Imilimo 11
11
Vino Peter wayile anena awi Iklezia lya mwe Yerusalemu
1Awapostile wonsi nawasuwizi wa mwe Yudeya monsi awivwa ukuti namakandinye yapochelezile Izwi lyakwe Leza. 2Ala pane Peter waya kwe Yerusalemu, awantu wano walondanga ukulemba amakandi uwusilamo awamukanuzya awati, 3Wayile wikala mung'anda yamakandi wane watalembwa uwusilamo, swinya walyanga apaliponga nawo! 4Ukuwa Peter awalandila Ilandwe lyonsi vino chalinji, awatantila ukufumilila pakutalika.
5Ati, Napepanga mukaya kakwe Yopa, nga nalota ichilota. Ngapano ndola chimwi chino chalinji ngati achilundo chikulu chikwika chilemilwe nivikonchi vini ukufuma mwiyulu, achimilila pano nalinji. 6Nalanga nafindamila mukasi ndola ivinyamana, ninkala, ivikulisi, ninyunyi zyalonde. 7Ngapano njivwa izwi lyamvwanzya lyati, Katuka, Peter; koma ulye! 8Ukuwa inkana inti, Awe, Mulali! Amuno ichintu chaka nanti achakulya chiwipe chisitela chinjile mumulomo wane. 9Ukuwa izwi alifuma mwiyulu swinya aliti, Utize uwakwelengania uwati chino Leza waswefya achintu chaka, 10Chonye-choo chachisilwe impindi zitatu, nga pakupelelechezya vyonsi avisendwa mwiyulu. 11Pampindinye yo yo apano awantu watumilwe kwenene ukufuma kwe Kesariya awafika pang'anda yino nalinji. 12Muzimu anena ukuti mpite nawo nanti kuzinguluka. Ngapano nawanawitunye waa mutanda wane wafumile kwe Yopa awapita nani kwe Kesariya, swensinye atuya atufichilila mu ng'anda yakwe Komelio. 13Atulandila namuno walolezile umungeli wino wayile ayimilila mung'anda yakwe mukasi amunena ati, Tuma wumwi kwe Yopa akite umuntu wino akwitwanga izina lyakwe Simoni Peter. 14Weyonye wandi ayize akunene amazwi nichiwanza chako chonsi nga mutulwe. 15Nga nalile navwanga amazwi, Umuzimu Mwimichile wawawila ndivino watuwizile naswe pakutalika. 16Ngapano njizuka amazwi yano Imfumu yatili, Yohani wabatizyanga naminzi, ukuwa mwenji muliwabatizwa nu Muzimu Mwimichile. 17Ngavino Leza wapile amakandi ichawila ichilichonga nachino watupile naswe pano twasuwizile—mu Mfumu e Yesu Klistu; ngafwandi nani neweni, wino ingalesya Leza?
18Awala wivwa wonye-woo, nimipanzi yawo isila awatumvya Leza, wakuti, Fwandi Leza wapa namakandinye ulongo ukuti watontolokwe nga wawe nuwumi!
Iklezia lya mwe Antioki
19Awasuwizi wasalangine pampindi yawuyimvi wuno waponile pano Stefano wakomilwe. Wamwi wayile awafika ku Foinisia naku Sayiprasi na kwe Antioki, awalanga wakulanda amazwi ku wa Yuda watupu. 20Ukuwa awasuwizi wamwi, awonsi wane wafumile kwe Sayiprasi nawano wafumile kwe Kureni, awaya ku Antioki awawilila namakandinye amazwi, awawalandila Ilandwe Zima ilya Mfumu e Yesu. 21Amaka ya Mfumu yalinji nawo, nawantu wavule awasuwila awapetuchila ku Mfumu e Leza.
22Ukulumbililwa kwamazwinye yaa akwivwika kwi Iklezia lyamwe Yerusalemu, achaleka awatuma Bamaba ku Antioki. 23Ala wafika walola vino Leza wapefile awantu, asechela asimpisya wonsi ukuti wawe awasuwilwa swinya awakusimichila ku Mfumu e Leza nimyezo yawo yonsi. 24Bamaba walinji amuntu muzima, wizwile nu Muzimu Mwimichile mbali nisuwilo. Awantu wavule awapetulilwa ku Mfumu.
25Bamaba aya ku Tarso mukuvwamba Sauli. 26Ala wamuzana, amutwala ku Antioki. Kumwaka wupuma wowilinye awalanga wakasunkana nawantu wi Klezia awasambilizya iwumba kulu. Amu Antioki-nye amuno awasambilizi watalisile ukwitwa ukuti awina Klistu.
27Kwela pampindinye yoyo apano awatumwa wamwi wafumile mwe Yerusalemu awaya kwe Antioki. 28Wumwi uwakwe woliwo walinji we Agabasi, weyonye awino ayimilila namaka ya Muzimu atumwa kuno kulipona ichipowe munsi yonsi. (Ichipowenye chocho chaponile pano Klaudiya walinji amfumu.) 29Awasambilizi awelengania awati wila muntu atumile awanyina wano walinji mwe Yudeya ivyakuwavwa ndipano amaka yafisile. 30Awachita wowonye, awatuma indalama kwe wasongo wi Klezia awapa Bamaba nu Sauli awatwala kweneko.
Zvasarudzwa nguva ino
Imilimo 11: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.