If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

“ऐ गोठमन मय तुमचो ले ऐईकाजे बल्ले कि तुमी ठोकर नी खाआ। हुनमन तुमके आराधना घरमन ले निकराऊन देदे, मान्तर हुन समया ऐऊ आय, कि जोन कोनी तुमके मारून देये दे हुन समजे दे कि मय माहापुरू चो सेवा करें से। असन हुनमन ऐईकाजे कर दे कि हुनमन ना बुआ के जानला से आउर ना मोके जानोत। मान्तर ऐ गोठमन मय ऐईकाजे तुमचो ले बल्ले कि जिदलदाय ऐ मन चो समया ऐओ तेबे तुमके सुरता ऐऊन जाओ कि मय तुमचो ले पयले ची बोलुन देऊ रये।”

“मय मुर ले तुमचो ले ऐ गोठमन ऐईकाजे नी बल्ले कसनबल्लोने मय तुमचो संगे रये। मान्तर अदायं मय आपलो पठालोबिता चो लगे जायें से; आउर तुमचो ले कोनी मोचो ले नी पचारोत, ‘तुय काहां जाय सीस?’ मान्तर मय जोन ऐ गोठमन तुमचो ले बल्ले से, ऐईकाजे तुमचो मन दुक ले भरून गेली से। तेबले बले मय तुमचो ले सते बलें सें कि मोचो जातोर तुमचो काजे नुकु आय, कसनबल्लोने अगर मय नी जाये तेबे हुन सायता करू तुमचो लगे नी ऐये दे; मान्तर अगर मय जायें दें, तेबे हुनके तुमचो लगे पटायें दें। हुन ऐऊन भाती संवसार के पाप आउर धारमिकता आउर नियाय चो बारे ने बेजबाप करे दे। पाप चो बारे ने ऐईकाजे कि हुनमन मोचो उपरे बिश्वास नी करोत; आउर धारमिकता चो बारे ने ऐईकाजे कि मय बुआ चो लगे जायें से, आउर तुमी मोके फेर नी दका से; नियाय चो बारे ने ऐईकाजे कि संवसार चो सरदार दोषी ठेबाया गेलो से।” “मोके तुमचो ले आउर बले खुबे असन गोठमन बोलतोर आसे, मान्तर ऐबे तुमी हुनके सऊक लाय नी सकास। मान्तर जिदलदाय हुन बल्ले सते चो आत्मा ऐये दे, तेबे तुमके सपाय सते चो बाट सांगे दे, कसनबल्लोने हुन आपलो बाटले नी बले दे मान्तर जोन काई सुने दे हुनी बले दे, आउर ऐतो बिती गोठमन के तुमके सांगे दे। हुन मोचो महिमा करे दे, कसनबल्लोने हुन मोचो गोठमन ले धरून भाती तुमके सांगे दे। जोन काई बुआ चो आय, हुन सपाय मोचो आय, ऐईकाजे मय बल्ले कि हुन मोचो गोठमन थानले धरून भाती तुमके सांगे दे।”

“डण्डिक ले तुमी मोके नी दका से, आउर फेर डण्डिक ले मोके दका से।” तेबे हुनचो खिन्डिक चेलामन आपस ने बल्ला, “ऐ काय आय जोन हुन आमचो ले बले से, ‘डण्डिक ले तुमी मोके नी दका से, आउर फेर डण्डिक ले मोके दका से?’ आउर ऐ ‘ऐईकाजे कि मय बुआ चो लगे जायें से’?” तेबे हुनमन बल्ला, “ऐ ‘डण्डिक’ जोन हुन बोलु आय, काय गोठ आय? आमी नी जानु कि हुन काय बले से।” ईशु ऐ जानुन भाती कि हुनमन मोचो ले पचारूक चाहाय सोत, हुन बल्लो, “काय तुमी आपस ने मोचो ऐ गोठ चो बारे ने पुच-पचार करेसास, ‘डण्डिक ले तुमी मोके नी दका से, आउर फेर डण्डिक ले मोके दका से’? मय तुमचो ले सत-सत बलें सें कि तुमी गागा से आउर बिलका से, मान्तर संवसार हरिक करे दे; तुमके शोक होये दे, मान्तर तुमचो शोक हरिक ने बदलुन जाय दे। नगत होतो समया बायले लेकी के दुक होऊ आय, कसनबल्लोने हुनचो दुका चो समया ऐऊन अमरली से, मान्तर जिदलदाय हुन पिला के जनम देऊन चुकु आय, तेबे ऐ हरिक ले कि संवसार ने गोटक माने उपजास होलो, हुन संकट के फेर सुरता नी करे। हुनी परकार तुमके बले ऐबे तो दुक आसे, मान्तर मय तुमचो ले फेर मिलें दें आउर तुमचो मन हरिक ले भरून जाय दे; आउर तुमचो हरिक कोनी तुमचो ले झिकुन नी नेयेदे। हुन दिने तुमी मोचो ले काई नी पचारा से। मय तुमचो ले सत-सत बलें सें, अगर बुआ ले काई मांगा से, तेबे हुन मोचो नाव ले तुमके देये दे। ऐबे तक तुमी मोचो नाव ले काई नी मांगलास; मांगा, तेबे पाहा से बल्ले तुमचो हरिक पुरा होऊन जाओ।

“मय ऐ गोठमन तुमचो ले कहनीमन ने सांगले से, मान्तर हुन समया ऐये से कि मय तुमचो ले फेर कहनीमन ने नी बलेंदें, मान्तर खुलुन भाती तुमके बुआ चो बारे ने सांगेंदें। हुन दिने तुमी मोचो नाव ले मांगा से; आउर मय तुमचो ले ऐ नी बले कि मय तुमचो काजे बुआ ले गुहार करेंदे; कसनबल्लोने बुआ तो खुदे ची तुमचो ले मया संगाऊ आय, ऐईकाजे कि तुमनमन मोचो ले मया संगालासास आउर ऐ बले बिश्वास करलासास कि मय बुआ चो बाटले ईले से। मय बुआ चो बाटले जगत ने ईले से; मय फेर जगत के छांडुन भाती बुआ चो लगे जाऊ आंय।” हुनचो चेलामन बल्ला, “दक, अदायं तो तुय खुलुन भाती बलसीस, आउर कोनी कहनी नी बल्लीस। अदायं आमी जानलु से कि तुय सपाय काई जानीस, आउर ऐचो जरूरी निआय कि कोनी तुचो ले काई पचारोत; ऐचो ले आमी बिश्वास करूं से कि तुय माहापुरू चो बाटले ईली सीस।” ऐ सुनुन ईशु हुनमन ले बल्लो, “काय तुमी अदायं बिश्वास करेसास? दका, हुन समया ऐये से मान्तर ऐऊन पोंचली से कि तुमी सपाय जत-खत होऊन भाती आपलो-आपलो बाट धरा से, आउर मोके ऐकला छांडुन दियासे; तेबले बले मय ऐकला नाई कसनबल्लोने बुआ मोचो संगे आसे। मय ऐ गोठमन तुमचो ले ऐईकाजे बल्ले से कि तुमके मोचो थाने शान्ति मिरो। संवसार ने तुमके कलेश होऊ आय, मान्तर हिम्मत जटाव, मय संवसार के जितले से।”

Dëgjoj यूहन्ना 16