Matej 15
15
E puranengere adetija hem e Devlesere naredbe
1Tegani nesave fariseja hem učitelja e Zakonestar taro Jerusalim ale koro Isus hem pučle le: 2“Sose te učenici phagena o adetija amare dadengere? Na thovena pumare vasta angleder o hajba!”
3A o Isus pučlja len: “A sose tumen phagena e Devlesere naredbe zbog tumare adetija?
4Adalese so o Devel phenđa: ‘Poštujin te dade hem te daja’ hem: ‘Ko dela armanja pe dade ili pe daja, nek ovel kaznime meribnaja.’
5A tumen phenena: ‘Ko vaćeri e dadese ili e dajaće: Sa soja šaj ine te pomožinav tut, već haljum sovli da adava ka dav sar daro e Devlese, 6adava manuš na valjani te mothoj poštujiba ple dadese.’ Ađahar, zbog tumare adetija, ruminena e Devlesoro lafi.
7Dujemujengere manušalen! Šukar o Isaija prorokujinđa tumendar:
8‘Akala manuša poštujinena man samo mujeja,
a lengoroi vilo dur mandar.
9Džabe poštujinena man,
adalese so sikavena o manušikane naredbe sar dai mlo sikaviba.’ ”
O Isus sikaj so o manuša anglo Devel valjani te oven čista andral
10O Isus vičinđa kora peste e narodo hem phenđa lenđe: “Šunen hem haljoven: 11Na meljari e manuše okova so đerdini lese ko muj, nego okova so ikljola taro lesoro muj – adava meljari e manuše.”
12Tegani nakhle nakoro leste o učenici hem pučle le: “Džane li so o fariseja uvredinde pe kad šunde so phenđan?”
13A ov phenđa lenđe: “Đijekh biljka sava na sadinđa mlo Dad kovai ano nebo, ka ovel ikaldi taro koreno. 14Muken tumen olendar! Oni korore hem vođe e kororenđe. A te o kororo legari e korore, soduj ka peren ki rupa.”
15O Petar phenđa lese: “Vaćer amenđe so mangljan te vaćere adala pričaja.”
16A o Isus pučlja len: “Ni tumen li pana na haljovena? 17Na dikhena li da sa so đerdini ko muj, džala ko vođi hem frdela pe avri taro telo? 18Ali, okova so ikljola taro muj, avela taro vilo, hem adava meljari e manuše. 19Adalese so taro vilo avena o bišukar mislija, o mudariba, o preljube, o blud, o čoriba, o hovavno svedočiba hem o hule. 20Adava meljari e manuše, a o hajba bithovde vastencar na meljari e manuše.”
I bari vera ano Isus e đuvljakiri koja nane Jevrejka
21I tegani o Isus dželo tari Galileja hem cidinđa pe ko krajo e tiresoro hem e sidonesoro.
22I dikh, nesavi đuvli, Hanaanejka taro adava krajo, ali koro leste hem vičini ine: “Smilujin tut maje, Gospode, Čhaveja Davidesereja! Mli čhaj but patini, adalese soi opsednutime demoneja.”
23Ali o Isus na phenđa laće ni jekh lafi. I lesere učenici nakhle đi leste hem molinde le: “Vaćer laće te džal, adalese so džala pala amende hem vičini!”
24A ov phenđa: “Bičhaldo injum te pomožinav samo e Izraelesere našalde bakrenđe.”
25Ali oj nakhini đi o Isus, peli ko kočija anglo leste hem phenđa: “Gospode, pomožin maje!”
26O Isus phenđa laće: “Nane šukar te lel pe o maro e čhavorendar hem te frdel pe e đuklorenđe.”
27A oj phenđa: “Oja, Gospode, adalese so hem o đuklore hana o troške save perena taro astali lengere gospodarengoro.”
28Tegani o Isus phenđa laće: “Bari ti vera, đuvlije! Nek ovel sar so mangeja.”
I lakiri čhaj odmah saslili.
O Isus sasljari buten
29O Isus dželo adathar hem alo đi E galilejakoro jezero. Tegani uklinđa ki gora hem beštino adari te sikaj.
30I but manuša ale koro leste hem pumencar ande e bangen, e kororen, e sakatimen, okolen so našti ine te vaćeren hem bute averen, i siđarena ine te čhiven len anglo lesere pre, a ov sasljarđa len.
31I o manuša inele zadivime so dikhle so okola so našti ine te vaćeren da vaćerena, o sakatime sasljovena, o bange phirena hem o korore dikhena, i lelje te slavinen e Izraelesere Devle.
O Isus parvari više oto štar hiljade manušen
32A o Isus vičinđa kora peste ple učenikonen hem phenđa lenđe: “Pharo maje akale manušenđe. Trin divei mancar, a nane len so te han. Nako te bičhalav len čhere bokhalen, te na peren odrumal.”
33O učenici pučle le: “Kaj te arakha dovoljno maro ko akava čučo than te da hajbnase sa edobor manušen?”
34I o Isus pučlja len: “Kobor mare isi tumen?”
On phende: “Efta mare hem hari maćhe.”
35I o Isus naredinđa o narodo te bešel ki phuv. 36Tegani lelja o efta mare hem e maćhen, zahvalinđa e Devlese, phaglja len hem dinđa len ko učenici, a o učenici dinde len e manušenđe. 37Sare hale hem čalile, hem efta pherde bare korpe čedinde pe okolestar so ačhilo oto hajba. 38A okola so hale inele štar hiljade murša, bizo te đenen pe o đuvlja hem o čhavore. 39I o Isus bičhalđa e manušen čhere, đerdinđa ko čamco hem dželo ko krajo e magadanesoro.
Obecnie wybrane:
Matej 15: RAB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj