Luk 24
24
24:1-12 Yisas bo der bugamorei
(Matyu 28.1-10; Mak 16.1-8; Yon 20.1-10)
1Inemirei igo itum der inorou qen pura ne yamangar welya qamb barim urigom arsi bigumir eng ba munon teteret end isamirei. 2Isab gamir eng nomon aib ger ba yar tumun qipiatemir eng bo ende me igamau. Tumun unat igama gamirei. 3Gab isab erobon isub gamir eng Munon barai Yisas git goan me igamau. 4Ende gab qanganget wogub naget igamari qand munon ombur mingoan oan qenengi nob nagetemirei igo wuri qani end naget igurei. 5Ende ibag yari wogub qumoramirei. Qumoramari munon ombur eng wuri nob qamamir: “An meimet qamb munon igomot der bogomar e gub qamb munon teteret e asi qib igoumon? 6Wo e me igo, der bogomai. Qoan Galili ite igo aninob qamar eng misir igar. 7Wo ete qamarei: “Munangit wau munon boru wurit duimari ba nam tenori big waramari umiba. Uma ba tumunimunorei igama qem ombur gari ubura bo der bugemba.”
8-9Ende qamarari yamangar eng qob eng misir igub wogub bo igeser tumun wogub isub mi eng gabriamir eng Yisas wonou imbigau yurau 11-ende igour eng wurinob qamb ne munon ar qei gor wurinob qamarari igumirei. 10Yamangar eng isub qamamir eng Maria Makdala ne Yoana ne Maria ger Yems unor eng ne yamangar qei wurinob igo qob eng Yisas wonou yurau eng wurinob qamamirei. 11Qamarari Yisas yurau eng der yamangar eng ar wob mugenderi igub qamb qib igour qamb qob me igatarau. 12Ende abari Pita der uyab-uyab munon teteret ite bo irarei. Irab inumor tumun erobon asi mingoan qas garei, mi ger me geau. Ende gab bo igeser isub misir qebebi igub igoai.
24:13-35 Imbigau munon ombur Emeus isub qamb isub igo Yisas gamirei
(Mak 16.12-13)
13Qen end gari Yisas yurau eng ombur der munai ginam Emeus eng isub qamb tap toat isub igurei. Ginam eng ginam aib Yerusalem wogub isau eng pi. 14Ombur isub igo mi eng gagar ebeter end qamb isub igurei. 15Ende qamb isub igamari Yisas wonou yar wobon end naget wurinob isub igoai. 16Isub igama gamir eng wuri mi mag opuramau gas ende aba Yisas wo sir me imbigau.
17Ne Yisas der wurinob qamar: “An ombur meimet qamb qobub isub igoumon?” Ende qamara ombur mi toubet qi naget igurei. 18Ende at igo ne ger unum Kliopas der qebi qamar: “Munon irou Yerusalem igour eng mi barim urigom ebeter eng gugum qoyam. Ne gari qoyam ue igo qamb qib igoan?” 19Ende qamara Yisas qebi qamar: “Mi maigas abai?” Ne wo bo qamar: “Nasaret munon Yisas tumuniamir eng abar end qamb igoun. Wo Qenu wonou qob gigit qamarau munon. Wo Qenu sarau qeretut nob baab ne qob qeretut nob munon yamangar wuri nob qamb qib igoai. 20Ende at qib igama ininou munon barai tari Qenut mian yab igour eng ne qomon qoat igour eng wuri der gabmant duiamirei. Duimari wuri qob qamb nausi ne uminer qamb nam tenori big waramari umorei. 21Eng wo Isrel munon wuriubersierib qamb dererei ende qamb misir iguminei. Ne mi eng gagar abar eng qen ombur gari uburerei. 22Ne gor ininou yamangar qei itumut inqeisiau gas ende uburei. 23Wuri munon teteret irab tumun erobon isub gaur eng wo git goan igama me geau. Ende gab abari enger der wuri nob qurar eng, igomot der bogomai qurar eng gugum qamarari igunei. 24Igub ininou munon bo mi eng gub qamb irab gaur eng yamangar ininob quraur gas ende, Yisas git goan me geau.”
25Ende qamarari Yisas wurinob qamar: “An qoan Qenu qob gigit qamara munon gumatemir eng misir ue igo oau segagam me buroumon? 26Munon wuriubersiau tari eng wo umb wogub bo igomot der bugama Qenu wonou aba baraitari igoriba.” 27Ende qamb ne qoan qanambig Moses qob gumater end qanambig qob suab bisii Qenu qamara munon gumatemir end bis beneriamorei.
28-29Ne wuri isi munai ginam isub qamb isumir eng pisiari ne Yisas wo wuriwogub tumbigi isib qamb ater ego wuri duet qamamir: “Worom mom isar eng ai itumoramba. In nob et iniban.” Ende qamarari wurinob mor isorei. 30Isub nam qabt erogori bugab mani parau ba Qenut qamb nonogursi boat wuriserei. 31Qen end Yisas mom gab imbig ebetemir ego wuri magqurt umanger qi qorei. 32Qoa me gab wurinou qob-qob qamamir: “Qataben yar igo qob eng ininob qamara igoun eng igub in oau mom ipirai.” ende qamamirei.
33Ende me gab wogub bo qand yonam Yerusalem qite wonou imbigau yurau 11-ende igour end irab ibagamir eng banamori qei wurinob qiumuni igurei. 34Ende ibegeari der ombur wurinob qamamir: “Munon Barai segagam igomot der bugab qib igama Saimon garei.” 35Ende qamarari ombur wuri gor der qataben isub igo qob wuri nob qamb isub igoar eng ne, mor isub mani parau boat wurisa qen end gab imbigari iuar eng gugum qamamirei.
24:36-49 Imbigau yurau gugum Yisas gamirei
(Matyu 28.16-20; Mak 16.14-18; Yon 20.19-23)
36Qob eng ende suab igamari Yisas wonou diab wuri wobon et igo wurinob qamar: “Oau mein burab igoarar.” 37Ende qamara wuri mai moui qiyo aibigau qamb borusi yariamirei. 38Ende abari wurinob qamar: “An meimet qamb qiet misir qebebi igub igoumon? 39An ye uben qamb nebit qamb gaiar. Ye yonou gari. An yebaab gaiar, moui mai min qer nob ende igo?” 40Ende qamb ne uben goten nob wurisirbigorei. 41Ende aba wuri mismisiramir ego sig oau apand me burau. Ende at igamari wurinob qamar: “An mi niau ger et igo?” 42Ende qamara yag wai qibi ger utemirei. 43Utari boroumi wuri magqurt norei.
44Ende at ne wurinob qamar: “Qoan aninob qib igo ne qob aninob qamam eng see mom gaumon eng. Qoan ir Moses qomon yet qamb gumater eng ne Qenu qob qamara gumatemir eng ne Sam qob yet qamb gumatemir eng gugum irimani ubura gaumon eng. 45Yisas ende qamb ne wo wurisiara misir uber igub qob qoan gumatemir eng mom musub imbigumirei. 46Ende abari wurinob qamar: “Qob ete qamb gumatemir eng: Munon wurimusiau tari eng wo git goan uter weriba. Ende ebet wo uma tumunimunorei igama qen ombur gari ubura bo iigomot der bugemba. 47Ende aba qanambig Yerusalem end wo unumot qamb qiroari munon ai qent gugum wot oabig ne wurinou qomon boru mogirt warari Qenu wuriubersia wonou yurau igorubour. 48An ye yegaman end gigit qob suouboumon. 49Ende abari Tain qoan anit mi iyeter eng ye anit imurimbam. End ne an mom ginam aib end mom qoat igamari mi eng anit der an nonogursieriba.”
24:50-53 Qenu Yisas mot wonou ginamt irarei
(Mak 16.19-20)
50Ende qamb ne ginam aib eng wogub oromar isi Betani end isumirei. Isub uben bemeni wuri nonogursiarei. 51Ende wuri nonogursi wogub iser Qenu mot erer irarei. 52Iroa wogub uru wab wot mismisir bo yonam Yerusalem yaremirei. 53Yar end igo qenen inorou munai aib end isub Qenut igub igurei.
Zvasarudzwa nguva ino
Luk 24: wnu
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2001, Wycliffe Bible Translators, Inc. All rights reserved