Jn 9
9
Yeso nyaʼa vɨ̀ mbaŋə̀ mɔʼɔ nɨ mbɨ nyaʼa gywɨ əfɨgə
1Ənɨ Yeso nyaʼə yènə̀ chèə̀, wɨ̀ nyaʼa zə mbaŋə̀ mɔʼɔ nɨ mbɨ nyaʼa gywɨ əfɨgə. 2Mə̀mə̀ə̀nɨ̀-ɨnû ɨməd nyaʼa biirɨ ɨ bɔ ni, “Əchwiə̀-ɨnû, à kɨ ɨnû rɨbɔ̀ŋ we ghɨ ni mbɨ gywɨ mbaŋə̀ zɔ̂ əfɨgə ə? À kɨ mbɨ məd, kɨ̀ mbɨ mbǎʼ məd, kɨ̀ mbɨ ɨŋgɔb məd ə?”
3Yeso nyaʼa wììrɨ̀ ni, “Kaʼi ni à yɨə mbaŋə̀ zɔ̂ nyaʼa ghɨ ənû rɨbɔ̀ŋ kɨ̀ mbǎʼ məd kɨ̀ ɨŋgɔb məd. Məd ə fɨ̀g ɨmbə̀ʼ bə̂d zə ɨchî nɨ Ŋwìə̀ ə fàʼə̀. 4Tɨ̀ berɨ faʼ ə̀fàʼì ze nɨ wə̀d we nɨ nyaʼa tom əmɨ naʼ ɨ na. Àyɨə tɨ̀ berɨ fàʼ ənɨ ɨsɨ ə kɨrɨ zeŋə. Ɨzɨmɨ wɨə yeʼe nɨ chəi ənɨ tɨ̀ bə̂d wɨrɨ fàʼ. 5Mbə̀ kyerɨ ni ənɨ mə̀ kɨrɨ ɨŋga ɨsɨg, mɔ̌ yɨ ɨzeŋɨ zeŋɨ əmbɨ ɨsɨg.”
6Ənɨ wɨ̀ nyaʼa gha ɨnû mbɔ̂, wɨ̀ nyaʼa chèd mad ə si, tɔpɨ, nɨŋ tɨchaʼ ze zɔʼ əghə ə mbaŋə̀ ze əŋgu, 7ghà ɨ bɔ ni, “Ndə̀ wo sò e ɨfě ɨŋga ətuŋ ze rɨ ə Silòàm.” (Əton ənɨ ɨkum wɔ̂ yɨ ni “Tom”). Mbaŋə̀ ze nyaʼa wò sò i ɨfě wɨrɨ bə̀ndɨ̀ yeʼe ənɨ wɨ nyaʼə sɨə zə ɨsɨ.
8Bə̂d rɨ ɨban əkwɨ mbɨ mbe nɨ nyaʼa kweʼ zə əməd ənɨ wɨə nɔndɨ ɨghɨ nyaʼa biirɨ ni, “Ɨmbə̀ʼ mbaŋə̀ zɔ̂ yɨ ze nɨ nyaʼə chub ə si, nɔndɨ ɨghɨ ə?” 9Bə̂d mɔʼɔ nyaʼa ghà ni, “À yɨ wɨwən”, mbɨ cherə nyaʼa gha ni, “Chə̂, kaʼi wɨwən. À yɨ wə̀d cherə nɨ yeʼ ɨghabɨ ə məd.”
Mbaŋə̀ ze ziə nyaʼa ghà ni, “Mə yɨə mbaŋə̀ ze nɨ nyaʼə nɔndɨ ɨghɨ.”
10Mbɨ nyaʼa biirɨ ɨ bɔ ni, “À sɨ che rɨ ye kɔ zə ɨsɨ ə?”
11Wɨ̀ nyaʼa wììrɨ̀ ni, “Mbaŋə̀ ze nɨ mbɨə tɔŋ ənɨ Yeso kəʼ tɔpɨ si, zɔʼ mɨ əghə əŋgu, ghà ɨ num ni, 'Ndə̀ wò sò e ɨfě ə Silòàm.' Mə kə̀ʼ wò sò, əne mə wɨə sɨə zə ɨsɨ.”
12Mbɨ nyaʼa biirɨ ɨ bɔ ni, “Mbaŋə̀ rəŋgu zi ə?”
Wɨ̀ nyaʼa wììrɨ̀ ni, “Chəi mə kyerɨ əsɨ ze nɨ wɨ̀ yeʼ əŋgu.”
Ɨchî nɨ mɨ̀Farisiî nyaʼa nwendɨ ɨfɨgɨ we
13Bə̂d mbe nɨ nyaʼə ghàmbɨ̀ə̀ mbɨ ə mbaŋə̀ ze nɨ nyaʼa kweʼ fɨgə nyaʼa nɨŋ əməd mbɨ wò əsɨ mɨ̀Farisiî. 14Əni ze nɨ Yeso nyaʼa tɔpɨ si vɨ̀ ɨfɨgɨ we əŋgu yɨə nyaʼa əni əkwɨ mɨ̀Jû. 15Mɨ̀Farisiî mbe nyaʼa bə̀ biirɨ ɨ bɔ ni, “À che rɨ ye bɔŋ sɨə zə ɨsɨ ə?” Wɨ̀ nyaʼa wììrɨ̀ əmbɨ mɨ̀mə̌d ni, “Wɨ̀ kə̀ʼ tɔpɨ si zɔʼ mɨ əghə əŋgu, mə wò sò, əne tɨ̀nîn mə wɨə sɨə zə ɨsɨ.”
16Mɨ̀Farisiî mɔʼɔ nyaʼa ghà ni, “Kaʼi Ŋwìə̀ tom mbaŋə̀ ze nɨ ghɨ ənû zɔ̂, ɨmbə̀ʼ ɨghəm nɨ chəi məd ə nùŋ əni əkwɨ.”
Àyɨə mbɨ mɔʼɔ nyaʼa ghà ni, “Tɨ̀ mbaŋə̀ ze nɨə ghɨ̀ ɨnû rɨbɔ̀ŋ ghɨ̀ ɨnû yiirɨ ɨghabɨ mbɔ̂ ə?” Ənɨ mbɨ nyaʼa ghà əne, ə̀ghàbrɨ̀ ə nyaʼa jwɨ̀ əkaʼ mɨ̀mə̌d.
17Mɨ̀Farisiî mbe nyaʼa wɨrɨ yì biirɨ əmbɨ ə mbaŋə̀ ze ni, “Wɨ̀ fə ghɨ à sɨə zə ɨsɨ. À ghà ni ye ɨmbə̀ʼ əməd ə?”
Mbaŋə̀ ze nyaʼa wììrɨ̀ ni, “Mə kyerɨ ni məd yɨə kàŋ ə wə̀d ɨ̀kə̀n Ŋwìə̀.”
18Chəi bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ben ni mbaŋə̀ ze nyaʼa fɨ̀gə̀, əne ɨ wɨə sɨə zə ɨsɨ, pè ənɨ mbɨ nyaʼa tɔŋ mbǎʼ məd mbɨ ɨŋgɔb məd. 19Ənɨ mbɨ nyaʼa yeʼe, mbɨ nyaʼa biirɨ əmbɨ mɨ̀mə̌d ni, “Wɔ̂ kɨ ə wan nɨ mbə̀ gha ni mbə nyaʼa gywɨ əməd əfɨgə ə? Wɨ̀ che rɨ ye sɨə zə ɨsɨ ə?” 20Mbǎʼ məd mbɨ ɨŋgɔb məd nyaʼa wììrɨ̀ ni, “Tɨ̀ kyerɨ ni mbaŋə̀ zɔ̂ yɨ a wan. Tɨ̀ bə̀ kyerɨ ni tɨ̀ nyaʼa gywɨ əməd əfɨgə. 21Àyɨə chəi tɨ̀ kyerɨ ɨchî nɨ zɨə yeʼ ni ɨ wɨə sɨə zə ɨsɨ rɨ̀nîn, kɨ̀ bè kyerɨ wə̀d we nɨ ghɨ̀ ni wɨ̀ kɔ zə ɨsɨ. Mbə̀ biirɨ ɨ bɔ. Wɨ̀ fə sɨ i mbaŋə̀, wɨ̀ bɨrɨ wiirɨ i ɨŋgam ziə.” 22Mbǎʼ mbɨ ɨŋgɔb mbaŋə̀ ze nyaʼa ghà əne ɨmbə̀ʼ ɨghəm nɨ mbɨ nyaʼə bɔə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû, ɨmbə̀ʼ ɨghəm nɨ mbɨ nyaʼa fə nùŋ ni mbə bɨrɨ fid wə̀d mɔʼɔ we nɨ ben ni Yeso yɨə Wə̀d we nɨ Ŋwìə̀ zɔʼɔ rɨŋga nəb ə̀kàtɨ̀. 23À yɨ əton nɨ mbǎʼ mbaŋə̀ ze mbɨ ɨŋgɔb məd nyaʼa gha ni, “Wɨ̀ fə sɨ i mbaŋə̀, mbə̀ biirɨ ɨ bɔ.”
24Mbɨ nyaʼa tɔŋ mbaŋə̀ ze nɨ mbɨ nyaʼa gywɨ əfɨgə ənɨ ɨghəm nɨ pe be ghà ɨ bɔ ni, “Gha we rəsìʼ ɨfě Ŋwiə̀! Tɨ̀ kyerɨ ni mbaŋə̀ zɔ̂ nɨ vɨ əwe yɨə wə̀d nɨə ghɨ̀ ɨnû rɨbɔ̀ŋ.”
25Mbaŋə̀ ze nyaʼa wììrɨ̀ ni, “Kɨ̀ à kɨ ə wə̀d nɨ ghɨ̀ ɨnû rɨbɔ̀ŋ kɨ̀ chə, chəi mə kyerɨ. Ənû nɨ mə kyerɨ yɨ ni mbɨ nyaʼa gywɨ əmɨ əfɨgə, əne tɨ̀nîn mə wɨə sɨə zə ɨsɨ!”
26Mbɨ nyaʼa biirɨ ɨ bɔ ni, “Wɨ̀ kəʼ ghɨ̀ ənû ə ye ənɨ ə ne ə? Wɨ̀ kəʼ chè rɨ ye bɔŋ fiʼ e əghə ə?”
27Wɨ̀ nyaʼa wììrɨ̀ əmbɨ mɨ̀mə̌d ni, “Mə fə kə̀ʼ gha ɨ nən, àyɨə chəi mbə̀ ghaʼ nɨ zwetɨ. Mbə kɨə wɨrɨə kəb zu ɨghəm cherə ɨmbə̀ʼ ə yè ə? Mbə wa bə̀ kəb nɨ yeʼ mə̀mə̀ə̀nɨ̀-ɨnû ɨməd ə?”
28Mbɨ nyaʼa zɔ̀m əməd ghà ni, “Àwɔ̀ yɨ ə̀mə̀ə̀nɨ̀-ɨnû məd. À yeʼ ɨmbə̀ʼ əwa, tɨ̀ yɨ mə̀mə̀ə̀nɨ̀-ɨnû Mose. 29Tɨ̀ kyerɨ ni Ŋwìə̀ nyaʼa ghàm əmbɨ Mose, à yeʼ ɨmbə̀ʼ mbaŋə̀ zɔ̂, chəi tɨ̀ kyerɨ əsɨ ze nɨ wɨ̀ nɔʼ rəŋgu.”
30Mbaŋə̀ ze nyaʼa wììrɨ̀ ni, “Əzɔ̂ yɨə kàŋ ənû ə yiirɨ! Chəi mbə̀ kyerɨ əsɨ ze nɨ wɨ̀ nɔʼ rəŋgu, àyɨə wɨ̀ fə fìʼ mɨ əghə. 31Tɨ̀ kyerɨ ni chəi Ŋwìə̀ ə zwetɨ ɨnû mbe nɨ bə̂d nɨə ghɨ̀ ɨnû rɨbɔ̀ŋ ə ghàə̀, àyɨə məd wɨə zwetɨ rɨ əmbɨ ə bə̂d mbe nɨə wumnɨ əməd bə ghɨ̀ə̀ ɨnû mbe nɨ wɨ̀ kəbɨ. 32Tɨ ənɨ Ŋwìə̀ nyaʼa tekɨ ɨsɨg, chəi bə̂d kweʼ zu ni wə̀d mɔʼɔ fə fìʼ əghə ə wə̀d nɨ mbɨ nyaʼa gywɨ əfɨgə. 33À mɨ yeʼ nɨ kaʼi Ŋwìə̀ kəʼ tom mbaŋə̀ zɔ̂, njɨ chəi ənɨ tɨ̀ wɨ̀ ghɨ̀ ənû ə mɔʼɔ.”
34Mbɨ nyaʼa wììrɨ̀ ɨ bɔ ni, “Mbɨ nyaʼa gywɨ əwe à kwi ɨŋga ɨnû rɨbɔ̀ŋ əne à wa bɨrɨ chwi ɨnû ɨ na ə?” Mbɨ nyaʼa ghà əne, fid əməd tɨ ɨŋga nəb ə̀kàtɨ̀ ze.
Bə̂d mbe nɨə ghà ni ka mbə yɨə mɨfɨgɨ̀
35Ənɨ Yeso nyaʼa zu ni mbɨ fə fid mbaŋə̀ ze rɨŋga nəb ə̀kàtɨ̀, wɨ̀ nyaʼa wo kə̀b əməd zə, biirɨ ɨ bɔ ni, “À ben Wan Wə̀d #9.35Ə zɨ ɨŋga ɨ̀ŋwàʼnɨ̀ ənun mɔʼɔ ni 'Wan Ŋwìə̀'. ə?”
36Mbaŋə̀ ze nyaʼa wììrɨ̀ ni, “Masà, məd kɨə we, ɨmbə̀ʼ mə ben əməd ə?”
37Yeso nyaʼa gha ɨ bɔ ni, “À fə zə əməd. À yɨə məd wɔ̂ ə ghàm ɨ ne.”
38Mbaŋə̀ ze nyaʼa ghà ni, “Ə̀nùŋɨ̀sɨg, mə benɨ.” Ənɨ wɨ̀ nyaʼa ghà əne, wɨ̀ nyaʼa chìndɨ̀ ɨtu ɨnywɨ ɨfě Yeso.
39Yeso nyaʼa ghà ni, “Mə nyaʼa yeʼe ɨ saʼ ɨsɨg wɔ̂ ɨmbə̀ʼ mɨfɨgɨ̀ zə ɨsɨ, mbe nɨə zə ɨsɨ beŋ ənɨ mɨfɨgɨ̀.”
40Mɨ̀Farisiî mɔʼɔ nɨ nyaʼa əŋgu mbɨ məd nyaʼa zu ənû ze nɨ wɨ̀ nyaʼə ghàə̀, əne mbɨ nyaʼa biirɨ ɨ bɔ ni, “À wa kəb gha ni tɨ̀ yɨə bə mɨfɨgɨ̀ ə?”
41Yeso nyaʼa wììrɨ̀ əmbɨ mɨ̀mə̌d ni, “À mɨ yeʼ nɨ mbə yɨ mɨfɨgɨ̀, njɨ chəi ɨgu-ənû ɨgwɨ nən. Àyɨə ɨchî nɨ mbə̀ gha ni mbə mbɨə zə ɨsɨ, ɨgu-ənû we kɨrɨ tən ɨgwɨ nən.”
Zvasarudzwa nguva ino
Jn 9: mgo
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2013, Cameroon Association for Bible Translation and Literacy