Locya 19
19
Si Yeso a kani Sakay
1Makaranes si Yeso do Yedike am, 2amyan dang so asa ka panirsirngen no mapeyvazay so deyking a meyngaran so Sakay a tey yaro so nizpi a tao. 3To na ji ngamoga ni Sakay o kapakacita na si Yeso, ta akman so wanjin o tao ori, kwan na. Am ikongo do tey maveveh, am ori o ji na makaslislini do aro a tao a tomita si Yeso. 4Ori o nipalalayo na mangay do pamanongan na kangay na komalat do asa ka kayo a tomita si Yeso. Ta makeykai si Yeso rana a mangonong dang. 5Makaranes si Yeso do yanan na ori am to na nangara si Sakay. Maniring jya am, “Mo Sakay, agcin rana, ta mangay ko do vahay nyo sicyaraw eya.” 6Ori o nipeygegcin na rana ni Sakay a masaray a tomaotao si Yeso. 7Macita da no aro a tao am marahet sira so aktokto a manci no, “Na todangai no nya do vahay no meyraraten a tao.” 8Am makaranes sira do vahay ni Sakay am taotawwen na si Yeso a kapacisirsiring na rana jya. Maniring am, “Mo Panirsirngen, to ko peyhataya o kangangay ko a itoro do ipangoyongoyod da tao. No si myan so tao a nipangamkaman ko so asa ranaw (100) am paolyan ko so apat a ranaw (400).” 9Maniring si Yeso jya am, “Yana nipanta inyo ni Ama ta do to so vayo a onowned nyo a asa ka vahay. Ta meyyangay kanyo a kano ineynapo nyo a si Apolahan a meyhanhan ni Ama ta do to. 10O ko nyai rana ya am yako meykala so meyraraten a tao a kapatastas ko sira do teyngato.”
Payyaingen na do lamlamsoy a kano nizpi a vowawan
(Matay 25:14-30)
11Makapya sira omamizing so ciring na ni Yeso am mangamaog so payyaingen na ciring na. Am no kanang am makeykai rana si Yeso a makaranes do Yelosaleng. Naknakmen da am, “Ala oya rana o papwen na so katalamozong na nyaten ni Ama ta do to.” 12Maniring si Yeso am, “Amyan so asa ka meynakem a tao mangay do marai a ili, ta omanam o kapanlanlag da nya a panirsirngen da. 13Meyratateng am lovoten na sira o asa ngarnan a lamlamsoy na a kaponged na sira so teyhesa ka nizpi a vowawan a kapanci na nya jira so, ‘Inyo rana manga keypong do ikabo ko am ahapen nyo o nizpi a kapeyparo nyo sya an.’ 14Ikongo do pacioyyan da ori no keylyan da, am ori o nipanovoy da so tao a mangay manci nya do rako a panirsirngen da so kaji dakzan nya a panirsirngen da. 15Mahap na o panirsirngen no meynakem a tao am meysinaoli rana do vahay da. Meyratateng am lovoten na sira o nipanta na so nizpi a vowawan a lamlamsoy na a kapacici na sira so nipeyparo da nizpi. 16Maniring o asa am, ‘Lawpan, ko ipacininizpi o mo nitoro jyaken a nizpi am nimeyparo so asa poo a nizpi.’ 17Maniring o lawpan am, ‘Ka tey mapatak. Ta yamo jya to nazibwan o likta vazay mo jyaken. Am ori o pamnekan ko nimo so asa ngarnan a ili a yaponged mo.’
18“Mai o ikararwa no lamlamsoy na am ipanci na, ‘Lawpan, o mo nitoro jyaken a nizpi am alima ka nizpi o na nipeyparwan.’ 19Maniring o lawpan jya am, ‘Yaponged mo o alima ka ili an.’ 20Mai o ikatlo no lamlamsoy na am ipanci na, ‘Lawpan, o mo nitoro jyaken a nizpi am yapa myan do jya. Ko nipakapya ya nikekeh no milakayob. 21Ta ko imo ikanyahey a tey malalansoken a tao a yamapamoon so beken a monganay jimo a yakomali so beken a mo nipamowa.’ 22Maniring o lawpan jya am, ‘Imo rana ya am yaka tey rahet a lamlamsoy ko an. Meysinaoli o ciriciring mo a iraherahet ko jimo an. Ta mo katenngan yaken a malalansoken a tao a mapamoon so beken a monganay jyaken a komali so beken a nipamowa ko am, 23ikongo ji mo na todangai nya peyyananaken a kapalovot mo so ananak na itoro jyaken do nyai ko na.’ 24Maniring rana do meytatanek do sirisiri a lamlamsoy na am, ‘Pehsey kamo o nizpi na a katoro nyo nya do yanimakanizpi so yasa poo a lamlamsoy ko ang.’ 25Maniring o aro a lamlamsoy na jya am, ‘Lawpan, yana myan so yasa poo a nizpi na ang.’ 26Maniring o lawpan am, ‘Ko pa ciring jinyo am o yanan na am rapan ko pa an. O kabwan na am miminen ko a ahapen o apeleh a amyan jya an. 27Omrahet jyaken a panirsirngen da am yai nyo sira kawakwak nyo sira do tangain ko.’ ”
Mazway a meypangay do Yelosaleng
(Matay 21:1-11; Make 11:1-11; Yowani 12:12-19)
28Mateyka na o aro a ciring na ni Yeso am meypangay rana sira do Yelosaleng. 29To da ji makaranes do Peyvake a kado Potani do asa ka tokon a meyngaran so Kanlan am tovoin na o rarwa ka macinanao jya manma. 30Maniring jira am, “Angay kamo do tanyo anamen a ili. Si mangay kamo am makacita kamo so asa ka ji da pa nyavangan no tao alikey a baka a makedked do dang. Am ovain nyo an a kalak nyo sya yai. 31No si myan so manci nya tao jinyo so, ‘Nyo ovayan so baka ang,’ am ipanci nyo jira o, ‘Yamyan so na patakan nya no Panirsirngen ta.’ ”
32Mangay sira am jyalas o nipanci ni Yeso jira. 33Ovain da o baka am pacicin na sira no mapeybaka sya. Maniring jira am, “Nyo ovayan so baka ang.” 34Maniring sira am, “Yamyan so na patakan nya no Panirsirngen ta.” 35Meyratateng am ovain da na o baka a yangay do tangain na ni Yeso, karasay da no ayob da do likod no baka a kapasakay da na si Yeso. 36Meypangay sira am ahapen da no aro a tao o aywayob da irasay da do pangonongan na. 37Omosok rana sira do tokon a meyngaran so Kanlan am amlololos sira o aro a macilolo jya tao a somaray nya ji Ama ta do to, do aro a nimacita da mina vazay ni Yeso. 38Maniring sira am, “Azwazwain ta o Panirsirngen ta a nitovoy ni Ama ta do to. So iyan na do teyngato no sarasaray a kano azwazway a mangay jimo, mo Ama do to.”#19:38 Anwanood 118:26.
39Maniring sira ji Yeso o macizavoz do aro a tao a macyagom do Vadisay am, “Mo Mangnanao, pancyaney sira o yamacilolo jimo, ta ji sira meykazyazyak.” 40Maniring si Yeso am, “Ko pa ciring jinyo am no si ji sira meyzezyak am o vato rana ito am to macipalit a somaray nyaken.”
Lavyan na ni Yeso o tao do Yelosaleng
41Toda ji makaranes do Yelosaleng am macita na o ili. Am ori o nilavyan na do tao do dang. 42Maniring am, “Inaoy si katenngan nyo sicyaraw eya o ikapya no onowned nyo. Ta yakanyo akmey mavota sicyaikwaya. 43No marateng o araraw na am mai o kavosoyan nyo a tao a omlimot jinyo a kaji nyo makasawayan. 44So ikamimin nyo a kano ananak nyo a balinasen da. Akman sang o vahavahay nyo. Ta abo o asa ka vato a madwadon. Ta ji nyo a tenngi o ikasasnad no aryarilaw na jinyo ni Ama ta do to.”
Nipangzan na ni Yeso o rako a panaralayan
(Matay 21:12-17; Make 11:15-19; Yowani 2:13-22)
45Somdep si Yeso do rako a panaralayan am powboten na sira o meypananazangan a tao. 46Maniring jira am, “O ciring na ni Ama ta do to a domket do Seysyo am, ‘O raralayan nyo nyaken a vahay am peyneynozyan ori no aro a tao.’#19:46 Isayya 56:7. Am nyo to peyvaliw a da peyvahayan no manakaw a tao.”#19:46 Yedimi 7:11.
47Mangday do araraw si Yeso a mangnanao so tao do rako a panaralayan. O panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan da am naknakmen da o kawakwak da sya. 48Am kaji da makatenngan jya rakpen, ta aro tao a makza no ipangnanao na.
Obecnie wybrane:
Locya 19: snt
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible Society in Taiwan