Jẹnẹsis 5
5
Uvwiẹ re Adam
(1 Ikun rẹ Ivie 1.1-4)
1Ọnana ọbe rẹ uvwiẹ rẹ Adam. Vwẹ ọke rẹ Ọghẹnẹ vwọ ma ohwo, ọ da ma vwẹ uhoho rẹ Ọghẹnẹ 2Ọshare vẹ aye ọ ma ayen, o de bruphihọ kẹ ayen, o de se odẹ rayen ohwo vwẹ ọke rọ vwọ ma ayen nu. 3Ọke rẹ Adam vwọ dia ikpe ujosa gbẹ ihwe nu, ọ da rhe dia ọsẹ rẹ ọmọ ro vwiẹri họhọ oma rọye, kọye uhoho rọye, o de se ode rọye Sẹt. 4Ẹdẹ rẹ akpọ re Adam vwẹ ọke ro vwo vwiẹ Sẹt nu da dia ikpe uri ẹne, o de ji vwiẹ emeshare kugbe emetẹ efa 5Kọye ẹdẹ rẹ akpọ rẹ Adam ejobi da dia ikpe uri ẹne gbe ujosa gbẹ ihwe; o ki rhi ghwu.
6Ri Sẹt rhe vwọ dia ikpe ujọne gbẹ iyori nure, ọ da rhe dia ọsẹ ri Inọsh. 7Sẹt vwo vwiẹ Inosh nu ọ da rhe dia akpọ na ikpe uri ẹne gbẹ ighwrẹ, o de vwiẹ emeshare kugbe emetẹ. 8Kọye ẹdẹ ri Sẹt dia akpọ na ejobi da dia uri ẹne gbẹ ujosa gbẹ ihwivẹ, o de ghwu.
9Ri Inọsh vwọ dia akpọ ikpe ujọne gbe ihwe re ọ da rhe dia ọsẹ ri Kenan. 10Rẹ Inọsh rhi vwo vwiẹ Kenan nu ọ da dia akpọ ikpe uri ẹne gbẹ ihwiori, o de rhe vwiẹ emeshare kugbe emetẹ efa. 11Kọye ẹdẹ rẹ akpọ rẹ Inọsh ejobi da dia ikpe uri ẹne gbẹ iyori; o de ghwu.
12Ri Kenan vwọ dia ikpe ujorha gbẹ ihwe nure, ọ da rhe dia ọsẹ ri Mahalalẹl. 13Kenan rhi vwo vwiẹ Mahalalẹl nu, ọke rhe dia akpọ na ikpe uri ẹne gbẹ ujuvẹ, o ki rhe vwiẹ emeshare kugbe emetẹ. 14Kọye ẹdẹ rẹ akpọ ri Kenan ejobi da dia ikpe uri ẹne gbẹ ujori gbẹ ihwe; o de ghwu.
15Ri Mahalalẹl vwọ dia akpọ ikpe ujorha gbe iyori nu, ọ da rhe dia ọsẹ ri Jared. 16Mahalalẹl rhi vwo vwiẹ Jared nu ọ da dia akpọ na ikpe uri ẹne gbẹ ọgban, o de vwiẹ emeshare kugbe emetẹ efa. 17Kọye ẹdẹ rẹ akpọ ri Mahalalẹl ejobi da dia ikpe uri ẹne gbẹ ujọne gbẹ ihwe gbẹ iyori, o de ghwu.
18Ọke ri Jared vwọ dia akpọ na ikpe ujọrenre gbe ivẹ nure ọ da rhe dia ọsẹ rẹ Inọk. 19Jared rhi vwo vwiẹ Inọk nu, ọ da dia akpọ na ikpe uri ẹne, o de rhi vwiẹ emeshare kugbe emetẹ efa. 20Kọye ẹdẹ rẹ akpọ ri Jared ejobi da dia uri ẹne gbẹ ujọrenre gbẹ ivẹ, o de ghwu.
21Ri Inọk vwọ dia akpọ ikpe ujorha gbe iyori nu, ọ da rhe dia ọsẹ ri Metusela. 22Inọk da yan nene Ọghẹnẹ ro vwo vwiẹ Metusela nu ikpe uri gbe ujori o de vwiẹ emeshare kugbe emetẹ efa 23Kọye ẹdẹ rẹ akpọ rẹ Inọk ejobi da dia uri gbe ujorenre gbe iyori. 24Inọk da yan nene Ọghẹnẹ o gbi ghwu-u, fikiridie Ọghẹnẹ reyerọ.
25Ọke ri Metusela vwọ dia akpọ ikpe ujurhiri gbe ighwrẹ re, ọ da rhe dia ọsẹ ri Lamẹk. 26Metusela rhi vwo vwiẹ Lamẹk nu, ọ da dia ikpe uri erha gbẹ ujurhiri gbẹ ivẹ, o de vwiẹ emeshare kugbe emetẹ efa. 27Kọye ẹdẹ rẹ akpọ ri Metusela ejobi da dia ikpe uri ẹne gbẹ ujọrenre gbẹ irhiri, o de ghwu.
28Re Lamẹk vwọ dia akpọ ikpe ujurhiri gbẹ ivẹ nure, ọ da rhe dia ọsẹ rẹ ọmọshare, 29o de se odẹ rọye Noa, tanẹ, Vwẹ evun rẹ otọ rẹ Ọrovwohwo harhere na ọye Ọnana che nurhe rhe kẹ avwanre omaerovwo nẹ iruo vẹ owian rẹ abọ rẹ avwanre. 30Lamẹk rhi vwo vwiẹ Noa nu, ọ da dia akpọ ikpe uri ivẹ gbẹ ujurhiri gbẹ ihwiori, o de vwiẹ emeshare kugbe emetẹ. 31Kọye ẹdẹ rẹ akpọ ri Lamẹk ejobi da dia ikpe uri erha gbẹ ujori gbẹ ighwrẹ, o de ghwu.
32Ri Noa vwọ ikpe uri ivẹ gbẹ ujori, ọ da rhe dia ọsẹ ri Shẹm, Ham kugbe Jafẹt.
Zvasarudzwa nguva ino
Jẹnẹsis 5: UBV77
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bible in Urhobo © United Bible Societies, 1977.