Motíosi 7
7
No do sómbánáa basɔ́gɔ́ɔ bɛsɛnɛ
(Lók 6.37-38,41-42)
1«No do bɛ́ɛ́mbá báaba bá sómbanɛnamɔ́ basɔ́gɔ́ɔ bɛsɛnɛ, go goŋaá Asaŋa a dɛ nyó sómbɛ́ná bɛɛnyɔ́ɔ. 2Mammana, Asaŋa a ŋga nyó sómbɛ́ná bɛsɛnɛ bɛ́nyɔ́ naá mbɔ́dɔ yɛ́ɛyɛ bɛɛnyɔ́ɔ no sómbanamɔ́ basɔ́gɔ́ɔ. Bá ŋga gɔ́lɔ́ go busío bɛ́nyɔ́ mɛ́da máama no lɔ́mɔ́ na má go bɔsɔ́gɔ́ɔ. 3Go busío báakɛ́ o núunemú gifumbú gɛ́ɛgɛ naá niíso ná tɛ́ɔbɛnɔ, kanɛ go ɛ́na boɛ́tɛ bɔ́ɔbɔ bó lɔ́mɔ́ naá náhɔ niíso o? 4Ɛ́na lí, nɛɛ́nɛ o lɔ́mɔ́ ba go oyana tɛ́ɔbɛnɔ go amɔ́: Tɛ́ɛ́náamɔ́ ko úlie gifumbú gɛ́ɛgɛ naá niíso náhɔ, gɔ́ɔ maamɔ́ɔ na boɛ́tɛ naá náhɔ o? 5Ukuilí mɔ́ɔnyɔ, manɛ́ dóana go búúlie boɛ́tɛ bɔ́ɔbɔ naá mamɔ́ niíso, o lo go nco go ɛ́nana bese go go úlie gifumbú gɛ́ɛgɛ naá niíso ná tɛ́ɔbɛnɔ.
Bɔ́ɔbɔ bó lɔ́mɔ́ go mbóa na ŋgɔnɔ́bɛ́
6«No do íŋéné go mbóa bɔ́ɔbɔ bó lɔ́mɔ́ fonáalú, go goŋaá sɛ́ dɛ nyó békikílídínyée go go nyó nóma; no do nɔɔnɔ́nɔ́ɔ ndɛŋɔ sɛ́nyɔ́ go ŋgɔnɔ́bɛ́ goŋaá sɛ́ gaá sɛ́ naadánáa.
Ɔŋɔ́nɔ́ɔ nɔnɔ Baaba
(Lók 11.9-13)
7«Ɔŋɔ́nɔ́ɔ nɔnɔ, manɛ́ bá ŋgaá nyó fáá; fúmbée nɔnɔ, manɛ́ no ŋgaá huenyée; gɔdɛ́dɛ́nɔ nɔnɔ bá lɛ go nyó buunene gɛasɛ́. 8Mammana, mɔtɔ uŋkimée mɔ́ɔnyɔ ɔ ɔŋɔnɔmɔ́, bá mo fáanana, mɔ́ɔnyɔ a fúmbemú a huenenye, mɔ́ɔnyɔ a gɔdɔnɔmɔ́ bá mo buunene gɛasɛ́. 9Ɛ́na lí, ánɛ́ɛ naá bɛɛnyɔ́ɔ a lɔ́mɔ́ ba goŋaá moɔnɔ́ a amɔ́ a mo ɔŋɛnɔ gɛlɛ́dɛ, a mo fáa ɛdánɛ́ o? 10Ɛ́na gɔnɔ́, moɔnɔ́ a mo ɔŋɛnɔ hɛɔbɔ́, mɔ́ɔ a mo fáa hɛɔnɛnɔ o? 11Kanɛ́ bɛɛnyɔ́ɔ báaba no lɔ́mɔ́ bɛgáda bá batɔ, no íyimene go fáanana baaná bɛ́nyɔ́ bɛnɔ́gɔ́ bá moóma, ɛŋɛndɔ inikí Isée bɛnyɔ́ mɔ́ɔnyɔ naá mmoɛná a lɔ́mɔ́ ba go fáanana bɛnɔ́gɔ́ bá moóma go báaba bá mo ɔŋɔnɔmɔ́ o?
Ŋɛɛná sɔ́gɔ́ɔ bɔ́ɔbɔ o lɛ́galɛgamɔ́ go amɔ́ mɔ́ɔ a go ŋɛɛna
(Lók 6.31)
12«Buimée bɔ́ɔbɔ no lɛ́galɛgamɔ́ goŋaá batɔ bá nyó ŋɛɛna, bó ŋɛɛnáamɔ́ tɔ́nɔ obɔ moánɛ: hɔ́ɔlɔ́ há Gicele gá Mɔ́sɛsɛ na kálata sá mbúsí sá Asaŋa mó oyamɔ́#7.12 Go eninye ŋgɔ́ŋɛ́ yɛ́ɛyɛ na ŋgɔ́ŋɛ́ yɛ́ɛyɛ naá Oló 13.8-10..
Bɛasɛ́ bɛ́andɛ́
(Lók 13.23-24)
13«Íŋénénée nɔnɔ naá gɛasɛ́ gá gágálɛ́dáalú; goakɛ́ gɛasɛ́ gá gɛsaágada gɔnɔ́ pɛ́ yɛ́ɛyɛ yɛ ɛ́danamɔ́ naá goyíme ɛ lɛ́ fɛaŋɔ; batɔ gɛca bá dómbanamɔ́ hɔ́ɔ. 14Kanɛ́, gɛasɛ́ gá cɔkɛnɛ, gɛ́ lɔ́mɔ́ pɛ́ yɛ́ɛyɛ yɛ indenyemú naá gɛɔyɔ, gɔ́ɔ batɔ sɔŋɛ bá yɛ fídenemú, goakɛ́ ɛ lɛ́ ndɔlɛ.
Na boɛ́tɛ na gɛsamɔ́ gá bɔ́
(Mot 12.33; Lók 6.43-44)
15«Bébeŋéemú nɔnɔ go mbúsí sá mbele. Sɛ́ nyó úlenine na mɔlɛŋɔ má bɛdómbáa, kanɛ́ naá gadɛ́ɛ gúunú, sɛ́ lɔ́mɔ́ ŋkɔ. 16No ŋga sɛ́ lɛncánáa go bɛsamɔ́ bá sɛ́. Bá dɛ gásáa bíkodóo naá gɛ́loŋká, ɛ́na mulíómólíómóo naá molɛ́ŋa. 17Caŋa táŋɛ́ mmue gɛnɔ́gɔ́ gá boɛ́tɛ gɛ́ úmemú bɛnɔ́gɔ́ bá bɛsamɔ́; gɛbɛ́ gá boɛ́tɛ gɛ́ úme tɔ́nɔ bɛbɛ́ bá bɛsamɔ́. 18Gɛnɔ́gɔ́ gá boɛ́tɛ gɛ́ dɛ úmée bɛbɛ́ bá bɛsamɔ́, nɔ́ɔnɔ tɔ́nɔ gɛbɛ́ gá boɛ́tɛ gɛ́ dɛ úmée bɛnɔ́gɔ́ bá bɛsamɔ́. 19Boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́, bá bó sómba bá nɔɔnɔnɔ naá íyuke 20Nɔ́ɔnɔ gɔ́ɔ no ŋgaá lɛncánáa mbúsí sá mbele go meŋiigíe má sɛ́.
Go go íŋene naá Bufuŋe bá Asaŋa
(Lók 6.46; 13.27)
21«Caákɛ́ biimée báaba bá pínenyemú bá amɔ́: “Daadáa, Daadáa!” bɔ́ɔ bá ŋgií íŋéné naá Bufuŋe bá mmoɛná, kanɛ́ goana báaba bá ŋananamɔ́ ndɛ́ga ya Baaba mɔ́ɔnyɔ naá mmoɛná. 22Aŋa buisí bá go sómba bɛsɛnɛ bó ŋgaá bolá, gɛca gá batɔ gɛ́ ŋga ŋgoyáná gɛ́ amɔ́: “Daadáa, Daadáa, ábɔ caá go ufíno yáhɔ gɔ́ɔ dɛ mbaá dóógónyóo cɔ́mɔ sá Asaŋa o? Dɛ báá gúnée bɛgáda bá biliíli o? Dɛ báá ŋanánáa gɛca gá bɛsɛɔ o?” 23Gɔ́ɔ ka ŋgaá bó oyáná daŋɛ́daŋɛ caá: “Ndɛ́ kanɛ go nyó íyime, ɛ́dá nɔnɔ halaháláa namɛ, bɛɛnyɔ́ɔ báaba no ŋananamɔ́ bobɛ́#7.23 Ɛ́dá nɔnɔ halaháláa… gɛbɛ́ : Go eninye na ŋgɔ́ŋɛ́ naá kálata ya Ɛsagɔ 6.9.!”
Fóága nnyaŋá yahɔ naá gɛdánɛ́dánɛ́
(Lók 6.47-49)
24«Gɔ́ɔ mɔtɔ uŋkimée mɔ́ɔnyɔ a bódólonyomú dogálɔ duimée dɔ́ɔdɔ ká lɔ́mɔ́ na go gálagala a báá dó bɛ́dɛ́gɛ́ná, a ŋga bɛ́ɛ́mbá aŋa mɔtɔ ba nciŋí mɔ́ɔnyɔ a mbaá fóágá nnyaŋá yɛhɛ́ naá gɛdánɛ́dánɛ́ mmoɛná. 25Nobóláa a báá naanánáa, ɛsɔmbɔ ɛ báá noncánáa, puŋe sɛ́ báá fufée na bogaaga, moóma muimée mɔ́ɔmɔ mó báá yúgúlényée nnyaŋá yɛ́ɛyɔ, akɛ́ nɔ́ɔnɔ ɛ dɛ mbá buhuge, goakɛ́ mogoná má yɛ́ mó mba lɛ́ dábɛ́gáalú naá gɛdánɛ́dánɛ́ mmoɛná. 26Gɔ́ɔ mɔtɔ uŋkimée mɔ́ɔnyɔ a bódólonyomú dogálɔ duimée dɔ́ɔdɔ ká lɔ́mɔ́ na go gálagala a dɛ ŋaáa aŋa dó oyamɔ́, a ŋga bɛ́ɛ́mbá caŋa mmue aŋa mɔtɔ ba kanɛ nciŋí mɔ́ɔnyɔ a mbaá fóágá nnyaŋá yɛhɛ́ naá ɛcánána mmoɛná. 27Nobóláa a báá naanánáa, ɛsɔmbɔ ɛ báá noncánáa, puŋe sɛ́ báá fufée na bogaaga, moóma muimée mɔ́ɔmɔ mó báá yúgúlényée nnyaŋá yɛ́ɛyɔ, gɔ́ɔ ɛ mbaá buhúgé; gobuhuge gá yɛ́ gó mba lɛ́ gɛɛmba.»
Nɛgaŋa ná Yésusu
(Mél 1.22; Lók 4.32)
28Aŋa Yésusu a mbaá dɔmbɔ́ témbuginye sɛ́ɛsɛ, bitúu bá batɔ bɛ́ báa lɛ gó ɛ́da go békúke go mbɔ́dɔ yɛhɛ́ ya go húunenye; 29goakɛ́ a mba lɛ́ a bó húunenye aŋa mɔtɔ mɔ́ɔnyɔ a bɛananamɔ́ nɛgaŋa, caá akɛ́ aŋa muloodio mábɔ́ má bicele.
Zvasarudzwa nguva ino
Motíosi 7: YAS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda