Locya 11
11
Nanao na sira ni Yeso a meynozi
(Matay 6:9-13; 7:7-11)
1Ipisa kapateyka na ni Yeso so inozi na am amyan so asa ka macinanao jya a manci nya jya so, “Mo Panirsirngen, nanawen mo yamen a meynozi an, akman si Yowani a nimnanao so macinanao jya.” 2Maniring si Yeso jira am, “No meynozi kamo am inarahen nyo ya an.
‘Mo Ama do to, inaoy ano si mamimin o tao a zomwazway so meylimwang a ngaran mo. Inaoy si italamozong mo o karawan.
3O kanen namen sicyaraw eya am itoro mo jyamen.
4Vonasen mo o raraten namen akman jyamen a ji mapeyyan sya do onowned so raten da jyamen no icyatatao namen. Ji mo yamen amya kalittan.’ ”
5Maniring si Yeso do macinanao jya am, “No si myan jinyo so mangay do kagagan na do avak no ahep a kapanci na no, ‘Mo kahakay, mamood ko pa jinyo so atlo a ka myanpaw an. 6Ta na kapakaranes pa no kagagan ko. So na ikabo no ko itaotao sya.’ 7No si maniring o kagagan na amyan do sahad am, ‘Kapakamo mo am ji mo yokaya yaken. Ta yamaneb rana o pangengneban, ta namen mitkeh kano anak ko. Am ori o ko ji makarawarawai so kapeyvangon a manta nimo.’ 8No si akman sang am meypanngonngo ka. Ko pa ciring jinyo am beken a kapeykagagan da o kapanta na nya. Ta na ahapen do kaji na nimtadan a mapasyasi jya. So nipantan na nya. 9Am ori o ko pancyan nya jinyo an. Makowyat kamo a meynozi, ta ori o ipakahap nyo so apyahen nyo no nakem. Makowyat kamo a komala si Ama ta do to, ta iya o yanan no kakzeben nyo no nakem. Makowyat kamo a tomawag ji Ama ta do to, ta iya o makasidong jinyo. 10Ta o mapasyasi jya kano komala sya kano tomawag jya am sidongen na sira. 11-12Sino jinyo o manta no minapodpod jinyo so mavowaw a kano alilipwan no macyami sira jinyo so among a kano icyoy. 13Kakwakwan nyo a meyraraten a tao a yamakateneng do kapanta no anak nyo so ney pipya a kanekanen a imanngo rana si Ama ta do to. Ta jyabo kaji na mantan ninyo no amin nyo jya o Seyzi a.”
Yeso a kani Peysepo
(Matay 12:22-30; Make 3:20-27)
14Nivozwaw ni Yeso o asa ka kalamsoyan ni Satan. Iya rana ori am vazay na kakovot na do ji makabnebnek a tao. Vozwawen na ori am makabnebnek rana o tao. Ori o nisavasavakan da nya no aro a tao. 15Am amyan jira ori so tao a manci no, “Iya rana ori am na nioyatan ni Satan a ngaranan da Peysepo. Ori o na ipakavozwaw so kalamsoyan ni Satan a komovot do tao.”
16O karwan da am naknakmen da o keyleylamdam da sya. Am ori o kakzeban da si Yeso a mapacita no oyowyat na manoyong a nimapo ji Ama ta do to. 17Katenngan na ni Yeso o keyleylamdam da sya. Maniring jira am, “Abwata asa ka mahataw a macizakazakat. So icyakman na sang no asa ka vahay a ji macizakazakat. 18No si masyakakan ni Satan a kano kalamsoyan na am ji da rana pakongo o kabedbed da. To da ranavwaki. Nyo ipanci yaken a na oyatan ni Peysepo. 19Ikongo nyo ji manci no kararay nyo a nipanta ni Peysepo so oyowyat. 20No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.
21“No si apzatan no tao no voovoo o peymeymasaodan da kano kavavahay da am jyabo kaji na makapzatan jya. 22Am no si myan so mowyowyat pa tao a mangay omrapong sya am jyabo kaji na makavozcinan so voovoo na katakaw na so warawara na.”
23Nipanci na pa ni Yeso am, “O ji nganod jyaken am mapasobna jyaken an. O ji nidong jyaken am zazatan na o vazay ko an.
Meykala o kalamsoyan ni Satan so peyvahayan na
(Matay 12:43-45)
24“Mavozwaw o kalamsoyan ni Satan do tao am omlivolivon a meykala so peywalaman na. Am ji makakala. Maniring am, ‘Yapyapya rana o kapeysinaoli ko pa mangay komovot do nikovotan ko a tao.’ 25Meysinaoli am macita na o tao ang a makownong rana jya. Ta abo nimacipalit a nikomovot jya. 26So nyangay na manara so papito a masozisozi pa ka nya a kalamsoyan ni Satan a mangay komovot jya. Manngo tao ori a. Jyabo kaji na rehrehtan pa sicyaikwaya no nakenakem na kano kakwa.”
Manoyong a sarasaray
27Kapyahen na meyzezyak si Yeso am to ngyan do aro a tao so asa ka mavakes. Maniring am, “O niomalavat jimo a kano niomazwazovo jimo am tey yapya.” 28Maniring si Yeso am, “Manoyong ori am omamizing so ciring na ni Ama ta do to a kapeyvazay na sya am tey yapya o akman sang a tao!”
Kakdain da no ji manganwanoyong a tao
(Matay 12:38-42)
29Rapongen da si Yeso no aro a tao am amyan so ciring na ni Yeso. Maniring jira am, “Yatey rako o raraten no tao sicyaikwaya. Ikongo da kakzeban so da kapakacita so oyowyat na ni Ama ta do to. Am o akman so mina vazay ni Ama ta do to do meyngaran so Yena o macita nyo. So ikabo no maharahara pa kano nang a macita nyo. 30O nimacita da ji Yena a oyowyat ni Ama ta do to no tao do Niniwey am akman sang o oyowyat ko a Nipamnekan na ni Ama ta do to a macita da no tao sicyakwaya. 31No marateng o araraw no ipacici na mapeykapyapinpin so tao ni Ama ta do to am o mavakes a panirsirngen da do Siba a ili no kakwa pa am meytatanek a omraherahet jinyo a tao sicyakwaya. Ta iya rana ori am nimapo do marai a ili mangay a omamizing so ciring na no panirsirngen a meyngaran si Solomen. Ko pa ciring jinyo am yamyan do jya so rakorako pa so vazay a kani Solomen am nyo ji ngamiznga. 32No marateng o ipacici na mapeykapyapinpin so tao ni Ama ta do to am meytatanek sira o tao do Niniwey a omraherahet jinyo a tao sicyaikwaya. Ta mamizing da o ciring ni Yena am mamlis rana sira. Ko pa ciring jinyo am yamyan do jya so yarakorako pa so vazay a kani Yena am yanyo ji ngapa o nanao na jinyo.”
Zezak no kataotao
(Matay 5:15; 6:22-23)
33Maniring si Yeso am, “Abwata o tao a tomayo so nipaciscisan a zampo a katoong na sya. O pinaciscisan a zampo am pangain do pakacittan sya. So ipakacita da no somdep a tao. 34O mata nyo am akmey zezngang no kataotao nyo an. No si apiya o mata nyo am akmey mazngang o pangonongan nyo an. No si marahet rana o mata nyo am masari rana o citahen nyo. 35Am ori o azimanan nyo so onowned nyo. Ta si mablis o zezak no onowned nyo am mangay o kangay nyo do kasarisaryan. 36No si apya o nakenakem nyo a abo so karatan am akman kamo so sang a to maniray an. Akman so mazngang a apoy a somoo jinyo.”
Marahet a iyangay da no tao a macyagom do Vadisay a kano mangnanao no iwawalam ni Ama ta do to
(Matay 23:1-36; Make 12:38-40)
37Mateyka a meyzezyak si Yeso am amyan so asa ka tao a macyagom do Vadisay a amrara sya koman do vahay da. Ori o nyangay na ni Yeso. 38Macita no tao a macyagom do Vadisay si Yeso am yeyyak na do kaji na mavanawan a todey angan. 39Maniring si Yeso jya am, “Inyo rana tao a macyagom do Vadisay am nyo ji peylolita o kakanan nyo am onowned nyo am yamapno no yamakakaday a nyo peyraratenan. 40Inyo rana ji mamayok a tao am manngwa, nyo jyatenngi na kapakateneng do kataotao nyo a kano onowned nyo ni Ama ta do to? 41So ikazonos nyo a manta no ji makahakaw a tao. Ta ori o akma ney ikatnaw no onowned nyo an.
42“To kanyo makasi a tao a macyagom do Vadisay. Tana mapasina kamo so ipeykingking nyo ji Ama ta do to so meykamadadayan a monganay jinyo am yanyo to nazibwan o pangangarilawan na ni Ama ta do to a kano nakenakem nyo so icyatatao nyo. Ta ori rana am ji to nazibwan o akman sang a vazay an. 43Inyo rana tao a macyagom do Vadisay am to kanyo makasi an. Ta nyo ikakza o nyo kalisna do pamanongan no peyneynozyan a kado karwarwan no tao a komakzeb so da kararalay ninyo no tao. 44Am ori o to nyo makasi an! Ta yakanyo akman so jyasingkaji a heseb no tao a jyaziman no mangonong a tao. Tana hapen da o icicirawat nyo no tao am ji da tenngi o karahet no onowned nyo.”
45Amyan so asa ka mangnanao no iwawalam ni Ama ta do to a mapacici si Yeso. Maniring am, “Mo Mangnanao, o ciring mo rana am yamo to mimina yamen a pazagomen?” 46Maniring si Yeso am, “Inyo rana ya am tey makasi kanyo an. Ta yatey yaro o yamasalit a vazay a nyo ipanci do tao a peyvazain da. Am inyo am yanyo ji patodotodwa o yasa ka tanoro nyo a yanyo isidong sira. 47So to nyo makasi an! Ta nyo peyveyveknen o heseb da no panoyonoywan na so ciring ni Ama ta do to no kakwa a niweywakwak da no ineynapo nyo. 48Am ori o nyo icyakmey macizanod so nakenakem do ineynapo nyo a yanimwakwak so aro a panoyonoywan na so ciring ni Ama ta do to. 49Am o mina ciring na ni Ama ta do to am, ‘Manovoy ko so panoyonoywan ko so ciring ko a kano nipamnekan ko a tao a omlivolivon no ciriciring ko a mangay jira. Am wakwaken da sira o karwan da. Am o karwan da am peyraraheten da sira.’ 50Inyo rana a tao sicyakwaya am mamwamoon jinyo o peyoyaoyyan ni Ama ta do to do aro a panoyonoywan na so ciring na a niwakwak da a nikapo na do nikamaog no karawan an, 51a nimapo ji Yapo kangay na do meyngaran si Sacyadiya a niwakwak da do panaralayan a masngen do patanatanangan so nakem si Ama ta do to. Ko pa ciring jinyo am mamwamoon do tao sicyakwaya o oyaoyyan na nira ni Ama ta do to. 52Inyo rana yamangnanao no iwawalam ni Ama ta do to am to kanyo makasi an! Ta nyo to ngimongan o teneteneng ni Ama ta do to an. Am nyo jyakzan am nyo ji mya o tao a makateneng jya.”
53Karwan na do dang ni Yeso am ikazyak da rana no tao a macyagom do Vadisay a kano mangnanao no iwawalam ni Ama ta do to si Yeso. Am ori o nipacicyan da si Yeso no masasalit a vazay, 54do kapeynakem da so kasozib da jya.
Obecnie wybrane:
Locya 11: snt
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible Society in Taiwan