New Testament in Triqui, Copala (MX:trc:Triqui, Copala)

Triqui, Copala

Quisíj caꞌmii Jesús nu̱ꞌ nana̱ dan, ga̱a ne̱ cachéé Jesús estadó Galilea a. ꞌO̱ se ne caꞌve̱j rá soꞌ cache̱e̱ soꞌ estadó Judea, cheꞌé se nanoꞌ nij síí uun chij rihaan nij yuvii̱ israelitá man soꞌ, ne̱ ticavi̱ꞌ nij soꞌ man Jesús, rá nij soꞌ a.
Dan me se da̱j doj quisi̱j chaꞌanj navij rá nij yuvii̱ israelitá chaꞌanj uneꞌ nij soꞌ veꞌ yacataj a. Cheꞌé dan cataj nij tinúú Jesús rihaan soꞌ a:
―Cavi̱i̱ so̱ꞌ caꞌa̱nj so̱ꞌ estadó Judea, ga̱a ne̱ queneꞌe̱n nij síí tucuꞌyón snana̱ so̱ꞌ nij suun sa̱ꞌ noco̱o ꞌyáá so̱ꞌ á. Sese me rá ꞌo̱ soꞌ xca̱j ndoꞌo yuvii̱ cuentá cheꞌé maꞌa̱n soꞌ, ne̱ ne ꞌyaj yuve̱ soꞌ se‑su̱u̱n soꞌ maꞌ. Sese ya̱ ꞌyáá so̱ꞌ suun sa̱ꞌ noco̱o, ne̱ caꞌa̱nj so̱ꞌ rej queneꞌe̱n nij síí ma̱n rihaan chumii̱ nihánj mán so̱ꞌ á ―taj nij tinúú maꞌa̱n Jesús rihaan soꞌ a.
ꞌO̱ se nda̱a maꞌa̱n nij tinúú Jesús ne cuchuma̱n rá niꞌya̱j man Jesús a̱ maꞌ. Cheꞌé dan cataj Jesús rihaan nij soꞌ a:
―Ataa quisi̱j güii no̱ xcúún ꞌu̱nj qui̱ꞌyáá ꞌu̱nj se‑su̱u̱n ꞌu̱nj á. Se‑su̱u̱n maꞌa̱n soj roꞌ, a̱ me maꞌa̱n güii caꞌve̱e quiꞌya̱j soj se‑su̱u̱n soj ado̱nj. Taj cheꞌé quita̱j riꞌyunj nij síí ma̱n rihaan chumii̱ nihánj man soj maꞌ. ꞌU̱nj roꞌ, vaa cheꞌé quita̱j riꞌyunj nij soꞌ, ese ꞌu̱nj me síí taj xnaꞌanj rihaan nij soꞌ se vaa chiꞌi̱i̱ ndoꞌo vaa ꞌyaj nij soꞌ ado̱nj. Cavi̱i̱ soj caꞌa̱nj soj chaꞌanj á. ꞌU̱nj roꞌ, se̱ caꞌanj ꞌu̱nj chaꞌanj cuano̱ cheꞌé se ataa quisi̱j orá qui̱ꞌyáá ꞌu̱nj se‑su̱u̱n ꞌu̱nj na̱nj ado̱nj ―taj Jesús rihaan nij soꞌ a.
Ga̱a ne̱ quináj soꞌ estadó Galilea a.

Dan me se ga̱a quisíj cavii nij tinúú Jesús caꞌanj nij soꞌ chaꞌanj, ga̱a ne̱ cavii maꞌa̱n Jesús caꞌanj soꞌ chaꞌanj uún a. Tza̱j ne̱ caꞌanj yuve̱ soꞌ a. Cheꞌé dan me nanoꞌ nij síí uun chij rihaan nij yuvii̱ israelitá man Jesús rej canuû chaꞌanj yoꞌ a. Ne̱ xnáꞌanj nij soꞌ man tuviꞌ nij soꞌ, cataj nij soꞌ a:
―Me rej va̱j síí yoꞌ ga̱ ―taj nij soꞌ, xnáꞌanj nij soꞌ man tuviꞌ nij soꞌ a.
Ne̱ ri̱i̱ ndoꞌo yuvii̱ man chaꞌanj ne̱ nanó yuve̱ ndoꞌo nij yuvii̱ cuentó cheꞌé Jesús a. Dan me se taꞌa̱j nij yuvii̱ cataj a:
―Síí sa̱ꞌ me soꞌ á ―taj taꞌa̱j nij yuvii̱ a.
Tza̱j ne̱ ꞌó taꞌa̱j nij yuvii̱ cataj a:
―Taj maꞌ. Síí tihaꞌ yuꞌunj man nij yuvii̱ me soꞌ na̱nj ado̱nj ―taj ꞌó taꞌa̱j nij yuvii̱ yoꞌ a.
Tza̱j ne̱ a̱ ꞌó nij yuvii̱ ne caꞌmi̱i̱ ranga̱ꞌ cheꞌé Jesús maꞌ. ꞌO̱ se cuchuꞌviꞌ nij yuvii̱ niꞌya̱j nij yuvii̱ man nij síí uun chij rihaan nij soꞌ a.
Dan me se a̱j quisíj caꞌa̱nj güii anuû chaꞌanj, ne̱ cavii Jesús rej ya̱nj nuvií noco̱o, ne̱ tucuꞌyón soꞌ man nij yuvii̱ a. Cheꞌé dan caráyaꞌa̱nj nij síí uun chij rihaan nij yuvii̱ israelitá, ne̱ cataj nij soꞌ a:
―Né si̱j tucuꞌyón me síí nihánj maꞌ. Me rej nariꞌ soꞌ snana̱ Yaꞌanj ga̱ ―taj nij síí uun chij yoꞌ niꞌya̱j nij soꞌ man Jesús a.
Cheꞌé dan cataj Jesús rihaan nij soꞌ a:
―Xa̱ꞌ tucuáán tucuꞌyón ꞌu̱nj, tza̱j ne̱ né tu̱cuáán cavii raá ꞌu̱nj me nihánj maꞌ. ꞌO̱ se stucua̱nj Yaꞌanj síí caꞌnéé manj me tucuáán nihánj chugua̱nj. Dan me se sese me rá ꞌo̱ soꞌ cuno̱ soꞌ rihaan Yaꞌanj, ne̱ xca̱j soꞌ cuentá ase tucuáán avii raá ꞌu̱nj me tucuáán tucuꞌyón ꞌu̱nj naꞌ, ase stucua̱nj Yaꞌanj me tucuáán yoꞌ xa̱ꞌ. Xa̱ꞌ síí aꞌmii snana̱ maꞌa̱n, tza̱j ne̱ ina̱nj me rá soꞌ caꞌmi̱i̱ sa̱ꞌ yuvii̱ cheꞌé maꞌa̱n soꞌ ado̱nj. Tza̱j ne̱ sese me rá ꞌo̱ soꞌ caꞌmi̱i̱ sa̱ꞌ yuvii̱ cheꞌé síí caꞌnéé man soꞌ, ne̱ ina̱nj nana̱ ya̱ cheꞌé síí caꞌnéé man soꞌ aꞌmii soꞌ, ne̱ ne nanoꞌ soꞌ chrej chiꞌi̱i̱ maꞌ. Nocoꞌ soj stucua̱nj Yaꞌanj rqué síí cuꞌna̱j Moisés rihaan soj, tza̱j ne̱ a̱ ꞌó soj ne uun nucua̱j canoco̱ꞌ nu̱ꞌ tucuáán yoꞌ a̱ maꞌ. Cheꞌé dan me cheꞌé nanoꞌ soj da̱j quiꞌya̱j soj, ne̱ cavi̱ꞌ ꞌu̱nj ga̱ ―taj Jesús rihaan nij síí uun chij rihaan nij yuvii̱ israelitá a.
Ga̱a ne̱ cataj nij yuvii̱ rihaan Jesús a:
―Nu̱u̱ nana̱ chre̱e nimán so̱ꞌ á. Me síí me rá ticavi̱ꞌ mán so̱ꞌ, rá so̱ꞌ ga̱ ―taj nij yuvii̱ rihaan Jesús a.
Ga̱a ne̱ cataj Jesús rihaan nij soꞌ a:
―Ga̱a rque̱ me se o̱rúnꞌ suun sa̱ꞌ noco̱o quiꞌyáj, ne̱ caráyaꞌa̱nj ta̱ranꞌ nij soj se vaa quiꞌyáá ꞌu̱nj suun sa̱ꞌ noco̱o güii naránj rá níꞌ a. Dan me se ya̱ uxrá cataj xnaꞌanj Moisés rihaan níꞌ se vaa caꞌne̱ꞌ níꞌ taꞌngaꞌ man snóꞌo cheꞌé rej caꞌve̱e cunu̱u sa̱ꞌ níꞌ rihaan Yaꞌanj ado̱nj. Tza̱j ne̱ né tucua̱nj cuchruj maꞌa̱n Moisés me yoꞌ maꞌ. ꞌO̱ se stucua̱nj xi̱i níꞌ nij síí ma̱n ga̱a naá me yoꞌ ado̱nj. Ne̱ nda̱a güii naránj rá aꞌneꞌ soj taꞌngaꞌ man snóꞌo ado̱nj. Dan me se cheꞌé se me rá soj quiꞌya̱j soj nu̱ꞌ stucua̱nj Moisés, cheꞌé dan aꞌvej rá soj cata̱ꞌ taꞌngaꞌ man snóꞌo güii naránj rá soj ado̱nj. Sese da̱nj vaa, ne̱ me cheꞌé aꞌmaan rá soj niꞌya̱j soj manj cheꞌé se cunuu sa̱ꞌ nu̱ꞌ nee̱ man ꞌo̱ snóꞌo quiꞌyáj güii naránj rá soj ga̱. Se̱ guun xca̱j soj cuentá cheꞌé se vaa ꞌyaj yuvii̱ ni̱ꞌyaj soj cheꞌé ina̱nj tucuáán noco̱ꞌ soj maꞌ. Tana̱nj xca̱j soj cuentá ni̱ꞌyaj soj nana̱ nica̱ ya̱ na̱nj á ―taj Jesús rihaan nij yuvii̱ a.
Cheꞌé dan cataj taꞌa̱j nij síí ya̱nj chumanꞌ Jerusalén a:
―Ne̱ si̱j nihánj roꞌ, né si̱j nanoꞌ nii ticavi̱ꞌ nii man me soꞌ naꞌ. Ne̱ nihánj aꞌmii ranga̱ꞌ soꞌ, ne̱ a̱ ꞌó nana̱ ne aꞌmii nij soꞌ rihaan soꞌ maan asânj. Ya̱ ya̱ Síí Caꞌnéé Yaꞌanj Ti̱nanii man Yuvii̱ rihaan Sayuun me soꞌ, rá nij síí uun chij rihaan níꞌ si̱j israelitá naꞌ. Tza̱j ne̱ neꞌen níꞌ me rej cavii síí nihánj ado̱nj. Tza̱j ne̱ taj síí neꞌen me rej cavi̱i̱ Síí Caꞌne̱j Yaꞌanj Ti̱nanii man Yuvii̱ rihaan Sayuun asa̱ꞌ caꞌnaꞌ soꞌ a̱ maꞌ ―taj nij síí ma̱n chumanꞌ Jerusalén yoꞌ a.
Cheꞌé dan sca̱ꞌ ndoꞌo caꞌmii Jesús ga̱a tucuꞌyón soꞌ man nij yuvii̱ rej ya̱nj nuvií noco̱o, ne̱ cataj soꞌ a:
―Neꞌen soj manj, ne̱ neꞌen soj me rej cavii ꞌu̱nj na̱nj ado̱nj. Tza̱j ne̱ ne caꞌna̱ꞌ ma̱ꞌanj maꞌ. ꞌO̱ se ya̱ aꞌmii síí caꞌnéé manj, tza̱j ne̱ ne neꞌen uxrá soj man soꞌ a̱ maꞌ. Neꞌén ꞌu̱nj man soꞌ, cheꞌé se cavii ꞌu̱nj rihaan soꞌ, ne̱ soꞌ me síí caꞌnéé manj ado̱nj ―taj Jesús rihaan nij yuvii̱ a.
Cheꞌé dan nanoꞌ nij soꞌ da̱j quiꞌya̱j nij soꞌ ne̱ ta̱ꞌaa nij soꞌ man Jesús, tza̱j ne̱ a̱ ꞌó nij soꞌ ne ta̱ꞌaa man soꞌ a̱ maꞌ. ꞌO̱ se ataa quisi̱j güii caꞌve̱e quiꞌya̱j nij soꞌ da̱nj man soꞌ a.
Ne̱ queꞌe̱e̱ nij yuvii̱ cuchumán rá niꞌya̱j man soꞌ, ne̱ cataj nij soꞌ a:
―Caꞌve̱e se caꞌna̱ꞌ ꞌó soꞌ cata̱j soꞌ se vaa Síí Caꞌnéé Yaꞌanj Ti̱nanii man Yuvii̱ rihaan Sayuun me soꞌ, tza̱j ne̱ daj chiha̱a̱ míj se̱ quisíj soꞌ quiꞌya̱j soꞌ doj suun sa̱ꞌ noco̱o rihaan suun sa̱ꞌ noco̱o quiꞌyaj síí nihánj a̱ maꞌ ―taj nij yuvii̱ niꞌya̱j nij soꞌ man Jesús a.
Dan me se ga̱a cuno nij síí fariseo se vaa caꞌmii yuve̱ nij yuvii̱ nana̱ dan cheꞌé Jesús, ga̱a ne̱ caꞌnéé nij xrej ata̱ suun noco̱o caꞌnéé nij síí fariseo man tanuu tumé nuvií noco̱o caꞌa̱nj nij tanuu ta̱ꞌaa nij tanuu man Jesús a. Cheꞌé dan cataj Jesús a:
―Do̱j güii ca̱yáán ꞌu̱nj ga̱ nij soj, ne̱ cavi̱i̱ ꞌu̱nj quina̱nꞌ ꞌu̱nj rihaan síí caꞌnéé manj caꞌna̱ꞌ ꞌu̱nj na̱nj ado̱nj. Nano̱ꞌ soj manj, tza̱j ne̱ se̱ nariꞌ soj manj a̱ maꞌ. Ne̱ se̱ guun nucua̱j soj cuchi̱ꞌ soj rej ca̱yáán ꞌu̱nj a̱ maꞌ ―taj Jesús a.
Cheꞌé dan nij síí uun chij rihaan nij yuvii̱ israelitá cataj rihaan tuviꞌ nij soꞌ a:
―Me rej caꞌa̱nj síí nihánj, ne̱ se̱ nariꞌ níꞌ man soꞌ ga̱. Caꞌa̱nj soꞌ rihaan tuviꞌ níꞌ síí ya̱nj chiháán nij síí aꞌmii xnaꞌánj griego naꞌ. Tu̱cuꞌyón soꞌ snana̱ soꞌ rihaan nij síí aꞌmii xnaꞌánj griego naꞌ. ꞌO̱ se cataj soꞌ nana̱ nihánj a: “Nano̱ꞌ soj manj, tza̱j ne̱ se̱ nariꞌ soj manj a̱ maꞌ. Ne̱ se̱ guun nucua̱j soj cuchi̱ꞌ soj rej ca̱yáán ꞌu̱nj a̱ maꞌ.” Me cheꞌé tuꞌva soꞌ da̱nj, rá soj ga̱ ―taj nij síí uun chij yoꞌ, xnáꞌanj nij soꞌ man tuviꞌ nij soꞌ a.
Dan me se ga̱a güii navi̱j chaꞌanj, güii noco̱o doj, ne̱ canicunꞌ Jesús, ne̱ cataj soꞌ a:
―Sese ase vaa síí nacoo̱ ndoꞌo na vaa soj, ne̱ caꞌna̱ꞌ soj rihanj, ne̱ rque̱j na achiin ya̱ man soj á. Xa̱ꞌ síí amán rá niꞌya̱j manj, tza̱j ne̱ quiri̱ꞌ soꞌ se vaa taj Danj Yaꞌanj rihaan níꞌ a. Dan me se ase vaa ꞌo̱ chráá sa̱ꞌ ndoꞌo nu̱u̱ na sa̱ꞌ ina̱nj roꞌ, da̱nj ga̱a̱ se sa̱ꞌ cu̱nuû nimán síí amán rá niꞌya̱j manj, ne̱ caꞌve̱e ga̱a̱ iꞌna̱ꞌ nimán soꞌ ado̱nj ―taj Jesús a.
Da̱nj taj Jesús, caꞌmii soꞌ cheꞌé Nimán Yaꞌanj cu̱nuû nimán nij síí cuchumán rá niꞌya̱j man soꞌ a. ꞌO̱ se ataa caꞌna̱ꞌ Nimán Yaꞌanj rihaan yuvii̱, ese ataa quisi̱j güii quina̱nꞌ Jesús rej xta̱ꞌ ne̱ niꞌndaj ya̱ sa̱ꞌ veꞌé gu̱un chij soꞌ a.
Cheꞌé dan taꞌa̱j nij yuvii̱ cuno nana̱ nihánj cataj a:
―Ya̱ ya̱ si̱j nataꞌ snana̱ Yaꞌanj síí cataꞌ tuꞌva Yaꞌanj ga̱a naá se vaa caꞌna̱ꞌ rihaan chumii̱ me síí nihánj na̱nj á ―taj taꞌa̱j nij yuvii̱ a.
ꞌÓ taꞌa̱j nij yuvii̱ cataj a:
―Si̱j Caꞌnéé Yaꞌanj Ti̱nanii man Yuvii̱ rihaan Sayuun me síí nihánj chugua̱nj ―taj ꞌó taꞌa̱j nij soꞌ a.
Tza̱j ne̱ ꞌó taꞌa̱j nij yuvii̱ cataj a:
―Xa̱ꞌ Síí Caꞌne̱j Yaꞌanj Ti̱nanii man Yuvii̱ rihaan Sayuun, tza̱j ne̱ né si̱j cavii estadó Galilea me soꞌ maꞌ. ꞌO̱ se Danj Yaꞌanj taj se vaa taꞌníí taꞌnij siꞌno̱ rey cuꞌna̱j David síí cayáán ga̱a naá me Síí Caꞌne̱j Yaꞌanj Ti̱nanii man Yuvii̱ rihaan Sayuun, ne̱ si̱j cavi̱i̱ chiháán David chumanꞌ Belén me uún soꞌ ado̱nj ―taj ꞌó taꞌa̱j nij yuvii̱ uún a.
Cheꞌé dan guun vi̱j caꞌmii nij yuvii̱, niꞌya̱j nij yuvii̱ man Jesús a. Ne̱ guun rá taꞌa̱j nij soꞌ ta̱ꞌaa nij soꞌ man Jesús, tza̱j ne̱ taj va̱j síí taꞌaa man soꞌ a̱ maꞌ.
Ga̱a ne̱ canica̱j nij tanuu caꞌanj uún nij tanuu rihaan nij xrej ata̱ suun noco̱o do̱ꞌ, rihaan nij síí fariseo do̱ꞌ, ga̱a ne̱ cataj nij xrej do̱ꞌ, nij síí fariseo do̱ꞌ, rihaan nij tanuu a:
―Me cheꞌé ne caꞌna̱ꞌ Jesús ga̱ soj, quiꞌyaj soj ga̱ ―taj nij soꞌ, xnáꞌanj nij soꞌ man nij tanuu yoꞌ a.
Ga̱a ne̱ cataj nij tanuu a:
―Cuna̱j uxrá vaa nana̱ aꞌmii soꞌ, ne̱ taj va̱j ꞌó yuvii̱ neꞌen caꞌmi̱i̱ nana̱ aꞌmii soꞌ a̱ maꞌ ―taj nij tanuu yoꞌ a.
Cheꞌé dan cataj nij síí fariseo rihaan nij tanuu a:
―Tihaꞌ yuꞌunj soꞌ man soj uún a̱ naꞌ. ꞌO̱ se a̱ ꞌó nij síí uun chij rihaan níꞌ si̱j israelitá do̱ꞌ, a̱ ꞌó nij síí fariseo do̱ꞌ, ne cuchuma̱n rá se vaa si̱j caꞌnéé Yaꞌanj me soꞌ a̱ maꞌ. Ne̱ xa̱ꞌ nij yuvii̱, tza̱j ne̱ ne neꞌen nij yuvii̱ stucua̱nj Moisés, ne̱ ina̱nj sayuun quira̱nꞌ nij yuvii̱ yoꞌ, quiꞌya̱j Yaꞌanj chugua̱nj ―taj nij síí fariseo rihaan nij tanuu yoꞌ a.
Dan me se nicu̱nꞌ síí cuꞌna̱j Nicodemo ga̱ nij soꞌ, ne̱ ꞌo̱ tuviꞌ nij soꞌ me soꞌ, ne̱ síí caꞌanj caꞌmi̱i̱ ga̱ Jesús ga̱a rque̱ doj me soꞌ, ne̱ cataj soꞌ a:
―Tza̱j ne̱ stucua̱nj Moisés taj se vaa ne nó xcúún níꞌ caꞌne̱ꞌ níꞌ cacunꞌ cheꞌé ꞌo̱ soꞌ, sese ataa cuno̱ níꞌ nana̱ aꞌmii soꞌ ne̱ sese ataa xca̱j níꞌ cuentá da̱j ꞌyaj soꞌ maꞌ ―taj Nicodemo rihaan ꞌó nij síí fariseo yoꞌ a.
Ga̱a ne̱ cataj nij soꞌ rihaan Nicodemo a:
―Me cheꞌé me rá so̱ꞌ caꞌmi̱i̱ sa̱ꞌ so̱ꞌ cheꞌé Jesús ga̱. ꞌO̱ se si̱j cavii estadó Galilea mé so̱ꞌ ga̱ soꞌ naꞌ. Tu̱cuꞌyón so̱ꞌ, ne̱ xca̱j so̱ꞌ cuentá se vaa a̱ ꞌó síí nataꞌ snana̱ Yaꞌanj ne avii estadó Galilea, ꞌyaj Yaꞌanj maꞌ ―taj nij síí fariseo rihaan Nicodemo yoꞌ a.
Dan me se cavii nij soꞌ, ne̱ quinanꞌ ꞌo̱ ꞌo̱ nij soꞌ tucuá nij soꞌ a.

Dëgjoj San Juan 7