Obľúbené biblické verše z EVASELIO A LUKA 19

Zdieľať

Koteuhi nee hau te Foha o te tagata o kumi pea mo haofaki te mea nee puli.

Nee natou lau: Manuia te hau e haele mai i te huafa o te Aliki! Tokalelei i te lagi, pea kololia i te u potu maoluga osi!

Nee ui leva e Sesu kia ia: I te aho nei kua ulu te fakamauli ki te fale aeni, koteuhi ko ia foki aeni ko he foha ia o Apalahamo.

I te kaku mai a Sesu ki te kogamea aia, nee tagaki ake leva ona mata ki oluga, pea nee ina ui age leva kia ia: Sakeo, fakavilivili o hifo ki lalo; koteuhi e tonu ke au nofo i te aho aeni i tou api. Nee fakavilivili leva ia Sakeo o hifo ki lalo, pea nee ina tali leva ia mo te fiafia.

Kae nee tuu ake leva ia Sakeo ia mua o te Aliki, o ui kia ia: Aliki, koeni, e au foaki ki te kau masiva te vaelua o oku koloa, pea, kapau nee au kaihaa he paaga a he tahi, e au toe fakaliliu anai kia ia te mea aia o liuga fa.

Nee lea age leva kia Sesu ni ihi o te kau faliseo, mai te lotomalie o te hahai: Pule, munai au tisipulo! Pea nee ina tali leva: E au tala atu kia koutou, kapau e natou fakalologo, pea e kalaga anai te u maka aeni!