Locya 23
23
Pacicin da do tangain ni Pilato
(Matay 27:1-2,11-14; Make 15:1-5; Yowani 18:28-38)
1Meyratateng am mamimin sira o tao a mangay ni Yeso do tangain na ni Pilato, 2a kalavat da rana so iraherahet da sya. Maniring sira am, “Namen nimacita ya yamapasozisozi so keylyan ta a na kapanci pa no ji noro so deyking do panirsirngen a na kapanci no kataotao na si Kizisto a panirsirngen.” 3Maniring si Pilato ji Yeso am, “Panirsirngen da imo no tao do Yotay?” Maniring si Yeso am, “Noon, manoyong ori.”
4Meyratateng am ipanci na ni Pilato do panipanirsirngen da no mapatanatanang so nakem da si Ama ta do to a kano aro a tao. Maniring am, “Ko ji makakala so yamakdeng a raraten no tao eya.” 5Am ikavevevek da amlololos no tao a manci no, “Yanimangnanao ori do Yotay eya. Am na papwen do Cyadidi yana kangay nya do jya so na pasozisozyan so aro a tao.”
Pacicin da do tangain ni Helote
6Mamizing na ni Pilato o aro a ciring da am ipanci na jira. Maniring am, “Yameyvahay do Cyadidi o tao eya?” 7Katenngan na si Yeso a nimapo do yaponged na ni Helote a ili am ori o nyangayan da nya ji Helote. No kano nang am amyan si Helote do Yelosaleng. 8Macita na ni Helote si Yeso am masaray. Ta nimamizing na rana o aro a vazay na ni Yeso. Am ori o nikakzeban na sya a citahen so mapangyangyalak a vazay na. 9Am ori o nipacicyan na si Yeso no aro a ciriciring. Am abwata o asa ka ciring a nitovis na jya ni Yeso. 10Sira rana o panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to am arakorako pa o patwawen da iraherahet da sya. 11Am ori rana o nipeyyaliliman da jya ni Helote a kano aro a itaysang do dang. So nipeymetdehan da sya, kapayob da jya so akmey ayob no panirsirngen, kangay da rana nya ji Pilato. 12O araraw na no nang am niyapwan no kapeykagagan da ni Helote a kani Pilato. No kabo na pa no vazay ori am ji sira masyakan so kanekanen sira ang.
Ipanci da o kawakwak da sya
(Matay 27:15-26; Make 15:6-15; Yowani 18:39-19:16)
13Nilovot na sira ni Pilato o panipanirsirngen no mapatanatanang so nakem da si Ama ta do to a kano kamanrarakehan da tao a kano aro a tao. 14Maniring jira am, “O nyo nyai jyaken a tao eya am yakmey yamapasozisozi so aro a tao. Am ko pacicin do nyo tangain am ko ji makakala so yasa ka raraten na. 15Si Helote rana am akman sang, ta abo makala na raraten na. Am ori o nyayyan na nya do jya. So na ikabwata no raraten na a iwakwak ta sya. 16Kapanci ko no tao a somipsipzot jya kapasaway ko rana sya.” 17[Mangday no akman sang kapamaring da so kanen o kato na mangozayan do pamnekan da no tao a mapasaway so asa ka nipteng da tao.] 18Mamizing da no aro a tao o ciriciring na am ikavevek da amlololos a manci no, “Zakaten nyo a kapasaway mo si Palapa a itoro mo jyamen.” 19Si Palapa rana am mapasobsobna do seyvo a kapanwakwak na so tao. Am ori o niptengan da sya. 20Naknakmen na ni Pilato o kapasaway na si Yeso. Am ori o nipakekan na so aro a tao. 21Am ikavevevek da amlololos no aro a tao a manci no, “Padketen do jyojika! Padketen do jyojika!” 22Ipitlo na sira pacicin ni Pilato am ipanci na jira o, “Ikeykongo raraten na no nya. Jyabo ko kapakakala so iwakwak ta sya raraten na. Am ori o pancyan ko no tao a somipsipzot jya kapasaway ko na sya.” 23Mamizing da no aro a tao am ikavevevek da amlololos a manci no, “Padketen si Yeso do jyojika!” Ji na pasovoy sira am to na rana ngonoci sira, 24kapangozay na ni Pilato do mina ciring da jya no aro a tao. 25Meyratateng am pasawain na si Palapa a nipteng da nimapasobsobna do seyvo a nimanwakwak so tao a katoro na ni Yeso jira a peyyaliliman da.
Padketen da si Yeso do jyojika
(Matay 27:32-44; Make 15:21-32; Yowani 19:17-27)
26Yangay da si Yeso no itaysang no Loma am masinmo da o asa ka tao do Cidinay a meyngaran si Simong a omalam a omoli a apo do takey a karakep da sya a pahanhanen da a somabway no jyojika kapacilolo na ji Yeso. 27O macilolo ji Yeso a aro a tao am amyan so aro a mavakes a ji ngoring amlavi jya. 28Meyvazingowngaw si Yeso am ipanci na jira. Maniring am, “Inyo rana mavavakes do Yelosaleng am ji nyo lavii yaken. Apyapya kalavi nyo do kataotao nyo a kano ananak nyo. 29Ta makeykai rana o kasasnad no araraw no arako a alalaw nyo. So iyan no tao a manci no, ‘O ji nimeytaodtod a tao a kabwata no ananak da am tey yapya o ngilin da no akman sang a tao.’ 30No marateng ori am amyan so tao a manci nya do rako a tokon so: ‘Kazday jyamen,’ a kapanci da nya do likta tokon so: ‘Bonbonyey yamen.’#23:30 Hesiya 10:8. 31No si akman sang a vazay da jyaken abo so raraten am mapanepanes pa o vazay da jinyo.”#23:31 Do ciring no Sila: o mavyay a kayo a kano maoto a kayo.
32No kano nang am mangap sira so rarwa ka meyraraten a tao pehzahen da ji Yeso a wakwaken. 33Makaranes sira do angayan da ngaranan da Yanga no oo no tao am padketen da dang si Yeso do jyojika a kapadket da so rarwa ka meyraraten a tao. O asa am amyan do wanan na. O asa am amyan do ozi na. 34Maniring si Yeso am, “Mo Ama, vonasen mo o raraten da no yamapadket jyaken a tao an. Ta da jyatenngi o vazay da jyaken.” Meyratateng am masipangoyongoyot sira o itaysang no Loma amvonong so mina ayob na ni Yeso. 35Aro tao a meytatanek a tomangara sya. O panipanirsirngen no tao do Yotay am meykeykaming sira manci no, “Na mavyay sira o tao am no yamanoyong a na nipamnekan ni Ama ta do to a Kizisto am na ji vyai so kataotao na.” 36Akman sang o aro a itaysang no Loma a meykeykaming nya a kapakasngen da tomoro no makopad a saki jya. 37Maniring sira am, “No ka manoyong a panirsirngen no tao do Yotay am mo ji vyai so kataotao mo?” 38O nivatvatkan da do teyngato no oo na kayo am, “Iya ya am Panirsirngen da no tao do Yotay.”
39O rarwa nimeyraraten a nipazasing da jya nipadket da am amyan so asa a manci no, “Beken a si Kizisto ka? Mo ji vyai so kataotao mo a kavyay mo jyamen!” 40Mamizing na no asa ka meyraraten a tao am ioya na. Maniring am, “Yata meyyangay a yada wakwaken. Manngwa, mo jyanyaheyan si Ama ta do to? 41Manoyong ta ya da wakwaken do katey marahet ta tao. Am iya rana am yabwata o yasa ka raraten na.” 42Meyratateng am maniring ori ji Yeso am, “Mo Yeso, no si ipirwa ka mai a meypanirsirngen am manakem mo yaken an.” 43Maniring si Yeso jya am, “Ko pa ciring jimo am macihza ka jyaken sicyaraw eya mangay do teyngato.”
No kawakwak na ni Yeso
(Matay 27:45-56; Make 15:33-41; Yowani 19:28-30)
44Aknamen na o mararaw am todabo o araw a kapeysarisari na no karatayan mangay do ikatlo na vatvatek do makoyab. 45Mina todapising o myan do rako a panaralayan a nibengbeng da sya rako a milakayob. 46Meyratateng am amlololos si Yeso a manci no, “Mo Ama, itoro ko jimo o pahad ko.” Teyka na o ciring na am mazavat o inawan na. 47Macita na no panirsirngen da no itaysang no Loma o aro a vazay am iraralay na si Ama ta do to a manci no, “Manoyong o tao eya ji meyraraten an.”
48Macita da o akman sang a vazay no tomangara sya a tao am to sira na lavi so onowned a meypangay rana do vahay da. 49O makasingkad si Yeso a tao a kano nimapo do Cyadidi a macihcihza jya mavakes am meytatanek sira macyatovang a marai a tomita so vazay ang.
No kangay na mapakakasa sya ni Yoseyvo
(Matay 27:57-61; Make 15:42-47; Yowani 19:38-42)
50-51Amyan so asa ka tao a meyngaran si Yoseyvo a tao do Yotay a meyvahay do ili a meyngaran so Adimatay. Iya rana ori am tey yapya o iyangay na no nang so icyatatao na a mapapanala so katalamozong na nyaten ni Ama ta do to. Tana mina saod na so keyyan na do asa ka panirsirngen am ji na nipya no nang o mina vazay da si Yeso. 52Mangay ori a macisirsiring ji Pilato so kakas na so kataotao na ni Yeso. 53Meyratateng am mangay na rana pakasen o kataotao na ni Yeso do jyojika a kapongos na jya no milakayob a yangay do nidokdokan na rana rako a mao. Am abo pa do dang o nimrakeh a tao a. 54O araraw na no nang am ikalima na zezak a ipeypanam na no kapeywalam no tao. 55O nimapo do Cyadidi a nimacihza ji Yeso a mavavakes am macilolo sira ji Yoseyvo a mangay tomita so nipakakasan na sya. 56Omoli sira do vahay da am mapeysinsinmo sira so mahangno a haneng a kato da mangozayan do iwawalam da a meywalam do ipeyweywalam no tao.
Obecnie wybrane:
Locya 23: snt
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible Society in Taiwan