Yohanes 10
10
At Yesus nen, “Domba indewerek dogolik, inanggorlem dogoligogo mende, nebe anat o,” yiluk yogisasike wene
1At Yesus nen wene esigit diluk yogisasikesik nen yabunggane, men yogisasike,
“An nen wene omanggi eberogonat yokisak o. Ta nen domba waganigiluk ebe lalma unggigiluk, kolagambe mbalekmangge unggigidek, leget isade ndalogo unggisi kalok, ap eti inil arurlu waganigogo mende inggi abusak waganigilugat o. 2Nen, ta nen, su kambemangge unggisi kalok, at eti domba indewerek dogolik inanggorlem dogoligogo mendeat o. 3At domba indewerek dogolik inanggorlem dogoligogo mende eti ebe wago kalok, at omanggi domba aila kolagambe mbalekma suwam werek mende nen su kuwal disinem, at domba indewerek etnogo nen ane pagiyasinem, it domba nen, at ane inasuk koligogoma nogo nen, inendaga dombok waisalok, wogisek sikmangge dukiligogo o. 4Wogisek dukiluk nen, at ebe alebagik lago nggorlek, anggo domba yomenogo, at ane inilumo nogo nen, at omborligat luguneyak o. 5Esigit diluk pano luguneyak mendeat, it ap ninat mende inane yisinem, it domba nen, it inane inonggodekma nen, inomborlik lagidek lo luguneyak o,” yiluk, 6at Yesus nen, wene eti paga lisogo it yogisasike mende, wene nggi mende pasik yisike salek, didigidegat welaguka.
At Yesus nen, “Domba indewerek dogolik, inanggorlem dogoligogo mende, nebe anat o,” yiluk yogisasike wene
7Esigit diluk didigidek werek nggorlek, yabunggane at Yesus nen, men yogisasike,
“Wene eberogonat omanggi yokisak o. Domba eti inagolak ambe mbalekma, an nebeat o. 8An wagidek werek nggorlek, it akoni amberek alebagik waguka eti, it inebe taʼbokogonat domba inil arurlu waganggik, kimakik, kagarigogi mende wagukasikmo nogo nen, it domba nen, it inane inasuk kolkidek welaguka. 9Kolagambe mbalek, an nebeat o. Ta nen an nebe paga unggisi kalok, irli korlaginmo mondok pano dogolik, dukigik unggigik kagako dogolik, ongga pano mende dombok nasi dogogin o. 10Nen, it ap inil arurlu waganigogo mende wirigogi eti domba inil arurlu waganggik, inakik, inebe mondok deget diyigik, kagasuwogoluk wirigogi mende, an wagagi etiat, it akoni yi mende ndi mende dogalegat oba kiyakogo dogoligogi eti kak, inebe iniluk mondok dogowagaluk inilugurinabiluk nen ebe mende oba kiyakogo dogowagaluk wagagi o. 11Domba inde werek dogolik inanggorlem dogoligogo mende, nobabut pano, nebe anat o. Domba indewerek dogolik inanggorlem dogoligogo mende, obabut pano mende nen, domba inirli waganogo watlasigin yiluk akla ambaligogo. 12At esigit diluk ambaligogo mende, at ap omanggi domba indewerek mende ebe dekma. At anggo dek mende. At onggo wogosuwagaluk inanggorlem werekma kelo yengge wagonem ilenggen lakalok, domba togot diyalok lo lagarekma, kelo yengge etnogo nen domba yomenogo aik nen yarlukigik woginabigiluk sikogo-mukogo sirlik-mbirlikogo wula ʼbiyiligogo. 13At eti onggo wogosuwagaluk domba inanggorlem dogoligogo eti paga, domba yomenogo inaʼbuwa dek togot diyalok lo liligogo o. 14-15Domba inanggorlem dogoligogo mende nobabut pano, nebe anat o. Nombae nen an ilu, nen, an nen at nilu, werek eti kak, an nen nanggo domba nilu, nen, it nen an inilu, weregat o. Esigit diluk dogolik, an nanggo domba inirli waganogo watlasigiluk werek o. 16Nen, an nanggo domba ebe lalma yoma arlek werek ʼbuk. O werlekmangge amberek weregat o. Nandomba etoma mende nane inasuk koluwagaluk wogisek wisigilugat werek o. ʼBiya wisumo, it an nanggo domba yonggo mbalek omanggimo noko dogogun. Esigit diluk noko nggorlek, an narligat nen inanggorlem dogogin o. 17An watlatluk nen suguluk niluk asigiluk nebe watlasigin ambaligogo eti paga, nombae nen an endainggen kunik werek o. 18An nen watlasigin ambigidekmaat, it akoni amberek nen obake paga nasusak erlok dek o. An nenggaerek nakla nenat, nebe watlasigin ambagin obaat watlasigin o. Watlatluk yabunggane suguluk niluk asigin eti nenggaerek nakla nen ambagin obaat o. Esigit diluk kagasuwagaluk nombae nen laʼbani wagike mendeat kagasigin o, yiluk eberogonat yokisigi,” yiluk yogisasike.
19Wene esigit diluk yogisasike eti paga, it ap Yahudi mende inaneyak mondok sagalkukasik inebe minggikuka. 20Esigit diluk minggikukasik it inebe dogalekmangge nen, men yisuka.
“At yi kugi obabut weyak mende akla unggekesik ebe sinuknuk agasik wene yisi nggorlegat, kit at ane koligogi eti nenaluk,” yiluk yisuka. 21Esigit diluk yisuka mende, it pelakngge nen, men yisuka,
“Dek o. Akoni kugi obabut weyak mende inakla unggiluk, wene esigit diluk yiligogi dek o! Kugi obabut weyak mende nen inilenggen mbuk mende erlok pano kagarinabusak ambegep? Mondok erlok dek o,” yiluk yisuka.
It ap nggokndek Yahudi mende nen Yesus ebe waganggidek togot disuka wene
22Esigit diluk yisukasik oba nen, it akoni Yahudi mende inakla nen,
“O Yerusalem Allah ago palek mende yabunggane panorogo nggarelkugu nogo,” yiluk inakla eberek dogolik pesta iyarigogi paga arat korok asi wagike. Etinem, o sogi weyak welagike. 23Esigit diluk werek nggorlek, at Yesus Allah ago palekma, monggaraila endaga Salomo lambilmongge nokonem, 24it ap nggokndek Yahudi mende eragalilu nandorli wagukasik nen, men yogokuka,
“Allah nen Kristus ayonggo ʼbiluk laʼbi wisigin yisike etnogo, karat a? Ninat a, yiluk arlik paligogi yi, ninakla dirlukogo kurli nggi paga nen yoknisagin. Allah nen Kristus ayonggo ʼbiluk laʼbi wisigin yisike etnogo, kebe karat kalok, ʼbukakogonat yoknisan o,” yiluk yogoko lagukama, 25at Yesus nen, men yogisasike,
“An Arat yokisasi lagi mende, kit nen eberogonat yiluk ambaligogi dek o. An nombae nen nayonggo ʼbisikemo kagarigogo eti an nabok ʼbukakogo yokisau kagat, kagarigogo mende, 26kit kinebe domba an mende ʼbuk, ninat eti paga, nebe didanigogi dego. 27Kit kinakla esigit diluk ambaligogi mende, it amberek an nandomba mende kalok, nane inasuk koligogi, it nen an nebe it inilu nogo nen, nomborlik wirigogi o. 28Nomborlik noko nggorlek, it iniluk mondok dogowagaluk inilugurinako dogogin eti paga, it inebe watlatluk dek asugun dek o. It an ninggi paga werek nggorlek, it ap amberek nen ndilogo woginabusak mondok dek o. 29Ap amberek erlok dek mende, an nombae nen nandomba woknikike mende etiat, ebe obatne werek o. It an nombae nen woknikike mende eti at inggi paga werekma, it ap amberek nen ndilogo woginabusak mondok dego. 30Nombae nimbisak ninebe omanggiat o,” yiluk yogisasikemo, 31it ap nggokndek Yahudi mende nen, nggit ininggimo waganggukasik, Yesus ebe mondok wasuwogoluk kagakuka. 32Esigit diluk kagako lagukama, at Yesus nen, men yogisasike,
“An nombae nen pano mende dogalegat kagasuwagaluk nayonggo ʼbisike mende kagakonem, kinilenggen niyasi lagap etoma taʼbokogonat, omanggi nggi kak nggorlo kagaki paga nen nebe nasuwogoluk kagarigogi,” yiluk yogisasikemo, 33it nen, men yogokuka,
“Kat pano kagako lagan eti paga nggit oba kasuwogoluk kagarigogi ʼbuk o. Kat kebe akoniat mende, Allah endaga weyagarogo, men yiligogon,
An Allah nimbisak ndak-ndak, yiluk yiligogon eti paga kasuwogoluk kagarigogi o,” yiluk yogokukama, 34at Yesus nen, men yogisasike,
“Wene Allah nen ninasuk wakike mende etnogo paga, at nenat, men yisikemo kolal mbalogo ʼbisukama werek,
Kit kinebe allah at o, (Mzm. 82:6)
yiluk kolal mbalek werek etnogo dek a? 35Wene Allah wene kolal mbalek werek eti taʼbokogonat, omanggi dek asigin dek ambigi. Eti paga, it at ane yogisasike mende pasik,
Kinebe allah at, yiluk yisikemo kolal mbalek werek nggorlegat, 36an nen,
Nebe Allah aʼbut, yigi eti paga,
Allah endaga weyagake, yiluk nenaluk yiligogi. Allah nenat nayonggo ʼbiluk eberogonat nebe mikogo agat oba yoma laʼbani wagike mendeat, esigit diluk nenaluk yiligogi. 37An nombae nen,
Esigit diluk kagako dogono, yiluk, nayonggo ʼbiluk laʼbani wagike mende, ebe kagakidek dogolepma, kit nen nebe didaniluk kinendainggen noba panggot dusak erlok dek mende. 38Mende, an nen kagako nggorlegat, kit eberogonat yiluk kinendainggen an noba panggot dusak kinaʼit o. Esigit diluk kagarigogi eti an nombae nimbisak kunik, nen, at nen an nimbisak kunik, werek eti kinilu atluk nen eberogonat yiluk didubagik nen, an kagako lagi mende eti eberogonat yiluk didini o!” yiluk yogisasikemo, 39it nen, at Yesus ebe pakawogoluk kagakuka mendeat, at it ininggi agap warek pesokogo dukisike.
40Yesus esigit diluk dukisikesik nen, yabunggane iyogoba i Yordan aik ilibagangge at Yohanes nen alebat akoni ima wusa ʼbiyasi lagikemo etoma wundali lagikesik welagike. 41Etoma werekma, akoni dogalegat at oba wagukasik nen, men yisuka,
“At Yohanes nen elalin mende omanggi kagako lagike mondok dek mende, at nen ap yi abok yisi lagike etnogo ane taʼbokogonat ebeat agike,” yiluk yisukasik 42it akoni etoma welaguka mende inebe dogalegat inendainggen Yesus oba panggot disuka.
Obecnie wybrane:
Yohanes 10: DNA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj