Zulgo - 1988 Edition (Drama-NT)

Aləka mbulum a də̀v a pat ladà i mèkwède ka, gà məkəs ata ta wilera i ga ya, tə da aka dive. Tə ndzaka dər gà wirdè tar aaha ti de ya. Tə daha ka, ta ŋgat a beliŋ ana ta hə̀ndə̀k dər ahəraha ya, dzèŋŋe aà gùva ŋa. Tə daha, ta patsa a dive ŋa ka, tàa leha aɗəm à məməta Yesuw BATSAH kwa ŋa tsa. I fataya ka, a mà a tar dər gərəŋ gərəŋ, tə sər dukw ana ti dzele a ya tsa. I təv ana tar riŋ ti dzele a gà gər kataya ya ka, gà wele duwa sula ta pàt a tar aba. Tə daha a təv tar nda gà petek herrè ŋa tizlzlè. Ta ŋgat a gà wele ata ka, tə dza ba aà medzedzere hinne, luz luz tə dzaya dər gər a bəɗ. Gà mburma ata sula ya, ta gwaɗa a tar: «Aàmala na ki yehwim a wele ana nda gà mesife ya, a liwiŋ gà məməta asa ya? Ama ka, ar ɗa i faha tsa, aka mbəlara i məməta ya. Dzalum aka dukw ana a tsikewa a kurum akahər ana ŋgat i Galile mba ka, a gwa: <Say ta gis a iye, iye, *wur ana a dara i təv Mbulum a, ta vile a iye a ahər a gà ɓəzla bakal, ti ta ndwendwey a iye aà dizl magə̀làwà ŋa, dite i huɗ mehinne makər a ka, i mbilere a i biye ya asa.> «
I fataya ka, bazlam Yesuw ata a tsikewa a tar a, a mà a tarra a gər a kuɗa. Tə da i təv dive ata ya, tə daha, tə ɗama gà dukw ana ta ŋgatar a, ndəna tə tsaraka ya, a gà ɓəzla mazazama ŋgat aaha ti zeha kurwa gəra ilik a, dite a gà asiŋ gà mburma ana tə zazam Yesuw a mbaŋa. I liwiŋ gà məkəs ata ka, gà Mariya ana a dara i Magədala ya, nda Yuwana, dite nda gà Mariya məmər Zakup. Tar nda gà asiŋ gà məkəs ŋgiɗ tserdze, tə ɗama gà dukw ata a gà ɓəzla meslire Mbulum. Ama gà wele ata tə tsaraka bazlam tar ata kataya ka, ta gəs tsa. Ta gwa: «Ti ɗeme a ka, dukw gà falày masakəŋa.» Ama Piyer ka, a hitse tsara, a val aka dive. A daha, zərəɗ a fə̀raha aɗəm ka, a ŋgataha a gà petek ŋa pəra. I dəba ŋa ya, a mbəɗ gər a ma. A daha, a dzala dukw ana a ge ba ya ka, a ge ahər kamala dukw mene aà mburma ya.


A pat ata ka, gà ɓəzla mazazama Yesuw sula ika magər tar a, tə da a kwite Imawus izaɗ aà Yeruzalem a zaakwa. Na ki de a nda sik ka, a ge a ndzemde sula. I təv ana ta mah ba, ti de a ya ka, tə dza ba aà mifefile aka gər dukw ana a ge ba i fataya tserdze. I huɗ mandza akaba ahəm tar ata tar riŋ tì dze akaba a ya ka, ta fə̀r ikaba ya ka, tsìtsìrhim Yesuw a riŋ i təv tar. Tə da akaba nda gà ŋgat dze. Tàa ŋgatar ibam, ama tə sər ŋgat ana weke ka, tə sər tsa. Ti ne kamala gà ɓəzla guluf a. Yesuw a gwaɗa a tar agəra bazlam tar ata a riŋ ti tsik ahər a ya: «Ki tsikwim a aà la dze ya?» Tə tsaraka kataya ka, dzìrìk ta hitse, matsəɓatsəɓ ŋa a riŋ a wir aà ter a i gəzləŋ hinne. Mìsle ŋgiɗ ilik, zləm ŋgar Kilewpas, a gwaɗar: «Kər ana, mbəlakw kəla ya, na i Yeruzalem a? Kàa sər aà gà dukw ana a ge ɗa ba i huɗ mehinne aaha ya te tsiye?» Yesuw a gwaɗar a tar: «Gà dukùla na a ge ba ya?» Ta gwaɗar aaka: «Dukw ana a ge ba nda təv Yesuw gà Nazaret ana mala məma à guma Mbulum a. Aɗaba ŋgat ka, ndzəɗa ŋa hinne nda təv megemir, ku mege nda təv bazlam ika miɗ Mbulum a, dite ika miɗ mburma tserdze tekeɗe ya. Gà Əbay gà ɓəzla mandəva kuɗa a Mbulum kwa, nda gà asiŋ gà bàba ŋa ana ta kwere a kwa ya, ta gəs ŋgat. Ta ger seriye mekìɗe. I dəba ŋa ya, tə daha, tə ndwandway ŋgat aà dizl magə̀làwà ŋa. Ama mər ka, mì dzala, mì gwa aà ŋgat ka, wele ana a ta mbil a à gà Isərayel a. Araha mbakum na a ge mehinne makər a, daga aà gər ana gà dukw ata ta ge ba ya. Kinehe və̀ɗəna, gà asiŋ gà məkəs ana ika magər mər a ka, ta wise a mər gər hinne asa, aɗaba ndeɗiŋa i mèkwède hedwe, ta wile aka dive ŋa. Tə daha ka, tàa leha aɗəm aà məməta ŋgar tsa. Ta màra, tə ɗama a mər ka, ta gwa: <Gà gawla Mbulum tàa pàt a mər aba, ta gwaɗa a mər, Yesuw aka mbəl. A riŋ ka, nda mesife ŋgar.> Mì tsaraka kataya ka, gà asiŋ gà mburma mər tə da aka dive ŋa. Tə daha ka, ti le ahəraha kalkal kamala ana gà məkəs ata tə ɗama a mər a. Ama ka, tàa ŋgat a Yesuw tsa kaɗəŋ.»
I fataya ka, Yesuw a gwaɗa a tar kuɗa: «A kurum gà mburma ana metsehe kurum a riŋ tsiye, dite ka, dukw ana gà ɓəzla məma à guma Mbulum ti tsik akahər ata ya ka, a mba a kurum a zləm tsa asa ya. Wànà kà sərum tsiye, na *Kiristi, mala məmbàlà à mburma ana Mbulum a gwa, i slir a kurumaha a ya ka, say à sèwèr a are dzekwiŋ a, dite ka, a ndze a a təv Əbay ŋgar ana gà mburma ti zlibe a à ŋgat a?» I dəba ŋa ya, a tsik a tar kuɗa, a ɗif a tar à dukw ana ti tsik aà ŋgat i wakita Mbulum a. A dza ahər ba ka, i wakita Musa ya, haa tsikw a ndze dər a wakita gà ɓəzla məma à guma Mbulum ana tserdze ya.
Zàkwayiya ka, tàa à mendze a kwite ana ti de aɗəm a ya, Yesuw a kəzlaha aà tar a, a ge aà ba kamala ana a de a aka miɗ a. Ama gà wele ata ta gwaɗar: «Ka da i təv mər a tsa, ndzakwa tserdze. Aɗaba araha, pat aka à medìɗè, dite həvəɗ a ge a dze ana, meme?» Tə daha, ta pəts a ga ana gà mburma ata tə da aɗəm a kuɗa, aà mendze nda gà tar. I dəba ŋa ya, tə ndza aà ɗaf a təv ilik ŋa tserdze. I təv ana tar riŋ ti zim a ya ka, Yesuw a zla ɗaf ata akahər, a ge dərraha kəkaaha a Mbulum. Dite a sasa ikaba ya, a dzaya a tar. I fataya tsara ka, wetititittè tə sər ŋgat lele kuɗa. Ələk ta fə̀r ikaba ya ka, a riŋ i təv tar asa tsa, aka məsak à tar. Ta gwaɗaba: «I təv ana ndeɗiŋa ŋgat a riŋ a ɗif a ma à dukw ana i wakita Mbulum aà vatwa ya ana, a məma dər i gəzləŋ ana də̀ɗə̀ffa tsiye?» Gà wele ata ta hitse tsara, ta mbəɗ gər a Yeruzalem. Tə daha ka, tàa le aà gà ɓəzla mazazama Yesuw ana kurwa gəra ilik ŋa ya, nda gà asiŋ gà mburma tar, mayahaba gər ŋa i fata. Gà mburma ata ta ŋgat a gà wele aaha tsara ka, tə lah dər aka tar ivaɗ, ta gwaɗa a tar: «BATSAH kwa ŋa ka, aka mbəlara i biye ya kaɗəŋ, Simun aka ŋgatar.» Gà wele aaha ibam, tə ɗama a tar biy tar ana a ge ba i təv ana tar riŋ ti de a ika vatwa ya mbaŋa. Dite tə sər dər, Yesuw kaɗəŋ a ka, i təv ana a sasa a tar ikaba ɗaf a.


I təv ana gà wele ata tar riŋ ta fèfil a mba ya ka, Yesuw a daha a liwiŋ gà mburma ata tserdze ya asa. A daha, a gwaɗa a tar: «Mandza zayzay mege i təv kurum.» Ta ŋgatar kataya ka, ta ge magəɗa hinne nda medzedzere, aɗaba ta gwa i tar ka, duwa na taŋa ya. Ama Yesuw a gwaɗa a tar: «Aàmala ana ki gwim a magəɗa, ka tikwim iye aà ahər nda ndzer tsiye? Fə̀rum aà gà ahər gà nda sik gà kwaŋ. Iye ndzer dukw gà. Lə̀mum aà iye, dite kà samatum ba gà kwaŋ. Aɗaba na mege duwa ka, slu ba ŋgar a riŋ, dite ka, atasl ŋgar a riŋ tsa. Ama gà biy ga ka, tar riŋ.» A tsik a tar aba gà bazlam ata ya ka, a pàt a tar à gà ahər ŋgar nda sik ŋgar. Ta ŋgatar kataya ka, ti sle aà megìse nda gəzləŋ zukw tsa. Aɗaba ta məts aà maŋgayaba hinne, a ge aà tar kamala dukw mene aà mburma ya. Yesuw a wiz aà tar duwa. A gwaɗa a tar: «Dukw mezime ɗa aà kurum i faha ya?» Gà mburma ata tə daha, ta vəlarra mezehe kilif a məvàkà ŋa. A zla kilif ata, a papəɗ ika miɗ tar i fata.
I dəba ŋa ya, a gwaɗa a tar asa: «Samatum kwaŋ. Aka ana iye riŋ i təv kurum mba ya ana, i tsikewa a kurum tsiye, na dukw ana ta wetse agəra iye ya? I tsikewa a kurum ka, bazlam ana i wakita məpala ahəm Musa ya, nda biy ana i wakita gà ɓəzla məma à guma Mbulum a, dite ndəna i wakita gà dimis tserdze ya, say a ta ge a ba mba ya ka, kaɗəŋ.» Ama ka, aka handaka a tar gər aà masəra gà guma ana i wakita Mbulum a lele. Dite a gwaɗa a tar: «I fata mewetse ŋa iɗəm ka, say *Kiristi, mala məmbàlà à mburma ana Mbulum a gwa, i slir a kurumaha a ya ka, à sèwèr a are hinne, dite i huɗ mehinne makər a ka, a mbilere a i məməta ya.*fa* Dite i dəba ŋa ya asa, a slir a mburma aà metsikeye guma ŋgar a gà mburma, ku mege a ŋga tserdze. Mburma ta mbəɗ à madzala gà gər tar, dite ka, Mbulum à pìl a à bakal tar kuɗa. Tì dze a ba aà metsikeye ŋa ka, i Yeruzalem a, dite ti de a dər ku mege a ŋga tserdze. Ama kurum ka, gà ɓəzla sida gà dukw ata ta geye a ba ya fit dze. Ama ka, i slir a kurumara a dukw ana Tsir gà a tsik i sida ya, a gwa, i ta vile a kurum a ya. Kinehe ka, ndzum ɗa i faha, haa a təv ana kàa ŋgatum ndzəɗa ana a dere a i gər ŋa i təv Mbulum a.»


I dəba ŋa ya, Yesuw a ndzək tar i huɗ kwite ya, tə da ndàra a kwite Betaniya. Ti ndzeha a fata ka, a zla ahər a mbulum, dite a pise a tar ahəm. I təv ana a pise a tar aba ahəm a ka, a da i təv tar a, Mbulum a zla ŋgat a təv ŋgar a gər ŋa. Gà ɓəzla mazazama ŋgat ta ŋgatar, a da aà tar a ka, tə dza gurmits a bəɗ, tə zàmbaɗa aà ŋgat. I dəba ŋa ya, ta mbəɗ gər a Yeruzalem nda gà maŋgayaba hinne. Tə dawa a ga Mbulum batsah ŋa ana i fataya kəla pat, tə zləbawa à Mbulum.

Dëgjoj Luka 24