Locya 16
16
Mapatak a lamlamsoy
1Maniring si Yeso do macinanao jya am, “Amyan so asa ka lamlamsoy no katenngan a tao. Amyan so tao a omraherahet sya. Maniring do katenngan a tao am, ‘Na to peyvwaka o warawara mo no lamlamsoy mo.’ 2Mamizing no lawpan da am tawagan na a mai. Maniring jya am, ‘Yamyan so ko nimamizing a vazay mo. Itoro mo na jyaken o vatvatek no peymasaodan ko, ta ji ko na pahanhana imo a tomalamozong nya.’ 3Mamizing no lamlamsoy na am manakenakem do onowned na. ‘Si pagcinen na yaken no lawpan am ikongo pa vazay ko. Si amhakakaw ko am jyabo ko oyowyat a. Si macyakakan ko am ji ko asnek. 4No si abo vazay ko am apyapya rana o kato ko na macivahayan do manci nyaken a kagagan ko.’ 5Meyratateng am mangay na kakadain sira a ipanci o nimamood do lawpan na so nizpi. Maniring do asa am, ‘Yapira o nivood mo do lawpan ko.’ 6Maniring am, ‘Yasa poo (100) ka vakvaklit no haneng.’ Maniring o lamlamsoy na am, ‘O nivood mo ori am pahephepan ta, kalima na rana ngarnan (50).’ 7Maniring do asa am, ‘Yapira jimo.’ Maniring am, ‘Yasa poo (100) a kalavalavat no mogis.’ Maniring o lamlamsoy na am, ‘O nivood mo ori am pahephepan ta, kawao na rana ngarnan (80).’ 8Mamizing na no lawpan na am isaray na o lamlamsoy ori, do katey mapatak na a mangamaog so vazay a ipeypapyan na so kataotao na.”
Maniring pa si Yeso am, “Ko pa ciring jinyo am o ji manaralay a tao sicyakwaya am akman sang o ahahapan da so vazay da. So ikateneteneng da kano manaralay a tao. 9Ko pa ciring jinyo am apyapya o kapanidong nyo do karawan so ipangoyongoyod da tao, ta no marateng o araraw nyo am pasdepen na inyo ni Ama ta do to do vahay na do teyngato.
10“O ji liklik so alikey a vazay a tao am ipeyhanhan o akman sang a mapeyvazay so rako a vazay. O ji ngezkezsang no alikey a vazay a kapangalalas na am ji meyhanhanan o akman sang a mapakavos so rako a vazay. 11No marahet o ahahapan nyo so peymasaodan nyo do karawan am jyabo kapahanhan na jinyo ni Ama ta do to a tomalamozong no peymeymasaodan na do teyngato a. 12No si ji nyo a patakan o apzapzatan da no karwan no tao am jyabo katoro da nya jinyo so meyngongyod a peymeymasaodan nyo a.
13“Abo o lamlamsoy a meyvazay do rarwa ka lawpan. No ikanig na o asa am ikaoya na o asa. No ikaoya na o asa am ikaglaw na o asa. Marahet o kapasaklang nyo ji Ama ta do to an, a tongdeng do peynizpi nyo an.”
Nanao na so meykamadadayan
(Matay 5:31-32; 11:12-13; Make 10:11-12)
14Mamizing da no tao a macyagom do Vadisay o ciring na ni Yeso am ipeykeykaming da, ta ikakza da o nizpi. 15Maniring jira si Yeso am, “Kanyo mapakapyapya so nakem do tangain no tao. Am si Ama ta do to rana am yamanita so onowned no tao an. Ta o ipanci no tao a ney makdeng na vazay am ipanci na ni Ama ta do to a jyakdeng.
16“Oyowyat no nitaid ni Moyse a kano panoyonoywan na so ciring ni Ama ta do to am o nimanaktak a si Yowani o pamindan na a kapeylimwang rana no Mapasaray a Ciriciring, do na katalamozong ninyo ni Ama ta do to. Ta abo tao a jyakza no katalamozong na nira. 17Am makeykeykai pa o hanit a kano karawan a mabo a kano asa ka ciring na ni Ama ta do to.
18“O mapakaro so kahanghangan na mavakes a kapapapen na pa so karwan no tao am raraten na ori. O mapapapen so nipakaro da mavakes am raraten na ori.”
Katenngan a tao a kani Lasalo
19Maniring pa si Yeso am, “No kakwa pa am amyan so asa ka katenngan a tao. Mangday do araraw kapeyyayob na so pipiya ayob a kakan na so ney yapipiya a kanekanen. 20Am amyan so asa ka ipangoyongoyod da tao a meyngaran so Lasalo a meykanokanoka so kataotao a miray do pangengneban na no mabsoy a tao, 21a komakzeb so meycyakakas do kanen na. O nokanoka na am mangay da laposan no inoino. 22Mawakwak o ipangoyongoyod da tao ori am yangay da no tinsi do tangain ni Apolahan. Mawakwak o katenngan a tao ori am ibobo no tao. 23Amyan do kararatan a makaliliw so kataotao na am to na cita do teyngato si Apolahan a kani Lasalo. 24Meyratateng am tawagan na. Maniring am, ‘Mo Apolahan, kasyasi mo pa yaken an. Tovoin mo pa si Lasalo a mapaiteng so likta ranom a itneb ko so tetehnan ko, ta ko tey rahet so kataotao do apoy eya.’ 25Am maniring si Apolahan am, ‘Manganako, mo pa manakem no kapeyigegen mo do karawan asyo an, a to meypanpan do kanekanen mo an. Am si Lasalo am abo ipangakaday na do araraw. Am sicyaikwaya am yamyan rana do jya yamacikasaray jyamen, a imo am ka amlavi so onowned. 26Jingwan so sang am mey ta kongwen o yamapeytawa jyaten a rako a alalasyas. Tana ikasi namen rana imo am jyabo kapakagcin namen so yamapeytawa jyaten eyto.’ 27Maniring o katenngan a tao am, ‘No komwan mo akay am tovoin mo pa si Lasalo. Ta mangay do vahay da ama, 28a kapamizing na pa so yalalima a kakteh ko, ta maraherahet o kai da pa macitovong jyaken a makaliliw so kataotao da.’ 29Maniring si Apolahan am, ‘Cyaha, ta yamyan so da pangozayan a ciriciring na ni Moyse a kano panoyonoywan na so ciring ni Ama ta do to.’ 30Maniring o nikatenngan a tao am, ‘Ji kakman sang mo akay, ta jyabo kaji da panoyngan so nimeyvangon a tao a mangay jira. Am ori o ipamlis da rana.’ 31Maniring pa jya si Apolahan am, ‘Tana myan so meyvangon a tao a mangay jira a kaji da nganoyngan do ciring na ni Moyse a kano panoyonoywan na so ciring ni Ama ta do to am jyabo kapanganoyong da.’ ”
Obecnie wybrane:
Locya 16: snt
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible Society in Taiwan