LUKAS 22
22
Yesus waruwok yiluk abok mbalkugwa wene
(Mat. 26:1-5; Mrk. 14:1-2; Yoh. 11:45-53)
1 #
Kel. 12:1-27
Wene Roti Ragi Bigikdek dago mende eti endaga nin yugu dogolir Paskah yugu lagugwa. Etegerogon ma, wene Paskah ake inakla eberkwi paga arar panggo yi wagage. 2Ap Imam-imam kepala mende inom, nen ir Guru-guru agama mende inom, ir nen Ar Yesus lakbi lakbo min warurak paga, akuni pakalok inoba inobade nen, nenggerogon kwak eruwok yiluk, tuan kwarku lagugwa.
Ar Yudas nen Yesus warurak abok nggeralkige wene
(Mat. 26:14-16; Mrk. 14:10-11)
3Ar Yudas endaga ambi Iskariot, nen ar ebe Yesus nen ir dua belas rasul inogar inom deninakige mende eti. Ma ar Iblis ar akla arar unggirige o. 4Eta nen Yudas ap imam-imam kepala inom, ap Allah Ai Palek aruwam werek mende inom, Ar Yesus Yudas nen nenggerogon ir wogoragin yiluk wene mbalkugwa. 5Nen ir iniliti adeknggen nen, kar nir uang wokirugun o, yiluk yorugwa. 6Ma, ar Yudas nen pano ar yogo andega lagagerek, Ar Yesus eti akuni inil dekma negen nenggerogon wogorak yiluk, o telek aga il wagangga lagage o.
Paska paga dago nau ndugurkugwa wene
(Mat. 26:17-25; Mrk. 14:12-21; Yoh. 13:21-30)
7Wene Roti Ragi Bigikdek dago narugwa paga arar panggo yi wagagemo, domba Paskah eku dogolir nau arar warinakugwa. 8Eta ma, Ar Yesus nen Petrus o, Yohanes o, imbirak yoraga dogolir, “Nir Paskah eku dogolir naungge mende ndugurogo bi lani o,” yiluk yorarige.
9Etegerogon yoragagemo, Nen ir nen kinok yogu dogolir, “Nir nen o nggoma ndugurogo bugun o?” yiluk yorugwa.
10Ar Yesus nen wene onggo yoraga dogolir, “Kir o kota unggugunem, ap ambi igirak i todek inggimo wolok ambi kinom abuk atuk kalok, ar uma kinom unggwi lalok, 11ar ap ai werek eti men yokno, Ar Guru nen, ‘An mutnarek lagwi mende ninom, o Paska ake dago naurak paga, o nggoma dago nugun? yiluk kinok yege o,’ yiluk yokno. 12Yogwi kinalok, ar ap uma onde werek eti nen, o tida paga erumo etoma nggok telek, nen erir taga mende inom pugurik werek o, yiluk yokeragin etnaga. Etegerogon yega kalok, o etoma arar ndugurogo bino o,” yiluk yoragage.
13Ir Petrus o, Yohanes o imbirak arar lagugwarik, inil bikarugwa mende, Ar Yesus yoragage ndak-ndak arar inil karugwa. Nen Paska ake dago naurak mende enogo arar ndugurogo birugwa.
Tuhan ake perjamuan inom ekugwa wene
(Mat. 26:26-30; Mrk. 14:22-26; 1Kor. 11:23-25)
14O Paska ake dago nau enogo arar panggo yirigemo, Ar Yesus aworomi inom arar korek tagugwa. 15Korek laktuk, Ar nen ir aworomi yoraga dogolir, “An kener auwan wakikdek kigik, kir ninom Paskah ake dago nau yi wadok nggok togon kigirik mo, ninom nugun o. 16Nenaluk, kinakla ebebar andani o: An nen dago nugun yi kudi nen, dago ambi ninggikdek mondok neyagik, Ar Allah nen mbogor agar ngger erogo bigin eti kenam ari ligin kudi paga arar o.”
17Yoraga lagagerek, Ar Yesus igirak anggur agi todek inggimo wagangga lagagerek, Ar Allah oba, wa yiluk, keyagi waka lagagerek yoraga dogolir, “Tumbur-tumbur erogo kodar lani o; 18Nen wene yi kinilu togo dogono o, o yoma Ar Allah nen inggimo wokbiluk paknirek dogorak kudi ari wagikdek kigik, An i anggur agi todek yi nigin mondok dek arar o.”
19Yega lagagerek, Ar Yesus nen roti inggim wagangga lagagerek, wa yiluk tamban arar ekige. Tamban arar eka lagagerek, roti enogo inggi paga ugur-ugur erogo wogoraga dogolir, men yoragage, “Yi An nebe arar ma, [kir kinake bigin o, ma kir nen An noba ebernaku dogolir, eku dogono o,” yiluk yoragage. 20#Yer. 31:31-34Yoralok, roti arar nunggu lagugwarik, etegerogon ar, igirak anggur amburu todek wogoraga dogolir, men yirige; “Anggur agi todek yi, Ar Allah Ane amburu yabongga erigin yirige mende eti arar o. Nen An namep kir kinake kidirik yi paga, wene yugu eti oba warek o.”]
21“Eti ar ogwe, kinil laktari watni! Ap inggi An nebe akuni inoba wogoragin mende ebe eti, meja ndalek yi paga, nimbirak agorik yi arar o! 22Ar Akuni Inakbur kamburak mende eti, Ar Allah nen ebebar kologo birige werek o, ogwe ar ap An nebe akuni inoba wogoragin mende eti perak, wene andugi edo oba bigin o!”
23Etegerogon yigi nanggige, ir nen ebe ta nen erik yiluk eka agama yege, yiluk ir-ir kinok dagal-dagal yirugwa.
Ta kwak nggok arigin yiluk aredo wakugwa wene
24 #
Mat. 18:1; Mrk. 9:34; Luk. 9:46 Ir Ar Yesus mutok lagwi mende nen, ta kwak ap nggok kwak etarigin yiluk, ir-ir aredo wakugwa. 25#Mat. 20:25-27; Mrk. 10:42-44Yugwi agagemo, Ar Yesus nen ir yoraga dogolir, “Ap raja-raja Ar Allah abok ir inonggodek mende agar paga yoma nen, akuni inapma tebelogo balok, mep dagak pagak erinaku dogolir ar mende, ir nen yirtagu dogolir, nir ap nggaindak, ‘Akuni Ninakma Pano Bagarek Welagwi' mende arar yirkodagwi o. 26Ogwe, kir etegeron dek o. Nen kir kinanggedekla kar ambi an nggok arik yiluk andalok kalok, kar eti kebe tebe yiluk we ap bugudak talek arar etarurak o. Ma, ar ap inewe nggok nen kalok eti, mondok yedoman mende talek arar etarurak o. 27#Yoh. 13:12-15Etiar ma, yogo ar ta kwak nggok kogop: ar ap meja paga kortatuk erom nertaga eti kwak nggok a, arte ayedoman eti a? Ebebar mende eti, ar ap korek meja paga erom nertaga eti arar o. Ogwe, An kir kinanggedekla ap yedoman mende talek ninom agorik o.
28An yiduk maduk dibirek ma kigik erir nega nagik, kir An ninom mondok ar erir nugwi o. 29An Nombae nen wene onde dogorak woknirige kwak, An kir eta ndak-ndak ar wokeragin o. 30#Mat. 19:28Etiar ma, An Raja etarigin eti paga, kir kinadeknggen togon erugun o. Nen kir ir akuni dua belas suku Israel mende enogo inawene mbalku dogowak nen yiluk, dua belas takhta wene edo mbalir tagama eti paga korek binagagin o.
Petrus nen Yesus nonggodek yigin yorige wene
(Mat. 26:31-35; Mrk. 14:27-31; Yoh. 13:36-38)
31Simon, Simon, Nane karuk kolin o! Iblis nen kir kinabur mbaluwak nen yiluk telek erogo wogogimo o; magandum ebe o, nen agakdo o, imbirak inadik erogo balok, pano mende adik erogo biluk nen maduk mo nggwe uwak denogo bega erigin o. 32An nen Simon wae, kebe kiliti ebebar ebekigen mende obarnerogon dogowak nen yiluk kake tamban ekimo o. Nen kar An noba watuk kalok, kogariyak iniliti aik warinaka dogono o.”
33Petrus nen wene onggo yega dogolir, “Ae Tuhan wae, an kede warnabu kalok nakla tiyok ar werek, nen Kar karugun kalok nimbirak ar narugun o!” yiluk yorige.
34Yorigemo Ar Yesus nen, “Petrus wae, kiliti ebebar andan o, tewe ayam ane awan yigikdek kigik kinggi kenagan paga Yesus an nonggokdek o, yiluk yigin o,” yorige.
Dompet inom, tu yugu inom, nen mbirok inom abok yirige wene
35 #
Mat. 10:9-10; Mrk. 6:8-9; Luk. 9:3, 10:4 Tuguluk Ar Yesus nen aworomi yoraga dogolir, “Pagane An nen kir wene wolok lakinaka dogolir, dompet inom, tu yugu inom, sepatu inom, wolok lagup o yiluk yokeragagimo lagagup enogo, kir kinamende ebebar dek agage karugup a?” yiluk kinok yigi nanggige, Ar Aworomi nen,
“Dek o!” yiluk yorugwa. Tuguluk Ar Yesus nen yoraga dogolir,
36“Mende yogondak kwak te? Kir ambi nen dompet inom, tu yugu inom; nen kar ambi kambirok dek kalok, kiyom baju paga onggo kundiluk, kambirok onggo mbalano o. 37#Yes. 53:12Wene yi waganini o, ayat Alkitab paga wene yirige eti, ‘Ir akuni nen Ar ebe maduk ekwa mende andagun o,’ yiluk yirige eti, An Noba mondok arar etarigin o. Nenaluk Alkitab paga nen, Wene An noba etaru paga yirige mende eti, yogondak arar etarir warir taga o,” yiluk yirige.
38Yigi nanggige, Ar Yesus mutok lagwi mende nen, “Tuhan wae! Kil laka eme nda, yoma mbirok mbere werek o,” yiluk yorugwama Ar Yesus nen, “Obok o,” yiluk yirige.
Yesus nen kur Zaitun paga tamban eri dagarige wene
(Mat. 26:36-46; Mrk. 14:32-42)
39Ar Yesus o kota dambe kalok, kur Zaitun paga etoma Ar aworomi inom lektagwi ndak-ndak arar lagugwa. 40Ari lagugwarik nen aworomi yoraga dogolir, “Kir kiniliti nggagali waga paga, maduk erurak erkinakem, tamban eku dogoni,” yiluk yoragage.
41Yoraga lagagerek, Ar ebe nen we ndorogo negen lagagerek, endop yunggu yiluk tamban eka dogolir, 42“Nombae o, An kener warigin yi, ndak arumo, dek erogo bin nda. Ogwe An Nakla andagi paga kwak dek o, arte Kar kakla andagen paga kwak erin o,” yiluk yorige. 43[Etegerogo tamban eka agagemo, ap malaikat mende ambi waga lagagerek nen, iliti aik wakbirige. 44Nen Ar Yesus akla paga nen, kener nggogar waka dogolir, tamban akber togo mondogar ekige. Etegerogo eka dogolir, Ar Adigak amep talek ndikbok ndakbok agar taga wurkige o.]
45Tamban eka lagagerek, tuguluk aworomi inoba lagige mende, iniliti watarugwa paga, nogo yugunem da lagage. 46Tuguluk Ar nen ir aworomi yoraga dogolir, “Nenaluk noge mban yirtagwi? Maduk erurak kiniliti nggagalka kau, kiniluk atuk nen tamban eku dogoni o,” yiluk yoragage.
Ar Yesus paktarugwa wene
(Mat. 26:47-56; Mrk. 14:43-50; Yoh. 18:3-11)
47Ar Yesus aworomi inom wene auwan mbalkunem ar, ar Yudas ir Ar Yesus awurumi mende ambi enogo nen, ir akuni dogalek wogorek arar wagage. Wagagerek nen ar Yudas enogo, lok-lok Ar Yesus elokte ande bik#22:47 Ande bik, Indonesia wene paga eti cium. eri lagage. 48Erigi nanggige ar Yesus nen, “Yudas, kar kande bik eken yi, Ar Akuni Inakbur enogo warurak paga, abok mbal digindik eken a?” yiluk yorige.
49Ar Yesus aworomi nen, wene etaga yanogo inil kugu lagugwarik, “Tuhan, yogondak ninom abugun o, nir ninambirok kodalogar o!” yiluk yorugwa. 50Yugu lagugwarik ar ambi nen, ap imam mende ayedoman ambi, aruk ebema nggwe mbirok paga takbolaber karige o.
51Ogwe Ar Yesus nen, “Yogo ya kudi o,” yiluk ap aruk takbolek enogo obalikmo kunogo birige o.
52Tuguluk Ar Yesus nen, ap imam-imam kepala inom, ir tentara inewai Ar Allah Ai Palek aruwam welagwi mende inom, nen ir ap Yahudi mende inewai inom, yoraga dogolir, “An yi, ap maduk ekwa mende agimo, paknabu paga, kir tige tega inom nen mbirok inom wolok wagop a? 53#Luk. 19:47, 21:37Kup keyam Allah Ai Palekma ninom welago yemenogo, ogwe kir nen paknakikdek welagop o. Ogwe o telek yogondak yi, ar o amum mo dogolir yabu erir taga mende obatne erurak paga arar ma, kir eruwam ndak-ndak ar o,” yiluk yoragage.
Petrus nen Yesus nonggodek yirige wene
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Ir nen Ar Yesus pagago wolok, ap imam nggok mende werekma bi lagugwa. Nen ar Petrus enogo kwiyakbok mugurek lagage. 55Uma tilimo etoma indu kunikmo togi werakunem, ar Petrus inom korek werekma, 56Kwe ambi etoma yabu erir taga mende nen, Petrus korek il kalok, yega dogolir, “Ar ap yi Ar Yesus inom kigi mende enaga ar werek yire,” yiluk yorige.
57Ogwe ar Petrus nen, “Ar Yesus eti an nunggukdek mondok arar o,” yiluk yirige.
58Satu jam negen ar welagugwarik paga, ar ambi nen ar Petrus il kalok, “Kar yi, ir kinom mende ar o!” yiluk yorige.
Ogwe Ar Petrus nen wene onggo yega dogolir, “Dek o, An dek,” yiluk yirige.
59 Satu jam negen ar welagugwarik paga, ar ambi ane obarne paga ar yoga dogolir “Ap yi Ar Yesus awurumi mende ar o, nenaluk ar ai o Galilea mende arar o,” yiluk yorige.
60Ogwe ar Petrus wene onggo yega dogolir, “Kar nena kakla andalok yegen eti, an nonggokdek o,” yiluk yirige.
Ar Petrus wene yanogo auwan onggo yega kigik, tewe ayam ane kokok yiluk arar yirige o. 61Yega kigik, Ar Yesus nen Petrus oba il dagarogon bikarige mo, Ar Petrus Tuhan nen wene yorige mende, “Kinggi kenagan paga, Ar Yesus eti nonggokdek yiluk, tewe ayam ane awan yigikdek kigik kane yigin o, yiluk yorige mende eti, ar akla arar eber tari wagage o.” 62Ar Akla ebertari wagagemo, Ar Petrus etoma nen wulka lagagerek, de ambik arar yirige o.
Yesus mberugwi ndugi wakwi ekugwa wene
63Akuni Yesus aruwam dogolir wene mberiragwi, ndugi wakwi eku lagugwa. 64Ir ambetak nen il ogi tebelogo biluk, wedak tanen ndugi kari taga endaga yin o yogik eku lagugwa. 65Inane ambigar aik dagok mbaik dagok yogu lagugwa.
Yesus ap Mahkamah Agama werekma wolok lagugwa wene
(Mat. 26:59-66; Mrk. 14:55-64; Yoh. 18:19-24)
66Kuben o keyalek ngge, ir ap Yahudi inewai inom, imam-imam kepala inom guru-guru agama inom, obogar wonggal diluk, Ar Yesus enogo, ir inewe Mahkamah Agama eti oba arar wolok lagugwa o. 67Wolok bi lagugwarik, Ar endokma waganggu dogolir, “Nir yornirau o, Kar yi ap nggok akuni ndilinakwa mende kar arar a?” yiluk yorugwa.
Yorugwama Ar Yesus nen wene onggo yega dogolir, “An nen kir yokiraga nalok, kir kinakla ebebar andagun degar o. 68Nen An wene kir kinok yokiragin kalok, kir nen wene onggo yoknirugun dek ar dek o. 69Ogwe o yogondak kudi nen arar, Ar Akuni Inakbur eti, Ar Allah Obarne Werek eti, inggi ebema nggwe arar kortaga o,” yiluk yoragage.
70Yiluk yoragi nanggige, ir obogar nen yogu dogolir, “Etegerogon kalok, Kar yi ar Allah akbur arar a?”
Ar Yesus nen wene onggo yoraga dogolir, “Kir yogop eta arar o,” yiluk yoragige.
71Yirigemo, ir nen yugu dogolir, “Ar ebe andema nen yege arar ninaruk kolalko o! Ma wene edo akuni inoba dombali lau, dek arar o!” yiluk yirugwa.
Zvasarudzwa nguva ino
LUKAS 22: WLW
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda