Génesis 6
6
Masa ñaa dihta ti yoari buhiri, Cohamacʉ mehne buhiri tiha
1Ã yoa masa ahri yahpare jiina cjerocã mehne masa putia tiha. Ahri yahpare ji sahsea taa niha tina. 2Ã yoa tina masa pohna numia, nuhmiare Cohamacʉ yaina sehe noano ñʉ, ji coaha. Ti ñʉ ji coaro sehe tina, ti ñʉ ji coa numiare ñʉ, beseha. Bese, namo tiha. 3Ti ã yoachʉ ñʉno, tiro Yawe sehe õ sehe ni tʉhotuha: “Yʉhʉ mipʉre ahrina masare ã catirucuchʉ yoasi. Yʉ yoaro seheta jiina waro jierara. Wiho jiina jira. Ã jiro mipʉre ciento y veinte cʉhmari ti catihto tjuasininohca tinare” ni, tʉhotuha.
4Ã yoa tí pjare Cohamacʉ yaina sehe masa pohna numia, ti besea numia mehne ji, tina pohna tiha. Ti pohna sehe ñano mʉaina jiha. Tuhsʉ, tí pjapʉre ti tuaro durucu, wacũnohorina jiha. Ã yoa baharopʉ cʉ̃hʉre ãta jia tiha tina.
5Yawe to ñʉchʉ sehere, jipihtina masa ti ñaa jia tia yʉhdʉa wahaha. Tina tiro mehne ñano buhiri tichʉ yoaa macaare ã yoarucu, ñaa dihtare ã wacũrucuina baro jia tiha. 6Ti ã jia tichʉ ñʉno, tuaro bʉjʉa witiha Yawe. Masa to bajuamehnerina to yajeripohnare tuaro purĩchʉ yoaha. 7Ã jiro tiro õ sehe ni wacũha: “Ahrinare, masa yʉ bajuamehnemarinare, jipihtina wahiquina dohse jiinare, ã jichʉ wʉina cʉ̃hʉre wajã pahñoihtja. Jipihtinapʉ ahri yahpai jiina yariaahca. Yʉ bajuamehnerina yʉ yajeripohnare tuaro purĩchʉ yoara” ni, tʉhotuha tinare.
8Ã jiparota, Noé sehere noano ñʉ ji coaha tiro.
Cohamacʉ Noére dohoria pjiriare yoa dutiha
9Ahri Noé ya quiti jira. Cohamacʉ Noére to yahuare “Potocã jira” ni, yoarucuriro to jichʉ, tiro ñʉ ji coaha tirore. Tiro to catiri pjare tiro mehne macaina watoi tiro dihta Cohamacʉ cahmasãare yoa, jia tiha. 10Ã yoa tiro tiaro mʉa pohna tiha, Sẽ, Cã, Jafe cʉ̃hʉ cjihtire.
11Ã yoa Cohamacʉ to ñʉchʉ, ahri yahpai jiina, masa ñaina, cahmacheina, cahma wajãina paró ji sahsea tiha. 12Tiro Cohamacʉ ñʉha tina jipihtina masa noaa jia tia sehere, ñaa mehne ti cohtota, jia tichʉ. 13Ã ñʉno, tiro Noére õ sehe niha:
—Ahrina masare, ahri yahpapʉ jiinare wajã pahñoi tai nija, ahri yahpa ti cahmachea, ti cahma wajãa, ti ji sahsea wahachʉ yoari buhiri. Tuhsʉ, ahri yahpa cʉ̃hʉre jipihtiropʉre dojomehnei tai nija. 14Ã jicʉ mʉhʉ yucʉri, noaa yucʉri mehne cʉ̃ria dohoria, pjiria yoaga. Tiare tuhsʉi, tia puhichapʉre tahtia poca dahrega. Ã yoa tuhsʉ, comape mehne tiare bihaga. 15Ã yoa pjiria dahrega. Õ puro yoaria, õ puro saria, õ puro mʉaria dahrega. Ciento y treinta y cinco metro yoaria yoa, ã yoa saro sehe veintidó metro saria waro yoa, ã yoa mʉano sehe trece metro noano pa metro dacho maca mehne mʉaria dahrega. 16Tiharica sehere cʉ̃ metro dacho maca mujipʉre wahã sʉhto pano tiha duhuga. Tuhsʉ, tia dohoriare tia tjuru cjʉaria dahrega. Cʉ̃ bʉhʉseheihta sãari sopaca tiria dahrega tiare.
17‘Ahri yahpare mioi tai nija. Jipihtiri yahpare catiro cjʉaina yariaahca. Ne cʉ̃iro dʉhsaro baro marieno yariaahca. 18Wiho mejeta mʉhʉ sehere mionore yʉ yʉhdori baharo, mʉhʉre noaa macaare yahu cũ namoihtja yʉhʉ. Tia dohoriapʉ mʉhʉ, mʉ pohna mʉa, mʉ namo, ã jichʉ mʉ macʉ namosanumia cʉ̃hʉ samunahca. 19Mʉhʉ sehe wahiquina ahri yahpai jiinapere, mʉno, numinore dohoria puhichapʉ na sãaihca, mʉhʉ mehne ti yʉhdʉ witihto sehe. 20Cãa wahpari wahiquinape, mʉno, numino, ã jichʉ wʉina, chihchõina, bʉaina, tinape mʉhʉ cahai taahca ti yʉhdʉ witihto sehe. 21Tuhsʉ, mʉhʉ sehe mʉ chʉhti macaape, wahiquina cʉ̃hʉ ti chʉhti macaape tia puhichapʉre wihboihca —niha Yawe Noére.
22Ã yoa tiro Noé sehe Cohamacʉ to dutiro seheta yoaha.
Zvasarudzwa nguva ino
Génesis 6: GVC
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO