Mata 5
5
Fare hateya ge Zeso ne ge njal digi
Luk 6.20-26
1Sok ge Zeso kuwa ɓase mbe ge nɔnɔg ma go, ndee ge njal sok a̰me ge haal digi, kaɗ na pe se. Ne nda ge ame hateya ma ndaa ta ya ge ne ta zì guwa. 2Sok mbe go, ee pe hate num fare.
Nda ge Dok kee num wa tare ma
3Zeso ɗege janna go: Laa saal a ge num ge ndil ta hoɗegeya maa on̰om zì ma pe, ago muluk ge Dok ne num way ne. 4Laa saal a ge num ge seɗ tiɗiya no ma pe, ago Dok mbo iyal num laa. 5Laa saal a ge num ge no suul ma pe, ago Dok mbo hon num suwa ge na kee wa tii ge num pe ge na ɓul mɔɗwag. 6Laa saal a ge num ge no camal mage mam njuwal ge temel taɗ ma pe, ago num dul wa ma mbo ee se. 7Laa saal a ge num ge kuwa nda a̰se no ma pe, ago Dok mbo kuwa num a̰se waɗme. 8Laa saal a ge num ge kee fare ge Dok ne ge dul wa kɔn̰al ma pe, ago àa mbo kuwa Dok ndwa. 9Laa saal a ge num ge ɓyare go halas kaa ge sok ma go peɗ ma pe, ago Dok mbo tol num na van ma. 10Laa saal a ge num ge njoɗ yal ge temel taɗ ma pe, ago muluk ge Dok ne num way ne. 11Sok ge àa kaɗ ka sal ḛ, àa ka kee ḛ yal, àa ka jan fare ge sone ge diige pe peɗ ndwa vḛḛne ḛ dḭḭl ge mbi pe, ḛ ke laa saal. 12Ḛ ke laa saal, ḛ kaɗ fafan̰, ge dape, poɗɗa ge ɓaŋlaŋ da̰a̰re ḛ go ge pḭḭ ma zì yà. Nda ge zwagre Dok wa ge ḛ ndwa zḛḛge ma, àa kê num mbe go waɗme.
Nda ge kàre Zeso pe ma dinna ge nuwam mage kɔn̰al go
13Ḛ dinna ge nuwam go ge nda pe peɗ dunin̰a zì. Ɗaŋɗe, kaɗɗa nuwam camam gaa daa ya to no, a ge da ta ɗoo, ndu wa mbo gwan ge ne camam ya de? Gaa go àa ka̰a̰ ne gezi, nda duwana ma mbo vin̰a ge ne pagal. 14Ḛ dinna ge kɔn̰al go, ge nda ge dunin̰a zige ma pe peɗ. Suwal ga̰a̰l ge àa sḭḭ ne ge njal pagal digi, ne wayya to. 15Ge mojo̰o̰ lampe go, nda dun ne digi go àa kubi ne ge sòo zì to, ɗaŋɗe, àa ee ne ge kaŋ ee lampe pe pagal ndwa go ne kɔn̰al zḛḛ ge nda ge zok zige ma ta mɔɗwag. 16N̰a kaŋ keeya ge ḛ ḛ ma kaa kɔn̰al ge nda ta peɗ, sok kuwa kaŋ keeya ge ḛ ḛ ge kwaɗa mbe ma go, nda duwana ma sale nè Ba ge no pḭḭ ma zì yà.
Zeso mbo ya huy eeya ge Dok ne ma wa
Luk 16.17; 12.58, 59; 16.18
17Zeso gwan jan num go: Ne kaa ge ḛ duwa go mbi mbo ya gul eeya ge Moyiz ne mage hateya ge nda ge zwagre Dok wa ma way ma to. Mbi be mbo ya gul num to, ɗaŋɗe, mbi mbo ya huy num wa. 18Fareba mbi jan ḛ ne no, zḛḛ ge go pḭḭ mage suwa burmi gezi, eeya koo fare ge nda ge zwagre Dok wa ma jin̰a num ma wa van a̰me go fyalag mbo kale gezi to baɗ, ḛ kuwa go num wa mbe ma mbo huy ne mbḛḛ. 19A ge pe no, ndu ge mbo hele wa yuwaleya van a̰me ɗu ge no ge eeya ma zì pagal ya, koo hate nda duwana ma num ke mbe go waɗme, mbo kaɗ ndu ge waɗe jiyale ne ge muluk ge Dok ne zì yà. Ɗaŋɗe, ndu ge mbo kaɗ-ɗa mboya ge num pagal, hate nda duwana ma num waɗme, mbo kaɗ ndu ge waɗe ga̰a̰l ne ge muluk ge Dok ne zì yà. 20Ago mbi jan ḛ ne no, kaɗɗa ḛ kee fare ge temel taɗ waɗe nda ge hate eeya ge Moyiz ne mage Farisi ma to ɗe, ḛ mbo waɗ ge muluk ge Dok ne zì to baɗ.
Hateya ge fare ge laa ol ne pagal
21Ḛ ge kuwaya go, àa jin̰a ḛ baŋ ma go: «Mo mbo hun swày to. Ndu ge mbo hun swày ya, àa mbo kun sariya ne pagal.»#Waz 20.13. 22Kaɗɗa ge mbi, mbi jan ḛ go, ndu ge diige ge ne laa mbo hoɗ-ɗa ge na van ta, àa mbo dol ne ge sok njoɗ yal zì. Ndu ge mbo jan na na̰ van ya go Raka#5.22 Ndu ge bàba.! Yahuɗ ma ga̰a̰l ge kun sariya ma mbo kun sariya ge ne pagal. Ndu ge mbo sal na na̰ van ya go: Dale! Dok mbo dol ne ol ge be piriya to zì.
23Kaɗɗa go mo gene ya mo bobo ge twal tuwaleya go, ge sok mboya go, mo seɗ go mo na̰ van dwaɗ sone go mo pagal, 24n̰a mo bobo sok mbe go, ge twal tuwaleya ko se, mbo, mo ɓyare vin̰a ge ḛ eyal ta buwal guy, guwa̰, mo wa ɗege hon mo bobo mbe go.
25Za̰a̰ tene avun cab ge mo kon ge huur, sok ge ḛ ge ne no gale ge vin̰a zì. Kaɗɗa go to, mo kon ge huur mbe mbo ɓyan mo ge ba ge kun sariya tok zì, ba ge kun sariya sḛ ge pool ɓyan mo ge asagar ma ga̰a̰l ge koy zok daŋay wa tok zì, asagar ma ga̰a̰l sḛ dibi mo ge daŋay zì me. 26Fareba mbi jan mo ne no, be ge mo poɗ kaŋ ge mbiya mo zuu tene papandaŋ to, mo mbo waɗ ge zok daŋay zì ya zum to baɗ.
27Ḛ ge kuwaya go, àa jin̰a ḛ baŋ ma go: «Mo mbo kee zina to.»#Waz 20.14. 28Kaɗɗa ge mbi, mbi jan ḛ go, ndu ge diige ge ndil ndu gwale ya, ne ene kaɗ ne pagal, kee zina ya kee zoo ge na dul wa zì ge ne. 29Kaɗɗa mo sok a̰me ge mo duul ta ge ee mo ne deɗɗa, koo ne kaa mo ndwa matoson, zagle ne, mo dol ne gezi yà kaal ge mo. A kwaɗa ge mo pe, mo gaa ge ndwa lee ɗu, ge go mo sḛ ge ɓul mɔɗwag, àa doo mo ge sok njoɗ yal zì yà. 30Kaɗɗa mo sok a̰me ge mo duul ta ge ee mo ne deɗɗa, koo ne kaa mo tok matoson, kṵṵ ne, mo dol ne gezi yà kaal ge mo. A kwaɗa ge mo pe, mo gaa ge tok lee ɗu, ge go mo sḛ ge ɓul mɔɗwag, àa doo mo ge sok njoɗ yal zì yà.
31Ḛ ge kuwaya waɗme go, àa jin̰a ḛ baŋ ma go: «Ndu ge diige ge yan na gwale ya, ne ho̰ ne lawayta ge ngay go na yin̰a ne yan.»#Dwa 24.1. 32Kaɗɗa ge mbi, mbi jan ḛ go: «Ndu ge diige ge yan na gwale ya, kaɗɗa na yin̰a ne ge zina pe to, ee ne kee zina. Ndu ge hee gwale ge àa yin̰a ne yan ya, kee zina waɗme.» 33Ḛ ge kuwaya iya go, àa jin̰a ḛ baŋ ma go: «Kaŋ ge mo kee wa tii sok guni tene ge Bagezok ndwa se go mo mbo kee num ma peɗ, a ngaɗ go mo huy num wa.»#Lev 19.12. 34Kaɗɗa ge mbi, mbi jan ḛ go: Ne kaa ge ḛ guni ta to baɗ, koo ge pḭḭ, ago a sok ge Dok kaa no na hòol muluk pagal ne, 35koo ge suwa, ago, a ne sok ee na ko ne, koo ge Jerusalem, ago a suwal ga̰a̰l ge gan ga̰a̰l nee ne. 36Guni tene ge mo pagal to baɗ, ago mo be mbyaɗ seŋe mo pagal susu ɗu saal koo pisil to. 37Kaɗɗa ḛ vinna kee a̰me, ḛ jin̰a bàŋ go, i kee ne ke, kaɗɗa ḛ kee to, ḛ jin̰a guwa go, i kee ne to. Fare ge ɗogle ge ḛ kan pagal ma mbo ge Ba ge zwam ta.
38Ḛ ge kuwaya go, àa jin̰a ḛ baŋ ma go: «Ndu ge ɓaa na kon ndwa, àa ɓaa ne ndwa, ge hal na kon kin̰a, àa hal ne kin̰a waɗme.»#Waz 21.24. 39Kaɗɗa ge mbi, mbi jan ḛ go: Ne kaa ge ḛ poo kaŋ keeya ge laa pisil ma, ge kaŋ keeya ge laa pisil to. Kaɗɗa ndu poɗ mo ya ge na tok guwa̰ ge mo gasa matoson go ndwa sen mo, seŋe ne lee magul waɗme. 40Kaɗɗa ndu a̰me ɓyare kaŋe mo ndwa ame mo ba̰a̰ kanna ge pul zige, n̰a ne mo ba̰a̰ ge yee gḛḛ waɗme. 41Kaɗɗa ndu a̰me ee mo ge pool mbo kilometr ɗu, mbo kilometr zi ge ne dagre. 42Ho̰ ndu ge kaɗe mo, kuri ndu ge mbo ya mo ta ɓyare wul to.
43Ḛ ge za̰a̰ ya go, ḛ baŋ ma ka janna go: «Mo laa wa̰a̰ mo rusu ma ɗeŋew, mo kuri mo kon ge ho̰o̰l gezi.»#Lev 19.18. 44Ɗaŋɗe mbi, mbi jan ḛ go: Ḛ laa wa̰a̰ ḛ nda ge ho̰o̰l ma. Ḛ ke kaɗeya ge num ge njon̰ ḛ ma pe. 45Go mbe no, ḛ mbo kaɗ dinna ge ḛ Ba ge no pḭḭ ma zì yà go. Ge dape, ndaa gyala ge nda ge laa pisil mage kwaɗa ma pagal, suwa mam ge nda ge temel mage temel to ma pagal waɗme. 46Kaɗɗa ḛ laa wan nda ge num laa wa̰a̰ ḛ ma ɗeŋew ɗe, ḛ mbo seɗ mà tok kon̰a de? Koo nda ge chal siyal ma puy, àa kee mbe go waɗme ɗe! 47Kaɗɗa ḛ san wa ḛ na̰ van ma ɗeŋew ɗe, ḛ kee ma̰ kaŋ ge ciciliŋ de? Koo nda ge no rusu Yahuɗ zì to ma#5.47 Nda ge no rusu Yahuɗ zì to ma, a nda ge kuwa Dok to ma ne. puy, àa kee mbe go waɗme ɗe! 48Ḛ kaa nda ge mbyaɗɗa tab ma ge mojo̰o̰ ḛ Ba ge no pḭḭ ma zì yà go.
Obecnie wybrane:
Mata 5: kiaGRB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017 Wycliffe Bible Translations, Inc. All rights reserved.