မာကု 3

စံဝ်ယေဆု ဆားနှာမ်းဒဲႈတူအီး တံင်ဆငည်းဆတာင်း

မတဲ ၁၂း၉-၁၄၊ လုကာ ၆း၆-၁၁

1ႎါည်းဒီး စီမေဲႈလာ်ဘိုး ဆငည်းဆတာင်းဘာ်န်း စံဝ်ယေဆုမာ် စီႎီးလေဲပ်ဒေဲႈဘိုး ပါ့်တရော်ပ် ဘိုးအူဘော်က်။ ခေဲင်းတရော်ပ်ဒီး စီမေဲႈလာ် တူအီးတည်းယာ်မ်းအူကဒ ဂေါ်ည်းအူန်း။ 2တူအီးပါ့်တရော်ပ်ဒီး ကဲကလံက်မာ် စီဂီပည်လာ်တိူဝ်ႈ အန်းစံဝ်နံင်ဆားနှာမ်းအာဝ်ဆားနှာမ်းဒဲႈ တာ့်ချှေႈတည်းယာ်မ်းအူကဒဒီး နှာင်းဂဲန်း တံင်ဆငည်းတဆာင်း၊ ဂေါႇမိုႈ ကဲဆီင်ဟြာ်ည်ႇ ဒီနံင်ကလူည်ႇကလေဲပ်အန်းစံဝ် စာနံင်ဘိူန်းတဲက်ႏဒါ်ႈ တာ့်အန်း။ 3ဘိူန်ဇေဲန်း အန်းစံဝ်စီ ဒါ်ႈတာ့်ချှေႈတည်းယာ်မ်းအူကဒဒီး “ဒေဲႈဇံင်းလအာည်ႇတူအီးကဲနီး။” 4ႎါည်းဒီး အန်းစံဝ် စီမှောႇတာ့်ကဲ ဒါ်ႈ “တံင်ဆငည်းဆတာင်းနီး နံင်ချှင်တော်ရေဲန်း မျိုးအီးချှီႇ ဟီုဝ်၊ နံင်ချှင်တော်ရေဲန်း မျိုးအီးဇေဝ်ဟီုဝ်။ နံင်ချှင်တော်ချော်တ်လာည်းအဆာက်တူအီး ဟီုဝ်၊ နံင်ချှင်တော် ပတတ်ယာ်မ်း အဆာက်တူအီး ဟီုဝ်။”

ကဲမာ် ဂေါ်ည်းဘူကျောႈဘူကျန့်မ။

5ဘိူန်ဇေဲန်း အန်းစံဝ်မာ် တိူဝ်ႈကပါ်ႇကပါ်န် ပါဆီင်ဇာဝ်း၊ အန်းစီပေန်လာ်ဘိုးနောႈဇောႈ ဂေါႇမိုႈ အန်းနာ်ႇ ကဲမိုႈတူအီးတီုဝ်ကလာင်းဒည်း၊ စီဒါ်ႈလာ် တာ့်ချှေႈတည်းယာ်မ်းအူကဒဒီး “ဆီုဝ်ဟံင်း တည်းမည်း။” ချှေႈဒီးမာ် ဘိူဝ်ဆီုဝ် တာ်တည်းအန်း၊ တည်းအန်းမာ်ဟည်ဂဲန်းဘာည်းဒို့အီးပျီမ်း။ 6ဘိူန်ဇေဲန်း ဖာရိဆဲကဲဒီးမာ် ယာ်ည်ႇလည်လေႈဟာဝ်းပေါႇ ဒခေဲင်းတရော်ပ်ဒီး။ ကဲစီဟာဝ်းပေါႇ ပါ့်စုမ်းဟေရိုတ်၊ ကဲစီကအုပ်ကမိုန် စာနံင်ပယာ်မ်းတာ့်စံဝ်ယေဆု။

တူအီးတော်န်ဒီတော်န်ဒဲန် ဒေဲႈဇူးပါ့်စံဝ်ယေဆု

7ႎါည်းဒီး စံဝ်ယေဆုကာည်း တပဲအန်းကဲ စီလည်လေႈဟာဝ်း ပါ့်ညျှာတီုင်းအေဲမ်းဂါလိလဲ။ တူအီးပါ့်အရာပ်ဂါလိလဲကဲမာ် တောႇဒေဲႈလဘာ်န်းအန်းစံဝ်။ 8ဒဇေဲန်းအာဝ်ႎါ်န်း ဂါဆီင်မိုႈအီးဂေါ်ည်း ပါ့် အရာပ်ယုဒ၊ လှံင်းယေရုဆလိင်၊ အရာပ်အိဒုမဲ၊ စံမ့်အရာပ်ညျှာဒလလေဲင်းအေဲမ်းယော်ဒန်၊ စီတောႇဘိုးအရာပ် ပါ့်ရီမ်းလှံင်းတုရုကာည်းလှံင်းဆိဒိုင်၊ ကဲစီယေဲဝ်းတညာဝ်း ခါဝ်ဆတာင်းပံင်ရေဲန်းအန်းစံဝ် စီဒေဲႈဇူးဒို့ ပါ့်ဂေါ်ည်းအန်း။ 9ဂေါႇမိုႈတူအီးဂေါ်ည်းကပါ်ႇကပါ်န် ဂီုန်းယာဝ်း ပါ့်ရီမ်းအန်းစံဝ် နှာင်းကဲဘူလံက်အန်းစံဝ် အန်းစီဆူည်ႇ တပဲအန်းကဲ ဟြာ်ည်ႇပ္လေႈအူန်း ကလေဲႇဟိူဝ်းအူလှာင်း နှာင်းဂေါ်ည်းရီမ်းအန်း။ 10ဆီမ်ဘာည်းဆံမ်ဒါ်ႈဘာည်းဇေဲန်း ဂေါႇမိုႈအန်းစံဝ်ရေဲန်းဒဲႈ တူအီးဆဲဝ်းကဲဂဲန်းဒေဲႈဒို့၊ ဂါဆီင်မိုႈတူအီးမေဲႈယောကာကဲပါ်ပည်မေဲႈ စာနံင်ဘိူန်းစုလံက်အန်းစံဝ် ကဲစီကစီင်းကအီင်းဒေဲႈလာ်ဘာည်းဇေဲန်း။ 11ကဲအီးမိုႈကနာ်မ်းဇာဝ်းလေဲပ်မာ် စံန်ကဲယေဲဝ်း အန်းစံဝ် စီအံက်ဆကျူႇမူႇကေဲန်း အောင်းပါဝ်ဒါ်ႈ “မည်းစံဝ် မိုႈပေါႇကော်န်းစံဝ်ဖြားဟာ့်။”

12ဘိူန်ဇေဲန်း အန်းစံဝ် စီတာ်မ်းကျောႈချဲတ် တာ့်ကဲ၊ နှာင်းကဲဘူလှယ်ကလာင်း လော်င်အန်း။

စံဝ်ယေဆု ရောႈလာည်း စံင်နာင်းစံဝ် အူကိူဝ်းလေႈအယ်ချှေႈ

မတဲ ၁၀း၁-၄၊ လုကာ ၆း၁၂-၁၆

13ဘိူန်ဇေဲန်း စံဝ်ယေဆု စီဟိုက်ဟာဝ်း ပါ့်တေဲင်းနော၊ စီတေဲႇ တူအီးချှေႈပံင်ကျိူက်အန်း၊ ကဲစီဟိုက်ဒေဲႈဇူးပါ့်ရီမ်းအန်းစံဝ်။ 14ဘိူန်ဇေဲန်း အန်းစံဝ်စီရောႈလာည်း တူအီးအူကိူဝ်းလေႈအယ်ချှေႈ နှာင်းကဲကဲဒီးပေန်ဒို့ စံင်နာင်းစံဝ်ဟာ့်။ အန်းစံဝ်ရောႈလာည်းအူန်းကဲ စာကဲနံင်မိုႈ အီးဂေါ်ည်းတောႇအူန်းအန်းစံဝ်၊ မိုႈ စာနံင်ပ္လေႈကဲ လှယ်ဟာဝ်း ဟောတြား၊ 15စာနံင်ဒဲႈဘိုး ကဲမေဲႈကနေဲႈ ဘယ်လိူည်းချူႈႎီုန် ကနာ်မ်းဇေဝ်ကဲ။

16တူအီးပံင်ရောႈအူန်းအန်းစံဝ် အူကိူဝ်းလေႈအယ်ချှေႈဒီး မိုႈ ဆိမိုန် အီးမိုႈအန်းစံဝ်တာင်ဇီုဝ်တမာည်းအန်းဒါ်ႈ ပေတရု၊ 17ရာကိုပ် ကာည်း ယောဟန် အီးမိုႈကော်န်းတားဆေဘေဒဲ အီးမိုႈအန်းစံဝ်တေဲႇဇီုဝ်တမာည်းကဲဒါ်ႈ ဘောနေရဂတ် ပံင်ဆီင်ဒါ်ႈအန်းမိုႈ ကော်န်းကဆာႈ၊ 18အန်ဒရေ၊ ဖိလိပု၊ ဘာတောလမဲ၊ မတဲ၊ တောမ၊ မိုႈဘိုး ရာကိုပ် အီးမိုႈကော်န်းတားအာလဖဲ၊ တတ်ဒဲ၊ ဆိမိုန် အီးမိုႈချှေႈနောႈကမေဲႈယာဝ်းခြိူဝ်း၊ 19စီတောႇဘိုး ယုဒဆာကာရိုတ် အီးမိုႈချှေႈအီးနံင်ယာ်ႈလှဲဝ်ႎီုန်ကတိ တာ့်စံဝ်ယေဆု။

စံဝ်ယေဆုကာည်း ကနာ်မ်းဇေဝ် ဘေလဆေဘုလ

မတဲ ၁၂း၂၂-၃၂၊ လုကာ ၁၁း၁၄-၂၃၊ ၁၂း၁၀

20ႎါည်းဒီးစံဝ်ယေဆု စီႎီးဟာဝ်းဘိုး ပါ့်ခလေဲပ်။ ဘိူန်ဇေဲန်းတူအီးကဲမာ် ဒေဲႈကစုခမိုဂီုန်းယာဝ်း၊ ဂေါႇဘာည်းဇေဲန်း စံဝ်ယေဆုကာည်း တပဲအန်းကဲ ကံပ်ဘူဆမားလာ် ဟိုမ်းပံင်ဟိုမ်း။ 21စံန်တူအီးခလေဲပ်စံဝ်ယေဆုကဲ ယေဲဝ်းတညာဝ်း ဘည်ဘာည်းအန်းကဲဒီး၊ ကဲစီဒါ်ႈဖာ်ႈ “အန်း ဟည်ကွံင်းယေဝ်း” စီဒေဲႈဇူးလာ် ပါ့်ဒီဂေါ်ည်းအန်းစံဝ် ဒါ်ႈနံင်ဒေဲႈတေဲႇလာည်းႎီးအန်း။

22ဘိူန်ဇေဲန်း ဆြာကံတ်ကျာမ်း ကဲအီးယာ်ည်ႇလေႈဒေဲႈ ပါ့်ညျှာလှံင်းယေရုဆလိင် ကဲစီဒါ်ႈ “ချှေႈနီးမိုႈ ကနာ်မ်းဇေဝ် ဘေလဆေဘုလ ဟည်လေဲပ်တံင်အန်း။ အန်းဂီတေဲႇဒါးလာ် ဇီုဝ်ကနာ်မ်းအန်းအီးဒါင်းခူကနာ်မ်းဇေဝ်ကဲဒီး၊ စီလိူည်းချူႈႎီုန် ကနာ်မ်းဇေဝ်ကဲဒီး။”

23ဘိူန်ဇေဲန်း အန်းစံဝ်စီတေဲႇကဲ ဒါ်ႈနှဲတာ့်ကဲ ကျောႈကကည်း “ခူန်ဆိုင်ဒါ်ႈအီး ဘာည်းမှေဲ အန်းနံင်ဆမားဘိုးချူႈႎီုန်ခူန်ဆိုင်။ 24ကီုင်းလှံင်းဒီးအူကီုင်း ဆာ်တူအီးအန်းကဲ အာဝ်လည်ကရောမ်းနောႈ ကီုင်းဒီးနံင်အာဝ်ဆမားမ ဇံင်းကတာ်န်းကႎျေဲန်း နံင်ကကာႈလှဲဝ်ဟာဝ်း။ 25တီင်ခလေဲပ်ဒီး အူခလေဲပ်မာ် ဆာ်တူအီးခလေဲပ်အန်းကဲ အာဝ်လည်ကရော်မ်းနောႈ လည်အူန်းမေဲႈနောႈကကာ်ႈခည်း၊ တူအီးခလေဲပ်ဒီးနံင်အာဝ်ဆမားမ ဂေါ်ည်းကတာ်န်းတခိူည်း နံင်ကကာ်ႈလေဲဝ်းဟာဝ်း။ 26ဘာည်းလိူည်ဇေဲန်း ခူန်ဆိုင်မာ် ဆာ်ကဲအာဝ်လည်ကရော်မ်းနောႈ၊ ဂေါ်ည်းကကာ်ႈကကာည်ႇခည်း ကဲနံင်အာဝ်ဆမားမ ဂေါ်ည်းကတာ်န်းကႎျေဲန်း၊ စီနံင်ကကာ်ႈလှဲဝ်ဟာဝ်း လိူည်ဘာည်းဇေဲန်း။

27ဆာ်အီးအာဝ်ဘက်အူန်းဆဲ ချှေႈအီးဘ္လော်မ်းဒါင်း လအာည်ႇ၊ ချှေႈမှေဲ့မာ် နံင်အာဝ်ဆမားမ လေဲပ်ဖာႇလာည်းဂျိုးအန်း တီင်ခလေဲပ်အန်း။ ဘက်ဒါးအူန်းဆဲ အန်းလအာည်ႇဖာ်ႈ၊ အီးစီနံင်ဘိူန်းလာ် လေဲပ်ဖာႇလာည်းဂျိုးအန်း။

28အံဝ်းနံင်ဒါ်ႈ အီးမိုႈအီးမှာန်အန်း၊ ပံင်ကလူည်ႇပံင်ကလေဲပ် တော်န်းမျိုးဘူဒါ်ႈ၊ ပံင်ဒါ်ႈကလူည်ႇတာ်စံဝ်ဖြားဘူဒါ်ႈ၊ စံဝ်ဖြားစီနံင်ပ္လိုတ်ဒဲႈ ပံင်ကလူည်ႇကဲဒီးပါ်ပည်မေဲႈ။ 29ဘည်ဘာည်းမာ် ချှေႈမှေဲ့ ဆာ်ဒါ်ႈကလူည်ႇ တာ့်ႎိညေန်ဆငါးစံဝ်ခည်း၊ စံဝ်ဖြားစီနံင်အာဝ်ပ္လိုတ်ဒဲႈမ ပံင်ကလူည်ႇချှေႈဒီး။ ချှေႈဒီး အန်းဟည်မိုႈပေါႇ အီးကလူည်ႇကလေဲပ် မေဲႈအီုင်ဂ္လဲတ်ပါ်ဇိုဟာ့်။” 30ဆီမ်ဘာည်းအန်းစံဝ်စီဒါ်ႈလာ်ဘာည်းဇေဲန်း၊ ဂေါႇမိုႈ တူအီးကလံက် ကဲဂီဒါ်ႈတာ့်အန်းစံဝ် “ကနာ်မ်းဇာဝ်း လေဲပ်တီင်အန်းဒီး။”

မာစံဝ်ယေဆု ကာည်း ႎါးအန်းကဲ

မတဲ ၁၂း၄၆-၅၀၊ လုကာ ၈း၁၉-၂၁

31ဘိူန်ဇေဲန်း မာအန်းစံဝ် ကာည်း ႎါးအီးမာည်းအန်းစံဝ်ကဲ စီဒေဲႈစာ်မ်းလာ် ပါ့်ဂေါ်ည်းစံဝ်ယေဆု။ ကဲစီဂေါ်ည်းလာ်ဒါးခရာ်ည်ႇ ဆူည်ႇချှေႈဟည်း လေဲပ်တေဲႇလေႈအန်းစံဝ်။ 32တူအီးကဲမာ် ဂေါ်ည်းအံက် ကပါ်ႇကပါ်န်ရီမ်းအန်းစံဝ်၊ ကဲစီဒါ်ႈတာ့်အန်းစံဝ် “မာမည်းကာည်းႎါးမည်းကဲ ကဲဂီဟြာ်ည်ႇမည်း ဟည်ဒေဲႈဂေါ်ည်းစာ်မ်းခရာ်ည်ႇ။”

33အန်းစံဝ်စီႎီးမှောႇဒါ်ႈ တာ့်ကဲ “နံင်မိုႈဆီ အီးမိုႈ မာအံဝ်း ကာည်း ႎါးအံဝ်းကဲ။” 34ဘိူန်ဇေဲန်း အန်းစံဝ် စီတိူဝ်ႈဖာ်ႈ တူအီးကဲအီးဂေါ်ည်းအံက် ကပါ်ႇကပါ်န်တောႇရီမ်းအန်းဒီး၊ စီဒါ်ႈလာ် “ကဲအီအံက်တောႇအံဝ်း ကဲကဲနီးဟာ့် မိုႈ မာအံဝ်းကာည်းႎါးအံဝ်းကဲ။ 35ဘာည်းမှေဲဆံမ်ဒါ်ႈလာ်ဘာည်းဇေဲန်း ကဲအီးမိုႈ အီးရေဲန်းတောႇ နောႈစံဝ်ဖြားဒီး ဟည်မိုႈပေါႇ ႎါးအံဝ်း ကာည်း မာအံဝ်းဟာ့်။”

Obecnie wybrane:

မာကု 3: RMT

Podkreślenie

Udostępnij

Kopiuj