ዮሃኒሳ ሚሺራቾ ጊዶ ቆፋ
ጊዶ ቆፋ
ዮሃኒሳ ሚሺራቾ ቃላይ ዬሱሲ ኣሾ ማይኢዲ ኣሳ ጊዶን ቤቲዳ ዴኦ ጾሳ ቃላ ጊዲዳይሳ ቆንጪሴስ። ሄሲካ ኣዋይ ጎዳ ጾሳ ጊዲዳ ማላ፥ ዬሱሲካ ጎዳ ጾሳ ጊዲዳይሳ ቤሴስ። ዮሃ 1፡1፤ 8፡58፤ 12፡41፤ 20፡28። ማጻፋዚ ሎኤ ቆንጪሲዛ ማላ ሃይሲ ሚሺራቾ ቃላይ ጻፌቲዳይ ናባቢዛይቲ ዬሱሲ ኣስ ኣሺዛዴ ጊዲዲ ያና ጌቴቲዳ ጾሳ ና ጊዲዳይሳ ኣማናና ማላኔ ኣሳይ ኢዛ ኣማኒዲ ሜርና ዴኦይ ኢዛን ዲዛይሳ ኤራና ማላሳ። (20፡31)
ሚሺራቾ ቃላዛስ ኮይሮ ኪፊሌይ ሜርናስ ዲዛ ጾሳ ቃላይኔ ዬሱሲ ኢሲኖ ጊዲዳይሳ ኮይሮ ሺሺዳፔ ጉዬ ዬሱሲ ኣስ ኣሺዛዴ ጊዲዲ ያና ጌቴቲዳ ጾሳ ናይ ኢዛ ጊዲዳይሳ ቤሲዛ ዱማ ዱማ ማላታታካ ሺሼስ። ሄሳፌ ቃሴ ሄ ማላታታፔ ኣይ ኣይፌይ ቤቲዳኮ ቆንጪሲዛ ታሪኬቲ ካሌቴስ። ሃይሲ ሃ ኪፊሌዚ ኢሲ ኢሲ ኣሳቲ ዬሱሳን ኣማኒዲ ኢዛ ካሊዛይታ ጊዲዳይሳኔ ሃራ ኣሳቲ ቃሴ ኢዛራ ዋኒ ኤቄቲዳኮኔ ኢዛን ኑ ኣማኖኮ ጊዛይሳ ዮቴቴስ። ሼምፖ 13-17 ጋካናስ ዬሱሲ ኦይኬቲዳ ኦማርስ ባና ካሊዛይታራ ኢዛስ ኣይ ማላ ሚኖ ኢሲፌቴ ዲዛኮ ኢዛስ ካቄቴ ዎዴይ ማቲሺን ኢዚ ባና ካሊዛይታስ ጊግሲዛ ቃላኔ ሚንዛ ቃላ ኢዚ ኢስታ ሲሲዳይሳ ቆንጪሴቴስ። ሃንኮ ኣቲዳ ዉርሴ ሼምፖቲ ቃሴ ዬሱሲ ኦይኬቲዳይሳ፥ ፒርዳስ ሺቂዳይሳ፥ ኢዛ ካቄቴ ጊሻሲኔ ሃይቆፔ ዴን ጊሻስ ሄሳካ ኢዛ ዴንፌ ጉዬ ባና ካሊዛይታስ ኢዚ ባና ቆንጪሲዳይሳ ዮቴቴስ።
ዮሃኒሲ ዬሱስ ኪርስቶሳ ባጋራ ቤቲዛ ሜርና ዴኦ ሎኤ ቤሲዛይ፥ ጾሳ ኪያቴ ሃኢፔ ዶሚዲ ዬሱሳ፥ ኦጌ፥ ቱማኔ ዴኦ ሂስቲ ኣማኖን ኤኪዛይታሳ። ዮሃኒሳ ሚሺራቾ ቃላ ሃራታፔ ዱማሲዛይ ኣያና ቱማቴ ኤሪሳናስ ኬሂ ኤሬቲዳ ኣሲ ሃች ሃች ጎኤቲዛ ሚሻታ ሄይቲካ ሃ፥ ቁማ፥ ፖኦ፥ ሄሚዛዴ፥ ዶርሳታ፥ ዎይኔ ሚኔ ዎይኔ ሚ ኣይፌ ሚሳቲዛይታ ሌሚሶን ዮቲዛይሳ።
ሃ ማጻፋይ ኦይኪዳ ኩሜ ቆፋ
ጌሎሶ 1፡1-18
ጻማቂዛ ዮሃኒሳኔ ዬሱሳ ካሊዳ ኮይሮ ታማሬታ 1፡19-51
ዬሱሲ ጾሳ ኦሶ ዶሚዴስ 2፡1—12፡50
ዬሩሳላሜኒኔ ሄ ሄራን ዬሱሳስ ዉርሴ ኦሶ ጋላሳታ 13፡1—19፡42
ሃይቆፔ ጎዳ ዴንኔ ኢዛ ቆንጬ 20፡1-31
ኩሻ ቆፋ 21፡1-25
Obecnie wybrane:
ዮሃኒሳ ሚሺራቾ ጊዶ ቆፋ: ጋሞመጽቅበፊደል
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Word for the World International amp The Word for the World Ethiopia