Bété, Guiberoua 2022 WBT (NT) Drama

Bété, Guiberoua 2022 WBT (NT) Non Drama

‑Mä Zelikoo glɔ 'mö, 'n Zezwii yiɛ ‑mä plɛ. ‑Mä ‑glɔ 'la 'mö, nɩkpɛ ‑bhlʋ ‑wʋ a ‑mä. Lapoomoni a 'wʋbhliwaa, wa 'kɔdɔɔ ɔ glɩnɩɛ. Wʋlʋ ɔ wʋlʋä. Ɔ nglɩɛ Zasee. Ɔ yɩbhä a ɔ 'kä ‑mɔ wa laa Zezwii 'ylɩmö. Zaa, Zezwii ‑wʋä ‑glɔɔ 'mö ‑dɩnɩ dɔ'wʋʋ, 'n ɔ yiɛ mö ɔ 'kɔ 'ylɩmö. ‑Maa ɔ'ɔɔ 'wʋ 'bhʋɔ zaa, nɩkpa kɔkɔmlɛɛ ‑wa ‑binɩɛ Zezwii a za, ɔ 'nɔɔ 'ylɩmö. 'N ɔ yiɛ guë, 'n ɔ yiɛ ‑bʋbʋʋ 'yli 'tʋnɩ, 'yioo Zezwii ‑wʋä bhli dɔ'wʋ a 'yuku, 'n ɔ yiɛ ‑mä mö. Su ‑bhlʋ, ‑wʋ 'nɩgböä ‑lɛ 'yio yɔwʋ wa laa sikomɔɔ, 'n ɔ yuä 'wlu ‑gbälɛ, ɔ 'kɔ ‑mä ‑kʋnɩ, ɔ 'kɔ 'ylɩmö. Zezwii ghlɛɛ ‑lɛ su 'la zɛmöö, 'n ɔ yiɛ 'wlu 'libhï, ɔ lɛ naa: «Zasee, ‑gägänɩ 'wʋ ‑n 'kä sɛ 'sibhë, ‑maa ‑mä ‑na'a 'ligbëa 'mö ‑mä n kää n 'kä zɩ'ɛ gʋʋ.» Ɔ gbää sa'aa, 'n Zasee yiɛ sɛ 'sibhë, ɔ 'wuë 'mäna, 'n ɔ ‑nyɔɔ yiɛ 'ligbë 'mö mö. Nɩkpa 'wuë, wa 'yɩɛ ‑sɩbhä 'ylɩmöö, wa'aa ‑wa 'lɩlɩlɩ, wa lɛ naa: «Nɩkpɛ ‑mɔ nɩ, 'nyinylolinʋnyɔ a 'bɛyɩ ‑mä ɔ möä gʋʋä.» Zasee ‑nyɛ Zezwii 'sɔ wa ghlɛɛ ‑mä 'ligbë 'möö, ɔ 'nɩgbö ‑lɛ Zezwii a 'yila 'klʋ, 'n ɔ yoo 'dɩ 'nyɛ, ɔ lɛ naa: «‑Alowli, yɩɛ, 'na wʋlʋnɔɔ 'wuë, n yu jijo'wʋ 'mö ‑dɩnɩ, n yi 'pʋäwaa 'kïbhë 'nyɛ. Nɩkpɛ ‑mɔ n ‑kä a ylʋ nʋ 'n n ‑kä a ɔ moni 'wʋ 'libhïï, n yonyɩ yowʋ 'nyɛ 'wë, n ye 'wʋ taa ‑gömö 'zʋnɩ.» Zezwii lɛ naa: «Zɩ'ɛ, 'pʋpʋɛ yɛ mä'ä 'ligbë nɩ 'mö plɛ, ɛ'ɛ ‑bhö nyɩasɛ, ‑maa Ablaamö a 'yu a yu ‑n glɩnɩmöä. Nɩkpɛ a 'Yu, ‑wa tʋʋä, dɛ wa ‑kä ‑wʋ ‑kë, ɔ 'kʋä sɛ tɛlɩ ɔ 'kʋä puë, nza ɔ yiɛ mä'ä dʋdʋ 'wʋ.»


Nɩkpaa ‑wʋ Zezwii 'yukwli ‑pʋnɩ dɔ'wʋ, 'n wa yiɛ ‑lɛ Zeluzalɛɛmö a ‑glɔɔ yɔwʋ ghlɛ. Zaa, wa ‑tɔnɩ nɩɩ, ɔ ‑kä ‑mä plɛ cuu, 'n Lagɔ 'a 'kämanɔɔ 'kä nɩkpabhë a 'yila 'klʋ gbëdanguu bhli. Nza Zezwii 'pää nine nɩ. Ɔ lɛ naa: «'Nglɩmönyɔ 'kɔdɔ ‑bhlʋ mɔɔ ‑wʋä ‑lɛ. 'N wa yoo 'ylɩ ‑bhlʋ 'mö bhlɩ ‑mɛmɛɛ ‑gömö wäzɩ, wa 'kɔ 'bhlɩlowli 'kɔdɔ 'wʋ 'zʋa, ɔ 'kä ‑mä 'ɔ bhlɩɩ 'mö 'kämanɩɛ yi. Ɔ lɛ 'kää möä yii, 'n ɔ yiɛ 'ɔ libhonʋwaa a gla'mö a nɩkpa kʋgbä wäzɩ, 'n ɔ yuëë bhʋlʋbhlʋ moni yowʋ 'nyɛ. Wa 'wuë 'mö wa mlɩnɩɛ. Ɔ lɛ naa: A 'libhï moni nɩ 'wʋ, n ‑kä mö 'wëë, a 'kɛ libho 'wʋ nʋ ‑këë, n 'kä zɩla'a yi. Ɔ 'nyʋää sa'a 'dɩ 'wëë, 'n ɔ yiɛ mö. ‑Maa ɔ 'bhele a ‑nʋa, wa 'nɔɔ ‑wa zaa, ɔ möä 'wëë, 'n wa yoo 'dɩ 'bɩwʋ 'pänɩ. Wa lɛ naa: Nɩkpɛ 'la a wäzɩɛ, ‑aaa 'yɩbhä ɔ nɩ yiinyɩ ‑gömö 'kämanɩɛ. ‑Sɩbhä yɩ ‑wʋ 'mö, ‑maa ɔ ghlɛɛ ‑mä, 'n wa yoo 'bhlɩlowli 'kɔdɔ 'wʋ 'zʋa, 'n ɔ yiɛ ‑mä 'ɔ bhlɩɩ 'mö 'bɩwʋ yi. Ɔ ghlɛɛ glɔɔ, 'ɔ libhonʋwaa ɔ 'nyɛ a‑a moni yowʋʋ, 'n ɔ yuëë wäzɩ. Ɔ lɛ naa: Monii n 'nyanyɩ a‑a yowʋʋ, a nwɛɛ libho 'wʋ a 'saa ɛ ghlɩnɩɛ ‑gömöö, a yi a ‑kaa wʋ 'dɩ 'nyɛ. 'N tɛkänɔɔ yiɛ yi. Ɔ lɛ naa: ‑Atʋ, monii ‑n nyɩaa a‑a yowʋʋ, n nwɛɛ libho 'wʋʋ, ɛ ghlɩnɩ 'wʋ kʋgbä ‑gömö. Ɔ lɛ naa: 'Ɔ! ‑Ayo ‑këë! Libhonʋnyɔ a ‑nɔ a ‑nɔ ‑n glɩnɩɛ. ‑Li 'tikïyiea n nyɩamöä yowʋʋ, sasɛ ‑n 'zʋniɛ 'yli. Yɩ 'nglɩ 'mö, tɛɛnɩ zɩ'ɛ dɛ'ɛ, gwlɩ 'kädɩ kʋgbä mö ‑n 'kää ‑gömö 'kämanɩ. 'N 'sɔnɔɔ yiɛ yi, ɔ lɛ naa: ‑Na'a monii, n nwɛɛ libho 'wʋʋ, ɛ ghlɩnɩ 'wʋ ngbï ‑gömö. Ɔ lɛ naa: Yɩ nɛnɩ, ‑nmö ‑naa, gwlɩ 'kädɩ ngbï mö ‑n 'kää ‑gömö 'kämanɩ. 'N ‑mɔmɔɔ yi'ɛɛ yi. Ɔ lɛ naa: ‑Atʋ, n ‑yi sɛ nɩɩ, ‑na wɛlɩ 'mö yɩ 'tɛɛ. Dɛ ‑nn a‑a kwïlanɩɩ, ‑lɛ ‑n sɛ. Dɛ ‑nn a‑a glʋʋ, ‑lɛ ‑n dɩ. Zaa, ‑gu n ‑gumöä tenyii. Yɩ za, ‑na'a monii ‑n nyɩaa a‑a yowʋʋ, mä n gwɛ a‑a ‑yʋkʋ 'mö sɛɛ, ‑mä ɛ ‑wʋä dɛ'ɛ. Zaa, 'libhe 'wʋ. Ɔ gbää sa'aa, ɔ 'bhidɩba lɛ naa: Libhonʋnyɔzokwë ‑n glɩnɩɛ. ‑Nanyɩ a wɛlɩɩ mɩɩ ‑kamöä gbʋ köbha. ‑Na'bhë ‑n ‑yi sɛ nɩɩ, na wɛlɩ 'mö yɩ 'tɛɛ. Dɛ n'n a‑a kwïlanɩɩ, ‑lɛ n sɛɛ. Dɛ n'n a‑a glʋʋ, ‑lɛ n dɩɛ. Zaa, ‑n kä a ‑n 'kä 'na monii nɩkpa ‑mumuë yowʋ 'nyɛ, wa 'kɛ libho 'wʋ nʋ. ‑Lɛ a dɔ'wʋ, n yi a‑a dɛ'ɛɛ, ylɛnɩɛ n 'kʋä a‑a mö, wa 'kɛ a ‑gömö 'zʋ wa ‑ka'mɛ a yowʋ 'nyɛ. Sa'a ɔ gbää, 'n ɔ yiɛ ‑wa ‑wʋ a‑a ‑lɛ 'dɩ 'nyɛ nɩɩ: Nɩkpɛ nɩ, monii ɔ ‑suä da'aa, a nɩ ‑sɔnyɩ kä'mö, nzɩɩ tɛkänɔɔ, ‑ɔnyɩ ‑nɛɛ yinɩɛ 'wʋ kʋgbä ‑gömöö, a 'kɔnyɩ yowʋ 'nyɛ. Wa lɛ naa: 'Ɔ! ‑Atʋ, ‑mɔ'la 'nyɩɛ ɔ ‑nɛɛ ‑zu tenyii. 'Bhidɩbaa lɛ naa: 'Dɩ n nyanyɩɛ dɛ'ɛ nɩɩ: ‑Ɔ kää ‑bɛ 'mö wa nyɛɛ tenyii. ‑Ɔ kää 'tikïyiee, 'ɔ 'saa ɔ kää, 'mö wa sɔɔ kä'mö. ‑Maa 'na ‑gblɩwaa wabhlɩ ‑wa gbä a‑a wa nɩ ‑tɩɩ wa 'bhlɩlowli 'wʋ 'zʋaa, a nɩ muë kie, a ‑nyʋä 'kä dɛ'ɛ na 'yila 'klʋ yi, a 'kʋä 'lɩbhä wa 'kä 'ku.»


Zezwii 'nyʋää sa'a 'dɩ 'wëë, 'n ɔ yiɛ 'wʋ ‑sɔ, mä ɔ ‑wʋ a‑a Zeluzalɛɛmö mö dɔ'wʋʋ, 'n ɔ yiɛ ‑mä mö. ‑Maa ‑n ‑kä ‑mä Zeluzalɛɛmö ghlɛɛ yii, gwlɩ 'sɔ, mö ‑n bhlɩɛ yɛ'mö. ‑Mu a nglɩɛ Bɛtɩfazee, ‑mu a nglɩɛ Betanii. ‑Gäga ‑bhlʋ wa laa Olivieswii a ‑gägaa zɛmö, ‑lɛ ‑gwlɩ 'la 'sɔɔ ‑wʋä. Zezwii ‑nyɛ 'ɔ ‑gänɩwaa 'sɔ, wa lɛ 'kɩɛ 'mö ghlɛɛ yii, 'n ɔ yiɛ wa gla'mö a nɩkpa 'sɔ tie, ɔ lɛ naa: «‑Glɔɔ ‑wʋ ‑wʋä mä'a a 'yukuu, a nɩ mö ‑mä. A ‑kä glɔ plɛ cuu, a yi ‑sʋkʋfanɩ a ‑dɩgba ‑bhlʋ 'ylɩmö, a ‑glɛ. ‑Bɛ 'naa ‑bhlɛ tɛkäsɛ ‑gömö ‑gbälɛ. A ‑kä ‑lɛ ghlɛɛ, a nɩ ‑daa 'kpɔ, a ‑ka'ma ‑lɛ. 'N nɩkpɛ ‑kaanyɩ a za nimï yɩbhä nɩɩ: 'Saa a 'ka bhä nʋ 'n a da bhä 'kpɔ 'nɩ? A nʋ nɩɩ: ‑Alowli mɔɔ yɩbhaa.» Sa'a ɔ 'nyʋää 'dɩ 'n wa yiɛ mö. Wa ghlɛɛ ‑mä, wɛlɩɩ 'wuë Zezwii 'nyʋä a‑a, ‑sɩbhä yɩ 'wlʋnɩɛ 'yli. Wa ‑wʋä ‑sʋkʋfanɩɩ 'kpɔ ‑dɩ dɔ'wʋʋ, 'n ɛ ‑lowluwaa yuëë nimï 'yɩbhä nɩɩ: «'Saa a 'kɛ bhä nʋ 'n a de bhä 'kpɔ 'nɩ?» Wa lɛ naa: «‑Alowli mɔɔ yɩbhɛɛ.» 'N wa yiɛ ‑sʋkʋfanɩɩ 'wʋ 'libhï 'n wa ‑nyɛɛ yiɛ mö. Wa ghlɛɛ Zezwii yɔwʋʋ, ‑lɛ ‑sʋkʋfanɩɩ ‑gömö 'n wa yiɛ ‑lɛ 'wa ‑banɩɩ 'zʋ 'n wa yonyɩɛ ‑gömö 'gbäla. Zezwii glɩ ‑sʋkʋfanɩɩ ‑gömö, wa ‑wʋ mö dɔ'wʋ, 'n nɩkpa yiɛ ‑lɛ 'yio 'wʋ 'wa ‑banɩɩ lʋlʋ. Wa lɛ 'käa'aa ‑mä Zeluzalɛɛmö ghlɛɛ, wa kwliɛ Olivieswii a ‑gägaa, ‑wa ‑gänɩɛ Zezwii, wa 'wuë 'n 'mäna yuëë 'wlu 'mänanɩ, ‑li 'kädɩ wa 'yɩɛ 'ylɩmö a za, wa 'wuë 'n wa yiɛ tenyii Lagɔ a 'nglɩ 'ghlimanɩ. 'N wa nʋä:
«'Bhlɩlowlii ‑ɔ yiɛ ‑Alowli Lagɔ a 'nglɩ 'möö,
Lagɔ nɩ 'pɔ 'nyu aa!
Lagɔtapɛ 'a 'pʋpʋɛ ‑kanyɩ 'wʋ ghlɛ,
ɔ 'nglɩ nɩ 'ghlimanɩ aa!»
Wa ‑wʋä sa'a 'mö 'kpa dɔ'wʋʋ, Falizɩɛwaa ‑mumuë ‑wa ‑wʋmö a‑a ‑mä ‑bʋbʋʋ gla'möö, 'n wa yiɛ Zezwii yɔwʋ 'dio, wa lɛ naa: «‑Atʋ, 'nyɛ yɩ ‑na'a ‑gänɩwaa 'dɩ, wa nɩ tɩ sa'a nʋ.» Zezwii lɛ naa: «'Dɩ n nyanyɩɛ dɛ'ɛ, wa ‑kä vlɩɩ 'zʋʋ, kpɩɩ mɩɩ 'kää 'mö 'kpa.»

Zezwii ghlɛɛ ‑lɛ Zeluzalɛɛmö glonuë 'wʋ, ɔ 'yɩɛ ‑glɔɔ 'ylɩmöö, 'n 'mɩɔ yoo 'ylimö ghlɛ, 'n ɔ yiɛ ‑mä a ‑nʋa 'wʋ 'winɩ. Ɔ lɛ naa: «‑Aa‑a! 'Saa 'kanyɩ a‑a puë, a ‑kʋʋ a zɩ'ɛ yɩbhlɩnɩɩ, yɩ yi a nɛnɩ. ‑Maa ngäzɩ 'wʋ yɩ ‑bhöä tenyii, sɛ yɩ zizaananyɩɛ 'yli a za. ‑Maa 'tɛnyɩ ‑mɛmɛɛ 'mö, 'a ‑gblɩwaa ‑nyɛ tʋgwɩnɩli 'kädɩ yi yi, wa 'kä 'a ‑glɔɔ 'gble 'mö pälɩ. ‑Bɛ 'naa 'kä ‑ga. A 'wuë, a ‑nyɛ 'a ‑glɔɔ 'sɔ, 'yli wa 'kanyɩɛ bhɩa. ‑Budu 'naa 'kanyɩ glɔ 'mö tʋʋ. Ɛ'ɛ ‑bhö nyɩasɛ, ‑maa sɛɛ Lagɔ 'pää a ngäzɩdlɩ 'n ɔ yeanyɩɛ 'wʋ yi ɔ 'kanyɩ puëë, a'aa ‑sɩbhä yɩbhlɩnɩ.»


Zezwii plɛɛ glɔ 'wëë, 'n ɔ yiɛ ‑mä Lagɔbudu 'Kɔdʋʋ a 'ligbëa 'mö plɛ. Ɔ lɛ 'bhöö 'lɛ, nɩkpa 'pänɩ ‑mä 'pɛlʋ. Wa 'wuë 'n ɔ yuëë ‑mä kpëti. Ɔ lɛ naa: «‑Mä Lagɔbɔgʋʋ 'mö, sɛ'ɛ Lagɔ gbää nɩɩ: 'Na ‑buduu, wa ‑kaa ‑mä bhibhenɩ a ‑luä. ‑Maa abhʋa abhlɩ, 'mö a 'zʋaa 'wiwa a ‑budu 'wʋ.»
‑Lɛ a 'tɛnyɩ 'la 'wuë 'mö, sɛɛ zila zɩɛ 'yize, ‑mä Lagɔbudu 'Kɔdʋʋ 'mö, ‑mä Zezwii ‑wʋä 'n ɔ nyɛɛ nɩkpa Lagɔwɛlɩɩ. ‑Maa Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ, Zwiiföwaa 'a 'kädɩɩ kökä, wa yɩbhä a wa 'kɔ 'lɩbhä ɔ 'kä 'ku. ‑Maa nɩkpa 'wuë, ɔ wɛlɩ wa ‑waa tenyii 'n wa soo 'kwädlɩ yɔwʋ wa 'kɔ 'yukwli ‑pʋnɩ, zaa wa'aa sɛ wa 'kä 'mözʋmözʋmö wa 'kɔ 'lɩbhää ‑yi.

Dëgjoj Lwiikö 19