Matej 13
13
O Isus vaćeri i priča oto sejači
1Ko adava dive o Isus iklilo taro čher hem dželo te bešel uzalo jezero te sikaj. 2Sa edobor džene čedinde pe uzalo leste, i adalese đerdinđa ko čamco hem beštino, a o manuša terđona ine ki phuv uzalo jezero. 3I but so vaćerđa lenđe ano priče, sar akaja:
“Šunen! Iklilo o sejači te sejini. 4I sar frdela ine o seme, nesave zrnja pele ko drom, i o čiriklja ale hem sa hale len. 5A nesave pele ko than kote inele hari phuv upro bara, i odmah lelje te ikljon, adalese so na inele ani hor phuv. 6Ali kad iklilo o zoralo kham, thabile hem šućile, adalese so na ine len baro koreno. 7A nesave pele maškaro kare, i o kare barile hem tasavde len. 8A nesave pele ki šukar phuv hem ande bijandipe – šel puti, šovardeš puti ili trijanda puti više adalestar so inele sejime. 9Kas isi kana, nek šunel!”
Sose o Isus vaćeri ano priče
10E Isusesere učenici ale koro leste hem pučle le: “Sose vaćereja e manušenđe ano priče?”
11A ov phenđa lenđe: “Adalese soi tumenđe dindo te džanen o garavdipa oto carstvo e nebosoro, a olenđe nane dindo. 12Adalese so, đijekhe kas isi džandipe, ka del pe lese pana hem ka ovel le but, a okole kas nane, ka lel pe lestar hem adava so isi le. 13Adalese vaćerava lenđe ano priče, adalese so anglo jaćha na dikhena hem anglo kana na šunena ni na haljovena. 14Ađahar upro lende pherđola o proroštvo e Isaijasoro:
‘Ka šunen hem ka šunen,
ali naka haljoven;
ka dikhen hem ka dikhen,
ali naka pendžaren.
15Adalese so akale manušengoro vilo ulo pharo,
phareste šunena kanencar
hem phandle pumare jaćha,
te na dikhen jaćhencar
hem te na šunen kanencar,
a vileja te na haljoven.
Adalese našti te irinen pe kora mande
te sasljarav len.’
16Ali blago tumare jaćhenđe so dikhena hem blago tumare kanenđe so šunena. 17Čače phenava tumenđe: But proroci hem pravednici edobor mangle te dikhen akava so tumen dikhena, ali na dikhle; hem mangle te šunen okova so tumen šunena, ali na šunde.”
Sostar vaćeri i priča oto sejači
18“Šunen akana sostar vaćeri pe ani priča oto sejači: 19Đijekhese kova šunela o lafi oto carstvo e nebosoro, a na haljola le, avela o Bišukar hem čorela lestar okova soi lese sejime ano vilo. Adavai o than ko drom ko savoi sejime o zrnja. 20A o than e barencar ko savoi sejime o zrnja, adavai okova kova šunela o lafi hem odmah lela le radosno. 21Ali, adalese so nane le baro koreno ana peste, na trajini but. Kad avela i nevolja ili o progonstvo zbog o lafi, ov odmah otperela oti vera. 22A o than maškaro kare ko savoi sejime o zrnja, adavai okova kova šunela o lafi, ali o brige akale dživdipnasere hem o zavodljivost e barvalipnasoro tasavena o lafi, i našti anel bijandipe. 23A i šukar phuv ki savi sejime o zrnja, adavai okova kova šunela hem haljovela o lafi. Ov čače anela bijandipe – šel puti, šovardeš puti ili trijanda puti više adalestar so inele sejime.”
Priča oto điv hem oto kukolj
24O Isus dinđa len hem aver priča: “O carstvo e nebosoroi slično sar kad o manuš pese ki njiva sejinđa o šukar seme. 25Ali, sar sare sovena ine, alo lesoro neprijatelj, sejinđa kukolj maškaro điv hem dželo. 26A kad barilo o điv hem kad anđa bijandipe, dikhlilo hem o kukolj. 27O sluge ale koro čherutno hem pučle le: ‘Gospodarona, ini tu sejinđan šukar seme tuće ki njiva? Kotar onda adava kukolj?’
28A ov phenđa lenđe: ‘O neprijatelj adava ćerđa.’
Tegani o sluge pučle le: ‘Mangeja li te dža te ikala o kukolj?’
29A ov phenđa: ‘Na, adalese so tumen ko ikaliba o kukolj šaj te ikalen hem o điv. 30Muken soduj te barjon đi ki žetva. I kad ka avel o vreme e čedibnasoro, ka phenav okolenđe kola čedena: Ikalen najangle o kukolj hem phanden le ko kupe te tharel pe, a o điv čeden hem čhiven le maje ki šupa.’ ”
Priče oto zrno oti gorušica hem oto kvasco
31O Isus dinđa len hem aver priča: “O carstvo e nebosoroi slično e zrnose oti gorušica save o manuš lelja hem sejinđa pese ki njiva. 32Ovi čače najtikoro oto sa semenja, ali kad barjola ovela po baro oto sa o biljke ki bašta, ovela kaš, i o čiriklja avena hem ćerena gnezdija upro lesere granke.”
33Phenđa lenđe hem aver priča: “O carstvo e nebosoroi slično e kvascose save i đuvli lelja hem čhivđa ano but baro čaro vareja, i ov ćerđa sa o humer te uštel.”
34Sa adava o Isus vaćerđa e manušenđe ano priče. Na vaćerđa lenđe ništa bizo priče. 35Ađahar pherdilo okova soi vaćerdo prekalo proroko:
“Mlo muj ka phravav ano priče,
ka vaćerav okova soi garavdo pana taro ćeriba e svetosoro.”
Sostar vaćeri i priča oto điv hem oto kukolj
36Tegani o Isus bičhalđa e manušen čhere, i đerdinđa ko čher. Lesere učenici ale koro leste hem phende: “Vaćer amenđe sostar vaćeri pe ani priča oto kukolj ki njiva.”
37Ov phenđa lenđe: “Okova kova sejinđa o šukar semei o Čhavo e manušesoro, 38a i njivai o sveto. O šukar semei o čhave e carstvosere, a o kukolj o čhave e Bišukaresere. 39O neprijatelj kova sejinđa o kukolj – adavai o beng. I žetva – adavai o kraj e svetosoro, a okola kola čedena – adalai o anđelja.
40Sar so o kukolj ikali pe hem tharela pe, ađahar ka ovel hem ko kraj e svetosoro. 41Me, o Čhavo e manušesoro, ka bičhalav mle anđelen te ikalen taro mlo carstvo sarijen kola ćerena averen te grešinen hem kola ćerena bišukaripe 42hem ka frden len ani jagali peć, kote ka ovel baro rojba hem krciba e dandengoro tari dukh. 43Tegani o pravednici sar o kham ka sijajinen ano carstvo pumare Dadesoro. Kas isi kana, nek šunel!”
Priča oto garavdo blago
44“O carstvo e nebosoroi sar o blago garavdo ki njiva. Kad o manuš arakhi le, palem garaj le hem radosno džala te biknel sa so isi le hem činela adaja njiva.”
Priča oto dragoceno biseri
45“Palem, o carstvo e nebosoroi sar kad o trgovco rodela šuže biserja. 46Kad arakhi jekh dragoceno biseri, džala hem biknela sa so isi le hem činela le.”
Priča oti mreža zako maćhe
47“Palem, o carstvo e nebosoroi sar i mreža frdimi ano jezero ani savi dolinde pe maćhe oti đijekh vrsta. 48Kad i mreža pherđola, o manuša ikalena la ki phuv. Tegani bešena hem e šukare maćhen čhivena ano čare, a e bišukaren frdena. 49Ađahar ka ovel hem ko kraj e svetosoro. Ka aven o anđelja hem ka ciden e bišukare manušen e pravednikonendar 50hem ka frden len ani jagali peć, kote ka ovel baro rojba hem krciba e dandengoro tari dukh. 51Haliljen li sa adava?”
On phende: “Oja.”
52A ov phenđa lenđe: “Adalese đijekh učitelj e Zakonestar kovai sikavdo oto carstvo e nebosoro – ovi sar o čherutno kova pestar ikali hem o nevo hem o purano blago.”
E Isuse na prihvatinena ano Nazaret
53Kad o Isus vaćerđa sa adala priče, dželo adathar 54hem alo ko than kaj barilo. Adari ki sinagoga sikavđa e manušen, a on divinde pe hem pučle: “Kotar lese adaja mudrost hem zoralipe te ćerel čudesija? 55Nane li akava e kaštarutnesoro čhavo? Nane li lesiri daj i Marija, a lesere phralja o Jakov, o Josif, o Simon hem o Juda? 56Hem nane li sa lesere phenja akate amencar? Kotar lese onda sa adava?” 57I na mangle te prihvatinen le.
Tegani o Isus phenđa lenđe: “E prorokose dela pe čast ano sa o thana, sem lese ano than kaj barilo hem lese ano čher.”
58I na ćerđa but čudesija adari adalese so e manušen na ine vera.
Obecnie wybrane:
Matej 13: RAB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj