Yohanes 11
11
Lazarus watlagike wene
1Ap omanggi endaga Lazarus, irugi Maria agot Marta imbisak inago o Betania omanggimo welaguka. 2Kwe Maria eti ebe, yabunggane ambusu obasi pano mende ninewe Endaganggok Yesus iyok oba wakikesik nen isi paga kokike mende etnogo. Esigit diluk inaguma werekma etinem, at Lazarus oba u warogo ʼbekemo, 3it kumi inebe mbere ewe agot imbisak iniru oba u eti paga, wene warogo Yesus oba laʼbiyasi dogolik men yisuka,
“Ninewe. Lazarus kendainggen kunik mende etnogo oba u warek werek o,” yiluk laʼbiyasukama, 4at Yesus yogosi laguka. Yogosi lagukama, asuk kolkikesik nen, men yogisasike,
“U warek eti paga, at ebe mondok watlasigin ʼbuk. An nen kagakonem, akoni nen Allah ebe pogorakik, aʼbut an pogot nakik, kagasuwagaluk, u warogo ʼbekemo werek o,” yiluk yogisasike. 5At Yesus nen, kwe Marta ewe imbisak inom, Lazarus inom, endainggen kunik welagike mendeat,
6“At Lazarus oba u werek,” yiluk yogokukama, asuk kolkike mende, eramen o welagikemo etomaat puk agikesik, inggi mbere welagike. 7Esigit diluk inggi mbere puk welagikesik nen, at agoromi ane waganggo laguka mende yomenogo yogisasi dogolik,
“Nit niniyogoba o Yudea wusa luwok o,” yiluk yogisasike. 8Esigit diluk yogisasikemo, it nen men yogokuka,
“Ninewe. Ap nggokndek Yahudi mende nen yogondak yiat nggit oba kasuwogoluk kagako lagakama dagi lagan etnogo mende, kat yabunggane suguluk o etomaat wusagaluk yiligogon a?” yiluk yisukama, 9at Yesus nen, men yogisasike,
“O ininggi omanggi pasik wi disinem, kuben jam 6 kurli keyamnggengge jam 6 agonem dambukogo 12 jam ininggi wenarigogi etnogo dek? Ta nen o mo akoni agat oba liyarinabigogo mende eti ilenggen kasi dogolik, ebe liya paga lago kalok, iyok aʼbit dikogo waragin mondok dek o. 10Mende, ta nen o kibanggo lago kalok, at akla liya mende dekma eti paga, iyok aʼbit dikogo waragin o,” yiluk yogisasikesik, 11yabunggane omanggi yogisasi dogolik, men yogisasike,
“Nit ninagarlak Lazarus etnogo arat noge yekemo mende, an nen, at noge yisinem iluguka ligin o,” yiluk yogisasike. 12Esigit diluk yogisasikemo it at agoromi ane waganggo laguka mende yomenogo nen, men yogokuka,
“Ninewe. At eti noge yiligogo kalok, oba pano asigin o,” yiluk yogokuka eti ebe, 13at Yesus nen Lazarus ebe arat watlagikemo nen yisike mendeat, it inakla nen,
“Eberogonat noge yiligogo nen yeke,” yiluk inakla ambasuka. 14Inakla esigit diluk ambasuka eti paga, at Yesus nen wene ʼbukakogo men yogisasike,
“Lazarus ebe arat watlagama o. 15Esigit diluk watlaga mendeat, kit kinendainggen noba panggot dubagik nen yiluk, an etoma wusigidek puk welagi eti kit kinake nakla arlenggen kigi o. Eti paga, yogondak nit Lazarus oba wusa luwok nen witni o,” yiluk yogisasike. 16Esigit diluk yogisasikemo, ap endaga Tomas yigik, Kulup mende yigik, yisi laguka eti nen, agarlagi Yesus agoromi pelakngge yomenogo men yogisasike,
“At Yesus ninomat watlasuwok nen, wusa luwok nen witni o,” yiluk yogisasike.
Yesus nen, “Iniluk mondok dogowagaluk inilugurinabigogo mende anat o,” yiluk yisike wene
17Esigit diluk yogisasikesik nen, at Yesus agarlagi inom arat wusa laguka kak, Lazarus agatma sal disukasik oba nen ininggi kenagan welagukasik omanggi werekma wusasuka. 18O Betania eti o Yerusalem eragalilu korogat kolak liligogoma kurli, 3 kilometer negen eti paga, 19kwe Maria inom, Marta inom, iniru Lazarus warekma inakla panorogo yiluk, it akoni Yahudi mende dogalegat inoba wagukasik welaguka. 20Esigit diluk wagukasik werekma,
“At Yesus ebe wirigogo,” yiluk akoni nen yisukama Marta asuk kolkikesik nen, Maria uma werek nggorlek Yesus oba ʼbika lagike. 21Lagikesik Yesus yogoko dogolik, men yisike,
“Newe. Kat yoma witluk dogolepma, an niru watlaga eti watlatlep dek kigi o. 22Esigit diluk watlatlep dek mende, newe. Yogondak kat nen Allah nena mende nggino yogosumo, at nen wokisiginat etnogo, an niluat o,” yiluk yogokikemo, 23at Yesus nen,
“Kat kiru suguluk iluk asiginat o,” yiluk yogokikemo, 24at Marta nen, men yogokike,
“O ilugun kurli paga akoni watlaguka mende inilugurinabigin etinem, at Lazarus eti yabunggane suguluk iluk asigin yiluk, an niluat o,” yiluk yogokikemo, 25at Yesus nen, men yogokike,
“Akoni iniluk mondok dogowagaluk, an nenat inilugurinabigogo o. At ta nen endainggen an noba panggot dilukmo nen watlasigin kalok, at ebe watlasigin mende, yabunggane iluk atluk iluk mondok dogogin o. 26Nen, akoni iniluk dogolik inendainggen an noba panggot diligogi mende, inebe mondok watlagidek iniluk mondok dogogun o. Wene eti eberogonat yiluk didegen a?” yiluk yogokikemo, 27at Marta nen, men yogokike,
“Newe. Kat kebe Allah aʼbut Kristus, Allah nen mikogo mendagaluk laʼbi wisigin yisuka etnogo, karat yiluk, didagagi o,” yiluk yogokike.
Yesus de akike wene
28Esigit diluk yogotluk, Marta nen ewe Maria waisi lagikesik asokneat wagikemo nen, men yogokike,
“Ninewe wene yanggul nisiligogo mende etnogo ebe wagasik korok yoma dogolik waikirigogo,” yiluk ane pok-pogat yogokike. 29Esigit diluk yogokikemo Maria asuk kolkikesik nen, ibat mendokogo melatluk, Yesus oba wagike. 30Wagikesik, at Yesus o silimo awan unggigidek, kwe Marta nen Yesus ʼbika lagikesik imbisak abuk agukama eranogoat werekma wagike. 31Kwe Maria nen esigit diluk ibat siyakogo melatluk duki wagikemo it akoni Yahudi mende kwe Maria akla panorogo yiluk uma welaguka mende yomenogo inilenggen kasukasik nen,
“Kwe Maria Lazarus owak oba de asi laga kigi,” yiluk omborlik waguka. 32Wago nggorlek, kwe Maria etnogo ilenggen Yesus ebe lakasikesik nen, oba wagikesik indibagal yunggulogo at apma soma yisikesik nen, men yogokike,
“Newe. Kat yoma witluk dogolepma, an niru watlaga eti watlatlep dek kigi o,” yiluk yogokikesik de akonem, 33it akoni Yahudi mende Maria omborlik waguka mende yomenogo inomat de akonem, at Yesus nen ilenggen iyalok nen, it inaʼbuwa nen akla weyak atluk inoba kinok waganggo dogolik, men yogisasike,
34“Lazarus ebe warek ngga-nggerogo sal degama werek,” yiluk yogisasikemo, it nen,
“Newe. Kilenggen kanok nen eme o,” yiluk yogokukama 35at Yesus de akikeat. 36Esigit diluk de ako werekma, it ap Yahudi mende yomenogo nen,
“Iya! Lakani! At Yesus Lazarus endainggen kunik mondok welagama yi, ninayuk a!” yiluk pogorakuka. 37Esigit diluk yisuka mende, it akoni yomenogo mende pelakngge nen men yisuka,
“At nen ap omanggi ilenggen mbuk mende pano kagake eti kak, Lazarus iluk dogowagaluk kagatlepma, watlatlep ambegep? Watlatlep degat o,” yiluk yisuka.
Yesus nen Lazarus ilugut disike wene
38Esigit diluk yisukama, at Yesus endainggen weyak atluk warek ebe nggit elo perlelekma nditnik-ndetnokogo ʼbisukama etoma ʼbika lagike. 39ʼBika lagikesik nen, men yogisasike,
“Nggit eti denggalogo laʼbini o,” yiluk yogisasikemo ap watlagike mende etnogo iru Marta nen, men yogokike,
“Newe. At ebe salkosik oba nen nininggi kenaganat welagosik omanggi welago yi. Arat pirli agasik obasi agama o,” yiluk yogokikemo 40at Yesus nen, men yogokike,
“An nen wene yokogo dogolik,
Kendainggen an noba panggot degen kalok, Allah pogorarigogo mende etnogo omanggi kagakonem kilenggen kiginat o, yiluk, arat yokigi dek nogo? Kilenggen kiginat o, yiluk yokigi o,” yiluk yogokikemo, 41it nen nggit etnogo denggalogo laʼbisukama, Yesus ilenggen mbogot oba liyakalok nen, men yisike,
“Allah Nombae. An nane kasuk kolken eti paga, keyagi watkabigogo o. 42An nen kat nggino yokogonem, nane kasuk koligogon etnogo, an niluat mende, it akoni yoma nen, kat nen an laʼbani wagagin eti nebe didanuwagaluk yokigi o, nombae,” yiluk esigit diluk yisikesik nen, 43yabunggane ane nggokogo men yisike,
“Lazarus. Duki me o!” yiluk yogokikemo, 44at Lazarus ebe watlagike mende etnogo iluk atluk, inggi iyok kerle su mende yiligat, elokonggen su yiligat, duki wagike. Duki wagikemo, at Yesus nen it akoni etoma welaguka mende yomenogo yogisasi dogolik,
“Ebe lowak nen, oba kerle su mende yilik etoma piyal dini o,” yiluk yogisasike.
Yesus wasuwogoluk wene mbalko laguka wene
(Matius 26:1-5; Markus 14:1-2; Lukas 22:1-2)
45Esigit diluk kagakikemo, it akoni Yahudi mende inebe dogalegat kwe Maria inom inoba wagukasik welaguka mende yomenogo, at Yesus nen kagakike mende eti inilenggen kasukasik nen, it amberek dogalegat inendainggen Yesus oba panggot disuka. 46Esigit diluk panggot disuka mende, it amberek ap Farisi mende inoba lagukasik nen, men yogisasuka,
“At Yesus nen yigit diluk kagake, ndigit diluk kagake,” yiluk yogisa laguka. 47Esigit diluk yogisa lagukama nen, it ap Allah indewerek ineugi nggokndek inom, it ap Farisi mende inom, it ap wene Allah pasik erlo mbileligogo mende waisasukama wagukama nen, men yogisasuka,
“At ap eti ebe diduwagaluk elalin mende dogalegat kagarigogo eti, nit nen ninggit diluk kagasuwok ambegep? 48Nit nen, at esigit diluk kagarik noko nggorlek mberikidek togot diyagun kalok, akoni dogalegat inendainggen at oba panggot dilik lagonem, yabunggane ilugun oba, it ap Roma mende witluk nen ninebe olin warogo ʼbinanggo dogolik, Allah ago palek miyali wisugun o!” yiluk yogisasukama, 49ap it mende omanggi endaga Kayafas, it ap Allah indewerek mende inewe nggok tahun eti paga welagike mende eti nen men yogisasike,
“Kit wene mondok kinonggodek nen yiligogi. 50Nit taʼbokogonat olin watninakidek, nit ninake ap omanggiat watlasumo pano, yiluk didiligogi dek a?” yiluk wene esigit diluk yisike eti, 51at akla nen nggagalogo yisike ʼbuk. At te, at ebe ap Allah indewerek mende inewe nggok tahun eti paga werekma, Allah nen akla nggagalkikemo, men yisike,
“Nit akoni Yahudi mende ninake Yesus ebe watlasigin,” eti pasigat yisike o. 52Mende, it akoni Yahudi mende inakeat yisike ʼbuk. Akoni taʼbokogonat Allah aʼburi mende o yi ai ndi ai sirlik-mbirlik werek mende inom dambukogo ʼbiyagaluk, Yesus watlasigin mende pasik yisike o. 53Esigit diluk yogisasikemo, kurli eti kurli nen, it ap nggokndek Yahudi mende nen Yesus ebe mondok wasuwogoluk abok mbalko laguka.
54Esigit diluk yisuka eti paga, at Yesus o Yudea etoma ap Yahudi mende inil oba ebe selekmarogo lagidek. Limak-limak noko lagikesik nen, o etoma togot diyalok, o limo akoni dekma eragalilungge o unggul endaga Efraim lagikesik, at agoromi ane waganggo laguka mende yomenogo inom etoma welaguka.
55Welaguka eta amot, it akoni Yahudi mende pesta endaga Paskah niligogi etnogo mende nausak oba arat panggok yi wagikemo nuwogoluk awan dogolik, it inoba nggorogo yiluk, Yahudi mende kagarigogi kak kagasuwogoluk, inaguma dombok nen o Yerusalem nandorli laguka. 56-57Nandorlek werek nggorlek, it ap Allah indewerek mende ineugi nggokndek mende inom, it ap Farisi mende inom, wene mbalko dogolik, men yisuka,
“It akoni amberek Yesus ebe werek inilu kalok, nit nen at ebe pakawogoluk yoknisa wisuwak o,” yiluk yonggo wula ʼbiyasukasikmo nogo nen, it akoni yomenogo Allah ago palekma dogolik, Yesus kweyarik it-it kinok waganggo dogolik,
“At pesta kagakonem yi wisigin ambaligogi a? Dek a,” yiluk yisi laguka.
Obecnie wybrane:
Yohanes 11: DNA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Yohanes 11
11
Lazarus watlagike wene
1Ap omanggi endaga Lazarus, irugi Maria agot Marta imbisak inago o Betania omanggimo welaguka. 2Kwe Maria eti ebe, yabunggane ambusu obasi pano mende ninewe Endaganggok Yesus iyok oba wakikesik nen isi paga kokike mende etnogo. Esigit diluk inaguma werekma etinem, at Lazarus oba u warogo ʼbekemo, 3it kumi inebe mbere ewe agot imbisak iniru oba u eti paga, wene warogo Yesus oba laʼbiyasi dogolik men yisuka,
“Ninewe. Lazarus kendainggen kunik mende etnogo oba u warek werek o,” yiluk laʼbiyasukama, 4at Yesus yogosi laguka. Yogosi lagukama, asuk kolkikesik nen, men yogisasike,
“U warek eti paga, at ebe mondok watlasigin ʼbuk. An nen kagakonem, akoni nen Allah ebe pogorakik, aʼbut an pogot nakik, kagasuwagaluk, u warogo ʼbekemo werek o,” yiluk yogisasike. 5At Yesus nen, kwe Marta ewe imbisak inom, Lazarus inom, endainggen kunik welagike mendeat,
6“At Lazarus oba u werek,” yiluk yogokukama, asuk kolkike mende, eramen o welagikemo etomaat puk agikesik, inggi mbere welagike. 7Esigit diluk inggi mbere puk welagikesik nen, at agoromi ane waganggo laguka mende yomenogo yogisasi dogolik,
“Nit niniyogoba o Yudea wusa luwok o,” yiluk yogisasike. 8Esigit diluk yogisasikemo, it nen men yogokuka,
“Ninewe. Ap nggokndek Yahudi mende nen yogondak yiat nggit oba kasuwogoluk kagako lagakama dagi lagan etnogo mende, kat yabunggane suguluk o etomaat wusagaluk yiligogon a?” yiluk yisukama, 9at Yesus nen, men yogisasike,
“O ininggi omanggi pasik wi disinem, kuben jam 6 kurli keyamnggengge jam 6 agonem dambukogo 12 jam ininggi wenarigogi etnogo dek? Ta nen o mo akoni agat oba liyarinabigogo mende eti ilenggen kasi dogolik, ebe liya paga lago kalok, iyok aʼbit dikogo waragin mondok dek o. 10Mende, ta nen o kibanggo lago kalok, at akla liya mende dekma eti paga, iyok aʼbit dikogo waragin o,” yiluk yogisasikesik, 11yabunggane omanggi yogisasi dogolik, men yogisasike,
“Nit ninagarlak Lazarus etnogo arat noge yekemo mende, an nen, at noge yisinem iluguka ligin o,” yiluk yogisasike. 12Esigit diluk yogisasikemo it at agoromi ane waganggo laguka mende yomenogo nen, men yogokuka,
“Ninewe. At eti noge yiligogo kalok, oba pano asigin o,” yiluk yogokuka eti ebe, 13at Yesus nen Lazarus ebe arat watlagikemo nen yisike mendeat, it inakla nen,
“Eberogonat noge yiligogo nen yeke,” yiluk inakla ambasuka. 14Inakla esigit diluk ambasuka eti paga, at Yesus nen wene ʼbukakogo men yogisasike,
“Lazarus ebe arat watlagama o. 15Esigit diluk watlaga mendeat, kit kinendainggen noba panggot dubagik nen yiluk, an etoma wusigidek puk welagi eti kit kinake nakla arlenggen kigi o. Eti paga, yogondak nit Lazarus oba wusa luwok nen witni o,” yiluk yogisasike. 16Esigit diluk yogisasikemo, ap endaga Tomas yigik, Kulup mende yigik, yisi laguka eti nen, agarlagi Yesus agoromi pelakngge yomenogo men yogisasike,
“At Yesus ninomat watlasuwok nen, wusa luwok nen witni o,” yiluk yogisasike.
Yesus nen, “Iniluk mondok dogowagaluk inilugurinabigogo mende anat o,” yiluk yisike wene
17Esigit diluk yogisasikesik nen, at Yesus agarlagi inom arat wusa laguka kak, Lazarus agatma sal disukasik oba nen ininggi kenagan welagukasik omanggi werekma wusasuka. 18O Betania eti o Yerusalem eragalilu korogat kolak liligogoma kurli, 3 kilometer negen eti paga, 19kwe Maria inom, Marta inom, iniru Lazarus warekma inakla panorogo yiluk, it akoni Yahudi mende dogalegat inoba wagukasik welaguka. 20Esigit diluk wagukasik werekma,
“At Yesus ebe wirigogo,” yiluk akoni nen yisukama Marta asuk kolkikesik nen, Maria uma werek nggorlek Yesus oba ʼbika lagike. 21Lagikesik Yesus yogoko dogolik, men yisike,
“Newe. Kat yoma witluk dogolepma, an niru watlaga eti watlatlep dek kigi o. 22Esigit diluk watlatlep dek mende, newe. Yogondak kat nen Allah nena mende nggino yogosumo, at nen wokisiginat etnogo, an niluat o,” yiluk yogokikemo, 23at Yesus nen,
“Kat kiru suguluk iluk asiginat o,” yiluk yogokikemo, 24at Marta nen, men yogokike,
“O ilugun kurli paga akoni watlaguka mende inilugurinabigin etinem, at Lazarus eti yabunggane suguluk iluk asigin yiluk, an niluat o,” yiluk yogokikemo, 25at Yesus nen, men yogokike,
“Akoni iniluk mondok dogowagaluk, an nenat inilugurinabigogo o. At ta nen endainggen an noba panggot dilukmo nen watlasigin kalok, at ebe watlasigin mende, yabunggane iluk atluk iluk mondok dogogin o. 26Nen, akoni iniluk dogolik inendainggen an noba panggot diligogi mende, inebe mondok watlagidek iniluk mondok dogogun o. Wene eti eberogonat yiluk didegen a?” yiluk yogokikemo, 27at Marta nen, men yogokike,
“Newe. Kat kebe Allah aʼbut Kristus, Allah nen mikogo mendagaluk laʼbi wisigin yisuka etnogo, karat yiluk, didagagi o,” yiluk yogokike.
Yesus de akike wene
28Esigit diluk yogotluk, Marta nen ewe Maria waisi lagikesik asokneat wagikemo nen, men yogokike,
“Ninewe wene yanggul nisiligogo mende etnogo ebe wagasik korok yoma dogolik waikirigogo,” yiluk ane pok-pogat yogokike. 29Esigit diluk yogokikemo Maria asuk kolkikesik nen, ibat mendokogo melatluk, Yesus oba wagike. 30Wagikesik, at Yesus o silimo awan unggigidek, kwe Marta nen Yesus ʼbika lagikesik imbisak abuk agukama eranogoat werekma wagike. 31Kwe Maria nen esigit diluk ibat siyakogo melatluk duki wagikemo it akoni Yahudi mende kwe Maria akla panorogo yiluk uma welaguka mende yomenogo inilenggen kasukasik nen,
“Kwe Maria Lazarus owak oba de asi laga kigi,” yiluk omborlik waguka. 32Wago nggorlek, kwe Maria etnogo ilenggen Yesus ebe lakasikesik nen, oba wagikesik indibagal yunggulogo at apma soma yisikesik nen, men yogokike,
“Newe. Kat yoma witluk dogolepma, an niru watlaga eti watlatlep dek kigi o,” yiluk yogokikesik de akonem, 33it akoni Yahudi mende Maria omborlik waguka mende yomenogo inomat de akonem, at Yesus nen ilenggen iyalok nen, it inaʼbuwa nen akla weyak atluk inoba kinok waganggo dogolik, men yogisasike,
34“Lazarus ebe warek ngga-nggerogo sal degama werek,” yiluk yogisasikemo, it nen,
“Newe. Kilenggen kanok nen eme o,” yiluk yogokukama 35at Yesus de akikeat. 36Esigit diluk de ako werekma, it ap Yahudi mende yomenogo nen,
“Iya! Lakani! At Yesus Lazarus endainggen kunik mondok welagama yi, ninayuk a!” yiluk pogorakuka. 37Esigit diluk yisuka mende, it akoni yomenogo mende pelakngge nen men yisuka,
“At nen ap omanggi ilenggen mbuk mende pano kagake eti kak, Lazarus iluk dogowagaluk kagatlepma, watlatlep ambegep? Watlatlep degat o,” yiluk yisuka.
Yesus nen Lazarus ilugut disike wene
38Esigit diluk yisukama, at Yesus endainggen weyak atluk warek ebe nggit elo perlelekma nditnik-ndetnokogo ʼbisukama etoma ʼbika lagike. 39ʼBika lagikesik nen, men yogisasike,
“Nggit eti denggalogo laʼbini o,” yiluk yogisasikemo ap watlagike mende etnogo iru Marta nen, men yogokike,
“Newe. At ebe salkosik oba nen nininggi kenaganat welagosik omanggi welago yi. Arat pirli agasik obasi agama o,” yiluk yogokikemo 40at Yesus nen, men yogokike,
“An nen wene yokogo dogolik,
Kendainggen an noba panggot degen kalok, Allah pogorarigogo mende etnogo omanggi kagakonem kilenggen kiginat o, yiluk, arat yokigi dek nogo? Kilenggen kiginat o, yiluk yokigi o,” yiluk yogokikemo, 41it nen nggit etnogo denggalogo laʼbisukama, Yesus ilenggen mbogot oba liyakalok nen, men yisike,
“Allah Nombae. An nane kasuk kolken eti paga, keyagi watkabigogo o. 42An nen kat nggino yokogonem, nane kasuk koligogon etnogo, an niluat mende, it akoni yoma nen, kat nen an laʼbani wagagin eti nebe didanuwagaluk yokigi o, nombae,” yiluk esigit diluk yisikesik nen, 43yabunggane ane nggokogo men yisike,
“Lazarus. Duki me o!” yiluk yogokikemo, 44at Lazarus ebe watlagike mende etnogo iluk atluk, inggi iyok kerle su mende yiligat, elokonggen su yiligat, duki wagike. Duki wagikemo, at Yesus nen it akoni etoma welaguka mende yomenogo yogisasi dogolik,
“Ebe lowak nen, oba kerle su mende yilik etoma piyal dini o,” yiluk yogisasike.
Yesus wasuwogoluk wene mbalko laguka wene
(Matius 26:1-5; Markus 14:1-2; Lukas 22:1-2)
45Esigit diluk kagakikemo, it akoni Yahudi mende inebe dogalegat kwe Maria inom inoba wagukasik welaguka mende yomenogo, at Yesus nen kagakike mende eti inilenggen kasukasik nen, it amberek dogalegat inendainggen Yesus oba panggot disuka. 46Esigit diluk panggot disuka mende, it amberek ap Farisi mende inoba lagukasik nen, men yogisasuka,
“At Yesus nen yigit diluk kagake, ndigit diluk kagake,” yiluk yogisa laguka. 47Esigit diluk yogisa lagukama nen, it ap Allah indewerek ineugi nggokndek inom, it ap Farisi mende inom, it ap wene Allah pasik erlo mbileligogo mende waisasukama wagukama nen, men yogisasuka,
“At ap eti ebe diduwagaluk elalin mende dogalegat kagarigogo eti, nit nen ninggit diluk kagasuwok ambegep? 48Nit nen, at esigit diluk kagarik noko nggorlek mberikidek togot diyagun kalok, akoni dogalegat inendainggen at oba panggot dilik lagonem, yabunggane ilugun oba, it ap Roma mende witluk nen ninebe olin warogo ʼbinanggo dogolik, Allah ago palek miyali wisugun o!” yiluk yogisasukama, 49ap it mende omanggi endaga Kayafas, it ap Allah indewerek mende inewe nggok tahun eti paga welagike mende eti nen men yogisasike,
“Kit wene mondok kinonggodek nen yiligogi. 50Nit taʼbokogonat olin watninakidek, nit ninake ap omanggiat watlasumo pano, yiluk didiligogi dek a?” yiluk wene esigit diluk yisike eti, 51at akla nen nggagalogo yisike ʼbuk. At te, at ebe ap Allah indewerek mende inewe nggok tahun eti paga werekma, Allah nen akla nggagalkikemo, men yisike,
“Nit akoni Yahudi mende ninake Yesus ebe watlasigin,” eti pasigat yisike o. 52Mende, it akoni Yahudi mende inakeat yisike ʼbuk. Akoni taʼbokogonat Allah aʼburi mende o yi ai ndi ai sirlik-mbirlik werek mende inom dambukogo ʼbiyagaluk, Yesus watlasigin mende pasik yisike o. 53Esigit diluk yogisasikemo, kurli eti kurli nen, it ap nggokndek Yahudi mende nen Yesus ebe mondok wasuwogoluk abok mbalko laguka.
54Esigit diluk yisuka eti paga, at Yesus o Yudea etoma ap Yahudi mende inil oba ebe selekmarogo lagidek. Limak-limak noko lagikesik nen, o etoma togot diyalok, o limo akoni dekma eragalilungge o unggul endaga Efraim lagikesik, at agoromi ane waganggo laguka mende yomenogo inom etoma welaguka.
55Welaguka eta amot, it akoni Yahudi mende pesta endaga Paskah niligogi etnogo mende nausak oba arat panggok yi wagikemo nuwogoluk awan dogolik, it inoba nggorogo yiluk, Yahudi mende kagarigogi kak kagasuwogoluk, inaguma dombok nen o Yerusalem nandorli laguka. 56-57Nandorlek werek nggorlek, it ap Allah indewerek mende ineugi nggokndek mende inom, it ap Farisi mende inom, wene mbalko dogolik, men yisuka,
“It akoni amberek Yesus ebe werek inilu kalok, nit nen at ebe pakawogoluk yoknisa wisuwak o,” yiluk yonggo wula ʼbiyasukasikmo nogo nen, it akoni yomenogo Allah ago palekma dogolik, Yesus kweyarik it-it kinok waganggo dogolik,
“At pesta kagakonem yi wisigin ambaligogi a? Dek a,” yiluk yisi laguka.
Obecnie wybrane:
:
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj