Lukas 23
23
Yesus iki herle warogo wolok Pilatus oba wagoukha wene
(Matius 27:1-2, 11-14; Markus 15:1-5; Yohanes 18:28-38)
1Wene itithogon isukhasik, inebe welagoukha meke emenogo tha'bokhogonat melagoukhasik nen, Yesus Pilatus oba wolok wagoukha. 2Wagoukhasik wene oba 'bekhe dogolik, men yogokhukha,
“Ap yi nen akhuni nit meke nukhetdisigik, uang pemerintah meke hasik ap kok Kaisar etnogo wogosusak dek o, igik,
Hinoe netagapogot Kristus etnogo anat o, igik, iluk nit ninil oba ekhe laga iti nen, wolok wago,” iluk yogokhukha. 3Itithogon yogokhukhama, at Pilatus nen Yesus oba hinok waganhe dogolik, men yogokhikhe,
“Ap Yahudi meke inoe etagapogot etnogo hat mekeat ega a?” iluk yogokhikhemo at Yesus nen,
“Hat egen itiat o,” iluk yogokhikhemo, 4at Pilatus nen ap Allah iteerek meke inougi koktek inom, akhuni doalegat natogorlek welagoukha meke emenogo inom, yogeisekhe dogolik, men isikhe,
“An nen, at yi itema waganhi meke, at weak ageikhe hagakhemo higi motok dek o,” iluk yogokhikhemo, 5it emenogo yabokane inane motok obatnerogon men yogokhukha,
“Dek o. Ap yi wene yakulisilik nekhe dogolik, akhuni o Yudea yi ai ti ai tha'bokhogonat inakla kagalik liliogo. Keram o Galilea etoma nen inakla kagalik kagalik, o yoma waga yi,” iluk yogokhukha.
Yesus Herodes oba wolok wagoukha wene
6Itithogon yogokhukhama at Pilatus etnogo asuk holhikhesik nen,
“Ap yi o Galilea meke a?” iluk, akhuni emenogo yogeisasikhemo, 7it nen,
“At iti, o at kok Herodes nen hagasik welagarekma emenogo meke o,” iluk yogokhukhama asuk holhikhesik nen, itinem he, ap kok Herodes ebe o Yerusalem etoma usalok werekma nogo nen, oba la'i ageikhe iti. 8La'i ageikhemo nen, at Herodes etnogo Yesus hagakhe lageikhe meke alebat asuk holhikhesik, akla nen,
“Ebe nileken hele e. Elalinat hagarinabik liliogo iti, ageikhe hagakhunem an nileken hele e,” iluk akla apalok werekma nen, at Yesus ebe oba wolok wagoukhama, ileken halok akla arleken akhasikhe. 9Akla arleken akhalok, yi wene ti wene doalegat Yesus oba hinok waganhikhe meke re, at nen oko ageikhe yogokhidegat huk ageikhe. 10Oko yogokhidek huk ageikhemo nen, it ap Allah iteerek meke inougi koktek inom, it ap Allah ane holal waganek iteerek meke inom, emenogo horokhogo hobotha ukiluk, inane inobatnerogon wene oba 'bekhe lagoukha. 11'Bekhe lagoukhama, at Herodes agarumi tentara meke inom nen, Yesus ebe inakla nen meanetdiluk, inane sagun doalegat yogokhe lagoukhasik nen, su motok hano ap koktek ikharek meke ageikhe i'biluk, apuke Pilatus oba la'isikhe. 12Alebageik, at Herodes Pilatus ipisak wim palek hakene welagoukha mekeat he, itithogon la'isikhe itinem ipisak hano agoukha.
Yesus yabokane Pilatus oba wolok wagoukhama, ebe wasuagaluk ukum 'bogokhogon 'bisikhe wene
(Matius 27:15-26; Markus 15:6-15; Yohanes 18:39–19:16)
13Nen, at Yesus wolok lagoukhama nen, at Pilatus nen, it ap Allah iteerek meke inougi koktek inom, it ap Yahudi meke koktek inom, inagarumi tha'bokhogonat inom,
“Natogositni o,” iluk yogeisasikhemo wagoukhama nen, 14wene men yogeisasikhe,
“At yi nen akhuni nukhetdisilik liliogo yi, iluk, an noba wolok wagasip wene oba 'begepma, an nen hit hinilobaat weke erlo penakhi meke re, hit nen wene oba 'begep hak, higi dek o. 15Nen, at ap kok Herodes itithogon ageikhe higidek nen, nit ninoba yoma la'i aga iti. Weak hagakhunem wene inoba 'biluk nen inakharek iti hakene, ap yi nen itithogon weak ageikhe hagakhemo higi motok dek o. 16Halok he, la'bisoko tugi anek warogo herle hisaligin o,” iluk yogeisasikhe. [ 17Itithogon yogeisasikhe iti, pesta kok etaga Paskah etnogo meke neke korlek, at Pilatus nen ap iniki herle warek meke opakiat halok ageikhe hisalogo wogeisekhe lageikhe etnogo nen, itithogon yogeisasikhe iti.] 18Itithogon yogeisasikhe meke re, it ap tha'bokhogonat emenogo nen, inaneak kokhogon walhe dogolik,
“Ap Barabas itiat hisalnisalok nen, ap ithi watno o,” iluk yogokhukha. 19At Barabas iti alebat ap aperek inomat nen, akhuni o kota kok etnogo meke horlim kagalogo,
“Ninougi koktek pemerintah meke nina'it,” iluk wim yakhe dogolik, aperek ageikhe inakhe lageikhemo iki herle warogo 'bisukha meke werekma itithogon yogokhukha. 20Yogokhukhama, at Pilatus akla nen,
“Yesus iti iki herle hisalogo thogotdigin,” akla apekhe dogolik nogo nen, ane yabokane dagakhogon yogeisasikhe meke re, 21it meneke inane oko kokhogon palek ekhe dogolik,
“O baga meldiluk watno o! O baga meldiluk watno o!” iluk yogokhukhama, 22at Pilatus nen iki pere baga yogeisasikhesik nen yabokane ageikhe inom dagakhogon yogeisekhe dogolik, men yogeisasikhe,
“At yi nena meke weak hagakhemo nen. Weak hagakhunem inakharek iti hakene, an wene erlo penakhi mekeat, at yi nen weak ageikhe hagakhemo higi dek o. Halok he, tugi anek warogo iki herle hisalogo thogotdigin o,” iluk yogeisasikhe meke re, 23o baga meldiluk wasuagaluk inane inobatnerogon nen kino yogokhukhama it inane obatne ageikhe. 24It inane obatne ageikhemo, at Pilatus nen it nen kino isukha tak-tagat wene 'bogokhogon isikhesik, 25at Barabas nen akhuni horlim kagalogo wim yakhe dogolik akhuni inakhe lageikhemo iki herle warogo 'bisukha meke etnogo,
“Herle hisalogo woknisausak,” isukha etnogo wogosigik, nen, at Yesus etnogo anek, it inakla apasukha meke tak-tagat hagasuagaluk agarumi iniki baga 'bigik, hagakhikhe.
Yesus o baga meldiluk wakhukha wene
(Matius 27:32-44; Markus 15:21-32; Yohanes 19:17-27)
26Itithogon wogeisasikhemo wolok wagoukha hak, ap etaga Simon, ai o Kirene meke ageikhe o thikmanke nen o kota ukigiluk lagunem, ebe hakhasukhasik o Yesus meldiluk wasugun meke etnogo wolok, Yesus oporlik loagaluk a'it werek korlek yogokhukha. 27Yesus ebe wolok wagunem akhuni doalegat inoporlik waga dogolik, humi aperek at uak de aga dogolik, inetaiken iniki nen huselilik wagoukha. 28Itithogon hagarik wagunem, at Yesus elokhe hebenokhogon lageisalok nen, men yogeisasikhe,
“Hit humi o Yerusalem meke yi, an nuak de agup o. Hit nen hineagei hinom hinekaerek hinuak de akhani o. 29Yabokane weak asigin werek. Itinem, it akhuni nen ekhe dogolik,
Humi abirli meke, ineagei itaginakhidek meke, inirlak ukul elege inape apusu nikidek meke, iti anek he, inakla arleken akhausak hakene o, ugun. 30#Hosea 10:8 Itinem, akhuni nen,
Ninebe al debelninabin, iluk tom koktek meke yogokhik,
Ninebe thebelogo 'binanin, iluk tom 'bugurlaktek meke yogokhik, ugun o.
31Iti hak, yogotak ya o ket oba negen dogolik hagatnabiogei yi, yabokane o puk oba negen asi laga dogolik nikithogon hagasugun apegep,” iluk yogeisasikhe.
32Nen, at wolok waga dogolik, it ap inobabut motok weak hagakhe lagoukha meke inebe pere inom inasuogoluk wogosik wagoukhaat. 33Wogosik o etaga Inukuloak Palegem oba wagoukhasik nen, at Yesus ebe o baga meldekhe dogolik, ap inebe pere inobabut weak hagakhe lagoukha meke eranogo inomat, ageikhe iki ebeke, nen ageikhe iki paike, o baga meldisalok inom inakhukhaat. 34Itithogon o baga meldisasukhama dogolik, at Yesus nen Allah men yogokhikhe,
“Nopase o! It yi inokodek dogolik hagatnabiogei yi, wene inoba 'bigidek thagalogo here'isan o,” iluk yogokhikhe. Nen, it ap tentara meke emenogo nen, itithogon meldisalok,
“At Yesus asu nokorlek etnogo tha hak horlagein,” iluk omatok thekerlogo walhegarek hak, helekit hupurlekentek meke walhasukhasik nen mikirlogo horlasukha. 35It akhuni emenogo eta metek dogolik inileken 'birogo werek korlek, it ap Yahudi meke inougi koktek emenogo inagouak sikin ilik, Yesus inane sagun yogokhe dogolik, men isukha,
“At yi Allah nen Kristus meldiluk la'isigin isikhe etnogo ebe arat halok he, it akhuni erlok tilinakhe laga etnogo hak, ekaerek nen itithogon tilanek he,” iluk isukha. 36-37Nen, it ap tentara meke emenogo oba horokhogon wagoukhasik, anggur eken apusu arle weak meke sisigithasukhasik nen, inane sagun men yogokhukha,
“Hat akhuni Yahudi meke inoe kok hetagapogot eberogonat halok, hekaerek nen tilan he,” iluk yogokhukha. 38Nen, it nen “AKHUNI YAHUDI MEKE INOE KOK ETAGA POGOT EBE YIAT O,” iluk holal waganogo o Yesus meldisukha etnogo baga upu ilugun oba tetnokhogon 'bisukha.
39At Yesus itithogon warogo meldekhe dogolik, ap weak hagakhe lagoukha meke inom warogo meldisasukha eranogo, at ageikhe nen Yesus ane sagun wenagakhe dogolik, men yogokhikhe,
“Hat Kristus at apigi. Halok he, hekaerek nen tiligik, nit tilninakhik, hagasin ta,” iluk yogokhikhe mekeat he, 40at agarlak ageikhe etnogo nen, at wenagakhe dogolik, men isikhe,
“Hat ap yi warogo 'bega hak ninom tak-tagat warogo 'binanha yoma, Allah hayuk dek a? 41Nit weak hagakhe lagoma ninobabut oba ninasusak tak-tagat ninakha mekeat he, at yi anek itithogon weak ageikhe hagakhidek o,” iluk yogokhikhesik 42yabokane, at Yesus men yogokhikhe,
“Yesus noe! Hat kok hetagapogot dogeigiluk waga dogolik, an noba ebetno,” iluk yogokhikhemo, 43at Yesus nen, men yogokhikhe,
“O yogotak yiat nipisak o hanoma etoma lalok dogogun o, iluk eberogonat yokhikhi o,” iluk yogokhikhe.
Yesus ebe watlageikhe wene
(Matius 27:45-56; Markus 15:33-41; Yohanes 19:28-30)
44-45Itithogon 'bisasukhama welagoukha, o mulikin jam 12 o dikene welageikhe meke re, o etomala tha'bokhogonat hi ageikhesik, mo yakhidek hiat werek korlek, hurli hiamaganekeke jam 3 hiat welageikhe. Jam 3 hagatlageikhemo nen, Allah ai halekma su kain meke o kakok palekma itikmoke welageikhe meke etnogo turlem heisogo kagoukhogon hagatlageikhe. 46Itithogon kagoukhogon hagatlageikhemo, at Yesus ane kokhogon Allah yogokhe dogolik,
“Nopase o! An nagurlagun kigikhogon hat hikimo waganinok nen, iluk yokhikhi o,” iluk yogokhikhesik nen, arat debekhogon watlageikhe. 47Itithogon hagakhikhemo ap tentara meke inoe kok etnogo ileken hasikhesik Allah hogorakhe dogolik,
“Ap yi eberogonat mothogon anek hagakhe laga meke higi o,” iluk isikhe. 48Nen, it akhuni doalegat inileken huogoluk wagoukha meke emenogo itithogon hagakhunem inileken halok yabokane inapuke inaila laga dogolik, inebe tha'bokhogonat inetaiken iniki nen huseligik warilik lagoukha. 49Nen, it Yesus ebe inilu meke hta'bokhogonat, it humi o Galilea nen Yesus oporlik usasukha meke men, it aperek men, inebe walegat metek dogolik, itithogon hagatlagunem inileken lageik welagoukhaat.
Yesus ebe warek oila 'bi lagoukha wene
(Matius 27:57-61; Markus 15:42-47; Yohanes 19:38-42)
50-51Itithogon hagakhukhama ap ageikhe etaga Yusuf, it akhuni Yahudi meke inaila o ukul ageikhe etaga Arimatea iti meke. Allah apma 'bisagein etnogo therogo dogolik, obabut hano mot hagakhe lageikhe meke, at ebe Yahudi inougi koktek wene pilinisuogoluk inom natogokhe lagoukha meke. Itithogon mekeat he, it agarlak lak nen, Yesus abok palogo wakhukha iti, an nen,
“I o, wasuok o,” iluk igidek huk welageikhesik nen, 52at Yesus ebe warek Pilatus oba kino lageikhe. 53Kino lageikhemo, at Pilatus nen,
“I o, hano,” iluk yogokhikhemo, wageikhesik Yesus warek etnogo o baga nen usa'i ageikhesik nen, su kain etaga lenan meke baga dikilogo, oila akhuni inebe warek 'bisekhe dogouogoluk helekit elo kerat herlelhukhasik nen, ebe warek aban 'bigidekma 'bi lageikhe. 54'Bi lageikhe itinem, it akhuni Yahudi meke Allah hasik iniki 7 baga werlegat dogogun oba horogat hagasuogoluk dogolik, yi meke ti meke tugurogo 'begarek oba tak-tagat hari Jumat 'bisikhe.
55Nen, it humi o Galilea nen Yesus oporlik usasukha meke emenogo Yusuf oporlik wagoukhasik, oila etnogo men, Yesus ebe warek 'bisikhe meke etnogo men, inileken hutukhogon hasukha. 56Inileken halok uma lagoukhasik nen, o yi eken ti eken obasi hano meke inom apusu obasi hano meke inom, Yesus ebe warek oba ebemake wasi luogoluk, tugurogo 'bisukha. Itithogon 'bisukhasik, it akhuni Yahudi meke Allah nen inasuk wakhikhe tak-tagat iniki 7 baga Allah hasik werlegat welagoukha.
Zvasarudzwa nguva ino
Lukas 23: LAIDNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda