Matayo 4
4
Uëghëëywa kunë Yesu
(Mrk 1:12-13; Luk 4:1-13)
1Uvii Mwahu agamutongeera Yesu faka umbugha adahe uëghëëywa na Ibilisi. 2Agadëa ula na unywa gwa matiku makumi ane utëku nanë mumwë, na mpeo ayo agoona njaa. 3Munya umughema agamuhanga, agamwëëra, “Nësa vee wë Mwana wamwa Muungu hanya magwe ayaa etendeke mëkatë.” 4Ëgweeso Yesu agasucha, “Ëandëkiwe,
‘Muntu atiudaha uduva gwa mukate gutufu,
ëgweeso gwa mu ukhani nëugurëghëtiwaa na Muungu.’”
5Ibilisi agamuhora faka uYerusalemu, muji weru, agamuvëka gunto a itembe ra hekalu. 6Agamwëëra, “Nësa veve wë Mwana wamwa Muungu, ëgwësye fang'ë, gusoko yiandekiwe,
‘Muungu uguvaraghëëya vamalaëka
vakwe gusoko ako,’
na ‘vëuguhora mumëkhono awe,
utajee uje gikuura mughuu wako mwigwe.’”
7Yesu agamwëëra, “Yiandëkiwe noo, ‘Utamughemee Müküü, Muungu wako.’” 8Faafo ibilisi agamuhora faka gunto a ughongo urifu, agamuraghëëra ntemi yoong'e ya urëmi na maja ayo, 9agamweera, “Ayaa oong'e nene ngugufa nëmbaa veve utungame gutufu na unkurya.” 10Faafo Yesu agamukhanëa, “Ënda kunë winjë setani! Ëandëkiwe, ‘Ugumukürya Müküü Muungu wako na umutumamëa mweeso imwenedu.’” 11Uvii, ibilisi agamureka, na gënya faafo vamalaëka vëgaja, vëgamutumamëa.
Mwandyo wa mwëmo wamwa Yesu uGalilaya
(Mrk 1:14-15; Luk 4:14-15)
12Yesu nënaa wategheeya mwino chuu Yohana wautëërwe mugeresa agenda uGalilaya. 13Agatunguya uNasareti, agenda uKaferinaumu, gwa irambo wa wilaya a uZabuloni na uNafutari, agëkhaa kuuko. 14Uvii ugakhonda ukhani uroo nënaa ugahanywa na munyagëdaghu Isaya:
15“Veve ng'ë amwa Zabuloni na ng'ë amwa Nafutali,
ng'andë a uYoridani, uraraava irambo,
Galilaya, ng'ë a antu va
Ndughu ingëja.
16Antu nënaa vëgëkhaa mukiti vawoonaa weru üküü.
Na vasaa nënaa vëuduvaa mu ng'ë a kiti na mumimi wa ikuya,
weru wavamwëëkëaa!”
17Ufuma itungo rësëë Yesu agaandya utanantya na uhanya, “Fei, mahutye anyu gusoko utëmi wa girunde wahumbeeraa!”
Yesu uguvataana auta somba vane
(Mrk 1:16-20; Luk 5:1-11)
18Yesu nënaa ugweenenda umpeo a irambo ra uGalilaya, agavoona anaamuntu vavërë auta somba, Simoni nëugutaanwa Fetero na Anderea muunaakwe vëugumëa iuta somba mwirambo gusoko naa auta somba. 19Uvii, agavëëra, “Ng'ongi, nëënoo ngumutënda nyee auta antu.” 20Gënyafaafo vëgayareka mauta somba awe vëgamuhonga. 21Nënaa wenda usonge nduvëëngë, agavoona anaamuntu vavërë, Yakobo mwana wamwa Zebedayo na Yohana muunaakwe. Vasaa naa vëmumasua itambëëmwe na tata wawe Zebedayo vëuyaning'anëëya mauta somba awe. Uvii Yesu agavataana. 22Veeso noo gënyafaafo vëgamëreka masua itambëëmwe na tata wawe, vëgamuhonga.
Yesu uguvasëya antu na uvaforya arue
(Luk 6:17-19)
23Yesu naa agenda muu itumbë muu wilaya a uGalilaya oong'e, ugusëya mumasunagogi na utanantya Sayu Njija a Utëmi wa Muungu. Agaforya marüe hiya hiya, malegheku hiya hiya a antu. 24Sayu yakwe igakündanëa uSiria oong'e. Arüe voong'e nënaa vëna marüe hiya hiya na vasaa nënaa veunyomwaa na malwe hiya hiya, vëna vinyonyinyonyi, anyaugwa itwe, anya ukuya ighandi, agavaforya voong'e. 25Maburi mingë a antu ufuma uGalilaya, uDekapoli, uYerusalemu, uYudea nane ng'andë a uYoridani vëgamuhonga.
Zvasarudzwa nguva ino
Matayo 4: RNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Kirimi New Testament © Bible Society of Tanzania, 2008.