ଲୁକ 20
20
ଜିସୁଦି ଅଦିକାର୍ ବିସୟ୍ତିଙ୍ଗ୍ ପ୍ରସ୍ନ
(ମାତିଉ ୨୧:୨୩-୨୭; ମାର୍କ ୧୧:୨୭-୩୩)
1ଜିସୁ ଅର୍ଲେନ୍ ମନ୍ଦିର୍ ଲୋଇ ମାନ୍ଜି ଲୋକାଙ୍ଗ୍ ସିକିୟା ସିଜିମାର୍ଆନ୍ ମାରି ନେଗିକାବୁର୍ ୱେର୍ସି ମାର୍ଆନ୍, ନାସ୍ତିୱାଲେ ପେରି ଜାଜକର୍ ନି ସାସ୍ତ୍ରିର୍ ଜିହୁଦିର୍ ପେରି ଲୋକାୱାଲେ ୱାଜି ୱାନିଙ୍ଗ୍ ଇର୍ହାର୍, 2ନିନ୍ ଏମେ ଅଦିକାର୍ତାନ୍ ଇୟାୱିଜୁ କିଜିନି, ବା ଏନ୍ ନିଙ୍ଗିଁ ଇୟା ଅଦିକାର୍ ସିତାନ୍, ୱାନ୍ ଏନ୍, ମାଙ୍ଗିଁ ଇନ୍ଆଁ ।
3ମାତର୍ ଜିସୁ ୱାରିଙ୍ଗ୍ ୱେର୍ତାନ୍, “ନାନ୍ ବା ମିଙ୍ଗିଁ ଉଣ୍ତ୍ରି ମାଟା ୱେନ୍ବାନା, ନାଙ୍ଗିଁ ଇନ୍ଣ୍ତ୍ରୁ, 4ଡୁବନ୍ସିନି ଯୋହନତି ବାପ୍ତିସ୍ମ ସିନି ଅଦିକାର୍ ମାପୁରୁ ମାଣ୍କୁ ନୋ ଲୋକା ମାଣ୍କୁ ଆତାମାର୍ଆତ୍ ।”
5ଆବେଟ୍ ୱାର୍ ୱାରି ୱାରି ଲୋଇ ୱାର୍ଗିଜି ସାତାର୍, ଜଦି ମାପୁରୁ ମାଣ୍କୁ ଇଜି ଇନିକା, ଆବେଟ୍ ୱାନ୍ ଇନାନ୍, ମିର୍ ଏନ୍ଦା ୱାନିଙ୍ଗ୍ ବିସ୍ବାସ୍ କିଇତିଦେର୍ ? 6ଜଦି ଲୋକା ମାଣ୍କୁ ଇଜି ଇନିକା, ଆବେଟ୍ ଲୋକୱିଜେରେ ମାଙ୍ଗିଁ କାଲ୍କାଣ୍ ଡାକ୍ନା ପୋକ୍ନାର୍, ଇରିଙ୍ଗ୍ ଯୋହନ ଜେ ଅରେନ୍ ବାବବାଦି, ଇକା ୱାର୍ ଆଟ୍ୱାଦାନ୍ ମାନାତାମାନାର୍ । 7ଆଦେଙ୍ଗ୍ ଇକା ଆମାଣ୍କୁ ଆତାତ୍, “ଇକା ନେସ୍ଏପ୍ ଇଜି ୱାର୍ ଜିସୁଙ୍ଗୁଁ ୱେର୍ତାର୍ ।”
8ଜିସୁ ୱାରିଙ୍ଗ୍ ଇର୍ଆନ୍, “ନାନ୍ ଏମେ ଅଦିକାର୍ତାନ୍ ଇୟାୱିଜୁ କିଜିନା, ଆକାବା ନାନ୍ ମିଙ୍ଗିଁ ୱେର୍ତେଙ୍ଗ୍ କେଏ ।”
ଅଙ୍ଗୁର୍କିଡ଼ିଇଦୁ ବାଗ୍ତାନ୍ ପାଣିକିନିୱାରି କାତା
(ମାତିଉ ୨୧:୩୩-୪୬; ମାର୍କ ୧୨:୧-୧୨)
9ଇୟା ୱେନ୍କା ଜିସୁ ଲୋକାଙ୍ଗ୍ ଇୟା କାତା ୱେର୍ତେଙ୍ଗ୍ ଆସ୍ତାନ୍ । “ଅରେନ୍ ଲୋକୁ ଉଣ୍ତ୍ରି ଅଙ୍ଗୁର୍ କିଡ଼ିଇ କିଜି ଆକା ପାଣିକିନିୱାରିଙ୍ଗ୍ ବାଗ୍ତୁ ପାଣି କିଦେଙ୍ଗ୍ ସିଜି ନାଣ୍ତ ଦିନ୍ତି ଉଣ୍ତିଙ୍ଗ୍ ଆଇ ଦେସ୍ତୁ ସର୍ଆନ୍ । 10ମାରି, ପାଣିକିନିକାର୍ ଏଣ୍ତେସ୍ ୱାନିଙ୍ଗ୍ ଅଙ୍ଗୁର୍ କିଡ଼ିଇଦି ପଳ୍ତି ବାଗ୍ ସିନାର୍, ଇୟାଉଣ୍ତିଙ୍ଗ୍ ୱାନ୍ ଅରେନ୍ ପାଣି କିନି ମୁରୁଲିଙ୍ଗ୍ ଟିକ୍ ସମୟତୁ ୱାରି ଲାକ୍ତୁ ପୋକ୍ତାନ୍, ମାତର୍ ଆୟା ପାଣିକିନିକାର୍ ୱାନିଙ୍ଗ୍ ମାଡ୍ ଡାକ୍ତାର୍ରୋ ୱାର୍ଇ କିୟୁଦାନ୍ ଡ଼େସିପେରିତାର୍ । 11ୱାନ୍ ମାରି ଅରେନ୍ ପାଣିକିନି ଗତିମୁରୁଲିଙ୍ଗ୍ ପୋକ୍ତାନ୍; ୱାର୍ ୱାନିଙ୍ଗ୍ ବା ଡାକ୍ତାର୍ ମାରି ଅପ୍ମାନ୍ କିଜି ୱାର୍ଇ କିୟୁଦାନ୍ ଡ଼େସିପେରିତାର୍ । 12ୱେନ୍କା ୱାନ୍ ମାରି ଅରେନ୍ୱାନିଙ୍ଗ୍ ବା ପୋକ୍ତାନ୍; ମାତର୍ ୱାର୍ ୱାନିଙ୍ଗ୍ ବା କାଣ୍ତିଆ କାବରା କିଜି ଆତ୍ରେ ପେର୍ତାପୋକ୍ତାର୍ । 13ଆବେଟ୍ ଅଙ୍ଗୁର୍ କିଡ଼ିଇଦି ମାଲିକ୍ ଇର୍ଆନ୍, ନାନ୍ ଇନିକା କିନା ? ନା ଲାଡ୍ତି ମାରିନ୍ତିଙ୍ଗ୍ ପୋକ୍ନା, ଆନାତ୍ସୁଗି ୱାର୍ ୱାନିଙ୍ଗ୍ ମାନାନାର୍ । 14ମାତର୍ ପାଣିକିନିକାର୍ ମାଲିକ୍ତି ମାରିସିଙ୍ଗ୍ ସୁଡ଼ୁଜି ୱାରି ଲୋଇ ୱାର୍ଗିସାଜି ଇନ୍ଡ୍ରେଙ୍ଗ୍ ଆସ୍ତାର୍, ଇକାନ୍ ତୋ ୱାନି ମାରିସି, ୱେନିଙ୍ଗ୍ ସାୟାମାର୍ଗା ଡାକ୍ନାଟ୍, ଏଣ୍ତେସ୍କି ଇୟାୱିଜୁ ଦନ୍ ମାଦି ଆନାତ୍ । 15ମାରି, ୱାର୍ ୱାନିଙ୍ଗ୍ ଅଙ୍ଗୁର୍ କିଡ଼ିଇ ଆତ୍ରେ ଅସି ସାୟାମାର୍ଗା ଡାକ୍ତାର୍ । ଇଲେଇ, ଅଙ୍ଗୁର୍ କିଡ଼ିଇଦି ମାଲିକ୍ ୱାରିଙ୍ଗ୍ ଇନିକା କିନାନ୍ ? 16ମାଲିକ୍ ୱାଜି ଇୟା ପାଣିକିନିୱାରିଙ୍ଗ୍ ସାବିସ୍ କିନାନ୍ ମାରି ଆଇ ଲୋକାଙ୍ଗ୍ ଅଙ୍ଗୁର୍ କିଡ଼ିଇ ବାଗ୍ତୁ ପାଣି କିଦେଙ୍ଗ୍ ସିନାନ୍ । ଇକା ୱେନ୍ଜି ୱାର୍ ଇର୍ହାର୍, ଆୟାୱାଜା ଆମାକିତ୍ ।”
17ମାତର୍ ଜିସୁ ୱାରିଙ୍ଗ୍ ସୁଡ଼ୁଜି ଇର୍ଆନ୍, ଆରିଙ୍ଗ୍ ଇୟା ଆମା ବାକ୍ୟ ରାସାତାମାନାତ୍, ତାନେ ଅର୍ତ ଇନିକା,
ଇଲୁ ତିଆର୍ କିନିକାର୍ ଆମା କାଲୁଦିଙ୍ଗ୍ ସିଲେ ଇର୍ହାର୍,
ଆକା କନାଦି ମୁଲ୍କାଲୁ ଆତାତ୍ ।
18ଆମାକାନ୍ ଆୟା କାଲୁ ମୁସ୍କୁ ଆର୍ନାନ୍, ୱାନ୍ ମକା ମକା ଆନାନ୍, ମାରି ଆୟା କାଲୁ ଆମାୱାନି ମୁସ୍କୁ ଆର୍ନାତ୍, ୱାନିଙ୍ଗ୍ ଆକା ଗୁଣ୍ତ୍ଗୁଣ୍ତା କିନାତ୍ ।
ସିସୁଟ୍ସିନି ବିସୟତି କାତା
(ମାତିଉ ୨୨:୧୫-୨୨; ମାର୍କ ୧୨:୧୩-୧୭)
19ଆବେଟ୍ ସାସ୍ତ୍ରିର୍ ମାରି ପେରି ଜାଜକର୍ ଆୟା ଦାପ୍ରେ ଜିସୁଙ୍ଗୁଁ ଆସ୍ତେଙ୍ଗ୍ ସେସ୍ଟା କିତାର୍, ମାତର୍ ୱାର୍ ଲୋକାଙ୍ଗ୍ ତିଲାତାର୍, ଇରିଙ୍ଗ୍ ୱାନ୍ ଇୟା କାତା ୱାରିଙ୍ଗ୍ ସୁଡ଼ୁଜି ଇର୍ହାନ୍ ଇଜି ୱାର୍ ବୁଜାତାର୍ । 20ଆବେଟ୍ ଦାର୍ମୁସାସ୍ତ୍ରିର୍ ମାରି ପେରି ଜାଜକର୍ ଜିସୁଙ୍ଗୁଁ ଜାଡ଼ିଦୁ ଆର୍ପ୍ତେଙ୍ଗ୍ ଇଜି ନେଗି ସମୟତିଙ୍ଗ୍ କାପ୍କିଜି ମାର୍ହାର୍ । ୱାର୍ ଜିସୁ ଲାକ୍ତୁ ଏସୋ ସାଲାକିଦି ୱାରିଙ୍ଗ୍ ଲାଞ୍ଚ୍ସିଜି ପୋକ୍ତାର୍ । ୱାର୍ ଇୟା ଲୋକାଙ୍ଗ୍ ନେଗି ଲୋକୁ ୱାଜା ସାଲାକି କିନି ଉଣ୍ତିଙ୍ଗ୍ ଇର୍ଆ ମାର୍ହାର୍ । ୱାର୍ ଜିସୁ ୱେର୍ସିମାନି ମାଟାଦୁ ଇନି ତାଗ୍ଇ ବିସ୍ୟ ପୟ୍ଜ ସପ୍ତେଙ୍ଗ୍ ବଦା କିଜିମାର୍ହାର୍ । ଇରିଙ୍ଗ୍ ଜଦି ୱାର୍ ଜିସୁମାନୁ ଇନି ତାଗ୍ଇ ବିସ୍ୟ ସୁଡ଼ୁଦେଙ୍ଗ୍ ଆଟ୍ନାର୍, ଆବେଟ୍ ୱାର୍ ଜିସୁଦି ମୁସ୍କୁ ଅଦିକାର୍ ମାନି ସାସନ୍ କିନି ଲୋକା କିୟୁଦୁ ଜିସୁଙ୍ଗୁଁ ଆସ୍ପିସ୍ନା ସିନାର୍ । 21ୱାର୍ ୱାନିଙ୍ଗ୍ ୱେନ୍ବାତାର୍, “ଏ ଗୁରୁ, ମାପ୍ ନେସ୍ନାପ୍, ନିନ୍ ଟିକ୍ ମାଟା ୱେର୍ନି, ମାରି ସିକିୟା ସିନି, ମାରି ଏଙ୍ଗ୍ବା ମକମ୍ ସୁଡ଼ୁଜି ପାଣି କିଇ, ମାତର୍ ସତ୍ତାନ୍ ଲୋକା ଜିବନ୍ ଉଣ୍ତିଙ୍ଗ୍ ମାପୁରୁଦି ବଦା ବିସୟ୍ତାନ୍ ସିକିୟା ସିନି । 22ମାଙ୍ଗିଁ ଇନ୍ଆଁ, ରାଜା କାଇସର୍ତିଙ୍ଗ୍ ସିସ୍ଟୁ ସିନିକା ମା ନିୟମ୍ ନୋ ସିଲେ ?”
23ମାତର୍ ଜିସୁ ୱାରି ସାଲାକି ନେସ୍ସି ୱାରିଙ୍ଗ୍ ଇର୍ହାନ୍, ନାଙ୍ଗିଁ ଉଣ୍ତ୍ରି ଅଦ୍ଲି ତର୍ତୁ । 24ଉଣ୍ତ୍ରି ୱେଣ୍ତି ଟାକା ଡାବୁଙ୍ଗୁଁ ତର୍ତୁ । ତେନି ମୁସ୍କୁ ଏ ବମା ନି ଦର୍ ମାନାତ୍ ? ୱାର୍ ଇର୍ହାର୍, ରାଜା କାଇସର୍ତିନ୍ନ୍ଦି ।
25ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ଆରିଙ୍ଗ୍ ରାଜା କାଇସର୍ତି ଆମାକା, ଆକା ରାଜା କାଇସର୍ତିଙ୍ଗ୍ ସିଦୁ; ମାରି, ମାପୁରୁଦି ଆମାକା, ଆକା ମାପୁରୁଙ୍ଗୁଁ ସିଦୁ ।”
26ଆବେଟ୍ ୱାର୍ ଲୋକା ଆଗ୍ଡ଼ି ଜିସୁ ମାଟାଦି ତାଗ୍ଇ ବିସୟ ଆସ୍ତେଙ୍ଗ୍ ଆଟ୍ଏତାର୍, ମାରି ୱାର୍ ୱାନ୍ ୱେର୍ତି ମାଟାଦି ଉଣ୍ତିଙ୍ଗ୍ କାବାଆଜି ଆଲେତା ମାର୍ହାର୍ ।
ଡ଼େସିନିଙ୍ଗ୍ଁନି ବିସୟ୍ତାନ୍ ପ୍ରସ୍ନ
(ମାତିଉ ୨୨:୨୩-୩୩; ମାର୍କ ୧୨:୧୮-୨୭)
27 #
ପ୍ରେରିତ ୨୩:୮. ଇୟା ୱେନ୍କା ସାତିଲୋକ୍ ମାରିଡ଼େସିଜିବନ୍ଆଜି ନିଙ୍ଗିଁନିକା ବିସ୍ବାସ୍ କିଇକାର୍ ଏସୋ ସାଦୁକିର୍ ଜିସୁ ଲାକ୍ତୁ ୱାତା ୱେନ୍ବାତାର୍, 28“ଏ ଗୁରୁ, ମୋସା ମା ଉଣ୍ତିଙ୍ଗ୍ ରାସ୍ତାମାନାନ୍ ଜେ, ଜଦି ଏମେ ଲୋକ୍ତି ଦାଦ୍ସି ଆଡ଼୍ସି ମାନାପ୍ ମାନାପ୍ କଡ଼କକ୍ରା ଆଏଣ୍ତା ସାନାନ୍, ଆତିଙ୍ଗ୍ ୱାନି ତଡ଼ାନ୍ ୱାନି ଆଡ଼୍ସିଙ୍ଗ୍ ପେଡ଼ିଆଜ ନିଜେଦି ଦାଦ୍ସି ଉଣ୍ତିଙ୍ଗ୍ କୁଟୁମ୍ କିଦେଙ୍ଗ୍ ଆଟ୍ନାନ୍ । 29ଅର୍ଲେନ୍ ସାତ୍ଲୋକ୍ ତଡ଼ାନ୍କୁ ମାର୍ହାର୍; ପେରିଦାଦ୍ସି ଅରେତ୍ ଆଇମାଦିଙ୍ଗ୍ ପେଡ଼ି ଆତାନ୍ ମାରି କଡ଼କକ୍ରା ଆଏଣ୍ତା ସାତା ସର୍ହାନ୍; 30ୱେନ୍କା ୱାନି କଗ୍ରି ତଡ଼ାନ୍ ପେଡ଼ିଆଜି କଡ଼କକ୍ରା ଆଏଣ୍ତା ସାତା ସର୍ହାନ୍ ମାରି ଅରେନ୍ ତଡ଼ାନ୍ ତାନେଙ୍ଗ୍ ପେଡ଼ି ଆତାନ୍; 31ଆୟାୱାଜା ସାତ୍ ତଡ଼ାନ୍କୁ ୱିଜେରେ କଡ଼କକ୍ରା ଆଏଣ୍ତା ସାତାସର୍ହାର୍ । 32ସାରାସାରିୱେନ୍କା ଆୟା ଆଇମା ବା ସାତା ସର୍ହାତ୍ । 33ଆରିଙ୍ଗ୍, ମାରିଡ଼େସିଜିବନ୍ଆଜି ୱାର୍ ନିଙ୍ଗିଁନିୱାଲେ ଆୟାୱାରି ଲୋଇ ୱାଦ୍ ଏ ଆଡ଼୍ସି ଆନାତ୍ ? ସାତ୍ଲୋକ୍ ତୋ ତାନିଙ୍ଗ୍ ପେଡ଼ି ଆତାମାର୍ହାର୍ ।”
34ଜିସୁ ୱାରିଙ୍ଗ୍ ଇର୍ହାନ୍, “ଇୟା ଦୁନିଆଦି କଡ଼କକ୍ରା ପେଡ଼ି ଆନାର୍ ମାରି ପେଡ଼ି ସିନାର୍, 35ମାତର୍ ଏମେ ମେମାରି ନି ଆଇମେକ୍ ସାତି ଲୋକାମାଣ୍କୁ ମାରିଡ଼େସି ନିଙ୍ଗିଁନି ଉଣ୍ତିଙ୍ଗ୍ ମାରି ୱାନି ଦୁନିଆଦୁ ଜିଦେଙ୍ଗ୍ ଜଗ୍ ଆନାର୍ ୱାର୍ ପେଡ଼ି ଆଏର୍; 36ମାରି, ୱାର୍ ସାଦେଙ୍ଗ୍ ଆଟ୍ଏର୍, ଇରିଙ୍ଗ୍ ୱିଜେରେ ମୁସ୍କୁପୁର୍ତି ଦୁତ୍କା ୱାଜା ତେବାନାର୍ ମାରି ମାରିଡ଼େସି ଜିବନ୍ଆଜିନିଙ୍ଗିଁତିଙ୍ଗ୍ କଡ଼ର୍ ଆକାର୍ଆକା ମାପୁରୁଦି କଡ଼ର୍ ଆନାର୍ । 37ମୋସା ନେଗ୍ରେଣ୍ତା ତର୍ତାମାନ୍ ଜେ ଲୋକୁ ସାତିମାଣ୍କୁ ମାରିଡ଼େସିଜିବନ୍ ଆଜି ଜିନାର୍ । ମୋସା ଏସ୍ତିୱାଲେ କାସ୍ନି ଦୁପାଦି ବିସୟ୍ତାନ୍ ରାସ୍ତାନ୍, ୱାନ୍ ଇର୍ଆନ୍ ଜେ, ପ୍ରବୁ ଆଜିନାନ୍ ଅବ୍ରାହାମତି ମାପୁରୁ, ଇସ୍ହାକ୍ତି ମାପୁରୁ ମାରି ଜାକୁବଦି ମାପୁରୁ । 38ୱାନ୍ ତୋ ସାତିଲୋକ୍ତି ମାପୁରୁ ଆଏନ୍, ମାତର୍ ଜିବନ୍ମାନି ଲୋକା ମାପୁରୁ; ଇରିଙ୍ଗ୍ ୱିଜେରେ ୱାନି ଆଗ୍ଡ଼ି ଜିନିକାର୍ ଆନାର୍ ।”
39ଆବେଟ୍ ସାସ୍ତ୍ରିରି ଲୋଇ ଏସୋ ଲୋକୁ ଇର୍ହାର୍, “ଏ ଗୁରୁ, ନିନ୍ ସତ୍ ୱେର୍ତି ।” 40ଇରିଙ୍ଗ୍ ୱାର୍ ୱାନିଙ୍ଗ୍ ଇନି ପ୍ରସ୍ନ ୱେନ୍ବାଦେଙ୍ଗ୍ ମାରି ସାସ୍ କିଏତାର୍ ।
କ୍ରିସ୍ତ ଏ ମାରିନ୍ ?
(ମାତିଉ ୨୨:୧-୪୬; ମାର୍କ ୧୨:୩୫-୩୭)
41ମାତର୍ ଜିସୁ ୱାରିଙ୍ଗ୍ ୱେନ୍ବାତାନ୍, କ୍ରିସ୍ତ ଜେ ଦାଉଦତି ମାରିନ୍, ଇକା ଲୋକୁ ଏଣ୍ତେସ୍ ଇନାର୍ ? 42ଇରିଙ୍ଗ୍ ନିଜେ ଦାଉଦ ଗିତସଂହିତାଦୁ ଇନାନ୍,
ପ୍ରବୁ ନା ପ୍ରବୁଙ୍ଗ୍ ଇର୍ହାନ୍,
43ମାପ୍ ଆମାସାନ୍ଦି ନି ସାତ୍ରୁରିଙ୍ଗ୍ ନି କାଲ୍କା ଆଡ୍ଗି କିଏପ୍,
ଆୟା ସାନ୍ଦି ମା ଉଣେରି ତରିନ୍ ବାସ୍ସ ମାନ୍ଆ ।
44ମାରି, ଦାଉଦ ୱାନିଙ୍ଗ୍ ପ୍ରବୁ ଇଜି ଇନାନ୍; ଆରିଙ୍ଗ୍, ୱାନ୍ ଏଣ୍ତେସ୍ ୱାନି ମାରିନ୍ ?
ଜିସୁ ସାସ୍ତ୍ରିରିଙ୍ଗ୍ ଜାଗାର୍ତା କିତାନ୍
(ମାତିଉ ୨୩:୧-୩୬; ମାର୍କ ୧୨:୩୮-୪୦)
45ୱେନ୍କା ଜିସୁ ୱିଜୁ ଲୋକା ଆଗ୍ଡ଼ି ସିସୁରିଙ୍ଗ୍ ଇର୍ଆନ୍, 46“ସାସ୍ତ୍ରିରିମାଣ୍କୁ ଜାଗାର୍ତା ! ୱାର୍ ନିର୍ଇ ଆଙ୍ଗିଁ ଆରାନାର୍ । ମାରି ସାତାସାଉକାଦୁ ଲୋକୁ ମାଡ଼ିସ୍ କିପିର୍ ଇଜି ଅଡ଼୍ବିନାର୍, ପାର୍ତନାକିନି ଇଲ୍କାଙ୍ଗ୍ ପେରି ବାଡି ମାରି ବୋଜି ଉଣିମାନୁ ପେରି ବାଡି ପୟଦେଙ୍ଗ୍ ବଦାକିନାର୍ । 47ୱାର୍ ରାଣ୍ତି ଆଇମେକା ଇଲୁଦି ୱିଜୁ ବିସୟ୍ ରେନାଅନାର୍ ମାରି ନିଜେଦିଙ୍ଗ୍ ନେଗିକାନ୍ ତର୍ତେଙ୍ଗ୍ଁ ନିର୍ଇ ପାର୍ତନା କିନାର୍; ୱାର୍ ନାଣ୍ତ ଦଣ୍ତ୍ ପୟ୍ନାର୍ ।”
Obecnie wybrane:
ଲୁକ 20: NTKoo20
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020