Imilimo 9
9
E Sauli atontolokwa
(Imilimo 22:6-16; 26:12-18)
1Impindinye yoyo yonsi, e Sauli walandalizile nuwukali wakwe akutetemya nukukoma awasambilizi wa Mfumu. Aya kwesimapepo mukulu 2amulenga kalata wakupochelelwa mung'anda zyawa Yusa izyakupepela zino zyalinji mu Damasika, alyakuti ndiwazana wamwi wane wakonkanga Inzila ya Mfumu kweneko, awonsi nawanachi, awaleme awatwale kwe Yerusalemu.
3Walile pane akuya ku Damasika, ala vino wapalamila mukaya, napaponapapo ukuwala akufuma mupela akumuliwilizya: 4Apona pansi afukime ayivwa izwi likumunena likuti, Sauli, Sauli! Ngachani chino ukunjimvya?
5Awuzya ati, Nga weweni Mfumu? Izwi alyivwika aliti, Ne Yesu wino ukuyimvya. 6Ukuwa katuka yinjila mukaya, amuno wandi ukananwe chino wazipila ukuchita.
7Awantu wane walinji pamulongo wonga nu Sauli awimilila-mya, nanti kuvwanga chimwi; awivwa izwiukuwa nanti kulola wumwi. 8Sauli akatuka pano waponile akupula aminso yakwe, ukuwa nanti kulola chimwi. Awamulema ikasa awamukolelela awamutwala mu Damasika. 9Alinda amanda yatatu nanti kulola, pampindinye yoyo yonsi atalyanga kamwi nanti akung'wa.
10Mu Damasika mwalinji umusambilizi wumwi wino witwanga izina lyakwe Ananiya. Imfumu e Leza amunenela muchilota ati, Ananiya! Ayitawa ati, Newaa Mfumu. 11Imfumu e Yesu amunena ati, Katuka yanga kwekumba wino wakutanji Mololoke, ule waya pang'anda yakwe Yuda uwuzye umuntu wumwi e Sauli wino wafuma ku Tarso. Akupepa, 12muchilota chakwe walola umuntu izina lyakwe we Ananiya waya winjila muno ali wawika amakasa yakwe pakwe weliwe alyakuti aminso yakwe yalola swinya.
13Ananiya atolelela ti, Mfumu, Awavule wanena ivyamuntunye wee, wanena ivintu viwipe ivivule vino wachitanga awantu wako mwe Yerusalemu. 14Nakonye-koo ku Damasika kuno ayizile, wapochelezile amaka ukufuma kwe simapepo mukulu ukuti ayize aleme wonsi wane wakalumbula izina lyako.
15Imfumu imunena ati, Yanga kweneko, amuno namusola ukuti ambombele, namutuma ukuti akawumbulile amakandi nizyamfumu, nawa Israeli izina lyane. 16Amuno nenenye nalwane nandi mulanjizye vyonsi vino wandi awayimba muno anene.
17Ngapano Ananiya apita, aya ayinjila mung'anda, aya awika amakasa yakwe pe Sauli. Ati, Mwanawitu Sauli, Imfumu e Yesu awino wantumae Yesu-nye nalwakwe wino walolesile kwewewe pano walinji munzila yakwiza koo. Antumile ukuti upochelele icheni chako uyizule nu Muzimu Mwimichile. 18Ngapano napaponapapo muminso yakwe Sauli amulakata vimwi ngati amamba yanswi atalika awalola swinya. Ayimilila abatizwa nukubatizwa; 19nga ala walya ichakulya, akonkowela.
Sauli awawizya wu Damasika
Sauli ayikala nawasambilizi mu Damasika amanda matichi. 20Alungama kung'anda zyakupepela afika awawizya ivyakwe Yesu. Akuti, Amwanakwe Leza.
21Wonsi wane wamwivwile awazunguka, awati, Wuzye umuntunye wee asi awino wakomanga awamwe Yerusalemu wano wakutaka Izina? Wuzye chisi achochonye chino wizizile nakonyekoo ukuti ayize awaleme awatwale kwe wasimapepo wakulu?
22Ukuwa Sauli awawizya namaka nkaninye, namazwi yakwe yano watanji Yesu we Mesaya ayawoma nkaninye na wa Yuda wano wikalanga mwe Damasika awapotwa nichakutolelela.
23Ayala amanda mavule yapita, awa Yuda awawungana awamba ukuti wakome Sauli; 24ukuwa amanya chino walondanga ukuchita. Awatanga muzyampongolo zyakaya uwusiku numusanya ukuti wamukome. 25Ukuwa uwusiku wumwi wane wakonkanga Sauli awamusenda awamufumizya pachimboma, awamusolosezya muchise.
Sauli aya kwe Yerusalemu
26Sauli aya kwe Yerusalemu ayelezya ukuyayisanzya kuwasambilizi. Awakana ukuti wamusuwile ndiwalinji amusambilizi, wonsinye wamutinanga. 27Apano Bamaba amwavwilizya amutwala kuwasambilizi. Aya alondolola muno Sauli walolezile Imfumu pano walinji pamusinzo nakuno Imfumu yamuvwanizye. Swinya awalandila kuno Sauli wawizyanga nukusinga mu Damasika mwizina lyakwe Yesu Imfumu. 28Ngapano Sauli ayikala nawasambilizi awapitapita mwe Yerusalemu wensi, alanga akuwizya nukusinga konsi mwizina lya Mfumu. 29Awavwanga mbali nukupanzyania na wa Yuda wano wavwanganga ichi-Griki, ukuwa awalonda ukumukoma. 30Awala awawuye wamanya, awasenda Sauli awamutwala kwe Kesariya awamutuma ku Tarso.
31Ngapano Iklezia lino lyalinji mwe Yuda, na mwe Galileya nga namwe Samariya alipochelela umutende. Lyatezile lyakula lyawoma nukuwoma nkaninye muno Umuzimu Mwimichile walinji nawo, awalanga wakuchindika Imfumu.
Peter aya mwe Luda na mwe Yopa
32Peter wapitapitanga koo-nakoo, achaleka wanda wumwi wayile kukusyungula awantu wakwe Leza wane wikalanga mwe Luda. 33Kokonye akuno aya asunkana numuntu wumwi wino watanji Eneya, wino walwile indwala yachintendya atakatukanga pano alazile kumyaka kananimonsi. 34Peter amupunda ati, Eneya, Yesu Klistu wakupozya. Katuka konza ichitala chako. Napaponapapo Eneya akatuka. 35Awantu wonsi wane wikalanga mwe Luda na mwe Sharoni awamulola, awapetuchila ku Mfumu.
36Mwe Yopa mwikalanga umwanachi wino witwanga izina lyakwe Tabita, walinji amusuwizi. (Izina lyakwe ilya mu chi Griki walinji we Dorika, kuno akuli kuti mpombo.) Umwanachinye wee wawombanga imilimo mizima imivule swinya wavwanga awalanda. 37Pampindinye yoyo alwala afwa. Awamupwizya awamulambalika mung'anda yapapela. 38Yopa vyapalamine nu Luda, achaleka walile awasambilizi wivwa kuno Peter walinji mwe Luda, awatuma awantu wawili kweweliwe namazwi yakuti, Twazina pitisya uyize kwesweswe. 39Achaleka Peter akatuka apita nawo, Ala wafika awamutwala mung'anda yapapela. Awanachi wonsinye awafwilwe awalume awamuwunganila, awalanga wakulosya mbali wakumulanjizya amalaya malekane-lekane yano Dorika wasumile pano walinji amumi. 40Peter afumizya awanachi wonsi palonde, asokowala apepa; ngapano apiluluchila kuchala ati, Tabita, katuka! Tabita akupula aminso yakwe, nga ala walola Peter ayikala. 41Peter atambalika ikasa lyakwe amukatusya. Ngapano ayita awasuwizi nawanachi wafwilwe awalume, awalanjizya. 42Amazwi ayasatila mwe Yopa monsi, nawantu wavule awasuwila mu Mfumu. 43Peter ayikala mwe Yopa nu Simoni e kanyuka wamikwela amanda mavule.
Zvasarudzwa nguva ino
Imilimo 9: WWN82
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chinamwanga Bible © United Bible Societies, 1981.