，
正能對土地得到食物。
18土地為到你會生竻仔㧯雜草，
你也愛食野生个菜。
19你愛汗流脈落正有好食，
直到你歸土，
因為你係對泥出來个。
你本來係泥，
到尾愛歸土。」
20 亞當㧯厥𡜵娘安到夏娃#3:20 「亞當」意思係「人類」，「夏娃」有「生命」个意思。，因為姖係人類个阿姆。 21主上帝用獸皮做衫褲俾亞當㧯厥𡜵娘著。
逐出伊甸園
22主上帝講：「看啊！該人已經㧯𠊎等相像，會分別善惡；驚怕佢這下又伸手摘生命樹个果子食，就永遠毋會死。」 23所以主上帝將佢逐出伊甸園，俾佢去耕種 — 佢本來係對土地出來个。 24主上帝逐走該人，又在伊甸園東片安設基路伯 #3:24 「基路伯」係複數个；在近東係一種怪物，面像人、牛、獅仔、抑係鷹鳥，身體常常像獅仔，也有翼胛。㧯四面轉動發火个劍，來掌生命樹个路。
Obecnie wybrane:
創世記 3: THV12Hdb
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© The Bible Society in Taiwan, 2012
All rights reserved
© 台灣聖經公會版權所有 2012