Nugunu - 2017 CABTAL (NT) Drama

Hɔ́ɔlɔ́ gibíné gá Pásɛ́ka ya Beyúdene gɛ́ báá go síene buisí búmmue, Yésusu i íyimene goŋaá gigúlí gɛ́hɛ́ gɛ́ báá go háa, gigúlí gá go úlukie naá cí háalá go go gunde naá Isée. A mba maamánáa boɛhɛ́ɛ báaba naá cí, a báá bó maamánáa gó bɛ́ɛ́ ɛ́dá húme naá mesúgidinye. Bá lɛ́ naá manyáanya má hɛɔbɔ́bɔ́ɔ, hɔ́ɔlɔ́ ohándá a báá ná go ága Yódasɛ Ɛsɛkalɛɔ́tɛ, ohaŋa ba Símono, gɛbɛ́ gá mbééníŋínyí naá odɛ́má gá go dúe Yésusu. Kanɛ́ Yésusu mɔ́ɔ a mba lɛ́ i íyimene goŋaá Isée a mba ágá buimée naá ɛmbɔ́gɔ yɛhɛ́, i íyimene goŋaá a mbɛ ɛ́dá go úle naá Asaŋa, gɔnɔ́ a gundenemú naá Asaŋa. Gɛ́hɛ́ go fadɛgɛna a báá búúlíe gɛla gá mmoɛná, a báá básómbɛ́ná gibéfúune miimpo naá nosɛ́ŋɛ́.
Gɔ́ɔ a bɔ́ŋɔmɔ́ miimpo a báá sugúné naá gɛmbalɛ́ŋa gá usóyóo, go ɛ́da go soga bɛgɔ́ndɔ́ bá behúúní bɛ́hɛ́, a bɛ́ fúune na gibéfúune gɛ́ɛgɛ a mbaá básómbɛ́ná naá nosɛ́ŋɛ́.
A á ncó bola naá Símono Píele, mɔ́ɔnyɔ a amɔ́ gɛ́hɛ́ a amɔ́: «Daadáa, maamɔ́ɔ o coga bɛgɔ́ndɔ́ o?»
Yésusu go mo gundie a amɔ́: «Bɔ́ɔbɔ ŋŋananamɔ́, o do bósó bá go bó ɔ́bɔ godɔ́ɔdɔ, kanɛ́ o ná bó ɔ́bɔ gɛcamɛna gɛ báá go dómba.» Píele a amɔ́ gɛ́hɛ́ aá: «O do ŋgá coga bɛgɔ́ndɔ́, akɛ́ go buisí!» Yésusu go mo gundie a amɔ́: «Aáŋa cɛ go sogá bɛgɔ́ndɔ́, o do ná gɔnɔ dáŋaba boóma naá boayá bámɛ.» Símono Píele a amɔ́ gɛ́hɛ́ aá: «Daadáa, o do cogá kanɛ́ goana bɛgɔ́ndɔ́, cogáamɔ́ tɔ́nɔ ɛmbɔ́gɔ na odóɛ.» Yésusu go mo oyana amɔ́: «Mɔ́ɔnyɔ a báá ná manɛ́ go dumbe a dɛ báá gɔnɔ́ ncaná ya ŋaáa a básoga, aáŋa caá goana bɛgɔ́ndɔ́, goakɛ́ a lɛ́ uŋkimée bɛ́hɛ́ sogógáalú. Bɛɛnyɔ́ɔ nó lɛ́ sogógáalú, kanɛ́ caá bɛɛnyɔ́ɔ biimée.» A mba lɛ́ i íyimene mɔ́ɔnyɔ a gaá ná mo dúé, boóma moánɛ bɔ́ a mbaá gálɛ́dá a amɔ́: «No do báá sogógáalú bɛɛnyɔ́ɔ biimée.»
Aŋa a mbaá maná go bó soga bɛgɔ́ndɔ́, Yésusu go bégundie gɛla gɛ́hɛ́, go gunde go lukumene naá tábɛ́la. Gɛ́hɛ́ go bó úhune a amɔ́: «No ɔ́ ɔ́bɔ́ naá cí boóma bɔ́ɔbɔ ŋŋamɔ́ go busío bɛ́nyɔ́ o? No pínenye no amɔ́ “Iloodio”, no gɔnɔ pínenye no amɔ́ “Daadáa”, giédie gɛ́ dɛ báá, goakɛ́ ndɛ́ nɔ́ɔ mammana. Kanɛ́ aáŋa yɔmɔ́ɔ mɔ́ɔnyɔ ndɔ́mɔ́ Daadáa gɔnɔ́ Iloodio ŋgaá nyó sogáa bɛgɔ́ndɔ́, bɛɛnyɔ́ɔ tɔ́nɔ no háanana go soganɛna bɛgɔ́ndɔ́, goakɛ́ bó lɔ́mɔ́ gieninye gɛ́ nnyó fáamɔ́: bɔ́ɔbɔ ŋŋamɔ́ go busío bɛ́nyɔ́, bó ŋanánáamɔ́ nɔnɔ tɔ́nɔ go basɔ́gɔ́ɔ.
«Mammana, mammana, ŋgaá nyó oyáná caá, uyogóní a dɛ dómbánáa ogɔ́nɔ́ɔ bɛhɛ́; akɛ́ mɔ́ɔnyɔ bá mo dómanamɔ́ go bosɔ́mɔ a dɛ dómbánáa mɔ́ɔnyɔ a mo dómanamɔ́. Godɔ́ɔdɔ, no í íyímé boóma moánɛ, no ná bɛ́ɛmba bese makɔ́nɔ́ no amɔ́ no ŋanana nɔ́ɔnɔ. Bó do báá go busío bɛ́nyɔ́ biimée gɔ́ɔ kálagalamɔ́; ŋgíyimene báaba mbií iyídé. Kanɛ́ bó háanana goŋaá nogálɔ ná Ŋgɔ́ŋɛ́ nɔ́ɔnɔ nó ɛ́nanɛna: “Mɔ́ɔnyɔ dɛ mbaá lɛ dɛ nyáanya nɛhɛ́, mɔ́ɔ a á ná mbékúbéné”. Godɔ́ɔdɔ ŋgaá nyó oyáná boóma moánɛ otóotoɛ yá ŋaá bó ɛ́nanɛna, goŋaá gɔ́ɔgɔ bó nɛ́ ɛ́nanɛnamɔ́, no oliminyo no amɔ́ yɔmɔ́ɔ Mmba ŋá nná lɛ́. Mammana, mammana, ŋgaá nyó oyáná caá: mɔ́ɔnyɔ a gɛ́ndɛgɛnamɔ́ mɔtɔ mɔ́ɔnyɔ tómamɔ́, a lɔ́mɔ́ yɔmɔ́ɔ moatɛ́ mɔ́ɔ a kɛ́ndɛgɛnamɔ́; gɔ́ɔgɔ a kɛ́ndɛgɛnamɔ́, bó dúfenye goŋaá a á gɛ́ndɛ́gɛ́ná mɔ́ɔnyɔ a lɔ́mɔ́ tómáalú.»

Aŋa Yésusu a mbaá maná go gálagala nɔ́ɔnɔ, nnyɔ́dɔ yɛhɛ́ go sagɛmɛda, gɛ́hɛ́ go oyana batɔ daŋɛ́daŋɛ a amɔ́: «Ŋgaá nyó oyáná mammana mammana caá, ummue naá bɛɛnyɔ́ɔ a gaá túé.» Behúúní go ɛ́da go núunenine, bá búúhenine bá amɔ́: «a gálagalamɔ́ nɔ́ɔnɔ go busío bá ánɛ́ɛ o?» Uhúúní ummue naá behúúní bɛ́hɛ́, mɔ́ɔnyɔ moánɛ Yésusu a mbaá lɛ a maamana, a mba lɛ́ naá boayá bɛ́hɛ́. Símono Píele go mo gélidie na igéyi a amɔ́: «mo úhúnéemú go busío bá ánɛ́ɛ a gálagalamɔ́.» Gɔ́ɔ uhúúní mɔ́ɔnyɔ ɛ ɛ́yɛmɛnɛnamɔ́ Yésusu naá gɛsasɔ, go mo úhune a amɔ́: «Daadáa, a lɔ́mɔ́ ánɛ́ɛ o?» Yésusu go mo gundie a amɔ́: «Kaá dúmé gigísi gá gɛlɛ́dɛ naá usóyóo; mɔ́ɔnyɔ kaá ná mo fáá, a lɔ́mɔ́ mɔ́ɔ.» Gɛ́hɛ́ go dómba go gɔ́lɔ gigísi gá gɛlɛ́dɛ gɛ́ɛgɛ a mbaá dúmé naá usóyóo, go fáa Yódasɛ Ɛsɛkalɛɔ́tɛ, ohaŋa ba Símono. Aŋa Yódasɛ a mbaá gɔ́lɔ́ gigísi gá gɛlɛ́dɛ gɛ́ɛgɔ, Sátana go dómba go mo íŋenine. Yésusu a amɔ́ gɛ́hɛ́ a amɔ́: «Bɔ́ɔbɔ o bɛananamɔ́ bá go ŋa, bó ŋaáamɔ́ fɛaŋɔ.» Akɛ́ ummue naá báaba bá mbaá lɔmɔ́ hɔ́ɔ, a dɛ mbɔ́ ɔ́bɔ goakɛ́ a mbaá gálɛ́dá nɔ́ɔnɔ. Aŋa Yódasɛ a mbaá lɔmɔ́ a nona gɛgada gá muinyí, bóncodío go ɛ́da go béeniŋenye bá amɔ́ Yésusu a báá ná mo oyáná a amɔ́ ɛ ɛ́da go ɔ́ndɔ moóma go gibíné, ɛ́na gɔnɔ́, go go fáa basógasoga boóma. Aŋa Yódasɛ a mbaá gɔ́lɔ́ gigísi gá gɛlɛ́dɛ, gɛ́hɛ́ go dómba go húme. Mbíno ɛ mbaá ŋá ɛ báá go oba.

Yódasɛ a hémene, Yésusu go oyɛda a amɔ́: «Godɔ́ɔdɔ, Asaŋa a á gúmídíe Moɔnɔ́ ba mɔtɔ, tɔ́nɔ Moɔnɔ́ a báá gúmídíe Asaŋa. [Aŋa Moɔnɔ́ a gúmidiemú Asaŋa,] Asaŋa mɔ́ɔ moatɛ́ a gaá gúmídíe Moɔnɔ́ tɔ́nɔ godɔ́ɔdɔ godɔ́ɔdɔ. Baaná bámɛ, ká lɛ́ nɛnyɔ́ goana go moɔnɔ́ ba gɛcamɛna. No ná púmbe, kanɛ́ aŋa mmbaá lɔmɔ́ oyánáalú Beyúdene caá, anáa ŋgɛ́danamɔ́, no do bósó ba go úle hɔ́ɔ, ŋgaá nyó oyáná bɛɛnyɔ́ɔ tɔ́nɔ godɔ́ɔdɔ nɔ́ɔ caŋa mmue. Nnyó fáa gɛpáa gá gicele: maamánɛ́náa nɔnɔ. Aŋa yɔmɔ́ mmbaá nyó maamánáa, no háanana tɔ́nɔ go maamanɛna. No amɔ́ no lɛ́ganalɛgana, mɔtɔ uŋkimée a ní íyime goŋaá no lɛ́ behúúní bámɛ.»


Símono Píele go mo úhune a amɔ́: «Daadáa, go ɛ́danamɔ́ áhanɛ́ɛ o?» Yésusu go mo gundie a amɔ́: «Anáa ŋgɛ́danamɔ́, o do bósó ba go mbiene hɔ́ɔ godɔ́ɔdɔ, kanɛ́ o ná síene o mbiene gɛcamɛna gɛ́ báá go dómba.» Píele go mo oyana a amɔ́: «Daadáa, ŋkádɛ gɛ́ ndegenemú goŋaá cɛ go biené hɔ́ɔ na hɔ́ɔ o? Ndɛ́ pɛnɛ́ɛ go go íŋene gɛɔyɔ gámɛ go busío báhɔ.» Yésusu go mo gundie a amɔ́: «Ɛɛ́ɛŋ, o gií íŋéné gɛɔyɔ gáhɔ go busío bámɛ! Ŋgaá go oyáná caá: otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda, o gaá ŋá o báá go mbásáŋona ɛŋɛndɔ ɛdadɔ́.»

Dëgjoj Sáŋa 13