Tuvin - 2011IBT-R (Bible) Non Drama

Tuvin - 2011 IBT-R (Bible) Drama

Дээрги-Бурган-Чаяакчының бүдүрүп чаяап кааны дириг амытаннарының аразындан эң-не кажары чылан болган. Ол херээженден айтырган: «Сесерликте кандыг-даа ыяштан чимистерни чиирин Бурган силерге хоруп каан дээр, ол ылап-ла шын бе?»
«Бис кандыг-даа ыяштан чимистерни чип болур бис – деп, херээжен харыылаан. – Чүгле сесерликтиң ортузунда турар ыяштың чимизин чип болбас дээрзин Бурган биске чугаалаан. Аңаа дээп безин болбас, оон башка өлүр бис».
«Чок, өлбес силер – деп, чылан чугаалаан. – Бир эвес ол ыяштан чимистерни чиптер болзуңарза, бурганнар дег, эки-бакты угааптар, карааңар ажык апаарыңарны Бурган билгеш, хоруп турар-дыр». Ол ыяштың чимистери чиксенчиг, аянныг, кижини угаанныг кылыптар кылдыр херээжен көрүп каан. Оон херээжен бир чимисти үзе тыртып алгаш, чипкен. Ашаанга база чимисти ап бээрге, ол база чип алган. Оларның иелдирзиниң карактары ажыттынып, боттарының эвегенин көрүп кааннар, бел кежиин чажыра баглап аар чүвени бүрүлерден кылып алганнар.
Кежээки сериин өйде сесерликте Дээрги-Бурган-Чаяакчының кылаштап турарын дыңнап кааш, кижи кадайы-биле ыяштар аразынга чашты берген.
«Кайда сен?» – деп, Дээрги-Бурган-Чаяакчы кижини кыйгырган.
«Сээң үнүңнү дыңнап кааш, эвегенимден эпчоксунгаш, чашты бердим» – деп, ол харыылаан.
«Чанагаш сен деп сеңээ кым ынча дидир? – деп, Бурган айтырган. – Мээң хоруп турганым ыяштан чимис ап чиппээн сен бе?»
«Меңээ эккеп бергениң херээжен ол ыяштан чимисти ап бээрге, чиптим» – деп, кижи харыылаан.
«Чүнү канчап алганың ол?» – деп, Дээрги-Бурган-Чаяакчы херээженден айтырган.
«Чылан мени мегелепти, ынчангаш чидим» – дээн.
Ынчан Дээрги-Бурган-Чаяакчы чыланга мынча дээн:

«Ол үүлгеткениң чүүл дээш
бүгү азырал болгаш черлик дириг амытаннардан артык каргаттырар сен!
Бүгү назыныңда иштиң-биле сояр сен,
довурак-доозун-биле чемненир сен.
Херээжен биле сени дайзыннар кылып каар мен,
сээң биле ооң ажы-төлү бот-боттарынга дайзыннар болурлар:
ооң оглу сээң бажыңны буза шавар,
а сен ооң таваңгайын шагар сен».

Дээрги-Бурган-Чаяакчы херээженге мынча дээн:

«Сээң иштиг-сааттыг үеңни аажок хилинчектиг кылып каар мен,
ажы-төлүңнү хилинчектенип чыткаш божуур сен.
Ашааңны аажок күзеп, аңаа хандыкшыыр сен,
ынчалза-даа ол сени чагырар».

Дээрги-Бурган-Чаяакчы эр кижиге мынча дээн:

«Херээженниң сөзүн тооп дыңнааш,
мээң чиирин хоруп турганым чимисти чиген сен.
Сээң хайың-биле чер каргаттырар!
Бүгү назыныңда чилчииң үзүлдүр ажылдап чорууруң черден
аъш-чем, кат-чимис тып чип чурттаар сен.
Чер сеңээ тенниг чадаң ыяштар өстүрүп бээр,
а сен ховунуң сигени-биле чемненир сен.
Ынчангаш дериң төп чорааш, чем тып чиир сен.
Сөөлүнде барып бодуңнуң-на келген чериңче эглип чоруй баар сен;
довурак-доозундан тывылган сен,
довурак-доозунче катап-ла шилчий бээр сен».

Кижи (Адам) кадайынга Ева деп атты берген, чүге дээрге ол бүгү-ле кижилерниң иези болган. Дээрги-Бурган-Чаяакчы Адамга болгаш ооң кадайынга хөмден кылган хептер кедирип каан. Оон Дээрги-Бурган-Чаяакчы мынча дээн: «Кижи эки-бакты угаап билир Бистиң бирээвис ышкаш апарды. Чиирге, өлүм чок апаар амыдыралдың ыяжының чимизин моон соңгаар кижи үзүп чивес болзун». Ынчангаш Дээрги-Бурган-Чаяакчы кижини бодунуң-на үнген черин болбаазырадып чурттазын дээш, Эдемниң сесерлиинден үндүр ойладыпкан. Адамны үндүр ойладыпкаш, Бурган Эдемниң сесерлииниң чөөн талазынга херувимнерни база бүгү талазынче долганып турар чалбыыш-оттуг хылышты тургузуп каан. Олар амыдыралдың ыяжынче баар орукту камгалап-карактап турган.

Dëgjoj Эге дөс 3