Imilimo 15
15
Awawungana mwe Yerusalemu
1Awantu wamwi wafumile mwe Yudeya awaya ku Antioki awasambilizya awanawitu, wakuti, Mutanga mwize mutulwe suka ndi mwalembwa uwusilamo ndimuno isundo lyakwe Musa lyatachila. 2E Pauli nu Bamaba awapanzyania nawo nkaninye; achaleka chapatichizizye Pauli nu Bamaba nawanji. wane walinji mwe Antioki ukuti waye kwe Yerusalemu wakalolane nawapostile nawasongo wakavwanzyanie vyovyonye.
3Pamusinzo wawo awasuchililwa na wi Klezia, nga awala wapita mwe Foinisia nu Samariya awawumbula vino amakandi yapetuchizile kwe Leza; amazwinye yaa ayapa awanawitu wonsi ichimwemwe. 4Awala wafika mwe Yerusalemu, awapochelelwa ni Klezia, nawapostile nawasongo, awawalandila vyonsi vino Leza wawachitizile. 5Ukuwa awantu wanji wane wakonkanga awa Falisi awimilila awavwanga awati, Wazipila ukulembwa uwusilamo nukusambilila isundo lyakwe Musa.
6Awapostile nawasongo awawungana apaliponga ukuti wapanzyanie chonye-choo. 7Akula ukupanzyania kwakula Peter ayimilila avwanga ati, Wanawitu, mwamanya kuno kali Leza wansozile nene mwakwe mwemwenye ukuti ndawizya Ilandwe Zima kumakandi, ukuti wivwe ngawasuwile. 8Ngapano e Leza wino wamanya mukasi mumyezo yawantu, apanichisizya amakandi awapa Muzimu Mwimichile, ndivino watupa naswe. 9Nanti wusyano wumwi pakasi pakwe woliwo naswe, awapwizya imyezo muno wasuwila. 10Ngafwandi amuno chani chino, kanonzi mukulonda ukwelezya Leza mukulonda ukutwika awasuwizi ichisendo chino nanti awatatakulunye nanti asweswenye tutanga tunyamule? 11Awe! Twasuwila swinya twatulwa muno ankumbu-nkumbu zya Mfumu e Yesu, ndivino nawonye.
12Iwumba lyonsi lyamyalile-mya wateyelezyanga pano Bamaba nu Pauli wakuvwanga ivyakuzungusya vyonsi nivyamayele vino Leza walesile awachita kumakandi. 13Awala wamala ukuvwanga, Jemusi asimpuka avwanga ati, Nteyelezyani, wanawitu! 14Simoni walondolola vino pakutalika Leza wape.hezile amakandi asenda wamwi awakwe woliwo awawa awantu wakwe. 15Amazwi yawatumwa yazumilizyania nkaninye nachoo. Ndivino Amawaliko Matele yavwanga yati,
16Imfumu e Leza wavwanga wati, Pansizi pakwe choo,
ndinyochela njize nkatusye ing'anda yakwe Davidi yino yapona.
Ndilimbuzya ivipompa vyakwe,
nzenge swinya.
17Apano awantu wonsi waliwavwamba Imfumu e Leza,
amakandi yonsi yano nita ukuti wawe awantu wane.
18Avino Imfumu e Leza wataka, wino watasile chonye-choo kali.
19Jemusi ati, yaa amelengania yane ayakuti, Tutize tuwafwa nukutamya amakandi wane wakupetuchila kwe Leza. 20Ukuwa tuwawalichile kalata tuwanene ukuti watize wawalya ichakulya chimwi chino chakombela chino chafimilwa ku makolania; swinya nukuyisunga kukuzenkenta; watize wawalya inyama yimwi yino yanyongwa awowo, nanti akulya uwazi wumwi. 21Amuno Isundo lyakwe Musa lyanda likawazwa mung'anda zyakupepela mumanda yakusolezya yonsi impindi ntali, namazwi yakwe yakawizwa mutwaya tonsi.
E kalata wino wawalichizilwe amakandi yano yasuwizile
22Ngapano awapostile, nawasongo, apaliponga ni Klezia lyonsi, awelengania ukuti wasole awantu wamwi mwiwumba wawatume ku Antioki nu Pauli nga nu Bamaba. Awasola Yuda, wino witwanga izina lyakwe Barsaba, nu Silasi, awasola wanye-waa wawili wane wamanyisilwe nkaninye kuwanyina. 23Nga awawatuma nukalata wamazwi yakuti, Sweswenye swewapostile, nawasongo, swinya swewanyonko, tukuwalamuka mwensi mwewanawitu mwewachikwatilwe chamakandi mwewantu mukwikalanga mwe Antioki, na mu Siria, nga na mwe Silisia. 24Twivwa kuno awantu witu wamwi wane wafumile kwakwe sweswe koo wiza mukuwavulungania nukuwavundula namazwi; awantu wane tutatela tuwatume, nanti akupochelela amasundo yamwi ukufuma kwesweswe. 25Achaleka twawungine apaliponga twazumilizyania ukuti tusole wamwi wane tungatuma kwemwemwe. Wakwiza apoliponga niviwuza vitu e Bamaba nu Pauli, 26wane wayifima wati, Nanti amfwanye tungafwanga muno akuwombela Imfumu e Yesu Klistu. 27Swinya twawatumila e Yuda nu Silasi, wane wandi wize wawanene ichilungampumi ivilivyonganye vino tuwalisile. 28Umuzimu Mwichile apaliponga naswe twivwine ukuti tutize tuwonjelezezye ichisendo chinji ukulusye amasundonye yaa: 29mutize muwalya ichakulya chimwi chino chafimilwa kumakolania; mutize muwalya uwazi; mutize muwalya inyama yimwi yino yanyongwa awowo; swinya mufuntuke kukuzenkenta. Ndi mwayisolezya kwevyonye-vyoo mwandi muwakwikala umutende. Tusyalile.
30Wano watumilwe awakatuka awaya ku Antioki, awawunganika iwumba lyawasuwizi lyonsi, awafika awawapa kalata. 31Walile awantu wawazya kalata, awasechela nkaninye kumazwi yansimpo yano wivwile. 32E Yuda nu Silasi, wane woliwonye nalwawo walinji awatumwa, awavwanga impindi ntali nawanyina, awawapa amaka ninsimpo. 33Awala wikala kweneko pazimba, awanyoswa umutende nawanyina, awaawanyochela kwewano wawatumile. [ 34Ukuwa Silasi weni asyala kokonye.]
35E Pauli nu Bamaba awikala mu Antioki impindi ntali, Apaliponga nawanyina wavule awasambilizya nukuwizya izwi lya Mfumu.
E Pauli nu Bamaba awapawunkana
36Apala pazimba Pauli anena Bamaba ati, Tuye tunyoke kuwanawitu mutwaya tonsi muno twawizizye Izwi lya Mfumu, alyakuti tulole muno wakwikalila. 37E Bamaba walondanga ukusenda Yohani Marko, 38ukuwa Pauli weni atalondanga ukuti apite nawo, amuno atisile nawo akwizafika kumpindi yakumala umulimo wawo, ukuwa wanyochezile panzila pano walinji mu Pamfulia. 39Achaleka awapanzyania nkaninye, awapawunkana nukupawunkana. Weni Bamaba asenda Marko alungama ku Sayiprasi, 40nawe Pauli asola Silasi awapita, awanyina awawalemeka munkumbu zya Mfumu ukuti awawasunga. 41Aya apita mu Siria na mu Silisia, awomya ama Klezia.
Zvasarudzwa nguva ino
Imilimo 15: WWN82
Sarudza vhesi
Pakurirana nevamwe
Sarudza zvinyorwa izvi

Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.